एहुना 9 - Korwa Bible

ईसू अंधा होड़े नपायतेरा

¹ तयोमरे ईसू अरू आँयगरिकुःआ चेलाकू दूर सेन मेला जनमावनेन वरीते अंधाय दोहोना, मी होड़ होड़कू ञेलतेरा।

² दो चेलाकू ईसू एचेरेकू होंबोरतेड, “ने गुरुजी, नाँयग होड़ अनँयगराः कसूरते जा एंगात अपातराः कसूरते अंधाय जनमावनेना?”

³ दो ईसू कतातेड, “नाँयग होड़राः सहे आँयग एंगात अपातराः कसूरते मेरेय अंधागना। मनदो नाँयग होड़राः जीवते भगवान अनँयग जंगरे उदुः लगा नाःआ इया होयाकिया।

⁴ रइत सुदुरुःतना, अरू हनमेला तोनोंगाः बुता ओरोबू एचे अवेतेरा। हनालगा ईंगे वारकेरा हाँयराः बुता दिनीने दिनरे एएचे लगा इदा।

⁵ चउंदीसरेयिंग दोहोन वरी ईंग चउंदीसराः मरसल हवे।”

⁶ नाःआ इया कतातेडखन ईसू ओतरेय बेगतेरा। हनते हाँय हना ओल दाःते हासे सुवेडतेड अरू अंधा होड़राः मेडरे लोटावगोतेडखने कतावातेरिया,

⁷ “दूमे, अरू सिलोहराः दाहराः दाःरेम आब जुवाः।” (सिलोहराः मतलोब वारतो हवे।) दो हाँयग अंधा होड़ सेनेडखन मेडे आबयान अरू ञेल ञेले कुदा वेगयान।

⁸ दो हाँयरिकुःआ परुसीकू अरू हाँय असे जोमतोकू ञेलतिरिया, हँकुःआ होड़कू कताया, “दुडुःकियानखने असे जोमा हाँय ननाँय दो ना लवे जा?”

⁹ अदोम होड़कू कताया, “नाँय दो हनाँय हवे।” अरू एटाः होड़कू कताया, “बुरी, नाँय हनाँयग होड़ इयाय ञिलुःतना।” मनदो हाँयग होड़ कताया, “ईंग हनाँय हवे।”

¹⁰ हनते हँकू हाँय एचेरेकू होंबरेःआ, “आमराः मेड करा इया गीगयना?”

¹¹ दो हाँय कतातेड, “ईसू ञावीग मी होड़ होड़ हासे सुवेडतेड अरू ईंगराः मेडरे लोटावतेडखन ईंगे कतावातेरा, सिलोह दाहरे सेनेकियानखन आब जुवाःमे, माःआन। दो ईंग सेनेडखनिंग आबयान अरूयिंग ञेलगोडतना।”

¹² दो हँकू होंबोरतेड, “हाँय करे इदानिया?” दो हाँय कताया, “चुवा मन दो।”

फरीसी होड़कू हाँयग अंधा होड़कू जासतेरा

¹³ हनते हँकुःआ होड़कू मड़ंग अंधाय दोहोना हाँयग होड़ फरीसी होड़कू एचेरेकू गोःयाडीग।

¹⁴ ईसू हास सुवेडतेडखन हाँयग अंधा होड़राः मेडे एचे ञेलतिरिया हना दिन, लोड़ोनराः दिन दोहोना।

¹⁵ हनालगा फरीसी होड़कू हाँय एचेरेकू होंबोरतेरा, “आमराः मेड करा इया नपाययना?” दो हाँय हँकू एचेरेय कतातेड, “हाँयग होड़ ईंगराः मेडरे हासे लोटावतेरा अरू ईंग आबनेना, दो ईंग ञेञेलतना।”

¹⁶ फरीसी होड़कू अते अदोम होड़कू कताया, “हाँयग होड़ लोड़ोनराः दिन मेरेय मनाःता। हनालगा हाँय भगवानरीग होड़ ना लवे।” मनदो एटाः होड़कू होंबोरतेरा, “कसूर होड़ करा उड़ी नाःआ इया बयाव जुवाः इयाःआ बुताय एचे अवेय?” नाःआ इया हँकू अड़ा-चउकीयान।

¹⁷ हनते हँकू अंधाय दोहोना हाँयग होड़ एचेरे अरूकू होंबोरतेड, “आमराः मेडे नपायकेरा हाँयराः बदीरे चेले माःआनमे कतायतना?” दो हाँय कताया, “हाँय दो भगवानराः बड़रा कतायीग होड़ हवे।”

¹⁸ हनारे हों हँकुःआ एहूदाकूरिकुःआ मूक होड़कू नाँयग होड़ अंधाय दोहोना अरू नुँहूय ञेञेलतना माःआन हाँयरिकिनाः एंगात अपात राःतेडकिनखन अरीनकू होंबोरकिन वरी मेरकू बिसवासगाड।

¹⁹ हँकू हँकिन एचेरेकू होंबोरतेड, “नाँय अबारीग बेटा हवे जा? ननाँय हवे जा अंधाय जनमावनेना हाँय? दो नाँय करा उड़ी नुँहूय ञेञेलतना?”

²⁰ दो हँकिन कतातेड, “अलिंग सुनुदीयतनालिंग नाँय दो अँननलिंगरीग बेटा हवे अरू अंधाय जनमावनेना।

²¹ मनदो नाँय करा उड़ी नुँहूय ञेञेलतना अरू इये नाँयराः मेडे नपायकेरा, हना मेरलिंग सुसुदीतना। नाँय लँइग कोवाया। हनालगा अपे अनँयग एचेरेपे होंबरे। आँयग बदीरे अनँयग उदुःगेता।”

^22-23 तोनोंगीग होड़ ईसू, मसी हवे माःआने मनेवाया दो, हाँयग होड़ अरजी ओड़ाः अते हिगार एंडाय लगा एहूदाकूरिकुःआ मूक होड़कू मी रायरेकू दोहोना। हनालगा हाँयग होड़रिकिनाः एंगात अपात एहूदाकूरिकुःआ मूक होड़कूराः बोतोरतेकिन कतातेरा, नाँय लँइग कोवाया। हनालगा अपे अनँयग एचेरेपे होंबरे, माःआन।

²⁴ हनते हँकू मड़ंगरे अंधाय दोहोना हाँयग होड़ अरू राःतिडीगखनकू होंबरेया, “भगवानमे मान मरजइत। अले दोले सुसुदीतना हाँयग होड़ कसूर होड़ हवे।”

²⁵ दो हाँय कता कुदातेरा, “हाँय कसूर होड़ हवे जा ना लवे, हना ईंग मेरिंग सुदीयतना। ईंग नाःआयिंग सुदीतना, ईंग मड़ंग मेरिंग ञेञेला, मनदो नुँहूयिंग ञेञेलतना।”

²⁶ हनते हँकुःआ होड़कू अरूकू होंबोरतेरा, “आमराः मेड करा इया नपाययना? हाँय करा इयाय एचेतेरा?”

²⁷ दो हाँय हँकू एचेरेय कतातेड, “ईंग अपे एचेरेयिंग कता उदुःगोतेडा। मनदो अपे हना कता मेरपे अयूमगाड। मी तुरहा अरू चिला लगा अअयूम लगापे चहाःतना? हाँयरिकुःआ चेलाकू अपे हों बड़ाँः लगापे चहाःतना जा?”

²⁸ हनते हँकू हाँय एचे बेग-हतावाड़िगखनकू कताया, “आम हाँयरीग चेला हवे। मनदो अले दो मोसेसरिकुःआ चेलाकू हवे।

²⁹ अले सुदीयतना भगवान मोसेस सुदाय बड़रानेना, मनदो अले नाँयग होड़ मेरले सुदीगेयता, हाँय करेयीग होड़ हवे, माःआन।”

³⁰ दो हाँय हँकू एचेरेय कतातेरा, “हाँय ईंगराः मेडे नपायकेरा। अरू अपे हाँय करेयीग होड़ हवे, हना अपे मेरपे सुसुदीतना दो नाःआ बयाव जुवाः इयाःआ कता हवे।

³¹ अबू सुदीयतना भगवान कसूर होड़कूराः अरजी मेरेय अयुमेता। मनदो भगवानराः ओंगोल इयाय सलाःता, हाँयग होड़राः अरजी भगवान अयुमेता।

³² चउंदीसराः मड़ंग जूग वरीते हों अंधाय जनमावनेना हाँयग होड़राः मेड तोनोंगीग नपायकेरा, हना मेर अयूमगना।

³³ अरू नाँय भगवानरीग होड़ अहाय दोहोकुः दो, हाँय कहिसाः ओरोय एचे अवेकेःआ।”

³⁴ हँकू हाँय एचेरेकू कतातेड, “आम दो जनमावनेन वरीते कसूर होड़ इदानमेःआ। अरू नुँहू अलेम चेडतना जा?” हनते हँकू हाँय अरजी ओड़ाः अते हिगारतिरीगखनकू एकला एंडागोतेडीग।

इंदरीराः अंदरा

³⁵ ईसू अयूमतेरा, एहूदाकूरिकुःआ मूक होड़कू मड़ंगरे अंधाय दोहोना हाँयग होड़कू एकला एंडागोतेडिया, माःआन। दो ईसू हाँये ञामतेरा अरू जुमावनेनखन हाँय एचेरेय कताया, “आम मनुवारीग बेटात एचेरेम बिसवासगेतना जा?”

³⁶ दो हाँय कतातेड, “ने परबू, हाँय एचेरेयिंग बिसवासगे लगा हाँय इये हवे?”

³⁷ दो ईसू कतातेड, “आम हाँयमे ञेलकिरिया अरू आम सुदा नुँहूय बुतुड़ुतना, हनाँय हवे।”

³⁸ हनते हाँय कताया, “ने परबू, ईंग बिसवासगेतानिंग।” हनते हाँय उकुड़ोमनेनखन ईसूय जागतेरा।

³⁹ दो ईसू कतातेड, “ईंग नाःआ चउंदीसरे होड़कू फड़ियाव लगायिंग वेगकिया। नाःआ अते मेरकू ञेञेलतना हँकुःआ होड़कू ञेलता अरू ञेञेलतना हँकुःआ होड़कू अंधा जुवाःता।”

⁴⁰ दो हाँय सुदाकू दोहोना हँकुःआ फरीसी होड़कू अते अदोम होड़कू नाःआ अयूमतेडखनकू कताया, “अले हों अंधा इदानलेःआ जा?”

⁴¹ ईसू हँकू एचेरेय कताया, “अपे अंधापे दोहोकुः दो अपे एचेरे कसूरराः बोझा ओरो दोहोनेना। मनदो अपे कतायतना, अले ञेञेलतनाले, हनानाः अते अपेराः कसूरराः बोझा दोनोहो जुवाःता।”