एहुना 6 - Korwa Bible

पाँच हजार अते बगरा होड़कू जोम लगा ईसू एमेतेरा

¹ तोनोंग दिन तयोमरे ईसू अरू आँयगरिकुःआ चेलाकू गलील छतर तोराकू। हना ततेरते हँकू गलील ञावराः हुडिंग समुंदरराः मार परोम तोराकू। (हना हुडिंग समुंदरराः एटाः ञाव दोहोना तिबिरियास।)

² ईसू बेमरियाकूय नपायतेरा हना बयाव जुवाः इयाःआ बुताकून होड़कू ञेलतेरा। हनालगा हाँय देह दूर मुरुक बगरा होड़कू ओतोंग सेना।

³ अरू ईसू आँयगरिकुःआ चेलाकू सुदा पहाड़रे देगकियानखने दुड़ुःयान।

⁴ दो एहूदाकूराः पसहा परोब निचकाःआ।

⁵ ईसू अउग-बउगे सहियारतेड दो, मुरुक बगरा होड़कू आँयग अगी वेगतोय ञेलतेडकुःआ अरू पिलिपूस एचेरेय होंबोरतेरा, “नाःआमिन बगरा होड़कू जोम लगा करा अगीतेबू अगूय?”

⁶ ईसू मड़ंगरे चिलाय एचेयता हना अनँयग आँयगते सुदीवाडखन पिलिपूस अंदजावगे लगा नाःआ इयाय होंबोरतिरिया।

⁷ पिलिपूस कता कुदातेरा, “मी होड़ होड़राः आठ महिनाःआ मंजूरी हों नाःआमिन होड़कू जोम लगा मेमेड कउड़ा हों ओरो पुरावनेना।”

⁸ ईसूरीग चेलाकू अते मी होड़ अंदरियास, सिमोन पतरसरीग बोहोत, ईसू एचेरेय कतातेड,

⁹ “नंडा मी होड़ लँइग इदानिया। हाँय एचेरे पाँचगोटोंग जावराः रुटी अरू बारटोंग हकूकिन इदा। मनदो निनमिन अते नाःआमिन होड़कू लगा करा इया होयाःता?”

¹⁰ दो ईसू कतातेड, “होड़कू एचे दुड़ुःगोडकूपे।” हंडा मुरुक बीरकून दोहोना अरू होड़कू हंडाकू दुड़ुःयान। हंडा अंदांज मनरद मरदकू पाँच हजारकू दोहोना।

¹¹ हनते ईसू रुटीय साबतेरा अरू भगवान एचेरे धनियाबादतेडखन दुड़ुःतो होड़कू लगा डुंडीग घड़ीने एचे हटिंगवातेडकुःआ। अरू हनन इया हकूकिन हों दोंगे पेरेगवामिने एचे हटिंगवातेडकुःआ।

¹² हँकुःआ जमा होड़कू बीयान दो ईसू आँयग चेलाकू एचेरेय कताया, “बनसावतो बटुड़ावगेपे दो हान ओरो एंडानेना।”

¹³ जमा होड़कू जोम उरियावनेनखन तयोमरे जावराः पाँचगोटोंग रुटीराः डुंडीगतो चेलाकू बारहगोटोंग दउड़ारे रेम ठुड़ीतेडखनकू पेरेगगोतेड।

¹⁴ ईसूराः बयाव जुवाः इयाःआ नाःआ बुता होड़कू ञेलतेडखनकू कताया, “सतायरे नाँयग होड़ चउंदीसरे वेग लगाय दोहोना हाँयग भगवानराः बड़रा कतायीग होड़ हवे।”

¹⁵ ईसू सुदीगोतेड, होड़कू ईंग रेनहाकेडखन अँकूरीग राजा बड़ाँवगींग लगाकू ओंगलेतना, माःआन। हनालगा हाँय कगरावनेनखन पहाड़ होर एनेकला तोराय।

ईसू दनाः दाः सेरमोय सेना

¹⁶ हना दिन सिंगाड़ मेला चेलाकू हुडिंग समुंदर अगी अरूकू सेनेडा,

¹⁷ अरू डोंगारे देगनेनखन कपरनहूम सहर होरकू सेना। हनमेला अयूबयान अरू ईसू हँकू सुदा मेरेय दोहोगान।

¹⁸ गड़रा घटाते हना हुडिंग समुंदरराः दाः हलकोयगगुःआ।

¹⁹ हँकू डोंगा सलाव सलाव बार कोस वरी तोराकू दो ईसू दनाः दाः सेरमो अँकू अगी वेगतो ञेलतिरिगखनकू बोरोयान।

²⁰ मनदो ईसू हँकू एचेरेय कताया, “अहापे बोर! इनिंग हवे।”

²¹ हनते ईसू डोंगारे एचे देगगेय लगाकू सपड़ावनेना अरू ओहेन हँकूराः डोंगा सेन लगा दोहोना हंडा सोदोरयान।

²² एटाः दिन हुडिंग समुंदरराः मार परोमकू दोहोना, हँकुःआ होड़कू सुदीगोतेड नंडा मिनीटोंग डोंगा इदा अरू ईसू आँयग चेलाकू सुदा डोंगारे मेरेय देगगान, मनदो हँकू अँनकू एकलाकू सेनेडा।

²³ हनते परबू रुटी लगाय अरजीतेरा अरू होड़कू जोम लगाय ओवातेडकुःआ, हना ततेरराः लेसान ततेररे तोनोंग तोनोंग होड़कू तिबिरियास सहर अते डोंगाकूनरेकू वेगनेना।

²⁴ ईसू अरू आँयगरिकुःआ चेलाकू हंडा कोवाकुःआ माःआन होड़कू सुदीगोतेड दो, हँकू डोंगाकूनरे देगकियानखन ईसू ञाम ञाम कपरनहूम सहररेकू सोदोरयान।

जीवराः रुटी ईसू हवे

²⁵ हुडिंग समुंदर मार परोम होड़कू पारनेनखन कपरनहूम सहररेकू सोदोरनेना अरू ईसू सुदाकू जुमावनेन दो, हँकू हाँय एचेरेकू होंबोरतेड, “ने गुरुजी, आम नंडा तुमिसमे वेगकिया?”

²⁶ दो ईसू कतातेड, “अपे ईंगपे अयूम! अपे बयाव जुवाः इयाःआ बुतापे ञेलतेरा, हनलगा अपे मेरपे ञामिंगतना। मनदो अपे रुटीपे जोम बीनेना, हनालगापे ञामिंगतना।

²⁷ लुलिग जुवाःता हना जोम जिनिसकून लगा एकला अहापे मिहनइतगे, मनदो ओरो लुलिगनेना अरू ओरो टुटीगनेना जीव एमेयता हना जोम जिनिसकून लगा होँपे मिहनइतगे। हना दो मनुवारीग बेटात अपे लगाय एमेवापेता। हना एमे लगा अपांग भगवान हनाँय एकला हातपाते ओवाडिया।”

²⁸ हनते हँकुःआ होड़कू होंबोरतेड, “भगवान ओंगलेतना हना बुता बुता लगा अले चिलाले एचे?”

²⁹ दो ईसू कतावाडकू, “भगवान ईंगे वारकिरिंगा। हनालगा ईंग एचेरेपे बिसवासगे। ननानाः हवे भगवानराः ओंगोल इयाःआ बुता।”

³⁰ दो हँकू हाँय एचेरेकू होंबोरतेड, “दो आम चिला बयाव जुवाः इयाःआ बुताम उदुःवालेता, जेमहा अले आम एचेरेले बिसवास अवेय?

³¹ भगवानराः कागदरे ओजाःतो इदा हनन इया, अबूरिकुःआ खुटिपरिया होड़कू टयंगाब ततेररे मनाहकू जोमतेरा; हाँय हँकू जोम लगा सेरमो देस अते जोम जिनिसे एमेतेरा।”

³² दो ईसू हँकू एचेरेय कताया, “अपे ईंगपे अयूम! अपे लगा मोसेस सेरमो अते रुटी मेरेय एमेगाड। मनदो ईंगरीग अपांग भगवान अपे लगा सताय रुटी सेरमो देस अतेय एमेयता।

³³ सेरमो देस अते उतरावनेनखन चउंदीसरिकुःआ होड़कू लगा जीवे एमेता हनाँय हवे, भगवानराः रुटी।”

³⁴ दो हँकू कतातेड, “ने साहेब, नुँहू वरीते जनामा बेला नाःआ रुटी अले लगाम एनेमेगोड ञवन।”

³⁵ हनते ईसू हँकू एचेरेय कता उदुःतेरा, “जीवराः रुटी ईंग हवे। ईंग एचेरेय वेगता, हाँय कहियो रंगेगतो ओरोय दोहोनेना अरू ईंग एचेरेय बिसवासगेता हाँय, कहियो ततंगतो ओरोय दोहोनेना।

³⁶ मनदो ईंग अपे एचेरेयिंग कतातेरा, अपे ईंगपे ञेलकेरा। हनारे हों मेरपे बिसवासगींगतना।

³⁷ ईंग इनिंगराः ओंगोल इया एचेय लगा सेरमो देस अते मेरिंग वेगगना। मनदो ईंगे वारकिरिंगा हाँयराः ओंगोल इया बुता पुरावगे लगायिंग वेगकिया।

³⁸ हनालगा अपांग भगवान ईंग एचेरेय जिमाःकेडकुःआ हँकुःआ होड़कू ईंग एचेरेकू वेगता अरू हँकू तोनोंग बेला मेरिंग कुदाकूता।

³⁹ ईंगे वारकेरा हाँयराः ओंगोल ननानाः हवे; हाँय ईंग एचेरेय जिमाःकेडकुःआ हँकुःआ होड़कू अते तोनोंगीग होड़ ओरोयिंग केड़ेतेडकुःआ, मनदो टुटीग दिनराः फड़ियावरे हँकूयिंग जियाव रेमकूता।

⁴⁰ ईंगरीग अपांगराः ओंगोल नाःआ हवे। बेटातकू ञेलता अरू हाँय एचेरेकू बिसवासगेता, हँकुःआ होड़कू ओरो टुटीगनेना हना जीवकू पवाःता अरू हँकू ईंग टुटीगगुःराः दिनरेयिंग जियाव रेमकूता।”

⁴¹ ईसू नाःआते गुनहोन मड़ंगरेय कतातेरा, सेरमो देस अते उतरावकिया हना रुटी, ईंग हवे। हनालगा एहूदाकू हाँय बदीरेकू कुरबुराःआ।

⁴² अरू हँकू कतातेड, “नाँय उसूपरीग बेटात ईसू हवे जा? हाँयरिकिनाः एंगा-अपाकिन हों सुसुदीतनाबू। दो नाँय करा उड़ीय कता अवेयता, ईंग सेरमो देस अतेय उतराव वेगकिया, माःआन?”

⁴³ दो ईसू कतातेड, “अपे अँननपे अहापे कुरबुराव होड़ेंग।

⁴⁴ ईंगे वारकेरा, ईंगरीग अपांग तोनोंगीग होड़ मेरेय रगेय दो, हाँयग होड़ ईंग एचेरे ओरोय वेगनेना अरू ईंग एचेरेय वेगता हाँयग होड़ टुटीगगुःराः दिनरे ईंग जियाव रेमगेयता।

⁴⁵ भगवानराः बड़रा कता होड़कूराः कागदरे नाःआ इया ओजाःतो इदा, भगवान हँकुःआ जमा होड़कूय चेडकूता। अपांग भगवानतेकू अयुमेता अरूकू चिडुःता हँकू, ईंग एचेरेकू वेगता।

⁴⁶ तोनोंगीग होड़ अपांग मेरकू ञेलगरिया। मनदो ईंग भगवान अगीतेयिंग वेगकिया, अरू ईंग इनिंग एकला अपांगिंग ञेलकेरा।

⁴⁷ अपे ईंगपे अयूम! बिसवासगेताय हाँयग होड़, ओरो टुटीगनेना हना जीवे पवाःता।

⁴⁸ ओरो टुटीगनेना हना जीव एमेयता हना रुटी ईंग हवे।

⁴⁹ अपेरिकुःआ खुटिपरिया होड़कू टयंगाब ततेरे मनाहकू जोमतेरा, मनदो हनारे होंकू गोएगयना।

⁵⁰ मनदो नाःआ रुटी सेरमो अते उतराव वेगकिया हना रुटी हवे अरू नाःआ रुटीय जोमता हाँयग होड़ ओरोय गोएगनेना।

⁵¹ सेरमो देस अते उतरावकिया, हना जीवराः रुटी इनिंग हवे। तोनोंगीग नाःआ रुटीय जोम दो, हाँय कहियो ओरोय गोएगनेना। अरू चउंदीसरिकुःआ होड़कू जियाः लगायिंग एमेयता, हना रुटी ईंगराः मास हवे।”

⁵² हनते एहूदाकू अँननकू अँकू अड़ा-चउकीनेनखनकू कताया, “नाँयग होड़ अनँयग मास करा उड़ी अबू जोम लगाय एमेयता?”

⁵³ दो ईसू हँकू एचेरेय कताया, “अपे ईंगपे अयूम! अपे मनुवारीग बेटातराः मास मेरपे जोम अरू हाँयराः बलंगी मेरपे ञूय, दो अपे सगर सइट वरी ओरोपे जियाव अवेनेना।

⁵⁴ ईंग एचेरे बिसवासकेडखन ईंगराः मासे जोमता अरू ईंगराः बलंगीय ञूयता, हनाँयग होड़ ओरो टुटीगनेना जीवे पवाःता। अरू टुटीगगुःराः दिनरे ईंग हाँयिंग जियाव रेमगेयता।

⁵⁵ ईंगराः देह सताय जोम जिनिस हवे अरू ईंगराः बलंगी सताय ञूय जिनिस हवे।

⁵⁶ ईंगराः देहे जोमगोडता अरू ईंगराः बलंगीय ञूयता हाँयग होड़ ईंग सुदा मिनीय दोहोनता अरू ईंग हों हाँय सुदा।

⁵⁷ जीयत इदानिया ईंग अपांग ईंगे वारकेरा अरू हाँय अते ईंग जीयत इदानिंगा। हनलगा ईंगे जोमता हाँयग होड़ ईंग अगीते जिनियतेय दोहोनता।

⁵⁸ नाःआ रुटी सेरमो देस अते उतरावकिया हना रुटी हवे। अपेरिकुःआ खुटिपरिया होड़कू मनाहकू जोमा, हनारे होंकू गोएगयना, मनदो नाःआ रुटीय जोमता हाँयग होड़ सगर सइट जूग वरी जीयते दोहोनता।”

⁵⁹ नाःआ कताकून ईसू कपरनहूम सहरराः अरजी ओड़ाःरे होड़कूय चेड मेलाय कतातेरा।

⁶⁰ ईसूरिकुःआ चेलाकू अते मुरुक बगरा होड़कू नाःआ कताकून अयूमतेडखनकू कताया, “नाःआ कता ओरोबू अयूम पसाव अवेतेरा। दो इये मनाव अवेनता?”

ओरो टुटीगनेना हना जीवराः सरवन

⁶¹ ईसूरिकुःआ चेलाकू अँननकू अँकू कुरबुराःआ, हना सुदीतेडखन ईसू हँकू एचेरेय होंबोरतेरा, “नाःआ कता अते अपेराः जीव हुडिंगयना जा?

⁶² अपे मनुवारीग बेटात सेरमो देस अगी देगतोपे ञेलेय दो करजुःतापे?

⁶³ भगवानराः सुद बिरुवा जीवे एमेता, मनदो मनुवाकू अते कहिसाः मेर होयाःता। ईंग कतातेरा हना सरवन भगवानराः सुद बिरुवा अगीतेयिंग कतातेरा अरू हनानाः कता अपे लगा जीव एमेयता।”

⁶⁴ ईसू मनाड़ंगतेय सुदीकेरा, ईंग एचेरे इये इये मेरकू बिसवासगेता अरू इये ईंगे एचे साबिंगता, माःआन। हनालगा हाँय कतातेरा, अपे अते अदोम होड़कू ईंग एचेरे मेरपे बिसवासगेतना, माःआन।

⁶⁵ दो ईसू अरूय कताया, “ननानाः लगा ईंग अपे एचेरेयिंग कतातेरा, अपांग मेरेय मयावाय दो तोनोंगीग होड़ ईंग एचेरे ओरोय वेग अवेनेना।”

पतरसराः बिसवास

⁶⁶ हना तयोमरे ईसूरिकुःआ मुरुक बगरा चेलाकू हाँय अड़ाःतेडखनकू कुदायान।

⁶⁷ दो ईसू आँयगरिकुःआ बारहगोटोंग मूक चेलाकू एचेरेय कताया, “अपे हों ईंग अड़ाः एंडाकिडिंगखन सेन लगापे ओंगलेतना जा?”

⁶⁸ दो सिमोन पतरस कता कुदातेरा, “ने परबू, अले इये एचेरेले सेन? ओरो टुटीगनेना हना जीवराः सरवन दो अनम एचेरे इदा।

⁶⁹ अले आम एचेरे बिसवासकेडखनले सुदीगोतेडा भगवानरीग सुद होड़ अनम हवे, माःआन।”

⁷⁰ दो ईसू कतातेड, “ईंग इनिंगते अपे बारहो होड़कूयिंग सुनावकेडपेःआ। हनारे हों अपे अते मी होड़ कलउरीग होड़ हवे।”

⁷¹ (ईसू बारहो मूक चेलाकू अते मी होड़ सिमोन इसकरियोतीरीग बेटात जूदा बदीरेय कतातेरा। अरू हाँय तयोमरे ईसूय एचे साबतिरिया)।