लूका 17 - Korwa Bible

कसूर, बिसवास अरू नपाय बुता बदीरे चेड

¹ ईसू आँयग चेलाकू एचेरेय कताया, “होड़कूके कसूररे बझाः लगा मुरुक दाव होयाःता। मनदो एटाः होड़कूय एचे बझावता हाँयग होड़राः जीव ठीक जुवाःता।

² तोनोंगीग हुडिंग बिसवासी होड़े एचे कसूरगेतान अते, हाँयग होड़राः होटोःरे जंता इया दिरि तोलकेडखन समुंदररे तेनेके बोलो एंडाय, हाँय लगा नपाय इदा।

³ हनालगा अपे सवासितीपे दोहोन। आम वपक बोपोकू अते तोनोंगीग कसूरगे दो, हाँयमे समझावगोड। अरू हाँय कसूर बदीरेय पसताः दो, हाँयराः कसूर आम ओंगोल अतेम बराव एंडागोड।

⁴ मी दिन हाँय सात तुरहा आम एचेरेय कसूरगे अरू सातो तुरहा आम एचेरे वेगकियानखन आँयगराः कसूर बराव एंडा लगाय असेय दो, हाँयराः कसूरमे बनाराव एंडागोड।”

⁵ ईसूरिकुःआ मूक चेलाकू परबू एचेरेकू कताया, “अलेराः बिसवासमे बडे।”

⁶ दो परबू ईसू कताया, “अपेराः बिसवास मीटोंग ढड़हा बिहान मिन दोहोन दो नाःआ तूत दूब रवीगकियानखन समुंदररे बीड जुवाः माःआनपे कताय दो, हना तूत दूब हों अपेराः बड़रा मनाःता।”

⁷ ईसू अरूय कताया, “ओंगलेपे, अपे तोनोंगीगरीग मी होड़ हड़वाहा इदा। हाँय दोहोड़रे हाड़े सीता सहे भेड़ाकूय सरावता। हड़वाहा दोहोड़ अतेय वेग दो, दबूमे ओहेन, जउः जोम लगाम दुड़ुः माःआनपे कतायता जा? ओरो!

⁸ मनदो अपे हाँय एचेरेपे कतायता, ईंग लगा जउःमे जउः अरू ईंग अरीनिंग जोम ञूय वरी मयांग कासकेडखन ईंगमे सेवा। हना तयोमरे आम होंम जोम ञूय।

⁹ अपे कतावाया हना हाँयग हड़वाहा एचेयतान दो, अपे हाँय धनियाबादपे ओवायता जा कोवान?

¹⁰ हान इया अपे एचेरे भगवान कतावायता हना एचेवाडखन नाःआ इया ककता इदा, अले दो आमरिकुःआ सेवकियाकू हवे। आम कतातेरा हनानाः एकलाले एचेकेरा।”

कुड़गा होड़कूराः नपायगुः

¹¹ ईसू समरिया अरू गलील छतरराः सिमान अते एरुसलेम सहर अगीय सलाःआ।

¹² दो मीटोंग गाँवरेय सोदोरनेन मेला दसटोंग कुड़गा होड़कू ईसू एचेरेकू जुमावनेना।

¹³ हँकू दुरहियारे चड़ाँवाडखन खिररी घड़ीनकू कतातेरा, “ने अलेरीग मालिक, ईसू! अलेम सोगावा।”

¹⁴ ईसू हँकू ञेलवाडखने कताया, “अपे दूपे, भगवान ओड़ाःरीग पुजउरी एचेरे सेनेकियानखनपे एचे जासगुः।” दो हँकू सेनेन सेन दुनूररे बेमारीतेकू नपाययान।

¹⁵ दो हँकू अते मी होड़ अनँयग सुदीगोतेड, ईंग नपाययना, माःआन। अरू मुरुक सटीक भगवान जागतेडखने कुदायान।

¹⁶ हाँय ईसू मड़ंगरे तबेरनेनखनने धनियाबादतिरिया। हाँयग होड़ समरिया होड़े दोहोना।

¹⁷ दो ईसू होंबोरतेरा, “दसो होड़कू मेरकू नपायगना जा? दो नवगोटोंग होड़कू करे इदानकुःआ?

¹⁸ नाँयग समरिया होड़ अड़ावाडखन भगवान जागगेय लगा तोनोंगीग मेरेय दोहोगान, जा?”

¹⁹ ईसू हाँयग होड़ एचेरेय कताया, “रेमकियानखन आम सलाव जुवाःमे। आम बिसवासतेड अतेम नपाययना।”

भगवानराः राइज बदीरे

²⁰ मी दिन फरीसी होड़कू ईसू एचेरेकू होंबरेःआ, “भगवानराः राइज तुमिस बुँहड़ीगुःता?” दो ईसू हँकू एचेरेय कताया, “भगवानराः राइज ञेनेल मेडरे मेर ञेल अवेनता।

²¹ भगवान आँयगराः राइज अपे तलारेय बुँहड़ीकेरा। हनालगा तोनोंगीग होड़कू नाःआ इया ओरोपे कता अवेतेरा, भगवानराः राइज नंडा इदा सहे भगवानराः राइज हंडा इदा, माःआन।”

²² हनते ईसू चेलाकू एचेरेय कताया, “मनुवारीग बेटातराः मी दिन ञेल लगा अपे चहाःता हना दिन निचकाःतना, मनदो हना अपे ओरोपे ञेल अवेतेरा।

²³ होड़कू अपे एचेरेकू कतायता, ञेलेयपे माँय नाःआरे इदानिया सहे माँय हंडा इदानिया, माःआन। अपे हँकूराः लबरा कता अहापे मनाः अरू हँकू तयोम अलोपे सेन।

²⁴ ठेड़ररे विड़चेड़ता अरू सेरमोराः चइरो गतर मरसल जुवाःता। हनन इया मनुवारीग बेटात आँयगराः दिनरेय एचे ञिलुःता।

²⁵ मनदो हना मड़ंगरे हाँयके पीरा ससहाव पनाराःता अरू नाःआ जूगरिकुःआ होड़कू हाँयकू आड-बेकारवाता।

²⁶ नूहराः परियारे होयानेना हनन इया मनुवारीग बेटात परियारे हों होयाःता।

²⁷ नूह मरंग जहाजरे अरीने देग वरी होड़कू जोम ञूःआ अरू बियाहगुःआकू अरू बियाह लगाकू एमे होड़ेंगा। हनमेला पुरा दाः वेजेडा अरू जमा होड़कू लाय एंडागोतेडकू।

²⁸ लूतराः परियारे हों नान इया होयानेना। होड़कू जोम ञूःआ अरू एमे होड़ेंगा अरूकू रोपाःआ अरू ओड़ाःकू तुतुलाःआ।

²⁹ मनदो हाँयग लूत सोदोम सहर अते उडुंगनेना, हनानाः दिन सेरमो अते सेंगेल अरू हितकाःतो लेटे दिरि लोजोरनेना अरू जमा होड़कू लाय एंडागोतेडकू।

³⁰ मनुवारीग बेटात अनँयग एचे ञिलुःता हना दिनरे हों ननन इया होयाःता।

³¹ हना दिन तोनोंगीग सड़ुम सेरमोरे दोहोन अरू आँयगराः जमा बरानाः ओड़ाः पेंदारे दोहोन दो, हना उडुंग अगू लगा अलोय उतराः। हनन इया दोहोड़रे दोहोन हाँय, ओड़ाः अगी अलोय कुदान।

³² लूतरीग अइमी बदीरेपे उहियार दोहोगे।

³³ अँननकू जीव बनसावराः ओंगोलरेकू दोहोनता हँकुःआ होड़कू अँननकूराः जीव ञेल केड़े एंडागोडता। मनदो अँननकू जीव बनसावराः ओंगोलरे मेरकू दोहोनता हँकुःआ होड़कूराः जीवे बनसावता।”

³⁴ ईसू अरूय कताया, “अपे ईंगपे अयूम। हना रइत, बार होड़ खटीरेकिन गेतेगकुःता दो, भगवान मी होड़े रेम गोःयायता अरू मी होड़े अटू एंडा अटूयता।

³⁵ बार होड़ अइमीकिन जंतारेकिन दड़ीता दो, भगवान मी होड़े रेम गोःयायता अरू मी होड़े अटू एंडा अटूयता।

³⁶ [बार होड़ दोहोड़रेकिन दोहोन दो, मी होड़े रेम गोःयायता अरू मी होड़े अटू एंडा अटूयता।”]

³⁷ नाःआ अयूमवाडखन चेलाकू ईसू एचेरेकू होंबरेःआ, “ने परबू, नाःआ करे होयाःता?” दो हाँय हँकू एचेरेय कताया, “लास दोहोनता हननंडा कुड़ीडकू जुमाःता।”