एहुना 18 - Korwa Bible

ईसूराः एचे साब

¹ नाःआ इयाय अरजीतेड तयोमरे ईसू, आँयग चेलाकू सुदा किदरोन झरी मार परोम तोराकू। हंडा मीटोंग बगइचा दोहोना अरू ईसू अरू आँयगरिकुःआ चेलाकू हंडाकू बोलोयान।

² ईसू अरू आँयगरिकुःआ चेलाकू हंडाकू सेन वेगा। हनालगा ईसूय एचे साबतेरा हाँयग जूदा हों हना ततेरे सुसुदीःआ।

³ दो जूदा रूमी देसरिकुःआ अदोम सइना होड़कू अरू मरंग पुजउरी होड़कू अरू फरीसी होड़कू वारतेडकुःआ हँकुःआ भगवानराः ओड़ाःरिकुःआ अगुरादार होड़कूय अविर अगूतेरा। अरू हँकुःआ होड़कू मुरीकून, ढिबरीकून अरू अवजारकून साबतेडखन हंडाकू सोदोरयान।

⁴ होनोयाः लगा दोहोना हना जमाकून ईसू सुदीतेरा अरू हँकू एचेरे सेनेडखने होंबोरतेडकुःआ, “अपे इयेपे ञामतना?”

⁵ दो हँकू कतातेड, “नसरतरीग ईसू।” दो ईसू हँकू एचेरेय कतातेड, “ईंग हवे।” (ईसूय एचे साबतेरा हाँयग जूदा हों हंडा हँकू सुदाय दोहोना।)

⁶ ईंग हवे माःआन ईसू कतातेड अरू हननमेला हँकुःआ होड़कू ओतरेकू तेके चुवेरयान।

⁷ दो ईसू अरूय होंबोरतेड, “अपे इयेपे ञामतना?” अरू हँकू कतातेड, “नसरेतरीग ईसू।”

⁸ हनते ईसू कतातेड, “अपे एचेरे ईंग हवे माःआनिंग कतातेरा, हाँय दो इनिंग हवे।”

⁹ ईसू मड़ंगरेय कतातेरा, आम ईंगमे एमेवातेरा, हँकुःआ होड़कू अते मी होड़ हों मेरिंग केड़ेगाडकू। हना कता नुँहू होनोयाः लगा नाःआ इया होयाकिया।

¹⁰ सिमोन पतरस एचेरे मीटोंग तलवइर दोहोना। अरू हना ओर उडुंगतेडखन मूक पुजउरीरीग सेवादारराः लुतूरे तपेगबाःगोतेड। (हाँयग सेवादारराः ञाव मलकूस दोहोना।)

¹¹ हनते ईसू पतरसे हुकुमवातेरा, “आमराः तलवइरमे दोहोयता हना थुइलारेम सोलोंगगोड। ईंग सहाव पारगे लगा भगवान ईंग लगाय एमेकेरा हना कटसिया ईंग सहावगे लगा कोवानेःआ जा?”

अना एचेरे ईसूकू गोःयाडीग

¹² हनते हँकुःआ सइना होड़कू अरू अँकूरीग हातपात होड़ अरू भगवानराः ओड़ाःरिकुःआ अगुरा होड़कू ईसू तोलतिरिगखनकू साब गोःयाडीग।

¹³ हँकू हाँय कइपारीग होँयहारतो, अना एचेरेकू गोःतिरिया। कइपा, हना बरिसरे एहूदाकूरीग मूक पुजउरी होड़े दोहोना।

¹⁴ अरू जमा होड़कू लगा मी होड़ गुजुः दो नपाय दोहोनता माःआन, एहूदाकूरिकुःआ मूक होड़कू सलाहे एमेवातेडकुःआ हाँयग होड़ दोहोना कइपा।

पतरस ईसूय आड-बेकारवाया

¹⁵ सिमोन पतरस अरू मी होड़ एटाः चेला हों ईसूराः देह दूरकिन ओतोंग वेगा। हाँयग एटाः चेला मूक पुजउरीरीग सिनहात होड़े दोहोना। हनालगा ईसूकू गोः बोलोतेरा हना मूक पुजउरीराः ओड़ाः राचरे हाँयकू बोलो ओवातिडिया।

¹⁶ मनदो पतरस हता दुवार बहरीरे चड़ाँतेय दोहोना। अरू मूक पुजउरीरीग सिनहात चेलातेन उडुंगनेन अरू दुवाररेय अगुराःआ हाँयग अइमी एचेरे कता उदुःतेडखन पतरस राच अगीय गोः बोलोयडीग।

¹⁷ दो दुवाररेय अगुराःआ हाँयग अइमी पतरसे होंबोरतेरा, “आम हों हाँयग होड़रीग चेलाकू अते मी होड़ ना लवे जा?” दो हाँय कता कुदातेरा, “ईंग ना लवे।”

¹⁸ ररंगराः दिन दोहोना अरू सेवकियाकूतेन अरू भगवानराः ओड़ाःरिकुःआ अगुरा होड़कू कोयला बाल हसातेडखन चइरो गतर चड़ाँकियानखनकू एलांगगुःआ। दो पतरस हों हँकू सुदा चड़ाँकियानखन सेंगेलरेय एलांगगुःआ।

मूक पुजउरी ईसू एचेरेय होंबोरतेरा

¹⁹ हनमेला मड़ंगरे मूक पुजउरीय दोहोना हाँयग अना, ईसू एचेरे चेलाकूतेन अरू हाँयराः चेड बदीरेय होंबोरतेरा।

²⁰ ईसू हाँय एचेरेय कतातेरा, “ईंग जमा होड़कू मड़ंगरेयिंग कता उदुःतेरा। एहूदाकू जुमाःता हना अरजी ओड़ाःकूनरे अरू भगवानराः ओड़ाःरेयिंग कता उदुःतेरा अरू ओकोकियानखन तोनोंग इया मेरिंग कतागरा।

²¹ दो आम चिला लगाम होंबरेयिंगतना? अयूमकेराकू हँकुःआ होड़कू एचेरेम होंबरे ईंग चेले माःआनिंग कताकेरा?”

²² ईसू नाःआ इयाय कतातेड दो ईसू कुटीरे चड़ाँतेय दोहोना भगवानराः ओड़ाःरीग मी होड़ अगुरा होड़ चपड़तिरिगखने कताया, “मूक पुजउरी एचेरे आम नाःआ इयाम कतायता जा?”

²³ दो ईसू कतातेड, “ईंग तोनोंग इयाःआ गारबारिंग कताकेड दो हनाम कता उदुःगे। मनदो ईंग सतायिंग कताकेरा दो चिला लगा ईंगमे चपड़केरा?”

²⁴ हनते अना ईसू तोनोलतो मूक पुजउरी कइपा एचेरेय वारगोतेडीग।

पतरस ईसू अरूय आड-बेकारवातेरा

²⁵ सिमोन पतरस चड़ाँकियानखन सेंगेले एलांगगुःआ दो मी होड़ हाँय एचेरेय होंबोरतेरा, “आम हों हाँयरिकुःआ चेलाकू अते मी होड़ हवे जा?” दो हाँय ईसू आड-बेकारवातिरिगखने कताया, “ईंग ना लवे।”

²⁶ पतरस बगइचारे लुतूरे तपेग एंडागोतेरा हाँयग होड़रीग नसी-नता होड़ मूक पुजउरीरीग सेवकिया होड़ दोहोना। दो हाँय होंबोरतेड, “ईंग हाँय सुदा बगइचारे मेरिंग ञेलगाडमे जा?”

²⁷ पतरस अरूय आड-बेकारवातिरिया अरू हननमेला कुकुड़ा कुकूड़चुःनेना।

पिलातूस मड़ंगरे ईसू

²⁸ हनते एहूदा होड़कूरिकुःआ मूक होड़कू ईसू कइपाराः ओड़ाः अते रूमी देसरीग हातपात होड़ पिलातूसराः गड़हीरे अंगुः बेलाकू गोःतिरिया। हँकू, छेप जुवाःताबू, माःआनते गड़हीरे मेरकू बोलोगान, जेमहा हँकू पसहा परोबकू मनाव अवेन।

²⁹ दो पिलातूस हँकू एचेरे बहरी उडुंगनेनखने होंबरेःआ, “अपे नाँयग होड़ चेले माःआनपे बदीगेयतना?”

³⁰ दो हँकू कतातेड, “नाँय कसूर होड़ मेरेय दोहोकुः दो अले आम एचेरे चिला लगाले अगूकेया?”

³¹ दो पिलातूस कतातेरा, “नाँय गोःयायपे अरू अपे अँननपेराः नियम इया नाँयपे फड़ियावगेय।” दो एहूदा होड़कूरिकुःआ मूक होड़कू हाँय एचेरेकू कतातेड, “तोनोंगीग होड़ ञेड एंडा लगा अले एचेरे हातपात कोवानेःआ।”

³² ईसू अनँयग गुजुःराः बदीरेय कतातेरा हना इया होनोयाः लगा नाःआ इया होयानेना।

³³ दो पिलातूस गड़ही पेंदारेय बोलोयान अरू ईसू एचे राःतिरिगखने होंबोरतिरिया, “आम एहूदाकूरीग राजा हवे जा?”

³⁴ दो ईसू कतातेड, “नाःआ कता अनम ओंगोलकेडखनमे कतायतना जा एटाः होड़कू ईंग बदीरे आम एचेरेकू कतातेरा?”

³⁵ हनते पिलातूस कतातेरा, “ईंग एहूदा होड़ हवे जा? अनमरिकुःआ होड़कू अरू मरंग पुजउरी होड़कू आम ईंग एचेरेकू अगूकेडमेःआ। उदगेमे, आम चिलाम एचेकेरा?”

³⁶ दो ईसू कता कुदातेरा, “ईंग राइजगे दो नाःआ चउंदीसरे ईंगराः राइज ना लवे। ईंग नाःआ चउंदीसरेयिंग राइजकेः दो ईंगरिकुःआ होड़कू ईंग लगा कड़ीगकियानखन नँकुःआ एहूदा होड़कूरिकुःआ मूक होड़कूराः तिःईतेकू बनसावकिंगा। मनदो ईंगराः राइज नंडाःआ ना लवे।”

³⁷ हनते पिलातूस कतातेड, “दो आम राजा हवे जा?” दो ईसू कतातेड, “आम कतायतना, ईंग राजा हवे। ईंग सतायराः बदीरे कनाता लगा नाःआ चउंदीसरे जनमावनेनखनिंग वेगकिया। सतायरेय बिसवासगेता हाँयग होड़ ईंगराः कताय मनाःता।”

³⁸ दो पिलातूस होंबोरतेड, “सताय चिला हवे?” हनते हाँय एहूदा होड़कूरिकुःआ मूक होड़कू एचेरे बाहरी अरू सेनेडखने कताया, “हाँय एचेरे तोनोंगाः गारबार मेरिंग ञामगडा।

³⁹ मनदो पसहा परोब मेला अपेराः रिती-बिधी इया, ईंग अपे लगा मी होड़ तोलतो होड़िंग अड़ाःगोडेयता। अपे चाहाःतनापे जा ईंग एहूदाकूरीग राजा अपे लगायिंग अड़ाःगोडेय?”

⁴⁰ दो हँकू मुरुक सटीतेकू कतातेड, “नाँय कोवान। अले लगा बराबा अड़ाःगोडेयमे।” अरू हाँयग बराबा लुलुड़ी होड़े दोहोना।