मती ओजाःतेरा भगवानराः नपाय सरवन 12 - Korwa Bible

ईसू लोड़ोनराः दिनरीग परबू हवे

¹ दो हनानाः दिनरे ईसू अरू आँयगरिकुःआ चेलाकू दोहोड़ तला दूरतेकू सेना। अरू हना दिन लोड़ोनराः दिन दोहोना। दो चेलाकू रंगेगतेडकुःआ अरू बली सीडतेडखनकू जोम इदीया।

² मनदो हना ञेलकेडखन फरीसी होड़कू ईसू एचेरेकू कताया, “ञेलमे, आमरिकुःआ चेलाकू, अबूराः नियम इया लोड़ोनराः दिनरे मेरबू एचेता, हनाकू एचेयतना।”

³ दो ईसू फरीसी होड़कू एचेरेय कतातेरा, “अपे भगवानराः कागदरे मेरपे बछावगना जा, दाऊद राजा अरू आँयगरिकुःआ सउंगताकू रंगेगतेड मेला चिलाकू एचेतेरा?

⁴ हाँय भगवानराः मरंग टपइर ओड़ाःरेय बोलोयान अरू पुजउरीकू एकला जोम अवेयता हना सुद रुटीय जोमतेरा, अरू आँयगरिकुःआ सउंगताकू होंय एमेवातेरा।

⁵ अरू अपे भगवानराः कागदरे मेरपे बछावगना जा, भगवानराः ओड़ाःरिकुःआ पुजउरीकू लोड़ोनराः दिनकू टड़ावतेरा। मनदो हँकू बेगर गारबारतेकू दोहोना, माःआन?

⁶ अपे ईंगपे अयूम! नंडा भगवानराः ओड़ाः अते मरंग होड़ इदानिया।

⁷ ईंग बलिदान मेरिंग चहाःतना, मनदो होड़कू सोगागोड होड़ेंगकू लगायिंग चहाःतना। नाःआ कता अपे नपायतेपे सुदीय होले बेगर गारबार होड़कू अपे ओरोपे फड़ियावतेडकुःआ।

⁸ हाव, मनुवारीग बेटात लोड़ोनराः दिनरीग परबू हवे।”

तिःई कोकोड़ावतो होड़राः नपायगुः

⁹ हनते ईसू हंडा अते तोराय अरू एहूदाकूराः अरजी ओड़ाःरेय बोलोयान।

¹⁰ हंडा मी होड़ होड़ दोहोना। हाँयराः तिःई कोकोड़ावतो दोहोना। दो फरीसी होड़कू ईसू बदीगेय लगाकू ञामा अरूकू होंबोरतिरिया, “अबूराः नियम इया तोनोंगीग होड़ लोड़ोनराः दिनरे एटाः होड़े नपाय अवेयता जा?”

¹¹ दो ईसू हँकू एचेरेय कतातेड, “ओंगोलगेपे! अपे अते तोनोंगीग होड़ एचेरे मीटोंग भेड़ा इदा अरू हाँयग भेड़ा लोड़ोनराः दिनरे मीटोंग डोडहारेय कसड़ बोलो जुवाःतान दो अपे हाँयग भेड़ा हना डोडहाते अपे मेरपे उडुंगेयता जा?

¹² दो मी होड़राः जीव मीटोंग भेड़ाराः जीव अते मुनुरुक मइद इदा। हनालगा लोड़ोनराः दिनरे नपाय बुताय बुता दो, नियम इयाय एचेयता।”

¹³ हनते तिःई कोकोड़ावतो होड़ एचेरे ईसू कताया, “आम तिःई लंबावगेमे।” दो हाँयग होड़ अनँयग तिःईय लंबावतेरा अरू हाँयराः एटाः तिःई इया हना तिःई हों नपाययान।

¹⁴ मनदो फरीसी होड़कू हंडा अते तोराकू अरू ईसू ञेड एंडाय लगाकू ओंगोलतेरा।

¹⁵ दो ईसू नाःआ कताय सुदीगोतेड अरू हाँय हंडाते एटाः ततेर तोराय। अरू मुरुक बगरा होड़कू हाँय देह दूरकू ओतोंग वेगा अरू हाँय हँकुःआ जमा होड़कू अँकूराः बेमरियातेय नपायतेडकुःआ।

¹⁶ हनते हाँय हँकूय सेतावतेडखने कताया, “अपे ईंग बदीरे तोनोंगीग एचेरे अहापे कता उदुःगे।”

¹⁷ भगवानराः बड़रा कता होड़ एसयाह मड़ंगरेय कतातेरा हना पुरावगे लगा नाःआ इया होयाकिया;

¹⁸ अयुमेपे! नाँय ईंग सुनावकेरा ईंगरीग सेवकिया हवे, ईंग हाँयिंग दुलारगेयता अरू हाँय सुदा ईंग मुरुक राजू नमा इदानिंगा। हाँय एचेरे ईंगराः बिरुवा दोहोनता, अरू हाँय बेगर एहूदाकू एचेरे हों नपाय फड़ियाव बदीरेय कता उदुःगेता।

¹⁹ हाँय तोनोंयग सुदा ओरोय कड़ीगनेना अरू ओरोय खिररीनेना, अरू हाँयराः अरो दूररे तोनोंगीग ओरोकू अयूमतेरा।

²⁰ जमा होड़कू नपायते मेरेय फड़ियावकू वरी, हाँय लंजाःतो सरपी ओरोय टोटाःतेरा, सहे मुटूराः सेंगेल ओरोय इडीगतेरा,

²¹ जेमहा जमा जइत होड़कू हाँय एचेरेकू असरागोड ञवन।

ईसू अरू दरहा

²² हनते तोनोंग तोनोंग होड़कू मी होड़ होड़ ईसू एचेरेकू अगूतिरिया। हाँयग होड़ कोंदा अरू अंधाय दोहोना। ईसू हाँये नपायतेरा अरू हाँय जमाकूने ञेला अरूय अयुमेःआ।

²³ दो जमा होड़कू बयावनेनखनकू होंबोरतेड, “होनायाःकून करे, नाँय दो दाऊद राजारीग नइड़-बाँस होड़ हवे जा?”

²⁴ मनदो फरीसी होड़कू नाःआ कता अयूमतेडखनकू कतातेड, “भूतकूरीग राजा दरहाते नाँय भूतकूय एचे उडुंगतना।”

²⁵ ईसू हँकुःआ होड़कूराः ओंगोल सुदीतेडखने कताया, “मिनी देसरिकुःआ होड़कू अँननकू अँकू रेडेग होड़ेंग दो हना देस लाय जुवाःता। हनन उड़ी मिनी ओड़ाःरिकुःआ होड़कू सहे सहररिकुःआ होड़कू रेडेग होड़ेंग दो हँकू होंकू बेगराव जुवाःता।

²⁶ दो कलउ अरू आँयगरिकुःआ सइनाकू अँननकू अँकू रेडेग होड़ेंग होले, हाँयराः राइज करा उड़ी दोहोनता?

²⁷ मनदो ईंग कलउराः जंगरते भूतकूयिंग उडुंगतान दो, अपेरिकुःआ चेलाकू इयेराः जंगरते भूतकूकू उडुंगता? हनालगा अपेरिकुःआ चेलाकू अँननपेरिकुःआ फड़ियावदारकू दोहोनता।

²⁸ ईंग भगवानराः जंगरते भूतकूयिंग उडुंगतान दो, भगवानराः राइज अपे तलारे बुँहड़ीकिया।”

²⁹ ईसू अरूय कताया, “मी होड़ जंगरदार होड़ अरीन तोल रहावगेय अते मड़ंग करा उड़ी एटाः होड़ हाँयग जंगरदार होड़राः ओड़ाःरे बोलोकियानखन हाँयराः जिनिसकूने उडुंग अवेयता? हाँयग होड़ मड़ंगरे हाँयग जंगरदार होड़े तोलता दो, हाँयग होड़राः जिनिसकूने उडुंग गोः अवेयता।

³⁰ ईंग सुदा कोवाया, हाँय ईंगरीग मुदइ होड़ हवे। अरू ईंग सुदा मेरेय सकलावगेता, हाँयग होड़ सितिर-बितिरगोडता।

³¹ हनालगा ईंग अपे एचेरेयिंग कतायतना, होड़कू एचेयता हना जमा कसूरकून अरूकू कतायता हना ओपता बड़राकून, भगवान बराव एंडागोडता।

³² अरू तोनोंगीग मनुवारीग बेटात बदीरे तोनोंगाः ओपता बड़राय कता हना कसूर हों भगवान बराव एंडागोडता। मनदो भगवानराः सुद बिरुवा बदीरेकू कतायता हना ओपता बड़रा, भगवान नाःआ जूगरे सहे दरवाःआ हना जूगरे हों कहियो ओरोय बराव एंडातेरा।”

नपाय अरू बेलूर जोःओते अउल-तउल

³³ “अपे सुदीयतना, नपाय जोःओ पवाः लगा होड़कू नपाय गछिकूनकू रोपाता। आडयना हना सींग दूब नपाय जोःओ ओरो जोःनेना।

³⁴ ने महुरा बींग उड़ी होड़कू, अपे बेलूर इदानपेःआ दो, करा उड़ी अपे नपाय नपाय बड़रापे कता अवेयता? अबूराः आहते उडुंगगुःता हना बड़राराः सोर अबूराः जीव हवे।

³⁵ नपाय होड़ अनँयगराः नपाय जीवते नपाय नपाये कतायता अरूय एचेयता। अरू आड होड़ अनँयगराः आड जीवते बेलूर बेलूर बड़राय कतायता अरूय एचेयता।

³⁶ बेगर लूरराः बड़राकू कतागोडता, हँकूके फड़ियावराः दिनरे भगवान एचेरे आभा एएमे पराःता।

³⁷ अपेराः बड़रा इया भगवान अपेय फड़ियावपेता सहे अपेय डंडियावपेता।”

ईसू चिनहा उदुःगे लगाकू असेया

³⁸ हनते अदोम नियम चेडदार होड़कू अरू फरीसी होड़कू ईसू एचेरेकू कतातेड, “ने गुरुजी, आम अते मीटोंग चिनहा ञेल लगाले चहाःतना।”

³⁹ मनदो ईसू कता कुदातेरा, “भगवान मेरकू मनेवायता हँकुःआ होड़कू अरू बेलूर ओंगोलरिकुःआ होड़कू चिनहाकूनकू ञामता। मनदो भगवानराः बड़रा कतायीग होड़ एवनाराः चिनहा अते अरू एटाः तोनोंगाः चिनहा ओरोपे पवावनेना।

⁴⁰ एवना पेय दिन अरू पेय रइत मरंग हँकूराः दोंगे पेंदारेय दोहोना। हनन इया मनुवारीग बेटात पेय दिन अरू पेय रइत ओत पेंदारेय दोहोनता।

⁴¹ निनवे सहररिकुःआ होड़कू एवनाराः परसार अयूमवाडखन कसूर अते जीवकू कुदातेरा। हनालगा निनवे सहररिकुःआ होड़कू फड़ियावराः दिनरे नाःआ जूगरिकुःआ होड़कूराः बदीरे चड़ाँवाडखन हँकूकू जाःता। अरू नुँहू एवना अते हों मरंगीग ईंग नंडा इदानिंगा।

⁴² दखिन देसरीग रानी, सुलइमान राजाराः कनहून अयुमे लगा मुरुक लंकातेय वेगनेना। नुँहू सुलइमान राजा अते मरंगीग ईंग नंडा इदानिंगा। हनालगा दखिन देसरीग रानी फड़ियावराः दिनरे नाःआ जूगरिकुःआ होड़कूराः बदीरे चड़ाँवाडखन हँकूय जाःता।

⁴³ मी होड़ अते मीटोंग भूत उडुंगगुःतान दो, भूत लोड़ोन लगा टयंगाब ततेररेय दँड़ाःगोड ञवनता। मनदो हाँय तोनोंग ततेर मेरेय पवाःता।

⁴⁴ दो हाँय अनँयग आँयगतेय बड़राता, ईंग उडुंगकिया हाँयग होड़ एचेरेयिंग कुदा सेनता। हाँयग भूत कुदा सेनतान दो, हनाँयग होड़ रिंग-रोंग अरू मड़ी-मलेंग ओड़ाः इयाय पवाःता।

⁴⁵ हनते हाँय सेनेवाडखन हाँय अते, अरू बेलूर बेलूर सातगोटोंग भूतकूय अगूता अरू हाँयग होड़ एचेरेकू समसाव जुवाःता। हनते हाँयग होड़राः जीव मड़ंग अते अरू बेलूर जुवाःता। ननानाः इया नाःआ जूगरिकुःआ बेलूर होड़कूराः जीवरे होयाःता।”

ईसूराः सताय मइछुवा

⁴⁶ दो ईसू होड़कू सुदाय बुतुड़ु मेला आँयगरीग एंगात अरू बोपोहकूतेन हाँय सुदा जुमाः लगाकू वेजेडा अरू हँकू हाँय सुदा बुतुड़ु लगाकू चहाःआ।

⁴⁷ दो तोनोंगीग ईसू एचेरेय कतातेड, “आम एंगाम अरू बोपोहकूताम आम सुदा बुतुड़ु लगाकू चहाःतना।”

⁴⁸ दो ईसू हाँयग होड़ एचेरेय कता कुदातेरा, “इये ईंगरीग अया हवे? ईंगरिकुःआ बोपोहकू इये इयेकू हवे?”

⁴⁹ हनते हाँय अनँयग चेलाकू अगी तिःई उदुःतेडखने कताया, “ईंग अया अरू बोपोकूतिंग नँकुःआ होड़कू हवे।

⁵⁰ सेरमो देसरे इदानिया ईंगरीग अपांगराः ओंगोल इयाकू जियाःता हँकुःआ होड़कू ईंग अया अरू बोपोकूतिंग अरू मेमेसकूतिंग हवे।”