एहुना 20 - Korwa Bible

ईसू गोएगतो अतेय जियाव रेमकिया

¹ हपताराः मड़ंग एतवार दिनरे, आंग फइड़साःआ मेला, मगदलियायिन मरियम हना मड़गटरेय सेनेडा अरू लात दुवारराः दिरि, चलाःतोय ञेलतेरा।

² दो हाँय बतकाव सेनेडखन सिमोन पतरस अरू ईसू मुरुके दुलारगेया हाँयग चेला, हँकिन एचेरेय कता उदुःतेरा, “ने वगीयाकिन, तोनोंगीग परबू ईसूराः मुरदा हना लात अते उडुंगकेडखने गोःयडा अरू अले मेरले सुसुदीतना, हना करेय मंडावगोतेडा।”

³ दो पतरस अरू हाँयग एटाः चेला लात अगी तोराकिन।

⁴ हँकिन बना होड़किन बतकाव सेनेडा। मनदो हाँयग एटाः चेला पतरस अते मड़ंग, लातरेय सोदोरनेना।

⁵ अरू हाँय बंगानेनखने कोबोःतेरा दो, लातरे सोनहे एकला दोहोना। हनते हों हाँय मेरेय बोलोगान।

⁶ हना तयोमते सिमोन पतरस सोदोरनेन अरू लातरेय बोलोयान अरू सोनहे एकलाय ञेलतेरा।

⁷ अरू ईसूराः बोःरे तोल पतात दोहोना, हना कफन सेतरा, कफन सोनहे अते एटाःरे मोड़हावकेडखन मंडावतोय ञेलतेरा।

⁸ हना तयोमरे मड़ंगरेय सोदोरनेना हाँयग चेला हों लात पेंदारेय बोलोयान अरू ञेलतेडखने बिसवासतेरा।

⁹ (ईसू गोएगतो अतेय जियाव रिमुःता हना कता भगवानराः कागद अते हँकिनाः होड़किन हना वरी मेरकिन सुदी अवेगाड।)

¹⁰ हनते हँकिनाः चेलाकिन ओड़ाः अगीकिन कुदायान।

मगदलियायिन मरियम एचेरे ईसू एचे ञेलनेना

¹¹ हनते मरियम हना लात अगीय कुदा सेनेडा अरू हना लातराः बहरी चड़ाँनेनखने इयामा। अरू हाँय इयाम घड़ीन हना लात पेंदा अगी बंगानेनखने ञेला।

¹² दो हंडा उजड़ सोनहे तुसिंगतो बार होड़ सेरमो देसरिकिनाः बराहीलकिन, ईसूराः मुरदाकू मंडावतेरा हंडा मी होड़ बोः अगी अरू मी होड़ काट अगी दुड़ुःतोकिन दोहोना।

¹³ दो हँकिन हाँय एचेरेकिन होंबोरतेड, “ने दिदी, आम चिला लगाम इयामतना?” दो हाँय कतातेड, “तोनोंगीग ईंगरीग परबूराः मुरदा तोनोंग होरे गोःयडा, अरू ईंग मेरिंग सुदीयतना हना करेय मंडावगोतेडा।”

¹⁴ नाःआ इया कतातेडखन तयोम अगीय ञेलतेरा दो ईसू चड़ाँते दोहोना, मनदो नाँय ईसू हवे माःआन मेरेय सिनहा अवेगडीग।

¹⁵ दो ईसू कतातेड, “ने दिदी, आम चिला लगाम इयामतना अरू इयेम ञामतना?” बगइचारीग बुता होड़ हवे माःआन ओंगोलकेडखन हाँय कतातेड, “ने साहेब, आम हाँयराः मुरदा करेम इदी अटूडा, ईंग उदुःवायिंगमे दो ईंग सेनेकियानखन हनायिंग गोःयाता।”

¹⁶ दो ईसू हाँय एचेरेय कताया, “ने मरियम।” हनते हाँय ईसू अगी उलटावनेनखने कतातेरा, “ने रबूनी!” (इबरानी भासीरे रबूनी लबदराः मतलोब, ने ईंग गुरुजी, माःआन हवे।)

¹⁷ हनते ईसू कतातेड, “ईंग अपांग भगवान एचेरे अरीनिंग सेना। हनालगा आम ईंग अहम साब रहावकायिंग। मनदो आम ईंगरिकुःआ वपक बोपोहकूतिंग एचेरे सेनेकियानखन हँकू एचेरेम कता उदुःगोड, ईंगरीग अरू अपेरीग अपांग अरू ईंगरीग अरू अपेरीग भगवान एचेरे सेरमोयिंग सलाःतना, माःआन।”

¹⁸ हनते मगदलियायिन मरियम सेनेकियानखन चेलाकूतेने कता उदुःवातेरा, “ईंग परबूयिंग ञेलतेरा।” हनते हाँय होयानेना हना जमाकून हँकू एचेरेय कता उदुःतेरा।

ईसू चेलाकू एचेरेय एचे ञेलनेना

¹⁹ हनानाः एतवार दिन सिंगाड़ मेला, चेलाकू एहूदाकूरिकुःआ मूक होड़कूराः बोतोरते ओड़ाःरे सींग रेडतोकू दोहोना। दो ईसू हंडाय वेजेडा अरू हँकू तलारे चड़ाँनेनखने कतावाकुःआ, “भगवान अपेराः जीवे सलसतगे।”

²⁰ नाःआ इया कतातेडखन हाँय आँयगराः तिःई अरू पंजर हँकूय उदुःवातेरा। दो हँकू ईसू सिनहातेडखन मुरुककू अहाल-बहालयान।

²¹ दो ईसू अरूय कतातेरा, “भगवान अपेराः जीवे सलसतगे। अपांग ईंगे वारकेरा, हनन इया ईंग अपे होयिंग वारपेतना।”

²² नाःआ इया कतातेड तयोमरे हाँय हँकू ओंगतेडखने कताया, “सुद बिरुवा नापे।

²³ अपे तोनोंगीग होड़राः कसूरपे बराव एंडागोड दो, हाँयराः कसूर भगवान बराव एंडागोडता। मनदो तोनोंगीग होड़राः कसूर अपे मेरपे बराव एंडाय, हाँयराः कसूर भगवान ओरोय बराव एंडातेरा।”

ईसू तोमा एचेरेय एचे ञेलनेना

²⁴ मनदो बारहगोटोंग चेलाकू अते मी होड़ दिदिमूस माःआनकू कतावाया हाँयग तोमा, ईसू वेगनेना हनमेला हँकू सुदा मेरेय दोहोगान।

²⁵ तयोमरे एटाः चेलाकू हाँय एचेरेकू कतातेड, “अले ईसूले ञेलतेरा।” मनदो हाँय हँकू एचेरेय कताया, “ईंग हाँयराः तिःईरे काटीराः दुलूयिंग ञेल अरू हना दुलूरे ईंगराः अंगरी मेरिंग सोलोंगे अरू हाँय पंजररे ईंगराः तिःई मेरिंग सोलोंगे वरी ईंग ओरोयिंग बिसवासतेरा।”

²⁶ आठ दिन तयोमरे ईसूरिकुःआ चेलाकू ओड़ाः पेंदारेकू दोहोना। अरू हँकू सुदा तोमा होंय दोहोना। हना ओड़ाःराः दुवार सींगतो दोहोना। हननमेला ईसू वेगनेना अरू हँकू तलारे चड़ाँनेनखने कतातेरा, “भगवान अपेराः जीवे सलसतगे।”

²⁷ हनते हाँय तोमा एचेरेय कतातेरा, “आमराः अंगरी ईंग तिःईरे सोलोंग सोयमे अरू आमराः तिःई ईंग पंजररेम सोलोंगगे। आम बार जीव ओंगोल होड़ अहम होयाः अरू ईंग एचेरेम बिसवासगे।”

²⁸ दो तोमा कतातेड, “ने ईंगरीग परबू अरू भगवान।”

²⁹ हनते ईसू हाँय एचेरेय कतातेड, “आम ईंगमे ञेलकेरा, हनालगाम बिसवासकेरा जा? बेगर ञेलतेकू बिसवासगेता हँकुःआ होड़कूराः जीव भगवान ननपायगेता।”

नाःआ कागदराः मतलोब

³⁰ ईसू आँयग चेलाकू मड़ंगरे मुरुक बगरा बयाव जुवाः इयाःआ बुताकूने एचेतेरा। मनदो हना जमाकून नाःआ कागदरे ओजाःतो कोवानेःआ।

³¹ मनदो ईसू, भगवानरीग बेटात, मसी हवे माःआन अपे बिसवासगोड ञवन घड़ीन हाँयराः ञावते जीवपे पवाः लगा नाःआ जमा कताकून ओजाःतो इदा।