एहुना 19 - Korwa Bible

¹ हनते पिलातूस ईसू गुरुंदतेय एचे ञेडतिरिया।

² दो सइना होड़कू जनुम उयिंगतेडखन हाँयराः बोःरेकू पगरीगोतेड अरू धुः-धुमइल रंगाः सोनहेकू तुसिंगतिरिया।

³ हनते हँकू हाँय एचेरे वेग घड़ीनकू लंदावाया, “ने एहूदाकूरीग राजा, सलाम सलाम।” अरू हाँयकू चपड़गेया।

⁴ दो पिलातूस बहरी उडुंगनेनखन एहूदाकूरिकुःआ मूक होड़कू एचेरे अरूय कताया, “ञेलेयपे, नाँयग होड़ एचेरे ईंग तोनोंगाः गारबार मेरिंग ञामगरा। हनलगा हाँय अपे एचेरे अरूयिंग उडुंग अगूगेयतना।”

⁵ ईसू जनुमराः पगरी अरू धुः-धुमइल रंगाः सोनहे तुसिंगतो बहरीय उडुंगनेन दो पिलातूस हँकू एचेरेय कतातेरा, “ञेलेयपे, हनाँयग होड़ नंडा इदानिया।”

⁶ मरंग पुजउरीकू अरू हातपात होड़कू ईसूकू ञेला दो हँकू मुरुक सटीतेकू कताया, “नाँय कुरूसरेम एचे ठोंकावगेय, कुनुरूसरेम एचे ठोंकावगोडेय।” मनदो पिलातूस कतातेरा, “ईंग नाँय एचेरे कहिसाः कसूर मेरिंग ञामगडा। हनालगा अँननपे गोःकिडिगखन कुरूसरेपे ठोंकावगेय।”

⁷ हनते एहूदाकूरिकुःआ मूक होड़कू कताया, “अलेराः हों नियमकून इदा। नाँयग होड़ अनँयग आँयगते भगवानरीग बेटा माःआने कताकिया। हनालगा नाँयग होड़ हना नियमकून इया ञेड गोजेय लगा इदा।”

⁸ नाःआ अयूमकेडखन पिलातूस अरूय बोरोयान,

⁹ अरू गड़ही पेंदारेय बोलोयान अरू ईसू एचेरेय होंबोरतेरा, “आम करेयीग हवे?” मनदो ईसू तोनोंग माःआन मेरेय सालगान।

¹⁰ दो पिलातूस कतातेड, “ईंग एचेरे चिला लगा मेरेम सालतना? आम अड़ाःमे लगा अरू कुरूसरे एचे ठोंकावमे लगा हों ईंग एचेरे हातपात इदा, हना कता आम मेरेम सुदीयतना जा?”

¹¹ दो ईसू कता कुदातेरा, “भगवान आम हातपात मेरेय ओवाकेःमे दो ईंग एचेरे आमराः कही हातपात ओरो होयाकुःआ। हनालगा आम एचेरे ईंगे जिमाकेरा, हाँयग होड़राः कसूर मुरुक बगरा इदा।”

¹² हना वरीते ईसू अड़ाःगेय लगा पिलातूस मुरुके कुरनिसतेरा, मनदो एहूदाकूरिकुःआ मूक होड़कू मुरुक सटीतेकू कताया, “आम नाँयग होड़मे अड़ाः दो आम कइसर राजारीग सउंगता ना लवे। तोनोंगीग होड़ अनँयग राजा माःआने कतानता हाँय, रूमी राजा कइसररीग मुदइ होड़े दोहोनता।”

¹³ नाःआ कता अयूमतेडखन पिलातूस ईसू बाहरीय अगूतिरिया। हंडा दिरि दूर ञावराः मीटोंग ततेर दोहोना, अरू इबरानी भासीरे गबबाता माःआनकू कतावाता। हंडा हाँय फड़ियावगे लगा गदीरेय दुड़ुःनेना।

¹⁴ हनमेला तिकिन बेला दोहोना अरू हना दिन पसहा परोब लगा सपड़ावगुःराः दिन दोहोना। दो पिलातूस कतातेड, “ञेलेयपे, ननाँय अपेरीग राजा हवे।”

¹⁵ मनदो हँकू मुरुक सटीतेकू कताया, “गोनोनोःयायमे! नाँय कुरूसरेम एचे ठोंकावगेय।” दो पिलातूस होंबोरतेरा, “अपेरीग राजा कुरूसरेयिंग एचे ठोंकावगोडेय जा?” दो मरंग पुजउरीकू कतातेड, “कइसर राजा अते एटाः अलेरीग तोनोंगीग राजा कोनोवाया।”

¹⁶ हनते पिलातूस ईसू कुरूसरे एचे ठोंकावगेय लगा रूमी सइना होड़कू एचेरेय जिमागोतेडीग।

कुरूसरे ईसूराः एचे ठोंकाव

¹⁷ हनते हँकू ईसूकू गोःयाडीग अरू हाँय अनँयग कुरूस रेमतेडखन एरुसलेम सहर अते इबरानी भासीरे गुलगुता माःआनकू कतावाता, हना बोः खुरपीराः ततेर अगीय सेनेडा।

¹⁸ हंडा हँकू ईसू सुदा एटाः बार होड़किन हों कुरूसकूनरेकू ठोंकावतेडकिना, मी होड़ खउना गतर अरू मी होड़ डिरही गतर अरू हँकिन तलारे हँकू ईसूकू ठोंकावतेरा।

¹⁹ पिलातूस ईसू बदीरे मीटोंग जाः सरवन एचे ओजाःतेडखन हना कुरूसरेय एचे ठोंकावतेरा। हना सरवन नाःआ इया ओजाःतो दोहोना, नसरेतरीग ईसू, एहूदाकूरीग राजा।

²⁰ इबरानी, उनानी अरू लतीन भासीकूनरे हना सरवन ओजाःतो दोहोना अरू कुरूसरे ईसूकू ठोंकावतिरिया हना ततेर एरुसलेम सहरते लेनेसानरे दोहोना। हनालगा मुरुक बगरा एहूदाकू हना सरवनकू बछाव अवेना।

²¹ दो हनते एहूदाकूरिकुःआ मरंग पुजउरी होड़कू पिलातूस एचेरेकू कताया, “एहूदा होड़रीग राजा माःआन अहम ओजाःगे, मनदो नाःआ इयाम ओजाःगे, ईंग एहूदाकूरीग राजा हवे माःआने कतातेरा।”

²² दो पिलातूस कतातेरा, “ईंग ओजाःकेरा, हनायिंग ओनोजाःगोतेडा।”

²³ सइना होड़कू ईसूकू ठोंकावतेड तयोमरे हाँयराः तोलेगतो जमा सोनहेकून गोःतेडखन मेमेड होड़ लगा मेमेडटोंग होयाः लगा चइर बंटाकू हटिंगतेरा। मनदो हाँयराः सेरमो तुसिंगतो सोनहे सेरमो अते लतार वरी बेगर सोःतो दोहोनेना।

²⁴ हनालगा हँकू अँननकू अँकू कता होड़ेंगनेना, “अबू नाःआ अहाबू सिरावगे। मनदो नाःआ सोनहे इयेराः होयाःता हना सुदी लगाबू चीट-पोटगेता।” भगवानराः कागदरे ओजाःतो इया होनोयाः लगा नाःआ इया होयानेना। हँकुःआ होड़कू ईंगराः सोनहे लगाकू चीट-पोटतेरा, अरू ईंगराः सोनहे अँननकू हटिंगयान। दो सइना होड़कू हनन इयाकू एचेतेरा।

²⁵ ईसू कुरूसरे ठोंकावतोय दोहोना, हंडा हाँयरीग एंगात अरू इहड़ोएंगतो, कोलोपासरीग एंगातुकू मरियम अरू मगदलियायिन मरियम, नँकुःआ जमाकू हंडा चड़ाँतकू दोहोना।

²⁶ ईसू आँयग एंगात अरू आँयग दुलारगेया हाँयग चेला सुदा चड़ाँत ञेलतेडकिनखन एंगात एचेरेय कतातेरा, “ने अया, ञेलेयमे, ननाँय हवे आमरीग बेटा।”

²⁷ हनते हाँय आँयग चेला एचेरेय कतातेरा, “ननाँय हवे आमरीग अया।” हना वरीते हाँयग चेला ईसूरीग एंगात अनँयग ओड़ाःरेय गोःयाडीग।

ईसूराः गुजुः

²⁸ ईसू ईंगराः सेवा चबायना माःआने सुदीतेडखन भगवानराः कागदरे ओजाःतो इदा हना कता होनोयाः लगाय कतातेरा, “ईंग ततंगकिरिंगा।”

²⁹ हंडा अंबटतो अंगूरराः रस मीटोंग भंडारे दोहोना। दो हँकू रुवा हना रसरे जोबरावतेडखन जूफा ञावराः टटकाःरे हना रस ईसू ञूय लगाकू एमेतेरा।

³⁰ दो ईसू हना रस ञूयतेडखने कतातेरा, “ईंगराः बुतायिंग चबागोतेडा।” हनते हाँय बोः हुटूतेडखन आँयगराः हनसाय अड़ाःगोतेड।

³¹ हना दिन पसहा परोब लगा सपड़ावगेराः दिन दोहोना। एटाः दिन मरंग लोड़ोनराः दिन दोहोना। हनालगा हना दिन एहूदाकू तोनोंगीग गोएगतो होड़ कुरूसरे मेरकू दोहो ओवाया। दो हँकू पिलातूस एचेरेकू कतातेरा, “ने साहेब, कुरूसरेकू ठोंकावकेडकुःआ हँकुःआ होड़कूराः काट एचे टोटाः एंडाकेडखन हँकूराः मुरदाम एचे उतराव एंडागोड।”

³² हनते सइना होड़कू सेनेकियानखन हँकुःआ होड़ अते मी होड़राः काटकू टोटाः एंडागोतेड। हनन इया ईसू सुदा कुरूसरे ठोंकावतोय दोहोना, हाँयग एटाः होड़राः काट होंकू टोटाः एंडागोतेड।

³³ मनदो हँकू ईसू एचेरेकू सेनेडखन हाँय गोएगतोकू ञेलतिरिया दो हाँयराः काट मेरकू टोटाःगाड,

³⁴ मनदो सइना होड़कू अते मी होड़ ईसूराः पंजररे खरदातेय सोबोःगोतेडीग अरू हननमेला बलंगी अरू दाः उडुंगनेना।

³⁵ नाःआ कागदिंग ओजाःगेतना, ईंग हना जमाकूनिंग ञेलतेरा, अरू ईंग सनाताय हिदइतिंग कता उदुःगेतना, जेमहा अपे हों नाःआ कताकून बिसवासकेडखन ईसू एचेरेपे बिसवास अवेय।

³⁶ भगवानराः कागदरे ओजाःतो इदा हनन इया होनोयाः लगा नाःआ होयानेना। हाँयराः तोनोंगाः जांग ओरोकू टोटाःतेरा,

³⁷ अरू एटाः ततेररे नाःआ इया ओजाःतो इदा, हाँयकू सोबोःतेरा, हँकुःआ होड़कू हाँय अगीकू ञेलता।

ईसूराः मुरदा लात पेंदारेकू अदेरगोतेड

³⁸ अरमतिया सहररीग उसूप ञावीग मी होड़ होड़ दोहोना। हाँय हों ईसूरीग चेलाय दोहोना। मनदो एहूदाकूरिकुःआ मूक होड़कूराः बोरते हना कता हाँय ओकोतेरा। दो हाँय पिलातूस एचेरे ईसूराः मुरदा गोःगे लगाय असेतेरा। हनते पिलातूस मुरदा गोःया लगाय एमेवागोतेडीग।

³⁹ मड़ंग ईसू एचेरे रइत मेलाय वेगा हाँयग निकुदिमूस हों हाँय सुदाय दोहोना। हाँय अंदांज पचास सेर गोंदावतो गंदरस अरू एलवा ञावराः नपाय महक जिनिसकूने अगूतेरा।

⁴⁰ एहूदाकूराः रिती-बिधी इया हँकिन नपाय महका हना जिनिसकून कफन सोनहेते ईसूराः मुरदारे मोड़हाव रेडगोतेडकिन।

⁴¹ ईसू कुरूसरेकू ठोंकावतिरिया हना ततेरराः लेसान मीटोंग बगइचा दोहोना। अरू हनानाः बगइचारे मीटोंग दिरिराः तुलात लात दोहोना। हना नँवा लातरे कहियो तोनोंगाः मुरदा मेरकू अदेरगतेरा।

⁴² हना दिन एहूदाकूराः लोड़ोनराः दिन लगा सपड़ावगुःराः दिन दोहोना अरू हना दिरिराः लात लेसानरे दोहोना। हनालगा हँकू हनानाः लातरे ईसूराः मुरदाकू अदेरगोतेड।