लूका 5 - Korwa Bible

ईसूरिकुःआ चेलाकू

¹ मी दिन ईसू गेनेसेरेत ञावराः हुडिंग समुंदर धरीरे चड़ाँनेनखने चेचेडा। भगवानराः सरवन अयूम लगा मुरुक बगरा होड़कू मिनीरे जुमावनेनखन ईसू एचेरेकू रेहेड तेपेडा।

² ईसू समुंदररे बारटोंग डोंगाय ञेलतेरा। तोनोंग तोनोंग केंवटा होड़कू हना डोंगा हंडा अटूवाडखन फेका जालकूनकू बुहाला।

³ दो ईसू सिमोनराः डोंगारेय देगनेना अरू सिमोन एचेरेय कताया, “नाःआ डोंगा दाः गतर गुनहोन तोरेगोडमे।” हनते ईसू डोंगारे दुड़ुःनेनखन हंडाकू जुमावनेना हँकुःआ होड़कूय चेचेडा।

⁴ हाँय बड़रा टुटीगतेडखन सिमोन एचेरेय कतातेरा, “नाःआ डोंगा गहीर दाः अगीम गोः अदेरगे। हनते हकूकू दाः लगा जाल तेकेगेमे।”

⁵ दो सिमोन ईसू एचेरेय कताया, “ने साहेब, अले अंगुः वरी जालले रेडतेरा। मनदो अले मीटोंगीग मेरले दाःगरा। नुँहू आम कताकेरा, हनालगा जालिंग तेकेगोडता।”

⁶ हँकू हना इयाकू एचेतेड दो, मुरुक हकूकू दाःनेना अरू जाल हिराः हिराःआ।

⁷ एटाः डोंगारेकू दोहोना हँकुःआ सउंगताकूतेन तिःईते गवीगतेडकूखनने कताया, “अलेपे संघरावा।” हनते हँकू वेगवाडखन बार डोंगा हकूकूकू सोलोंग पेरेगगोतेड, जेमहा डोंगा बुडाःआ।

⁸ नाःआ ञेलतेडखन सिमोन पतरस ईसू मड़ंगरे उकुड़ोमवाडखने कतातेड, “ने परबू। ईंग कसूर होड़ हवे। ईंग अते सलाव जुवाःमे।”

⁹ सिमोन अरू हाँयरिकुःआ सउंगताकू नाःआमिन हकूकू ञेलतेडकूखनकू बयावयान।

¹⁰ नँकूरिकुःआ सउंगताकूरे जबदीरिकिनाः बेटाकिन एकूब अरू एहुना हों दोहोना। अरू हँकिन होंकिन ञेल बयावयान। दो ईसू सिमोन एचेरेय कताया, “अहम बोर! तिसिंग वरीते आम हकूकू ओरोम साबतेडकुःआ मनदो तिसिंग वरीते आम ईंग अगी होड़कू राः अगूदारिंग बड़ाँवमेता।”

¹¹ हनते हँकुःआ होड़कू डोंगा, दाः धरीरेकू ओर उडुंगतेरा अरू हँकू जमा बरानाः अड़ाःतेडखन ईसूरिकुःआ चेलाकू बड़ाँवयान।

कुड़गा होड़राः नपायगुः

¹² तोनोंग दिनरे ईसू मीटोंग सहररेय सेनेडा अरू हंडा मी होड़ कुड़गा होड़ दोहोना। अरू हाँय ईसूय ञेलतेरा दो, तबेरवाडखन ईसू एचेरेय गोड़न-पइयना, “ने परबू, आम चाहाःतान दो ईंग नपाय अविंगताम।”

¹³ दो ईसू तिःई लंबावतेडखन हाँये टोँवावतेरा अरूय कताया, “ईंग चहाःतना। आम नपाय जुवाःमे।” अरू हननमेला हाँय कुड़गा बेमारीतेय नपाययान।

¹⁴ हनते ईसू हाँये हुकुमवातेरा, “नाःआ कता तोनोंगीग एचेरे अलोम कताय। मनदो आम भगवानरीग पुजउरी एचेरे सेनेकियानखन एचे जासगुःमे। अरू मोसेस हुकुमकेरा, हना नियम इया आम सुदगुः लगा बलिदानमे देगगे, जेमहा जमा होड़कू सुदीगोड, आम नपाययना, माःआन।”

¹⁵ ईसूराः बदीरे मुरुक तान तानरिकुःआ होड़कू सुदीगोतेड अरू मुरुक बगरा होड़कू ईसूराः बड़रा अयूमगे लगा अरू अँननकूराः बेमारी अते नपायगुः लगा हाँय एचेरेकू जुमाःआ।

¹⁶ मनदो ईसू, हँकू अते एटाःनेनखन रिंग-रोंग ततेररे सेनेवाडखने अरजीःआ।

लकवा होड़राः नपायगुः

¹⁷ मी दिन ईसू मीटोंग ओड़ाः पेंदारेय चेचेडा। दो एरुसलेम सहर अते, गलील छतर अरू एहूदिया राइजराः जमा गाँव अते फरीसी होड़कू अरू नियम चेडदार होड़कू हों हना ओड़ाःरेकू दुड़ुःकुःआ। हनमेला होड़कू नपायकू लगा भगवानराः जंगर ईसू एचेरे दोहोना।

¹⁸ अरू तोनोंग तोनोंग होड़कू ईसू एचेरे मी होड़ लकवा ञेडतिरिया हाँयग होड़ खटीतेकू तूल अगूतिरिया। मुरुक बगरा होड़कू ओड़ाः पेंदारेकू पेरेगकुःआ। हनालगा हँकू हाँय ईसू एचेरे मेरकू गोः अवेगडीग।

¹⁹ हना अते हँकू सड़ुम चोटरेकू गोः देगतिरिया। अरू हँकू खपरा उजड़तेडखन हाँय पटिया सुदा ईसू मड़ंगरेकू जुवांग उतरावतिरिया।

²⁰ ईसू हँकुःआ होड़कूराः बिसवास सुदीतेडखन लकवा ञेडतिरिया हाँयग होड़ एचेरेय कताया, “ने सउंगता, आमराः कसूर बराव एंडायना।”

²¹ फरीसी होड़कू अरू नियम चेडदार होड़कू अँननकू जीवरेकू ओंगोलतेरा, भगवान बदीकेडखने कतायतना नाँयग होड़ इये हवे? भगवान अड़ाःकेडखन इये कसूरे बराव एंडा अवेयता, माःआन।

²² ईसू सुदीगोतेड नँकू नाःआ इयाकू ओंगलेतना अरू हँकू एचेरेय कताया, “अपे चिला लगा नाःआ उड़ीपे ओंगलेतना?

²³ उदुःगेपे, ईंग आमराः कसूरिंग बराव एंडाकेरा माःआन कता लगा, जा रेमवाडखन सेनमे माःआन कता लगा रिता इदा?

²⁴ अपे नाःआ कता सुदीयपे, मनुवारीग बेटातके चउंदीसरे मनुवाकूराः कसूर बराव एंडागे लगा हातपात इदा।” हनते हाँय लकवा ञेडतिरिया हाँयग होड़ एचेरेय कताया, “ईंगमे अयूम। रिमुःमे अरू आमराः पटिया रेमकेडखन ओड़ाःमे सलाव जुवाः।”

²⁵ हँकुःआ होड़कू ञेनेञेला हननमेला हाँय रेमनेना। हनते हाँय गेतेगनेना हना रेमतेडखन भगवान जाग घड़ीन अनँयग ओड़ाः तोराय।

²⁶ जमा होड़कू बयावयान अरू भगवान जागतेडखनकू कतातेरा, अबू बिसवासगे लगा मसकिल इदा हना इयाःआ कताकून तिसिंगबू ञेलकेरा, माःआन।

लेवी ईसूरीग चेलाय बड़ाँवनेना

²⁷ तोनोंग दिन तयोमरे ईसू समुंदर अगीय सेनेडा अरू लेवी ञावीग मलगुजारी गोः होड़े ञेलतेरा। हाँय मलगुजारी गोः लगा दोफा दूर कुटीरेय दुड़ुःआ। ईसू हाँय एचेरेय कतातेड, “ओतोंग वेगमे।”

²⁸ दो लेवी जमा बरानाःए अड़ाःतेड, हंडातेय रेमनेन अरू ईसूरीग चेला बड़ाँवनेनखन हाँय देह दूर तोराय।

²⁹ अरू लेवी अनँयग ओड़ाःरे मुरुक होड़कू जोम लगाय सरबहातेरा। अरू हँकिन सुदा मुरुक बगरा मलगुजारी गोः होड़कू अरू एटाः एटाः होड़कू हों हंडा जोजोम लगाकू दुड़ुःनेना।

³⁰ हना अयूमतेडखन फरीसी होड़कू अरू नियम चेडदार होड़कू ईसूरिकुःआ चेलाकू एचेरे कुरबुराः घड़ीनकू कताया, “अपे चिला लगा मलगुजारी गोः होड़कू अरू एटाः कसूर होड़कू सुदापे जोम ञूयता?”

³¹ नाःआ अयूमतेडखन ईसू कतातेड, सुलटीगरे इदानिया हाँयग होड़ लगा कोवान, मनदो बेमारीरेय दोहोनता हाँयग होड़ लगा जिड़ीदारराः जरूरी दोहोनता।

³² ईंग बेगर गारबार होड़कू राः लगा मेरिंग वेगगना। मनदो कसूर होड़कू अँकूराः कसूर अते जीव एचे कुदाकू लगायिंग वेगकिया।

उपास बदीरे सवालराः जबाब

³³ दो तोनोंग तोनोंग होड़कू ईसू एचेरेकू कताया, “एहुनारिकुःआ चेलाकू उपास दोहो घड़ीनकू अरजीतना अरू फरीसी होड़कूरिकुःआ चेलाकू हों हनन उड़ीकू एचेयतना, मनदो आमरिकुःआ चेलाकू जोम-ञूयता।”

³⁴ दो ईसू हँकू एचेरे मीटोंग कहड़ीय कतातेरा, “बरवा सुदाकू दोहोनता हँकुःआ बरतिया होड़कू चिला लगा उपासकू दोहोन?

³⁵ मनदो बरबाबू सउंगताकू अतेकू एटाःगोडेयता, हना दिन वेगता। दो हननमेला हँकू उपासकू दोहोनता।”

ईसू नँवा दूरे उदुःगेतना

³⁶ ईसू, अरू मीटोंग कहड़ी हँकू एचेरेय कता उदुःतेरा, “तोनोंगीग होड़ जुना सोनहेरे नँवा सोनहेराः चिरकूट ओरोय सोःतेरा। नान उड़ीय एचेय दो, नँवा सोनहे हिराः जुवाःता अरू जुना सोनहेरे ओरो मेसानेना।

³⁷ तोनोंगीग होड़ नँवा अंगूरराः रस जुना हेड़ेराः बगलीरे ओरोय सोलोंगतेरा। नान उड़ीय एचेय दो नँवा अंगूरराः रस रंजाव जुवाःता अरू बगली सिराव जुवाःता अरू हना रस तू जुवाःता।

³⁸ हनालगा नँवा रस नँवा बगलीरे सोसोलोंग इदा।

³⁹ जुना रसकू ञूयतेरा हँकू नँवा रस अते जुना लगाकू अंदूनता। हँकू कतायता, जुना दो नँवाते अनउर नपाय इदा।”