लूका 3 - Korwa Bible

एहुना ईसूराः दूरे संजोड़तेरा

¹ तिबिरियास कइसर रूमी देसरीग मरंग राजा पंदरह बरिस वरीतेय दोहोना। हननमेला पुंतियूस पिलातूस, एहूदिया राइजरीग मरंग हातपात होड़े दोहोना अरू हरदोस, गलील छतररीग हातपात होड़े दोहोना अरू हाँय वगात पिलिपूस, इतुरिया छतर अरू तरकोनीतीस छतररीग हातपात होड़े दोहोना अरू लिसानियास, अबिलेना राइजरीग हातपात होड़े दोहोना।

² एहूदाकूरिकिनाः मूक पुजउरीकिन अना अरू कइपा दोहोन मेला, टयंगाब ततेररेय दोहोना हाँयग जकरियारीग बेटात एहुना एचेरे भगवान अनँयगराः सरवने कता उदुःतेरा।

³ दो एहुना एरदन नई गतरराः छतररे सेनेवाडखने परसारतेरा, भगवान अपेराः कसूरे बराव एंडागे लगा कसूर अते जीव कुदाकेडखन बतिसमापे गोः, माःआन।

⁴ भगवानराः बड़रा कतायीग होड़ एसयाहराः कागदरे नाःआ इया ओजाःतो इदा, टयंगाब ततेररे खिररीवाडखने कतायता हाँयग होड़राः अरो, परबू वेग लगा दूरपे संजोड़का, अरू हाँय लगा दूरपे सोएगगोड।

⁵ जमा डोडहा पटावगोडपे अरू जमा पहाड़ समगोडपे। जमा टेडहो दूर सोएगगोडपे अरू जमा डोडहा डिपा समगोडपे।

⁶ अरू जमा होड़कू ञेलतकू भगवान होड़कू करा इयाय सडावकूता, हना।

⁷ दो एहुना एचेरे बतिसमा गोः लगाकू वेगा हँकुःआ होड़कू एचेरे हाँय कताया, “ने महुरा बींग इया होड़कू, दरवाःआ हना डंडियाव पवाः अते बनसाः लगा इये सेतावतेडपेःआ?

⁸ सींग दूब नपाय जोःओ जोःता, हना इया कसूर अते जीव कुदाकेडखन अपे नपाय जीवपे जियाः। अपे अहापे कताय, इबराहीम अलेरीग खुटिपहार होड़ हवे अरू हनाते अले बनसाव जुवाःता, माःआन। अपे ईंगपे अयूम, नाःआ दिरिकूनते हों इबराहीम लगा लइंकू भगवान जनमाव अवेकूताय।

⁹ नुँहू सींग दूब घींग लगा वके सपड़ावतो इदा। नपाय जोःओ मेर जोःता हना जमा सींग दूबकून, घींगकेडखन सेंगेलरेकू बाल लोगोडता।”

¹⁰ हनमेला अदोम होड़कू होंबोरतेड, “दो अले चिलाले एचे?”

¹¹ दो हाँय हँकू एचेरेय कताया, “तोनोंगीग होड़ एचेरे बारटोंग अंगा इदान दो, अंगा कोवानेःआ, हाँय लगा मीटोंग अंगाय हटिंगगोड। अरू तोनोंगीग एचेरे जोम जिनिस इदान दो जोम लगा कोवानेःआ, हाँयग होड़ लगाय हटिंगगोड।”

¹² मलगुजारी गोः होड़कू हों बतिसमा गोः लगाकू वेगनेना अरू हँकू होंबोरतेरा, “ने गुरुजी, अले चिला एचे इदा?”

¹³ दो एहुना हँकू एचेरेय कताया, “जे मिन ढिबुवा गोः इदा हनाते बगरा अलोपे गोः।”

¹⁴ सइनाकू हों हाँय एचेरेकू होंबोरतेरा, “गुरुजी, अलेके चिला एचे इदा?” दो हाँय हँकू एचेरेय कताया, “होड़कू अते ढिबुवा रेनहाकेडखन अलोपे गोः अरू लबराकेडखन तोनोंगीग होड़ अलोपे बदीगेय। सरकार एमेयता हिनिनमिनाः तंकातेपे संतोकगे।”

¹⁵ एहूदाकू, सडावदार लगा मुरुककू ततंगीःआ। हनालगा हँकू ओंगोलतेड, नाँयग एहुना हनाँयग सडावदार मसी हवे जा कोवान, माःआन।

¹⁶ दो एहुना हँकू एचेरेय कताया, “ईंग दाःते बतिसमायिंग एमेतना। मनदो ईंग अते मरंग मी होड़ वेगता। हाँयराः चाटीराः डोरा लड़ाः जुकूर हों ईंग कोवायिंगा। हाँय अपे सुद बिरुवाते अरू सेंगेलते बतिसमाय एमेवापेता।

¹⁷ गोहोम खनहियाड़ अते ते अमिंगगे लगा अरू अकिडकेडखन अनँयग पलारे दोहोय लगा हाँयराः हटाः अनँयग तिःईरे इदा। मनदो कहियो मेर इड़ीगगुःता हना सेंगेलरे कुटाय बाल लोगोडता।”

¹⁸ नाःआ अरू एटाः एटाः नपाय बड़रा कतातेडखन एहुना, होड़कू एचेरे नपाय सरवने कता उदुःआ।

ईसूराः बतिसमा

¹⁹ (तयोमरे गलील छतररीग हातपात होड़ हरदोस, आँयगरीग हिलीत हेरोदियासे सगइतेरा। दो हाँयराः नाःआ गारबार अरू एटाः एटाः गारबार लगा एहुना हाँये डंटावा।

²⁰ दो हरदोस एहुना जेहेलरेय एचे सींगगोतेडीग अते, मड़ंग अते हों बगराय गारबारतेरा।)

²¹ जेहेलरे सींगतोय दोहोन अते मड़ंग एहुना एटाः एटाः होड़कू बतिसमाय एमेवाःआ दो ईसू हों बतिसमा गोःतेडखने अरजीःआ अरू सेरमो देस गीगयान।

²² हनमेला भगवानराः सुद बिरुवा पेरवाँ तितीग इया हाँय चोटरे उतराव वेगनेना। अरू सेरमो होरते बड़रा अयूमनेना, आम ईंगरीग दुलार बेटा हवे अरू ईंग आम सुदा राजू इदानिंगा, माःआन।

ईसूरिकुःआ खुटिपरिया होड़कू

²³ ईसू भगवानराः सरवन उदुःगे लगाय बुँहड़ीतेरा हनमेला हाँयराः उमइर अंदांज तीस बरिस दोहोना। जमा होड़कू ओओंगोला ईसू उसूपरीग बेटात हवे, माःआन। उसूप एलीरीग बेटात दोहोना।

²⁴ एली मतातरीग बेटात दोहोना अरू, मतात लेवीरीग बेटात दोहोना अरू, लेवी मलकीरीग बेटात दोहोना अरू, मलकी एनारीग बेटात दोहोना अरू, एना उसूपरीग बेटात दोहोना।

²⁵ उसूप मतितीरीग बेटात दोहोना अरू, मतिती आमोसरीग बेटात दोहोना अरू, आमोस नाहुमरीग बेटात दोहोना अरू, नाहुम असलियारीग बेटात दोहोना अरू, असलिया नोगारीग बेटात दोहोना अरू,

²⁶ नोगा मातरीग बेटात दोहोना अरू, मात मतितियाहरीग बेटात दोहोना अरू, मतितियाह सिमीरीग बेटात दोहोना अरू, सिमी ओसेकरीग बेटात दोहोना अरू, ओसेक एहोदारीग बेटात दोहोना अरू,

²⁷ एहोदा ओनानरीग बेटात दोहोना अरू, ओनान रेसारीग बेटात दोहोना अरू, रेसा जरुबाबीलरीग बेटात दोहोना अरू, जरुबाबील सलतिएलरीग बेटात दोहोना अरू,

²⁸ सलतिएल नेरीरीग बेटात दोहोना अरू, नेरी मलकीरीग बेटात दोहोना अरू, मलकी अदीरीग बेटात दोहोना अरू, अदी कोसमरीग बेटात दोहोना अरू, कोसम इलमोदामरीग बेटात दोहोना अरू, इलमोदाम एररीग बेटात दोहोना अरू,

²⁹ एर एहोसुवारीग बेटात दोहोना अरू, एहोसुवा एलाजररीग बेटात दोहोना अरू, एलाजर ओरीमरीग बेटात दोहोना अरू, ओरीम मतातरीग बेटात दोहोना अरू, मतात लेवीरीग बेटात दोहोना अरू,

³⁰ लेवी सामोनरीग बेटात दोहोना अरू, सामोन एहूदारीग बेटात दोहोना अरू, एहूदा उसूपरीग बेटात दोहोना अरू, उसूप ओनानरीग बेटात दोहोना अरू, ओनान इलयाकीमरीग बेटात दोहोना अरू,

³¹ इलियाकीम मेलियारीग बेटात दोहोना अरू, मेलिया मिनारीग बेटात दोहोना अरू, मिना मतातरीग बेटात दोहोना अरू, मतात नातानरीग बेटात दोहोना अरू, नातान दाऊदरीग बेटात दोहोना,

³² दाऊद ईसेरीग बेटात दोहोना अरू, ईसे ओबेदरीग बेटात दोहोना अरू, ओबेद बोअजरीग बेटात दोहोना अरू, बोअज सलमोनरीग बेटात दोहोना अरू, सलमोन नहसोनरीग बेटात दोहोना, अरू,

³³ नहसोन अमीनादाबरीग बेटात दोहोना अरू, अमीनादाब अरनीरीग बेटात दोहोना अरू, अरनी हिसरोनरीग बेटात दोहोना अरू, हिसरोन फिरिसरीग बेटात दोहोना अरू, पिरीस एहूदारीग बेटात दोहोना अरू,

³⁴ एहूदा एकूबरीग बेटात दोहोना अरू, एकूब इसहाकरीग बेटात दोहोना अरू, इसहाक इबराहीमरीग बेटात दोहोना अरू, इबराहीम तिरहरीग बेटात दोहोना अरू, तिरह नाहोररीग बेटात दोहोना अरू,

³⁵ नाहोर सरूगरीग बेटात दोहोना अरू, सरूग रऊरीग बेटात दोहोना अरू, रऊ फिलगारीग बेटात दोहोना अरू, फिलगा एबीररीग बेटात दोहोना अरू, एबीर सिलहरीग बेटात दोहोना अरू,

³⁶ सिलह केनानरीग बेटात दोहोना अरू, केनान अरपकसदरीग बेटात दोहोना अरू, अरपकसद सेमरीग बेटात दोहोना अरू, सेम नूहरीग बेटात दोहोना अरू, नूह लिमिकरीग बेटात दोहोना अरू,

³⁷ लिमिक मथुसिलहरीग बेटात दोहोना अरू, मथुसिलह हनोकरीग बेटात दोहोना अरू, हनोक इरीदरीग बेटात दोहोना अरू, इरीद महालेलरीग बेटात दोहोना अरू, महालेल केनानरीग बेटात दोहोना अरू,

³⁸ केनान एनोसरीग बेटात दोहोना अरू, एनोस सेतरीग बेटात दोहोना अरू, सेत आदमरीग बेटात दोहोना अरू, आदम भाबी भगवानरीग बेटात दोहोना।