लूका 9 - Korwa Bible

ईसू चेलाकूय वारतना

¹ हना तयोमरे ईसू आँयगरिकुःआ बारहो मूक चेलाकूय राःतेड अरू हँकूके भूतकू उडुंगकू लगा अरू बेमरियाकू नपायकू लगा हातपाते एमेवातेडकुःआ।

² हनते हाँय हँकू भगवानराः राइज बदीरे परसारगे लगा अरू बेमरियाकू नपायकू लगाय वारगोतेडकू।

³ हाँय हँकू एचेरेय कताया, “अपे दूर सेन मेला, बोंग अरू झोला अरू जोम लगा तोनोंगाः जिनिसकून अरू ढिबुवा अरू बबरटोंग अंगा अहापे गोः।

⁴ तोनोंगीग होड़ अपेय नेत-नेवार दो, हाँयग होड़राः सहररे जमाकू एचेरे परसारगे वरी हनाँयग होड़राः ओड़ाःरेपे दोहोन।

⁵ तोनोंग सहररिकुःआ होड़कू अपे मेरकू नेत-नेवारपे दो हँकूराः सहर अते बहरी सेन मेला हँकूराः बदीरे मीटोंग चिनहा इया अपेराः काटराः धुंदरा कोटा एंडा अटूपे।”

⁶ दो हँकुःआ मूक चेलाकू एटाः एटाः गाँव अगी तोराकू अरू नपाय सरवन उदुःवाडखन बेमारीतेकू दोहोना हँकुःआ होड़कूकू एचे नपायतेडखनकू सलाःआ।

हरदोसराः ओंगोल कुहकाः

⁷ ईसूराः बदीरे अयूमवाडखन गलील छतररीग हातपात होड़ हरदोस बयावयान। तोनोंग तोनोंग होड़कू कताया, बतिसमा एमेयीग होड़ एहुना गोएगतो अतेय जियाव रेमकिया।

⁸ अरू एटाः होड़कू कताया, इलियाह कुदा वेगकियाय, अरू एटाः होड़कू कताया, परिया जूगरीग एटाः तोनोंगीग भगवानराः बड़रा कतायीग होड़ जियाव रेमकिया, माःआन।

⁹ हनते हरदोस कताया, “एहुनाराः बोः ईंग एचे पुजातेरा। दो नुँहू इये बदीरे ईंग अयुमेतना?” अरू हरदोस ईसू ञेल लगा मुरुके कुरनिसतेरा।

पाँच हजार होड़कू जोम लगा ईसू एमेतेरा

¹⁰ ईसू वारतेडकुःआ हँकुःआ मूक चेलाकूतेन कुदा वेगयान अरू हँकू चिल चिलाकू एचेतेरा हना ईसू एचेरेकू उदुःतेरा। अरू ईसू हँकू हिगारतेडकूखन बेतसइदा सहररेय गोःयाडकू।

¹¹ होड़कू सुदीगोतेड ईसू करा अगी तोराया हना, अरू हाँय अगीकू तजाःयान। अरू ईसू सुदा बहालतेकू जुमावयान। दो हाँय हँकू एचेरे भगवानराः राइज बदीरेय कता उदुःगेःआ अरू हाँय एचेरेकू वेजेडा, हँकुःआ बेमरियाकू जमाकूय नपायतेरा।

¹² हना दिन मिंगिड़ी मेला ईसू एचेरे आँयग बारहो मूक चेलाकू वेगवाडखनकू कताया, “अबू दो रिंग-रोंग ततेररे इदानबुःआ। हनालगा नँकुःआ होड़कू नाःआ अते एटाः एटाः गाँव अरू डीह अगी वारगोडकूमे। जोमगे लगा अरू गेतेग लगाकू ञामता।”

¹³ दो ईसू हँकू एचेरेय कताया, “मँकू जोम लगा अँननपे एमेय।” हँकू कतातेड, “अले एचेरे पाँचटोंग रुटी अरू बारटोंग हकूकिन एकला इदा। नँकुःआ होड़कू जोम लगा एएमे इदा दो अले सेनेकियानखन जमाकू जोम लगा किजा अअगू पराःता।”

¹⁴ (हंडा अंदांज पाँच हजार मनारद मरदकू दोहोना।) मनदो ईसू चेलाकू एचेरेय कताया, “नँकुःआ होड़कू पचास पचास होड़कू मेमेड खुड़हारेपे एचे दुडुःकू।”

¹⁵ दो हँकुःआ होड़कूकू एचे दुड़ुःगोतेडकू।

¹⁶ हनते ईसू हना पाँचटोंग रुटी अरू बारटोंग हकूकिने साबतेड अरू सेरमो संगीलवाडखने धनियाबादतेरा अरू हाँय डुंडीग घड़ीन चेलाकू एचेरे हटिंगगे लगाय एमेगोतेड।

¹⁷ जमा होड़कू जोम बीयानकू अरू डुंडीगतो जोम जिनिसकून बारहगोटोंग दउड़ारेकू हलंग रेमतेरा।

ईसू बदीरे पतरसराः मनाः

¹⁸ मी दिन ईसू अनँयग आँयगतेय अरजीःआ। हना तयोमरे हाँय आँयग चेलाकू एचेरेय होंबरेःआ, “होड़कू ईंग बदीरे चेले माःआनकू कतायता?”

¹⁹ दो हँकू कताया, “अदोम होड़कू कतायतना, आम बतिसमा एमे होड़ एहुना हवे अरू अदोमकू कतायतना आम इलियाह हवे अरू अदोमकू कतायतना परिया जूगरीग मी होड़ भगवानराः बड़रा कतायीग होड़ जियाव रेमकिया, माःआन।”

²⁰ दो ईसू होंबोरतेड, “दो अपे चिले माःआनपे ओंगलिंगतना, ईंग इये हवे?” दो पतरस कताया, “आम भगवान वारकेडमेःआ हाँयग मसी हवे।”

ईसू अनँयगराः गुजुः बदीरेय कताया

²¹ हनते ईसू हँकू सेतावतेडखने कताया, “अपे नाःआ बड़रा तोनोंगीग एचेरे अलोपे कताय।”

²² अरू हाँय कताया, “मनुवारीग बेटाके मुरुक कटसिया ससहाव पराःता अरू एहूदा मूक होड़कू, मरंग पुजउरीकू अरू नियम चेडदार होड़कू आड-बेकारवडिगखन हाँयकू एचे ञेड एंडागींता। मनदो हाँय पेय दिनरेय जियाव रिमुःता।”

²³ हनते ईसू जमा होड़कू एचेरेय कताया, “तोनोंगीग ईंग तयोम अगी वेग लगाय ओंगले दो, हाँय अनँयगराः जीव अड़ाःवाडखन अनँयग कुरूस सगर दिन रेमकेडखन ईंग देह दूरे ओतोंग वेग।

²⁴ तोनोंगीग अनँयग जीव बनसाव लगाय चहाः दो, हाँयग होड़राः जीव लाय जुवाःता। मनदो ईंग लगा अनँयग जीवे अड़ाः एंडागोड, हाँयराः जीव बनसाव जुवाःता।

²⁵ तोनोंगीग होड़ चउंदीसराः जमा जिनिसकूने पवाव जुवाः अरू अनँयग जीवे लायगोड दो, हनारे चिला नफा होयाःता?

²⁶ तोनोंगीग होड़ ईंग बदीरे अरू ईंगराः सरवन बदीरेय गियुः दो, मनुवारीग बेटात, आँयगराः अरू आँयग अपांगराः अरू सेरमो देसरिकुःआ सुद बराहीलकूराः विड़चेड़ मरसलरेय कुदा वेग मेला हाँयग होड़ बदीरे होंय गियुःता।

²⁷ अपे ईंगपे अयूम, नंडा चड़ाँत इदानकुःआ नँकुःआ होड़कू अते अदोम होड़कू भगवानराः राइज अरीनकू ञेल हना वरी ओरोकू गोएगनेना।”

ईसूराः विड़चेड़

²⁸ आठ दिन तयोमरे ईसू, पतरस, एहुना अरू एकूब पहाड़ चोटरे अनँयग सुदा अरजीगे लगाय गोःयाडकू।

²⁹ दो ईसू अनरजीआय मेला हाँयराः सुरइत बदलावयान अरू हाँयराः सोनहे फक-फक उजड़ लवकाःआ।

³⁰ दो हनमेला असाका, हँकू बार होड़, मोसेस अरू इलियाह ईसू सुदा बुतुड़ुतोकू ञेलतेडकुःआ।

³¹ हँकिन हों मरसल उड़ीकिन विड़चेड़नेना अरू ईसू एरुसलेम सहररे करा इयाय गुजुःता हना बदीरे हँकू बुतुड़ुःआ।

³² पतरस अरू हाँयरिकिनाः सउंगताकिन दड़ुमा। हँकू चिड़गड़नेन दो, ईसू मरसल उड़ी विड़चेड़तो अरू हाँय सुदा बार होड़ चड़ाँतकू ञेलतेडकिना।

³³ हँकिन बना होड़ ईसू अते सेनराः बेला होयानेन दो पतरस ईसू एचेरेय कताया, “ने मालिक, अबू नंडा इदानबुःआ दो नपाय इदा। दो अले पेयटोंग कुंबाले तुलाता, मीटोंग आम लगा, मीटोंग मोसेस लगा अरू मीटोंग इलियाह लगा।” पतरस मेरेय सुदीया हाँय चिलाय कताःआ, हना।

³⁴ पतरस कताय मेला बदरी हँकू जमाकू दाब रेडगोतेडकू। दो बदरी दाब रेडतेडकुःआ हनमेला पतरस अरू सउंगताकूतेन मुरुककू बोरोयान।

³⁵ हना बदरी अते मीटोंग अरोकू अयूमतेरा, नाँय ईंग सुनावकिरिया ईंगरीग बेटायिंग हवे। दो अपे नाँयराः कतापे मनाः, माःआन।

³⁶ भगवानराः बड़रा अयूमतेडखन हना तयोमरे पतरस, एहुना अरू एकूब ञेलेया, ईसू मिनी होड़े दोहोना। अरू हँकुःआ होड़कू नाःआ कता मुरुक दिन वरी तोनोंगीग एचेरे मेरकू कतागाड।

ईसू भूत समसावतो होड़े नपायतेरा

³⁷ एटाः दिन ईसू पहाड़ अतेय उतराव वेगनेना दो मुरुक बगरा होड़कू हाँय सुदा जुमाः लगाकू वेजेडा।

³⁸ दो हंड़ाकू दोहोना हँकुःआ होड़कू अते मी होड़ खिररीवाडखने कताया, “ने गुरुजी, ईंगरीग मिनी होड़ बेटायिंग इदा। हनालगा हाँयमे मयावा।

³⁹ मीटोंग भूत हाँय एचेरेय समसाःता अरू हाँय मुरुके एचे खिररीयता। भूत हाँय एचेरे असवारकियानखने एचे डोलावगोयता अरू आहते पोतो उडुंगता। नान इयाय होया जुवाःता अरू भूत मेरेय अड़गेयता।

⁴⁰ ईंग आमरिकुःआ चेलाकू एचेरे नाँयग भूत एचे उडुंगगेय लगायिंग असेतेरा। मनदो हँकू मेरकू उडुंग अवेगडीग।”

⁴¹ दो ईसू कता कुदातेरा, “अपे मेरपे बिसवासगेता अरू जिधू इदानपेःआ। ईंग तुमिस वरी अपे सुदा दोहोकियानखन अपेयिंग सहावगोड ञवन?” ईसू हाँयग होड़ एचेरेय कताया, “आम बेटा नंडाम अगूगेय।”

⁴² हाँयगरीग बेटा वेग मेला भूत हाँये एचे दरकावतेरा। ईसू हाँयग भूते डंटावतेरा अरू बेटात नपायनेनखन हाँयग अपात एचेरेय जिमातिरिया।

⁴³ जमा होड़कू भगवानराः जंगर ञेलवाडखनकू बयावयान। हनमेला ईसू उलटावनेनखन आँयगरिकुःआ चेलाकू एचेरेय कताया,

ईसू अनँयग गुजुः बदीरे अरूय कतायतना

⁴⁴ “ईंग कतायता हना बड़रा नपायतेपे अयूमगे। मनुवारीग बेटात होड़कूराः तिःईरेकू एचे सबेयता।”

⁴⁵ मनदो हँकुःआ चेलाकूतेन ईसू कतातेरा हना कता मेरकू बुझाव अवेगान। हना कता हँकू लगा ओकोत दोहोना अरू ईसू एचेरे होंबरे लगाकू बोरा।

मरंग इये हवे?

⁴⁶ ईसूरिकुःआ चेलाकू अड़ा-चउकीःआ, अबू अते मरंग इये हवे, माःआन?

⁴⁷ ईसू हँकूराः ओंगोल सुदीवाडखन मी होड़ लँइग अगूतिरिगखन अनँयग एचेरेय एचे चड़ाँतिरिया।

⁴⁸ हनते ईसू हँकू एचेरेय कताया, “तोनोंगीग होड़ ईंगराः ञावते नाँयग लँइगे नेत-नेवार दो, हाँय ईंगे नेत-नेवारता। ईंगे नेत-नेवारता, हाँय ईंगे वारकेरा हाँयग भगवाने नेत-नेवारता। अपे अते इये अनँयग आँयग हुडिंगे ओंगलुःता, हनाँय जमाकू अते मरंग इदानिया।”

⁴⁹ दो एहुना कताया, “मी होड़ आम ञावते भूतकूय उडुंगा। मनदो हाँय अबूरीग होड़ ना लवे। हनालगा अले हाँय रोंकावगेय लगाले कुरनिसतेरा।”

⁵⁰ दो ईसू कतातेरा, “तोनोंगीग अपे मेरेय घंटावपेता हाँय अँननपेरीग होड़ हवे। हनालगा हाँय अहापे रोंकावगेय।”

ईसू समरिया छतररे

⁵¹ ईसू सेरमो देस अगी सेनराः बेला पुरा वेगा दो, हाँय एरुसलेम सेन लगाय ओंगोलतेरा।

⁵² हाँय मूक चेलाकूय वार मड़ंगगोतेडकू। ईसू लगा सरबहा सपड़ावगे लगा समरिया छतरराः मीटोंग गाँवरेकू सेनेडा।

⁵³ ईसू एरुसलेम अगीय सेना, हनालगा समरिया जइत होड़कू हाँय मेरकू नेत-नेवारगडीग।

⁵⁴ दो हना ञेलवाडखन ईसूरिकिनाः चेलाकिन एहुना अरू एकूब कतातेरा, “ने परबू, अले सेरमो अते सेंगेल एचे लोजोरकेडखन नँकुःआ होड़कू एचे लो एंडागोडकू लगा आम चहाःतना जा?”

⁵⁵ मनदो ईसू उलटावनेन अरू हँकिने डंटावतेडखने [कताया, “अबा करा इया जीवकिनाः होड़किन हवे? मनुवारीग बेटात होड़कू ञेड एंडाकू लगा मेरेय वेगगना, मनदो हाँय होड़कू बनसावकू लगाय वेगकिया।”

⁵⁶ हनते हँकू एटाः गाँवरे तोराकू।]

ईसू सुदा सेन दूर

⁵⁷ ईसू दूररे सेन मेला मी होड़ ईसू एचेरेय कताया, “आम सेनता, हना दूररे ईंग होयिंग सेनता अरू आमरीग चेलायिंग दोहोनता।”

⁵⁸ दो ईसू हाँय एचेरेय कताया, “हुई हुटाकू दोहोन लगा दुलू इदा अरू तितीगकू दोहोन लगा तुका इदा। मनदो मनुवारीग बेटातराः बोः अतड़े लगा हों ततेर कोवानेःआ।”

⁵⁹ ईसू एटाः होड़ एचेरेय कताया, “ईंगरीग चेला बड़ाँः लगा ईंग सुदाम वेग।” दो हाँयग होड़ कताया, “ने परबू, मड़ंग ईंग अपांगमे तील ओवायिंग।”

⁶⁰ दो ईसू हाँय एचेरेय कताया, “गोएगतो होड़कू अँननकूरिकुःआ गोएगतो होड़कूम तील ओवा। मनदो आम सेनेवाडखन भगवानराः राइज बदीरे होड़कू एचेरेम कता उदुःगे।”

⁶¹ अरू मी होड़ कताया, “ने परबू, मड़ंग ईंग ओड़ाःरिकुःआ होड़कू पइड़घाव अटूकू लगाम सेने ओवायिंग।”

⁶² दो ईसू हाँय एचेरेय कताया, “तोनोंगीग होड़ सीय लगा हड़ लकठा साबकेडखन तयोम अगीय ञेल दो, हाँयग होड़ भगवानराः राइज जुकूर कोवाया।”