मती ओजाःतेरा भगवानराः नपाय सरवन 1 - Korwa Bible

ईसूरिकुःआ खुटिपरिया होड़कूराः सूची

¹ ईसू मसीराः खुटिपरिया होड़कूराः सूची कागद नाःआ इया इदा। ईसू मसी इबराहीमरीग नइड़-बाँस होड़ अरू दाऊद राजारीग नइड़-बाँस होड़ होंय दोहोना।

² इबराहीम, इसहाकरीग अपाते दोहोना, इसहाक, एकूबरीग अपाते दोहोना, एकूब, एहूदा अरू आँयग वपक बोपोहकूतेनरीग अपाते दोहोना,

³ एहूदा, पिरीस अरू जोरहरीग अपाते दोहोना, अरू हँकिनरीग एंगात तामार दोहोना, पिरीस, हेजरोनरीग अपाते दोहोना, हेजरोन, एरामरीग अपाते दोहोना,

⁴ एराम, अमीनादाबरीग अपाते दोहोना, अमीनादाब, नहसोनरीग अपाते दोहोना, नहसोन, सलमोनरीग अपाते दोहोना,

⁵ सलमोन, बोअगरीग अपाते दोहोना अरू एंगात राहाब दोहोना, बोअग, ओबेदरीग अपाते दोहोना अरू एंगात रूत दोहोना, ओबेद, एसेरीग अपाते दोहोना,

⁶ अरू एसे, दाऊद राजारीग अपाते दोहोना। दाऊद, सुलइमानरीग अपाते दोहोना, (अरू सुलइमानरीग एंगात दाऊद राजा सुदा सगइगुः अते मड़ंग हाँय उरियाहरीग एराते दोहोना),

⁷ सुलइमान, रहबामरीग अपाते दोहोना, रहबाम, अबियाहरीग अपाते दोहोना, अबियाह, असारीग अपाते दोहोना,

⁸ असा, एहोसापातरीग अपाते दोहोना, एहोसापात, एहोरामरीग अपाते दोहोना, एहोराम, उजियाहरीग अपाते दोहोना,

⁹ उजियाह, जोतमरीग अपाते दोहोना, जोतम, आहाजरीग अपाते दोहोना, आहाज, हिजिकियाहरीग अपाते दोहोना,

¹⁰ हिजिकियाह, मनसीहरीग अपाते दोहोना, मनसीह, आमोनरीग अपाते दोहोना, आमोन, जोसियाहरीग अपाते दोहोना,

¹¹ अरू जोसियाह, एकुनियाह अरू आँयगरिकुःआ बोपोहकूरीग अपाते दोहोना। हनमेला बाबील राइजरिकुःआ होड़कू इसराएल होड़कू रेनहातेडकूखन बाबील राइजरेकू गोःयाडकू।

¹² बाबील राइजरिकुःआ होड़कू इसराएल होड़कू बाबील राइजकू गोःतेडकुःआ हना तयोमरे, एकुनियाह, सालतीएलरीग अपाते दोहोना, सालतीएल, जेरूबाबिलरीग अपाते दोहोना,

¹³ जेरूबाबिल, अबीहूदरीग अपाते दोहोना, अबीहूद, इलयाकीमरीग अपाते दोहोना, इलियाकीम, अजोररीग अपाते दोहोना,

¹⁴ अजोर, सदोकरीग अपाते दोहोना, सदोक, अकीमरीग अपाते दोहोना, अकीम, एलिहूदरीग अपाते दोहोना,

¹⁵ एलिहूद, इलियाजररीग अपाते दोहोना, इलियाजर, मतानरीग अपाते दोहोना, मतान, एकूबरीग अपाते दोहोना,

¹⁶ अरू एकूब, उसूपरीग अपाते दोहोना। उसूपरीग अइमी दोहोना मरियम। अरू हाँयग मरियमके मी होड़ हेरेल होन होयानेना अरू हाँयराः ञाव दोहोना ईसू। अरू हाँय मसी, माःआनकू कतावाया।

¹⁷ इबराहीम अते दाऊद राजा वरी, ईसू मसीरिकुःआ चउदाहगोटोंग खुटिपरिया होड़कू दोहोना। अरू दाऊद राजा अते, इसराएल होड़कू बाबील देसरे रेनहातेडकूखनकू गोःकुःआ, हना वरी चउदाहगोटोंग खुटिपरिया होड़कू दोहोना। अरू इसराएल होड़कू बाबील राइजरे रेनहातेडकूखनकू गोःकुःआ अते ईसू मसी जनमावनेना हना वरी चउदाहगोटोंग खुटिपरिया होड़कू दोहोना।

ईसू मसीराः जनमाः

¹⁸ ईसू मसी नाःआ इयाय जनमावनेना। हाँयरीग एंगात मरियमराः मंगा बरा उसूप सुदा होयानेना। मनदो हँकिन मिनीरेकिन दोहोन अते मड़ंग, मरियम सुद बिरुवातेय भरी-पावनेना।

¹⁹ दो हाँयगरीग हेरेलतो उसूप नपाय होड़े दोहोना। हनालगा हाँय मरियम ओपतागेय लगा मेरेय चहाःआ अरू कलेकाल हाँय अड़ाःगेय लगाय ओंगलेःआ।

²⁰ दो उसूप नाःआ इयाय ओंगोल दोहोतेरा दो, परबू भगवानरीग बराहील सपनारे हाँय एचेरे एचे ञेलनेनखने कताया, “ने दाऊदरीग नइड़-बाँस होड़ उसूप, सुनुद बिरुवाते मरियम भरी-पावकिया। हनालगा हाँय आम अइमी बड़ाँः अते अहम बोर।

²¹ हाँय मी होड़ हेरेल होने हेवेता अरू हाँय अनँयगरिकुःआ होड़कू अँनकूराः कसूर अतेय सडावकूता। हनालगा आम हाँयराः ञाव ईसू माःआनमे साबगे।”

²² परबू भगवान आँयग बड़रा कता होड़तेय कता उदुःतेरा, हना कता इया पुराव जुवाः लगा नाःआ इया होयानेना।

²³ “मी होड़ डिंडा धंगड़ी भरी-पाव जुवाःता, अरू हाँय मी होड़ हेरेल होने हेवेगेयता। अरू हाँयराः ञाव दोहोनता, इमानुएल।” अरू हनाराः मतलोब नाःआ हवे, भगवान अबू सुदा इदानिया, माःआन।

²⁴ उसूप बेरेडनेनखन परबू भगवानरीग बराहील हाँय एचेरेय कतातेरा, हनन इयाय एचेतेरा। हनानाः वरीते उसूप मरियम आँयग एचेरेय अगूतिरिया।

²⁵ मनदो मरियम लँइग अरीने जनमावगेय वरी, उसूप हाँय सुदा मेरेय गेतेगा। दो लँइग होयानेन तयोमरे उसूप हाँयग लँइगराः ञाव ईसू माःआने साबतेरा।