एहुना 5 - Korwa Bible

दाह धरीरे गेतेगतो होड़राः नपायगुः

¹ तोनोंग दिन तयोमरे ईसू एहूदाकूराः परोब लगा एरुसलेमे सेनेडा।

² एरुसलेमरे भेड़ा ञावराः हता दुवार कुटीरे मीटोंग दाह दोहोना। इबरानी भासीरे नाःआ दाहराः ञाव दोहोना बेत-हसदा। अरू हना दाहराः चइरो गतर पाँचगोटोंग मरंग परछी दोहोना।

³ हंडा मुरुक बेमरियाकू, अंधा होड़कू, लकवा ञेडतो होड़कू अरू खोड़ा होड़कू गेतेगतोकू दोहोना।

⁴ [तोनोंग तोनोंग बेला परबू भगवानरीग बराहील सेरमो देस अते दाःरे उतरावकियानखन दाःए हिड़कोड़ा। दो दाःरे मड़ंगकू उतराःआ, हँकू तोनोंग इयाःआ बेमरियारेकू दोहोना हों हँकू नपाय जुवाःआ।]

⁵ दो हंडा मी होड़ होड़ दोहोना। हाँय अड़तीस बरिस वरीते लकवा बेमारीरेय दोहोना।

⁶ ईसू हाँयग होड़ हंडा गेतेगतोय ञेलतिरिया अरू हाँय मुरुक बरिस वरीते बेमरियारे इदानिया माःआन सुदीकेडखन हाँये होंबोरतिरिया, “नपायगुः लगाम चहाःतना जा?”

⁷ दो हाँयग बेमरिया होड़ ईसू एचेरेय कतातेड, “ने साहेब, दाः हिड़कोड़गुःता हनमेला ईंग दाःरे गोः उतरावगींग लगा तोनोंगीग होड़ ईंग सुदा कोवाया। ईंग दाःरे उतराः लगायिंग कुरनिस सोयता दो, ईंग अते मड़ंग तोनोंगीग एटाः होड़ उतराव जुवाःता।”

⁸ हनते ईसू हाँय एचेरेय कताया, “रिमुःमे! अरू आमराः पटिया रेमकेडखनमे सलाव जुवाः।”

⁹ हाँय हनन मेलाय नपाययान अरू आँयगराः पटिया रेमतेडखने दँड़ा चुवेरगोडा। दो हना दिन लोड़ोनराः दिन दोहोना,

¹⁰ अरू एहूदाकू नपायनेना हाँयग होड़ एचेरेकू कताया, “तिसिंग दो लोड़ोनराः दिन हवे। अबूराः नियम इया तिसिंग पटिया रेम कोवानेःआ।”

¹¹ मनदो हाँय कता कुदातेरा, “ईंगे नपायतेरा हाँयग होड़ ईंग एचेरेय कतातेरा, आमराः पटिया रेमकेडखनमे सलाव जुवाः, माःआन।”

¹² दो हँकू हाँय एचेरेकू होंबोरतेड, “पटिया रेमकेडखनमे सलाव जुवाः, माःआने कतावातेडमेःआ हाँयग होड़ इये हवे?”

¹³ हंडा मुरुक होड़कू दोहोना। हना अते ईसू कगरावयाने। हनालगा नपायनेना हाँयग होड़ मेरेय सुदी अवेगाड, हाँय इये दोहोना, माःआन।

¹⁴ तयोमरे ईसू सुदा हाँयग होड़ भगवानराः ओड़ाःरेय जुमावनेना। अरू ईसू हाँय एचेरेय कतातेड, “ञेलमे! आम नपाययना। अरू अहम कसूरगे। नाःआ अते बगरा तोनोंग इयाःआ गराह कटसिया आम एचेरे अहा होयाः।”

¹⁵ हनते हाँयग होड़ सेनेवाडखन एहूदाकू एचेरेय कता उदुःगोतेड, ईसू ईंगे नपायकेरा, माःआन।

¹⁶ ईसू नाःआ जमाकून लोड़ोनराः दिनरेय एचेतेरा। हनालगा एहूदाकू हाँय संताव लगाकू बुँहड़ीतेरा।

¹⁷ हनते ईसू कतातेड, “नुँहू वरी ईंग अपांग बुतागोड ञवनताय। हनालगा ईंग हों हाँय इयायिंग बुतागोड ञवनतना।”

¹⁸ ईसू लोड़ोनराः दिन मेरेय मनावगाड अरू हाँय भगवान ईंग अपांग माःआन कता घड़ीन ईंग भगवान इया इदानिंगा, माःआने कतानता। हना ओजाहते एहूदाकू ईसू ञेड गोजेय लगा अरू मुरुककू कुरनिसतेरा।

बेटातराः हातपात

¹⁹ दो ईसू हँकू एचेरेय कतातेरा, “अपे ईंगपे अयूम! बेटात अनँयग आँयते तोनोंगाः ओरोय एचे अवेतेरा। मनदो हाँय अपात एचेतेय ञेलता हनानाः एकला हाँय एचेयता। अपात एचेयता, हनन इया बेटात होंय एचेयता।

²⁰ अपात बेटाते दुलारता अरू हाँय एचेयता हना जमाकून बेटाते उदुःवाता। नाःआ अते मरंग मरंग बुता एचेय लगा होंय उदुःवायता। अरू अपे मुरुकपे बयाव जुवाःता।

²¹ अपात गोएगतो होड़कूय जियाव रेमा, हनन इया बेटात हों हाँय चहाःता हँकुःआ होड़कू जीवे एमेवाकूता।”

²² “अपात तोनोंगीग होड़ मेरेय फड़ियावगेयता, मनदो फड़ियावकूराः बुता बेटाते जिमावारा।

²³ नाःआते होड़कू अपातकू मान मरजइतता हनन इया बेटात होंकू मान मरजइतता। अरू बेटात मेरेय मान मरजइतगेयता हाँयग होड़, बेटाते वारकेरा हाँयग अपात हों मेरेय मान मरजइतगेयता।”

²⁴ “अपे ईंगपे अयूम! ईंगराः सरवने अयूमता अरू ईंगे वारकेरा हाँय एचेरेय बिसवासगेता हाँयग होड़, ओरो टुटीगनेना हना जीवे पवाःता अरू भगवान हाँय ओरोय डंडियावतिरिया। मनदो हाँय गुजुः अते जीव अगीय बोलोयना।

²⁵ अपे ईंगपे अयूम, मी बेला सुदुरुःता, अरू हनमेला गोएगतो होड़कू भगवानरीग बेटातराः अरोकू अयूमता अरूकू जियाःता। मनदो हना बेला नुनुँहू बुँहड़ीयना।

²⁶ अपात जीवराः सूती हवे। हनन इया बेटात हों जीवराः सूती बड़ाँः लगा हातपाते एमेवाडिया।

²⁷ हाँय मनुवारीग बेटात हवे। हनालगा अपात होड़कूय फड़ियाव लगा बेटात हातपाते ओवाडिया।

²⁸ मड़गटरे इदानकुःआ हँकुःआ होड़कू हाँयराः अरो अयूमकेडखन उडुंग वेगराः बेला सुदुरुःतना अरू अपे अहापे बयावगुः।

²⁹ नपाय बुताकू एचेतेरा, हँकू भगवान अते ओरो टुटीगनेना हना जीव पवाः लगाकू जियाव रिमुःता अरू बेलूर बेलूर बुताकूनकू एचेतेरा, हँकू भगवान अते डंडियाव पवाः लगाकू जियाव रिमुःता।”

³⁰ “ईंग इनिंग ईंगते तोनोंगाः मेरिंग एचे अवेयता। ईंग भगवान अगीतेयिंग अयुमेता हनन इयायिंग फड़ियावकूता। ईंग इनिंग ओंगोल इया एचेय लगा मेरिंग चहाःतना, मनदो भगवान ईंगे वारकेरा, अरू हाँयराः ओंगोल इया एचेय लगायिंग चहाःतना। हनालगा ईंगराः फनड़ियाव सताय इदा।”

³¹ ईसू अरूय कतातेड, “ईंग इनिंग बदीरे हिदइतिंग एमे दो, हना हिदइत तोनोंगीग सताय हवे माःआन ओरोकू मनावनेना।

³² मनदो एटाः होड़ ईंग बदीरे हिदइते एमेयतना अरू ईंग सुसुदीतना ईंग बदीरे हाँयराः हिदइत सताय हवे।”

³³ “अपे बतिसमा एमेयीग होड़ एहुना एचेरे होड़कूपे वारतेरा अरू हाँय ईंग बदीरे सताय हिदइते उदुःतेरा।

³⁴ होड़कू ईंग बदीरे हिदइतकू उदुः लगा मेरिंग चहाःता। मनदो अपे सडावगुः लगा नाःआ कतायिंग कता उदुःकेरा।

³⁵ एहुना विड़चेड़तो अरू सलगाःतो ढिबरी इयाय दोहोना अरू अपे तोनोंग बेला वरी हाँयराः कता मरसल इया भगवानराः सतायरे सलाः लगापे संघरावाया।”

³⁶ “बुता पुरावगे लगा अपांग ईंग एचेरेय जिमाःतेरा अरू नुँहूयिंग एचेयतना, हना बुता पुरावगे लगा अपांग ईंगे वारकेरा। नाःआ ईंग बदीरे हिदइत इया दोहोनता अरू एहुनाराः हिदइत अते मरंग इदा।

³⁷ ईंगे वारकेरा हाँयग अपांग, ईंग बदीरे हिदइते एमेकेरा। मनदो अपे हाँयराः बड़रा मेरपे अयूमगरा अरू हाँय मेरपे ञेलगडिया।

³⁸ हाँय ईंगे वारकेरा, मनदो अपे ईंग एचेरे मेरपे बिसवासगरा। हनालगा हाँयराः सरवन अपेराः जीवरे मेर दोहोनता।

³⁹ अपे भगवानराः कागदते तिंगीड घड़ीन चिडुः लगापे कुरनिसगेतना। नाःआ अते अपे ओंगलेता, ननते अले ओरो टुटीगनेना हना जीवले पवाव जुवाःता, माःआन अरू ननानाः कागद ईंग बदीरे हिदइत एमेयता।

⁴⁰ हनारे हों अपे ओरो टुटीगनेना हना जीव पवाः लगा ईंग एचेरे वेग लगा मेरपे चहाःता।”

⁴¹ “ईंग होड़कूराः मान मरजइत मेरिंग चहाःता।

⁴² मनदो ईंग सुदीयतना, अपे एचेरे भगवानराः दुलार कोवानेःआ, माःआन।

⁴³ ईंगरीग अपांग भगवानराः ञावते अपे एचेरेयिंग वेगकिया अरू अपे ईंग मेरपे मनेवागाडिंग। मनदो तोनोंगीग होड़ अनँयग ञावतेय वेगता दो अपे हाँय नपायपे मनेवायता।

⁴⁴ अपे अँननपे अपे जाग होड़ेंगता अरू मिनीटोंग इदानिया हाँयग भगवान अगीते मान मरजइत पवाः लगा अपे मेरपे चहाःतना। दो अपे करा उड़ी ईंगपे बिसवास अवे?”

⁴⁵ “अपे अहापे ओंगले, ईंग अपांग मड़ंगरे अपेयिंग जाःता, माःआन। अपे भरसागेतना हाँयग मोसेस हवे अपेरीग जाजाःयीग होड़।

⁴⁶ मोसेस ईंग बदीरेय ओजाःतेरा अरू अपे हाँय एचेरेपे बिसवासकेः दो, ईंग एचेरे होँपे बिसवासकेःआ।

⁴⁷ मनदो मोसेस ओजाःतेरा हना कता अपे मेरपे बिसवागेतना, दो ईंगराः कता अपे करा उड़ीपे बिसवास अवेय?”