लूका 7 - Korwa Bible

रूमी सइनाकूरीग हातपात होड़राः बिसवास

¹ ईसू होड़कू चेड उरियावनेनखन कपरनहूम सहररेय सोदोरयान।

² दो हंडा रूमी देसरीग मी सव सइनाकूरीग हातपात होड़ दोहोना। हाँयरीग मी होड़ बेगारी होड़ दोहोना अरू हाँय मुरुके मंजूरवाया। हाँय मुरुक बेमारीते गुजुः इयाय दोहोना।

³ हाँयग हातपात होड़ ईसूराः बदीरेय अयूमतेरा। हाँय ईसू एचेरे तोनोंग एहूदाकूरिकुःआ मूक होड़कू वारतेडकूखने कतातेरा, ने गुरुजी, वेगवाडखन ईंग सेवकिया होड़ नपायगोडेयमे, माःआन।

⁴ हँकुःआ मूक होड़कू ईसू एचेरे सेनेकियानखन मुरुक अरजी घड़ीनकू कताया, “हाँयग होड़ आम संघरावाय जुकूर इदानिया।

⁵ हाँय अबू एहूदाकूय दुलारता अरू अबू लगा मीटोंग अरजी ओड़ाःए एचे तुलाकेरा।”

⁶ दो ईसू हँकू सुदा हातपात होड़राः ओड़ाः अगीय सेनेडा। हाँय ओड़ाः अगीय सोदोरनेन दो हातपात होड़ आँयगरिकुःआ सउंगताकू ईसू एचेरे वारतेडकूखने एचे कता उदुःतेरा, “ने परबू, आम अलोम हलकइनगुः। आम ईंग ओड़ाः वेग जुकूर ईंग कोवायिंगा।

⁷ ईंगराः ओंगोलरे ईंग आम एचेरे सेन जुकूर हों कोवायिंगा। हनलगा ईंग आम एचेरे मेरिंग सेनेगान। ईंग हों होड़कूराः आड़रे इदानिंगा अरू ईंगराः कता मनाः सइना होड़कू हों इदानकुःआ।

⁸ ईंग मी होड़ एचेरेयिंग कतायता, दूमे, दो हाँय सलाव जुवाःताय। अरू मी होड़ एचेरेयिंग कतायता, दबूमे, दो हाँय ईंग एचेरेय वेग जुवाःता। अरू ईंग सेवकिया होड़ एचेरेयिंग कतायता, बुतामे, दो हाँय बुताता। हनालगा आम कतागोड दो, ईंगरीग सेवकिया होड़ नपाय जुवाःता।”

⁹ दो ईसू हना अयूमतेडखने बयावयान अरू उलटावकियानखन अनँयग देह दूरकू वेजेडा हँकुःआ होड़कू एचेरेय कताया, “अपेयिंग कतावातना, अबू इसराएल होड़कू एचेरे हों नाःआमिन बिसवास ईंग नुँहू वरी मेरिंग ञेलगरा।”

¹⁰ अरू हँकुःआ सउंगताकू मालिकतेन ओड़ाःरेकू कुदा सेनेडा दो, हाँयग सेवकिया होड़ नपायतोकू ञेलतिरिया।

रंडियाहीनरीग बेटातराः जियाव रिमुः

¹¹ तोनोंग दिन तयोमरे ईसू नयीन सहररेय सेनेडा। चेलाकूतेन अरू एटाः एटाः होड़कू हों ईसू सुदाकू दोहोना।

¹² हाँय सहरराः हता दुवार अगीय सोदोरनेन दो होड़कू मी होड़ गोएगतो होड़कू तूल अगुःआ। गोएगतो होड़ मी होड़ रंडियाहीनरीग मिनी होड़ बेटाते दोहोना। अरू हना गाँवरिकुःआ मुरुक बगरा होड़कू हाँयग रंडियाहीन सुदाकू दोहोना।

¹³ ईसू रंडियाहीन ञेलतेडखने सोगावातेडिया अरू हाँय एचेरेय कताया, “अहम इयाम।”

¹⁴ हनते ईसू गोएगतो होड़ एचेरे सेनेवाडखन टटड़ाय टोँवावतेरा। दो तूल अअगुःआकू हँकुःआ होड़कू चड़ाँयानकू। हनमेला ईसू कताया, “ने डिंघा, आम एचेरे ईंग कतायतना, रिमुःमे।”

¹⁵ हननमेला गोएगतोय दोहोना हाँयग होड़ जीयावनेनखन दुड़ुःयाने अरू हाँय बड़रागोडाय। हनते ईसू एंगात एचेरेय जिमागोतेडीग।

¹⁶ हना ञेलवाडखन जमा होड़कू बोरोयानकू। अरू हँकू भगवान जागवाडखनकू कताया, “मी होड़ मरंगीग भगवानराः बड़रा कतायीग होड़ अबू तलारेय वेगकिया अरू भगवान अनँयग होड़कूय मयावारा।”

¹⁷ ईसू एचेतेरा हना एहूदिया राइजरे अरू चइरो गतरराः राइजरे होंकू कता उदुःगोतेड।

एहुनारिकुःआ चेलाकू ईसू एचेरे

¹⁸ बतिसमा एमे होड़ एहुना जेहेलरेय दोहोन मेला आँयगरिकुःआ चेलाकू ईसू बदीरे हाँय एचेरेकू कता उदुःतेड।

¹⁹ दो एहुना अनँयगरिकुःआ चेलाकूतेन अते बार होड़ ईसू एचेरे नाःआ होंबोर लगाय वारतेडकिना, वेग लगाय दोहोना हाँय अनम हवे जा, अले एटाः होड़ लगा ततंगी इदा, माःआन।

²⁰ हँकिन ईसू एचेरे सोदोरनेनखनकिन कताया, “बतिसमा एमे होड़ एहुना अलिंग आम एचेरेय वारकेडलिंगा अरूय होंबरेःआ, वेग लगाय दोहोना हाँय अनम हवे जा? अलेके एटाः होड़ लगा ततंगी इदा जा?”

²¹ हननमेला ईसू बेमरियाकू अरू पीरारेकू दोहोना हँकुःआ होड़कू होंय नपायतेरा। अरू होड़कू अते भूतकूय एचे उडुंगगोतेड अरू मुरुक बगरा अंधा होड़कूराः मेडे नपायतेरा।

²² हनते ईसू एहुनारिकिनाः चेलाकिन एचेरेय कताया, “अबा अयूमकेरा अरूबा ञेलकेरा हना एहुना एचेरेबा कता उदुःगे, अंधाकू ञेलतना, टुठा होड़कू सेनतना, कुड़गा होड़कू नपाययना, भइरा होड़कू अयुमेतना, गोएगतो होड़कू जियाव रेमतना अरू गरीब होड़कू एचेरे नपाय सरवनकू परसारगेतना।

²³ दो ईंग बदीरे बिसवासरे बड़ियाड़कू दोहोनता हँकुःआ होड़कूराः जीव-जहन भगवान भलावाता।”

²⁴ एहुना वारतेडकिना हँकिनाः होड़किन कुदा सेनेड तयोमरे, ईसू एहुनाराः बदीरे हंडाकू दोहोना हँकुःआ होड़कू एचेरेय कताया, “अपे चिला ञेल लगा टयंगाब ततेररेपे सेनेडा? होयते डोलाःता हना सरपी इया होड़ ञेल लगा अपे सेनेडा जा?

²⁵ अपे नपाय सोनहेय तुसिंगतेरा हाँयग होड़ ञेल लगापे सेनेडा जा? बुरी। नपाय नपायकू तुसिंगता अरू मुरुक बहालरेकू दोहोनता हँकुःआ होड़कू दो राजा ओड़ाःरेकू दोहोनता।

²⁶ दो अपे चिला ञेल लगापे सेनेडा? अपे भगवानराः बड़रा कतायीग होड़ ञेल लगापे सेनेडा जा? हाव। ईंग अपे एचेरेयिंग कतायतना, एहुना जमा भगवानराः बड़रा कता होड़कू अते हों मरंगीग हवे।

²⁷ नाँयग होड़ बदीरे भगवानराः कागदरे नाःआ इया ओजाःतो इदा, अयुमेमे, आम मड़ंगरे सेनेकियानखन आमराः दूरे सोएगगोड लगा ईंग इनिंगरीग बराहील आम अते मड़ंगिंग वारेयता।

²⁸ एहुना अते तोनोंगीग मरंग होड़ नुँहू वरी चउंदीसरे मेरेय जनमावगना। मनदो भगवानराः राइजरे इदानकुःआ हँकू अते हुनुडिंगीग होड़ हों एहुना अते मरंग इदानिया।”

²⁹ मुरुक बगरा होड़कू नाःआ कताकू अयूमतेरा अरू एहुना एचेरे बतिसमाकू गोःतेडा हँकुःआ मलगुजारी गोः होड़कू हों भगवान सताये एचेकेरा माःआनकू कबुलावनेना।

³⁰ मनदो फरीसी होड़कू अरू नियम चेडदार होड़कू एहुनाराः बतिसमा मेरकू गोःगाड अते, भगवानराः हिछाकू टड़ावगोतेड।

³¹ दो ईसू अरूय कतातेड, “नाःआ जूगरिकुःआ होड़कू इये सुदा ईंग अउल-तउलकू?

³² नँकुःआ होड़कू, बजाररेकू दुड़ुःता हँकुःआ लइंकू इया इदानकुःआ अरूकू कता होड़ेंगता, अले अपे लगा सोहनाईले बजाःआ, मनदो अपे मेरपे सूनगान। अले अपे लगा फिकीर सेरेंगले सेरेंगा, मनदो अपे मेरपे इयामगान, माःआन।

³³ बतिसमा एमे होड़ एहुना एटाः होड़कू जोमता हना इया मेरेय जोमगाड अरू हाँय रंजावतो अंगूर रस हों मेरेय ञूगाड। अरू अपे कतायतना, हाँय एचेरे भूत इदा, माःआन।

³⁴ मनुवारीग बेटात जमाकूने जोम ञूःआ अरू अपे कतायता, माँय हरहा होड़ अरू मतवाड़ होड़ हवे। अरू माँय कसूर होड़कू अरू मलगुजारी गोः होड़कूरीग सउंगता हवे, माःआन।

³⁵ मनदो भगवानराः कनहून इयाकू सलाःता हँकुःआ होड़कू नपाय दूररेकू सेनता।”

फरीसी ओड़ाःरे कसूर अइमी

³⁶ सिमोन ञावीग फरीसी होड़ दोहोना। हाँय आँयग ओड़ाःरे जोम लगा ईसूय राःतेरा अरू ईसू फरीसी होड़ ओड़ाःरे तुयेकटावाडखन कड़वठिया दुडुःकियानखने जोजोमा।

³⁷ दो ईसू सिमोन ओड़ाःरे एटाः होड़कू सुदा गुतियाय वेगकिया, हना अयूमकेडखन मी होड़ कसूर अइमी हंडाय वेजेडा। हाँय मीटोंग मुरुक किमइताः दिरिराः बोतोलरे नपाय महका हना सुनुमे अगूतेरा।

³⁸ हाँय ईसूराः काट तयोम अगी चड़ाँनेनखने इयामा अरू हाँयराः कटतरे मेड दाः लुजुरुःआ अरू अनँयग ऊबतेय जोडतिरिया। हाँय ईसूराः काटे अंजोडा अरू हना सुनुम हाँय काटरेय तिलाःतेरा।

³⁹ ईसूय राःतेरा हाँयग फरीसी होड़ हना ञेलतेडखन अनँयग जीवरेय ओंगोलतेरा, नाँय दो कसूर अइमी हवे। ईसू सतायरे भगवानराः बड़रा कतायीग होड़ दोहोकुः दो सुदीगोडकेःआय करा इयायीग अइमी ईंग काटे टोँवावतना, माःआन।

⁴⁰ दो ईसू हाँय एचेरेय कताया, “ने सिमोन, आम सुदा मीटोंग बड़रा ककता इदा।” दो सिमोन कताया, “अयुमेतनायिंग, कता उदुःगेयमे।”

⁴¹ ईसू कताया, “तोनोंगीग सेटरिकिनाः बार होड़ रिनहादारकिन दोहोना। मी होड़ पाँच सव दिनारे गोःतेरा अरू मी होड़ पचास दिनारे गोःतेरा।

⁴² तयोमरे हँकिन एचेरे तोनोंगाः मेर दोहोगान अरू एमे कुदागेराः बेला सोदोरनेना। हनमेला सेट कतातेड, नाःआ रीन ईंग अड़ाःगोडतिंग। अबा अलोबा एमेय, माःआन। दो हँकिन अते इये सेट बगराकिन दुलारगेयता?”

⁴³ दो सिमोन कतातेड, “ईंग ओंगोलरे, बगराय गोःतेरा हनाँयग होड़, बगरा सेटे दुलारता।” दो ईसू कताया, “आम सतायमे कतायतना।”

⁴⁴ हनते ईसू हाँयग अइमी अगी उलटावकियानखन सिमोन एचेरेय कताया, “आम ञेलतेराम नाँयग अइमी चिलाय एचेतेरा? ईंग आम ओड़ाःरेयिंग वेगकिया, दो आम ईंग काट बुहाल लगा दाः मेरेम एमेगाड। मनदो नाँयग अइमी आँयगराः मेड दाः ईंग काटरे लुजुरुःआ अरू ऊबतेय जोडकेरा।

⁴⁵ आम ईंग मेरेम अंजोडगडिंग, मनदो नाँयग अइमी ईंग नंडायिंग वेगकिया हना वरीते ईंगराः काटे अंजोडतना।

⁴⁶ आम ईंग बोःरे सुनुम मेरेम तिलाःगडा। मनदो नाँयग अइमी ईंग काटरे नपाय महकतना हना सुनुमे तिलाःकेरा।

⁴⁷ ईंग बड़राम अयूम, नाँयग अइमी मुरुके कसूरतेरा। मनदो नाँयराः जमा कसूरिंग बराव एंडागोतेडा। हनालगा नाँय ईंग मुरुके दुलारगिंगतना। मनदो हुडिंग कसूर बराव एंडात होड़ हुनुडिंगे दुलारगींगता।”

⁴⁸ हनते ईसू हाँयग अइमी एचेरेय कताया, “आमराः कसूरिंग बराव एंडाकेरा।”

⁴⁹ ईसू सुदा जोम लगाकू दुड़ुःनेना हँकू ओंगलेःआ, कसूर होंय बराव एंडागोडता नाँयग होड़ इये हवे, माःआन।

⁵⁰ हनते ईसू हाँयग अइमी एचेरेय कताया, “आमराः बिसवासते भगवान आमे सडावकेडमेःआ। सलसततेम सलाव जुवाः।”