लूका 14 - Korwa Bible

लोड़ोनराः दिनरे नपायगुः

¹ मीटोंग लोड़ोनराः दिनरे ईसू मी होड़ फरीसी होड़कूरीग मरंग होड़ ओड़ाःरे जोम लगाय सेनेडा। दो फरीसी होड़कू ईसू सिरढीटकू ञेलगोड ञवना।

² हंडा मी होड़ होड़ दोहोना। हाँय फुलिया बेमारीरेय दोहोना।

³ हनमेला ईसू नियम चेडदार होड़कू अरू फरीसी होड़कू एचेरेय कताया, “लोड़ोनराः दिनरे बेमरिया होड़ नपायगेय नियम इया इदा जा कोवान?”

⁴ मनदो हँकुःआ होड़कू कलेकालयानकू। हनते ईसू हाँयग होड़ चोटरे तिःई खेपातेडखने नपायतिरिया अरू हाँये सेने ओवातिरिया।

⁵ ईसू हँकू एचेरे अरूय कताया, “लोड़ोनराः दिनरे अपे तोनोंगीगरीग उरिग सहे गदहा इंदोरारेय कसड़ जुवाः होले अपे ओहेन उडुंगगेयतापे जा कोवान?”

⁶ हनारे हों हँकू तोनोंग माःआन मेरकू कता कुदा अवेगाड।

भगवान सउद होड़कूय नपायता

⁷ ईसू गुतियाकूय ञेला, हँकू मरंग मरंग होड़कू दुड़ुःता हना ततेररे दुड़ुः लगाकू ञामा। हनमेला ईसू मीटोंग अउल-तउल कहड़ीय कतातेरा।

⁸ “तोनोंगीग अपे बियाहरे टिवाय एमेवापे दो, अपे सेनेकियानखन नपाय ततेररे मड़ंग अलोपे दुड़ुः। टिवाय एमेकेरा हाँयग होड़ आमते हों मरंग होड़े नेवताकेरा करे?

⁹ दो आम अरू हाँयग मरंग होड़ लगा टिवाय एमेकेरा, हाँय वेगकियानखन आम एचेरेय कतायता, नाँय दुड़ुः लगाम एमेवाय, माःआन। दो हननमेला आम गियुःकियानखन जमाते हुडिंग ततेररे दुनुड़ुः पराःता।

¹⁰ हनालगा बियाहमे सेन दो आम जमाकूते हुडिंग ततेररेम दुड़ुः। दो आमे टिवावारा हाँयग होड़ वेग दो, नाःआ इयाय कतायता, ने सउंगता, मड़ंग अगीम दुड़ुः। हनमेला हंडाकू दोहोनता हँकुःआ होड़कू आमकू मान मरजइतमेता।

¹¹ दो ननन इया अनँयग आँयग मरंगे ओंगलुःता हाँयग होड़ भगवान हुडिंगे बड़ाँवगेयता अरू अनँयग आँयग हुडिंगे ओंगलुःता, हाँय भगवान मरंगगे बड़ाँवगेयता।”

¹² हनते ईसूय टिवावातेरा हाँयग होड़ एचेरे हों ईसू कताया, “आम केलवा सहे बियाड़ी जोम लगा होड़कूम राःकूता दो, अनम सउंगताकू सहे वपक बोपोकू सहे जइत सगाकू सहे गिरहत परुसीकू अलोम राःकू। हँकुःआ होड़कूम राःतान दो, हँकू हों आमकू राःता अरू आमकू एमे कुदावाता।

¹³ मनदो आम होड़कू जोम लगाम राःकूतान दो गरीब होड़कू, खोड़ा होड़कू, लंगड़ा होड़कू अरू अंधा होड़कूम राः।

¹⁴ हँकुःआ होड़कू आम ओरोकू राः बदला अवेतेडमेःआ। हनालगा नाःआ इयाम एचेय दो भगवान आमे भलावाता। बेगर गारबार होड़कू जियाव रिमुःता हना दिन भगवान अते नपाय इमानमे पवाःता।”

जोजोमराः अउल-तउल कहड़ी

¹⁵ हंडा जोम लगाकू वेजेडा हँकुःआ होड़कू अते मी होड़ नाःआ बड़रा अयूमवाडखन ईसू एचेरेय कताया, “भगवान राइजरेय जोजोमता हाँयग होड़ भगवान भलावायता।”

¹⁶ दो ईसू हाँय एचेरे मीटोंग अउल-तउल कहड़ीय कताया, “तोनोंगीग होड़ सरबहातेडखन मुरुक होड़कूय राःतेरा।

¹⁷ दो जोम जिनिसकू संजोड़तेड दो टिवावातेडकुःआय हँकू एचेरे नाःआ इया कताय लगा सेवकियातेने वारतेरा, दबूपे, जमा जिनिसकून जोम लगा संजोड़तो इदा।

¹⁸ राःवातेडकुःआय हँकुःआ होड़कू अते मेमेड होड़ ओरोयिंग सेने अवेनेना, माःआन छुटीकू असेःआ। मी होड़ कताया, ईंग नुँहू मीटोंग कियारींग किजाकेरा, हना ञेल लगा ईंगके सेन इदा। हनालगा ईंग छुटीगोडिंगमे, माःआन।

¹⁹ एटाः होड़ कताया, ईंग नुँहू पाँच जवइर उरिगकूयिंग किजाकेरा। उरिगकू नपाय इदानकुःआ जा कोवान हँकू ञेल लगायिंग सेनता। हनालगा ईंग छुटीगोडिंगमे, माःआन।

²⁰ अरू मी होड़ कताया, नुँहू नुँहू ईंगराः बियाह होयाकिया। हनलगा ईंग ओरोयिंग सेने अवेतेरा, माःआन।

²¹ हनते हाँयग सेवकिया होड़ जमा बड़रा मालिक एचेरेय कता उदुःतेरा। दो हाँयग मालिक रीसवाडखन सेवकियातेन एचेरेय कताया, सहरराः बजारकूनरे अरू खोइड़कूनरे सेनेवाडखन गरीबकू अरू खोड़ा होड़कू अरू लंगड़ा होड़कू अरू अंधा होड़कू नंडाम राः अगूकू।

²² तयोमरे सेवकिया होड़ कताया, ने मालिक, आम कतातेरा हनन इयायिंग एचेकेरा। हनारे हों होड़कू मेरकू पेरेगगना।

²³ दो मालिक हाँयग सेवकिया होड़ एचेरेय कताया, आम संडककूनरे अरू दूरकूनरे सेनेकियानखन होड़कू रेनहाकेडकूखनमे राः अगूकू, जेमहा ईंग ओड़ाःरे होड़कू पेरेग जुवाः।

²⁴ ईंग अपे एचेरेयिंग कतायतना, मड़ंग ईंग राःतेडकुःआ हँकुःआ होड़कू अते तोनोंगीग ईंग ओड़ाःरे ओरोयिंग जोम ओवातेडकुःआ।”

ईसूरीग चेला बड़ाँःराः मतलोब

²⁵ मुरुक बगरा होड़कू ईसू सुदाकू सेना। दो ईसू हँकू अगी उलटावनेनखने कताया,

²⁶ “तोनोंगीग होड़ ईंगरीग चेला बड़ाँः इदान दो ईंग अते आँयग एंगात, अपात, एरात, लइंकू, वपक बोपोहकूतेन, अजी मेमेसकूतेन अरू आँयग जीव हों बगरा अलोय दुलारगे। नाःआ इया मेरेय एचेय होले, हाँय ईंगरीग चेला ओरोय बड़ाँव अवेनेना।

²⁷ अरू अनँयगराः कुरूस रेमकेडखन ईंग तयोम मेरेय वेग दो, हाँय हों ईंगरीग चेला ओरोय बड़ाँव अवेनेना।

²⁸ अपे अते तोनोंगीग होड़ मीटोंग मरंग बड़ियाड़ उसूल ओड़ाः तुला अते मड़ंग हना ओड़ाः तुला लगा ईंगराः ढिबुवा पुराःता जा कोवान हना मेरेय जोड़वेता जा?

²⁹ हाँयग होड़ नेवे गडाता हना तयोमरेय सुदीगोडता नाःआ ओड़ाः रेम लगा ढिबुवा ओरो पुरावनेना, माःआन। दो होड़कू हाँयकू लंदा एरंगवायता।

³⁰ अरूकू कतायता, नाँय दो ओड़ाः तुला लगाय बुँहड़ीतेरा मनदो तितियार मेरेय अवेगाड।

³¹ हनन इया तोनोंगीग राजा एटाः देसरीग राजा सुदा लड़ाइ लगाय सेनतान दो, हाँय नपाये ओंगोल बुझाववाता, बीस हजार सइनाकूतेन अगूकेडखन ईंग सुदा लड़ाइ लगाय वेगता हाँयग राजा सुदा ईंगरिकुःआ दस हजार सइनाकूते ईंग जीताव अवेनतिंग जा ओरो?

³² जीताः मेरेय अवेय दो, हाँय एटाः राजा लनंकारेय दोनोहोन मेला आँयगरीग बराहील हाँय एचेरे वारकिडिगखन हाँय सुदा राजू नमान लगाय चहाःता।

³³ अपे ईंगपे अयूम। नाःआ इया तोनोंगीग अनँयगराः जमा जइतकून मेरेय अड़ाःगे दो, हाँय ईंगरीग चेला ओरोय बड़ाँव अवेनेना।

बुलुंग अते चेड

³⁴ बुलुंग नपाय इदा। मनदो बुलुंगराः सेबेल मेर दोहोन दो चिला जिनिसते हना बुलुंग सेबेलगुःता?

³⁵ हना बुलुंग ओत लगा सहे रसाइनगे लगा मेर बड़ाँःता अरू होड़कू हान बहरीकू तेके एंडागोडता। अयूम अवेयता हाँयग होड़, नपायतेय अयूम ठुड़ावगे।”