एहुना 16 - Korwa Bible

¹ अपे बिसवास अहापे अड़ाःगे लगा नाःआ कता अपे एचेरेयिंग कता उदुःकेरा।

² हँकू अपे अरजी ओड़ाःकून अतेकू उडुंग एंडागोडपेता। मी बेला निचकाःतना अरू हनमेला हँकू अपेकू ञेड एंडागोडपेता अरूकू ओंगलेता, अले भगवानराः सेवाले सेवातना, माःआन।

³ हँकू ईंग अरू ईंग अपांग मेरकू सुदीयतना। हनालगा हँकू अपे एचेरे नाःआ इयाकू एचेयता।

⁴ नाःआ जमा होनोयाः बेला अपे उहियार अगूय लगा अपे एचेरे नाःआ कतायिंग कता उदुःकेरा। ईंग अपे सुदायिंग दोनोहोना। हनालगा मड़ंगरे नाःआ कता ईंग अपे एचेरे मेरिंग कतागाड।

सुद बिरुवाराः बुता

⁵ मनदो नुँहू ईंगे वारकेरा हाँय एचेरेयिंग सेनतना। हनारे हों अपे अते तोनोंगीग ईंग एचेरे ओरोपे होंबोरतेरा, आम करम सेनतना, माःआन।

⁶ नाःआ कता अपे एचेरेयिंग कतागोतेरा। हनालगा अपेराः जीव हुडिंगयना।

⁷ मनदो अपे एचेरे ईंग मीटोंग सताय कतायिंग कतायतना, ईंग सलाःतना दो, अपे लगा नफा होयाःता। ईंग मेरिंग सेन दो संघरादार अपे एचेरे ओरोय वेजेडा। मनदो ईंग सेन दो, हाँय अपे एचेरेयिंग वारगोडेयता।

⁸ सुद बिरुवा वेग दो चउंदीसरिकुःआ होड़कू एचेरे कसूर बदीरे अरू बेगर गारबारतेःआ जीव जियाः बदीरे अरू फड़ियावराः बदीरे सताय कताय उदुःवाकूता।

⁹ होड़कू ईंग एचेरे मेरकू बिसवासगेता, हनालगा सुद बिरुवा अँकूराः कसूर बदीरे उदुःवाकूता।

¹⁰ ईंग अपांग एचेरेयिंग सलाःता अरू हनाते अपे ओरोपे ञेल अवेतिरिंगा। हनालगा बेगर गारबारतेःआ जीव जियाः बदीरे सुद बिरुवा उदुःवाकूता।

¹¹ चउंदीसरीग राजा कलउ डंडियावगेय लगायिंग फड़ियाव दोहोकेरा। हनालगा सुद बिरुवा फड़ियाव बदीरे होड़कूय उदुःवाकूता।

¹² अपे एचेरे ईंगके अरू मुरुक बड़रा ककाता इदा। मनदो नुँहू हना कता अपे ओरोपे ओंगोल बुझाव अवेनेना।

¹³ मनदो सतायराः बिरुवा वेग दो अपे जमा बरानाः सताय दूरे उदुःवापेता। हाँय अनँयग ओंगोलते ओरोय कतातेरा। मनदो हाँय अयुमेता हनानाःए कता उदुःगेता अरू दरवाःआ हना कताकून होंय कता उदुःगोडता।

¹⁴ हाँय ईंग अतेय अयूमगेता हना कताकून अपे उदुःवाडखन ईंगे मान मरजइतता।

¹⁵ अपांग एचेरे इदा हना जमाकून ईंगराः हवे। हनालगा ईंग मड़ंगरेयिंग कताकेरा, हाँय ईंग अतेय अयूमगेता हना कताकून अपेय उदुःवापेता, माःआन।”

उसियाड़ी बहालरे बदलाव जुवाःता

¹⁶ हनते ईसू अरूय कताया, “अरू गुनहोन बेला तयोमरे अपे ईंग ओरोपे ञेल अवेतिरिंगा, अरू हना देहोरते अपे ईंगपे ञेल अवेता।”

¹⁷ हनते ईसूरिकुःआ अदोम चेलाकूतेन कता होड़ेंगा, “ईंग अपांग अगीयिंग सेनता, हनालगा अरू गुनहोन बेला तयोमरे अपे ईंग ओरोपे ञेल अवेतिरिंगा। अरू हना देहोरते अपे ईंगपे ञेल अवेता, माःआने कतायता दो हनाराः मतलोब चिला हवे?

¹⁸ हनालगा हँकू कतातेड, गुनहोन बेला, माःआने कतायता, हनाराः मतलोब चिला हवे? अले मेरले ओंगोल बुझाव अवेनतना।”

¹⁹ हँकू ईंग एचेरे होंबरे लगाकू चहाःतना माःआन ईसू सुदीतेडखन हँकू एचेरेय कतातेरा, “ईंग कता उदुःकेरा, अरू गुनहोन बेला तयोमरे अपे ईंग ओरोपे ञेल अवेतिरिंगा, अरू हना देहोरते अपे ईंगपे ञेल अवेता, हना कता बदीरे अँननपे अपे चिला लगापे होंबोर होड़ेंगतना?

²⁰ अपे ईंगपे अयूम! अपे फिकीर घड़ीनपे इयामता, मनदो चउंदीसरिकुःआ होड़कू बहाल जुवाःताकू। अपे नुँहू उसियाड़ी जुवाःतापे, मनदो अपेराः उसियाड़ी अतेपे बनाहाल जुवाःता।

²¹ सवाड़ीगुः मेला अइमीकू मुरुक हसूरेकू दोहोनता, मनदो मी होड़ लँइग जनमाव जुवाःता हना तयोमरे हना हसूय लिड़िंगोडता।

²² हनन इया नुँहू अपे उसियाड़ीकिया, मनदो अपे सुदा अरूयिंग जुमाःता अरू अपेराः जीव बहाल जुवाःता। नाःआ बहाल तोनोंगीग अपे अते ओरोकू चलाः अवेतेरा।

²³ हनमेला अपे ईंग एचेरे तोनोंगाः अअसे लगा कोवानेःआ। अपे ईंगपे अयूम! अपे ईंगराः ञावते कहिसाः ईंग अपांग एचेरेपे असेय दो, हना हाँय एनेमेवापेता।

²⁴ नुँहू वरी अपे ईंगराः ञावते कहिसाः मेरपे असेगरा। अपेराः जीव अहाल-बहाल जुवाः लगा ईंगराः ञावतेपे असेय, दो पवाव जुवाःतापे।

ईसू जितावतो इदानिया

²⁵ नुँहू वरी ईंग अउल-तउल कतायिंग कताकेरा। मनदो ईंग अपे एचेरे अउल-तउल कता ओरोयिंग कतातेरा अरू ईंग अपांग बदीरे मीसुटीयिंग कता उदुःवापेता हना बेला निचकाःतना।

²⁶ हना दिन अपे बदीरे ईंगके अपांग एचेरे अअसे लगा कोवानेःआ। अपे अँननपे ईंगराः ञावतेपे असेयता।

²⁷ ईंग अपांग अगीतेयिंग वेगकिया, हना अपे बिसवासकेडखन ईंगपे अलार-दुलारकेरा। हनालगा ईंग अपांग अपे होंय अलार-दुलारता।

²⁸ ईंग अपांग अगीते नाःआ चउंदीसरेयिंग वेगकिया। ईंग नाःआ चउंदीस अड़ाःकेडखन ईंग अपांग एचेरे अरूयिंग सेनता।”

²⁹ दो चेलाकूतेन हाँय एचेरेकू कतातेड, “अहाँ! नुँहू दो आम बेगर अउल-तउलते मीसुटीम कतागोतेडा।

³⁰ तोनोंगीग आम एचेरे तोनोंगाः होहोंबोर लगा कोवानेःआ। नुँहू अले सुदीगोतेडाले, आम जमा बरानाःम सुदीयतना। ननानाः अते अले बिसवासगेतना आम भगवान अगीतेम वेगकिया, माःआन।”

³¹ नाःआ अयूमतेडखन ईसू हँकू एचेरेय कतातेरा, “अपे नुनुँहूपे बिसवासगेतना जा?

³² ईंगपे अयूम! अपे जमाकू सितिर-बितिर जुवाःता अरू ईंग अड़ाः एंडाकेडखन अपे अँनपे अपेराः दूरपे सलाव जुवाःता हना बेला निचकाःतना। मनदो ईंग अपांग ईंग सुदा इदानिया, हनलगा ईंग ओरोयिंग एकलानेना।

³³ ईंग अते अपेराः जीव सलसतरे दोहोन लगा नाःआ कता अपे एचेरेयिंग कता उदुःकेरा। चउंदीसरे अपे लगा गराह गिराह अरू कटसिया होयाःता, मनदो ईंग नाःआ जमाकूनते जितावतो इदानिंगा। हनालगा अपे डीड़तेपे दोहोन।”