मती ओजाःतेरा भगवानराः नपाय सरवन 10 - Korwa Bible

ईसूरिकुःआ बारहगोटोंग मूक चेलाकू

¹ हनते ईसू आँयगरिकुःआ बारहो मूक चेलाकू अनँयग एचेरेय राःतेडकुःआ अरू हँकू भूतकू उडुंगकू लगा अरू जमा बरानाः बेमरियाकू नपायकू लगा हातपाते एमेवातेडकुःआ।

² हँकुःआ मूक चेलाकूराः ञावकून ननानाः हवे; मड़ंगीग सिमोन (हाँयराः एटाः ञाव दोहोना पतरस), अरू आँयगरीग बोहोत अंदरियास, जबदीरीग बेटात एकूब अरू आँयगरीग बोहोत एहुना,

³ पिलिपूस, बरतुलमाय, तोमा, मलगुजारी गोः होड़ मती, हलपाइरीग बेटात एकूब, तददे,

⁴ सिमोन कनानी, अरू तयोमरे ईसूय एचे साबतेरा हाँयग जूदा इसकरियोती।

⁵ नँकुःआ बारहो मूक चेलाकू ईसू नाःआ हुकुम एमेवातेडकूखने वारतेडकुःआ, “बेगर एहूदाकू एचेरे सहे समरिया छतररिकुःआ होड़कू एचेरे अलोपे सेन।

⁶ मनदो अपे इसराएल जइतरिकुःआ केड़ेत भेड़ाकू इया इदानकुःआ हँकुःआ होड़कू एचेरेपे सेन।

⁷ अपे सेनेन मेला नाःआ इया परसारकेडखनपे कताय, भगवानराः राइज अपे तलारे बुँहड़ीकिया, माःआन।

⁸ हसूत होड़कूपे नपायगोड, कुड़गा होड़कूपे नपायगोड, गोएगतो होड़कूपे जियाव रेमगोड अरू होड़कू अते भूतकू एचे उडुंगगोडकूपे। अपे बेगर दामतेपे पवावकिया हना अपे बेगर दामते होड़कूपे एमेगोडवा।

⁹ अपे सेन मेला पेटाररे सोना, चाँदी सहे तंबा अलोपे गोः।

¹⁰ तोनोंगाः बुताय बुताता हाँयग होड़के हनानाः बुताराः बनी पवाः जुकूर इदानिया। हनालगा अपे सेन दूर लगा झोला सहे बारगोटोंग अंगा सहे चाटी सहे हाप हों अलोपे गोः।

¹¹ अपे तोनोंगाः सहररेपे बोल दो, हना सहररीग नपाय होड़पे ञामवा अरू हना सहर अते अपे अरीन सेन वरी हाँय सुदापे दोहोन।

¹² अपे तोनोंगीगराः ओड़ाःरेपे सेन दो हना ओड़ाःरिकुःआ होड़कूपे सलामगोड।

¹³ हना ओड़ाःरिकुःआ होड़कू नपाय जीव होड़कू दोहोन दो, हँकुःआ होड़कू अपे अते भगवानराः सलसतकू पवाःता। मनदो हना ओड़ाःरिकुःआ होड़कू नपाय जीव होड़कू मेरकू दोहोन दो, भगवानराः सलसत अपे एचेरे कुदा जुवाःता।

¹⁴ अरू तोनोंगीग अपे मेरकू नेत-नेवारपे अरू अपेराः कता मेरकू अयूमगे दो, हँकूराः सहर सहे ओड़ाः अते अपे उडुंग मेला अपेराः काट अते धुंदराकून कोटा एंडा अटूपे।

¹⁵ अपे ईंगपे अयूम! फड़ियावराः दिनरे नाःआ सहररिकुःआ होड़कू, सोदोम अरू गोमोरा सहररिकुःआ बेलूर होड़कू अते बगरा डंडकू पवाःता।”

अनँयग मूक चेलाकू ईसू सेतावकूतना

¹⁶ सवासितीपे दोहोना। रमू बुःआकूराः तलारे भेड़ाकू इयायिंग वारपेतना। हनालगा अपे बींगकू इया कनहूनदारकूपे दोहोन अरू पेरवाँकू इया बेगर गारबारतेपे दोहोन।

¹⁷ अपे बेलूर होड़कू अते सवासितीपे दोहोन। हँकू अपे पंचाइतरेकू जिमापेता अरू अँकूराः अरजी ओड़ाःकूनरे अपे गुरुंदतेकू ञेडपेता;

¹⁸ अरू ईंग ञाव बदीरे राजाकू अरू हातपात होड़कू मड़ंगरे अपेकू ओर गोःयाता। हनमेला अपे हँकू एचेरे अरू बेगर एहूदाकू एचेरे ईंगराः हिदइतदारकूपे दोहोनता।

¹⁹ हँकुःआ होड़कू कोट कछेरीरे अपेकू इदीता हनमेला अपे चिला कता इदा हना बदीरे अपे अहापे ओंगोल दोहोगे। हनमेला अपेके हँकू सुदा बड़रा लगा कनहून भगवान एमेवापेता।

²⁰ नाःआ कता अपे उहियार दोहोका, अपे अँननपे मेरपे बुतुड़ुता। मनदो अपेरीग अपांग भगवानराः बिरुवा, अपे कता लगा इदा हना कता अपे जीवरेय उदुःवापेता।

²¹ वगत अनँयग बोहोत एचे साबकेडखन अरू अपात बेटात एचे साबकेडखन ञेड एंडाय लगाकू जिमागेयता। अरू लइंकू अँननकूरिकुःआ एंगा-अपा घंटावकेडखनकू ञेड एंडागोडकूता।

²² अरू ईंगराः ञाव अते जमा होड़कू अपेकू हिनइस-बिनइसवापेता। मनदो अरीन टुटीगगुः वरीय सनाहाव ञवन हनाँयग होड़ भगवान सडावगेयता।

²³ अपे दोहोनता हना सहररे होड़कू अपेकू संतावपे दो, हना सहर अते एटाः सहर अगीपे ञीर जुवाः। अपे ईंगपे अयूम, अपे इसराएलराः जमा सहरकूनरे अरीनपे दँड़ा पुरावगे अते मड़ंग, मनुवारीग बेटात वेग जुवाःता।

²⁴ तोनोंगीग चेला अनँयगरीग चेडदार अते मरंग मेरेय बड़ाँःता। अरू तोनोंगीग सेवकिया अनँयगरीग मालिक अते मरंग मेरेय दोहोनता।

²⁵ मनदो चेला चेडदारतेन सुदा अरू तोनोंगीग सेवकिया आँयगरीग मालिक सुदा बरोबइरगुः दो हाँय संतोकगे लगा इदा। हँकुःआ होड़कू, ओड़ाः मालिकतुकू दरहा माःआनकू कतावायता दो, ओड़ाःरिकुःआ एटाः होड़कू चिला लगा मेरकू ओपताकेःआ?

परबू सुदापे बोर

²⁶ एटाः होड़कू अते ओकोकेडखनकू पसावगोडता हन कताकून भगवान उडुंगगोडता, अरू ओकोत बड़रा भगवान जमा होड़कूय एचे सुदीगोडकूता। हनालगा अपे होड़कू सुदा अहापे बोर।

²⁷ ईंग अपे एचेरे अंदरारेयिंग उदुःवापेतना, हना बड़रा अपे मरसलरेपे कता उदुःवाकू। अरू अपे अँननपेराः लुतूररे जहड़ घड़ीनपे अयूमकेरा हना बड़रा सड़ुम चोटतेपे परसारगे।

²⁸ अपेराः देहकू ञेड एंडाता, मनदो अपेराः बिरुवा ओरोकू गोएग अवेतेरा हँकुःआ होड़कू सुदा अलोपे बोर। मनदो अपेराः बिरुवा अरू देह दगलीकून नरगरेय लाय एंडा अवेता हनाँयपे बोरोवा।

²⁹ अपे जमाकूपे सुसुदीतना, मीटोंग रिचकी ढिबुवाते बारटोंग गोरेलाकिनबू किजाता। मनदो अपांग भगवानराः बेगर ओंगोलते मीटोंगीग गोरेला हों ओरोय कसड़नेना।

³⁰ अपेराः बोःराः मेमेडटोंग ऊब हों भगवान गँड़ाव दोहोकेराय।

³¹ हनालगा अपे अलोपे बोर। अपे गोरेलाकू अते हों मरंग इदानपेःआ।

ईसू एचेरे बिसवास

³² हनते ईसू अरूय कताया, “अपे ईंगपे अयूम! तोनोंगीग होड़, होड़कू मड़ंगरे ईंगे मान मरजइत दो, ईंग हों सेरमो देसरीग अपांग भगवान मड़ंगरे हाँयग होड़िंग मान मरजइतगेयता।

³³ मनदो तोनोंगीग होड़, होड़कू मड़ंगरे ईंगे आड-बेकारवा दो, ईंग हों सेरमो देसरीग ईंग अपांग भगवानराः मड़ंगरे हाँयग होड़िंग आड-बेकारवायता।

³⁴ अपे नाःआ इयापे ओओंगोलतना जा, नाँय चउंदीसरिकुःआ होड़कू एचे राजू नमाकू लगाय वेगकिया, माःआन? ईंग होड़कू एचे राजू नमाकू लगा मेरिंग वेगगना। ईंग होड़कू एचे हिगार हटिंगकू लगायिंग वेगकिया।

³⁵ अपात बेटात अते अरू बिटीत एंगात अते अरू किमिनतो आँयगरीग हनहारतो अते एटाःगोडकू लगायिंग वेगकिया।

³⁶ अनँयगराः ओड़ाःरिकुःआ होड़कू, मी होड़रीग मुदइए दोहोनता।

³⁷ अनँयग एंगात सहे अपात, ईंग अते बगराय दुलारगेयता हाँयग होड़, ईंग जुकूर कोवाया। अरू ईंग अते बगरा, बेटात सहे बिटीते दुलारता हाँयग होड़ हों ईंग जुकूर कोनोवाया।

³⁸ अरू अनँयग कुरूस रेमकेडखन ईंग तयोम मेरेय सलाः दो, हाँय हों ईंग जुकूर कोनोवाया।

³⁹ मी होड़ अनँयग जीव बनसाव लगाय चहाः दो, हनाँयगराः जीव लाय एंडा जुवाःता। अरू ईंग लगा अनँयग जीवे लायगोडता हनाँयग होड़राः जीव भगवान बनसावगोडता।

⁴⁰ अपेकू नेत-नेवारता हँकुःआ होड़कू ईंगकू नेत-नेवारता, अरू ईंगकू नेत-नेवारता हँकुःआ होड़कू ईंगे वारकेरा हाँयग भगवानकू नेत-नेवारता।

⁴¹ भगवानराः बड़रा कता होड़े नेत-नेवारता हाँय, भगवानराः बड़रा कता होड़राः इमान भगवान अगीतेय पवाता। तोनोंगीग बेगर गारबार होड़ माःआन मनेवाडिगखने नेत-नेवारगेयता दो, हाँयग होड़ बेगर गारबारीग होड़राः इमान भगवान अगीतेय पवाःता।

⁴² अपे ईंगपे अयूम! तोनोंगीग होड़ ईंगरिकुःआ चेलाकू अते मी होड़ हुडिंगीग चेला लगा दाः ञूय लगाय एमेवाय दो, हाँयग होड़ भगवान अगीते इमाने पनावाःता।”