एहुना 14 - Korwa Bible

ईसू अनँयग मूक चेलाकूय कता बहालगोडता

¹ ईसू अनँयग चेलाकू एचेरेय कतातेरा, “अपेराः इंदरी अहापे कुंभलावगे। भगवान एचेरेपे बिसवासगे अरू ईंग एचेरे होँपे बिसवासगोड ञवन।

² ईंग अपांग ओड़ाःरे मुरुक छिनाकून दोहोन लगा इदा। हना सताय मेर दोहोकुःआ दो ईंग अपे एचेरेयिंग कतागोडकेःआ। अरू ईंग हंडा अपे दोहोन लगा ततेर तुला लगायिंग सेनतना।

³ हंडा ततेरिंग तुलागोड दो ईंग कुदा वेगकियानखन अपेयिंग गोःयापेता अरू ईंग दोहोनता हना ततेररे अपे होँपे दोहोनता।

⁴ अरू ईंग सलाःतना हना ततेर सुदरुराः दूर अपे सुदीयतना।”

⁵ हनते तोमा ईसू एचेरेय होंबोरतेड, “ने परबू, अले मेरले सुदीयतना आम करेम सेनता, दो अले करा उड़ी दूरले सुदीय?”

⁶ दो ईसू कतातेड, “दूर, सताय अरू जीव इनिंग हवे। ईंग अड़ाःकेडखन ईंग अपांग भगवान एचेरे तोनोंगीग ओरोय सेने अवेनेना।

⁷ अपे ईंगपे सुदीकेःआ दो ईंगरीग अपांग होँपे सुदीकेःआ। मनदो नुँहू वरीते अपे हाँयपे सुदीयतना अरू हाँय होँपे ञेलकिरिया।”

⁸ दो पिलिपूस कतातेरा, “ने परबू, अपाममे उदुःवाले। ननानाः अते अले संतोक जुवाःता।”

⁹ हनते ईसू कतातेड, “ने पिलिपूस, ईंग मुरुक दिन वरी अपे सुदा इदानिंगा अरू नुँहू वरी आम ईंग मेरेम सुदींगतना जा? ईंगे ञेलकेरा हाँयग होड़ ईंग अपांग होंय ञेलकेरा। दो आम करा इयाम कतायतना, अपाममे उदुःवाले, माःआन।

¹⁰ आम मेरेम बिसवासगेतना जा, ईंग अपांग सुदा मिनी इदानिंगा अरू अपांग ईंग सुदा हों मिनी इदानिया, माःआन? ईंग कतायता हना कता ईंग, ईंगराः ओंगोलते मेरिंग कतायतना, मनदो अपांग ईंगराः जीवरेय दोहोनता अरू आँयगराः बुता ईंगतेय एचेयता।

¹¹ ईंग अपांग सुदा मिनी इदानिंगा अरू अपांग ईंग सुदा मिनी इदानिया, हना कता अपे बिसवासगे। नाःआ कतारे मेरपे बिसवासगेतान दो, ईंग एचेयतना हना बयाव जुवाः इयाःआ बुतारेपे बिसवासगे।

¹² अपे ईंगपे अयूम! मी होड़ ईंग एचेरेय बिसवासगेता दो, ईंग एचेयता हनानाः बुता हाँय होंय एचेयता। ईंग अपांग एचेरेयिंग सेनता। हनालगा हाँयग होड़ ईंग अते हों मरंग मरंग बुताय एचेयता।

¹³ बेटातते अपातराः मान मरजइत होयाः लगा अपे कहिसाः ईंगराः ञावतेपे असेय दो हनानाः ईंग एचेयता।

¹⁴ ईंगराः ञावते अपे ईंग एचेरे तोनोंगाःपे असेय दो हनायिंग एनेचेगोडता।

सुद बिरुवा बदीरे जबान

¹⁵ अपे ईंगपे अलार-दुलारता दो, ईंगराः हुकुमपे मनाःता।

¹⁶ अरू ईंग अपांग एचेरेयिंग अरजीगेता अरू हाँय अपे लगा अरू एटाःयीग संघरादारे वारता। हाँय अपे कहियो ओरोय अड़ाःतेडपेःआ।

¹⁷ हान सतायराः बिरुवा हवे। चउंदीसरिकुःआ होड़कू हान मेरकू ञेल अवेयता अरू मेरकू सुदी अवेयता। हनालगा हँकू हाँयराः कता मेरकू मनेवाता। मनदो हाँय अपे सुदा इदानिया अरू हाँय अपे सुदाय दोनोहोगोड ञवनता। हनालगा अपे हाँयपे सुदीयता।

¹⁸ ईंग टुरा लइंकू इया अपे एकला ओरोयिंग अड़ाःतेडपेःआ, मनदो अपे एचेरेयिंग कुदा वेगता।

¹⁹ ईंग जीयत इदानिंगा, हनलगा अपे हों जीयतपे दोहोनता। गुनहोन बेला तयोमरे चउंदीसरिकुःआ होड़कू ईंग ओरोकू ञेल अवेतिरिंगा, मनदो अपे ईंगपे ञेल अवेता।

²⁰ हना दिन अपे सुनुदीगोडता ईंग अपांग भगवान सुदा मिनी इदानिंगा अरू अपे ईंग सुदा मिनी इदानपेःआ अरू ईंग अपे सुदा हों।

²¹ अनँयग जीवरे ईंगराः कता दोहोकेडखने मनेवाता हाँय ईंगे अलार-दुलारता। ईंगे अलार-दुलारता हाँय ईंग अपांग हों हाँये अलार दुलारता। ईंग हों हाँयिंग अलार-दुलारता अरू ईंग इनिंग बदीरे हाँयिंग उदुःवाता।”

²² हनते इसकरियोती ना लवे हाँयग जूदा, ईसू एचेरेय कताया, “ने परबू, आम चिला लगा आम बदीरे अले एचेरे एकलाम उदुःगेतना अरू चउंदीसरिकुःआ होड़कू एचेरे मेरेम उदुःगेता?”

²³ दो ईसू कतातेड, “अपे तोनोंगीग ईंगपे अलार-दुलार दो, हाँय ईंगराः सरवने मनेवाता। ईंग अपांग हाँये अलार-दुलारता अरू अलिंग हाँय एचेरे सेनेकियनखन हाँय सुदालिंग दोहोनता।

²⁴ ईंग मेरेय अलार-दुलारगींगता हाँय, ईंगराः सरवन मेरेय मनेवाता। अपे अयुमेता हना सरवन इनिंगराः कोवान, मनदो ईंगे वारकेरा ईंग अपांगराः हवे।

²⁵ नाःआ जमा कता ईंग अपे सुदा दोनोहोन मेलायिंग कतातेरा।

²⁶ मनदो भगवान ईंगराः ञावते संघरादार इदानिया हाँयग सुद बिरुवा अपे एचेरेय वारेयता। अरू हाँयग सुद बिरुवा जमा कताकूने चेडपेता अरू ईंग अपे एचेरेयिंग कता उदुःतेरा हना जमाकूने एचे उहियार अगूपेता।

²⁷ ईंग अपे जीविंग सलसतगेता। ईंग इनिंग अपे जीविंग सलसतगेता, मनदो चउंदीसरिकुःआ होड़कू सलसतगेता हना इया कोवान। हनालगा अपेराः जीव अहापे कुंभलाव ओवा अरू अहापे बोर।

²⁸ अपे ईंग कतातेरा हनापे अयूमतेरा, ईंग सलाःतना अरू अपे एचेरेयिंग कुदा वेगता, माःआन। ईंग अपांग ईंग अते मरंग इदानिया। हनालगा ईंग अपांग एचेरेयिंग सेनता अरू अपे ईंगपे दुलारकेःआ दो अपे नाःआ कताते बहाल जुवाःकुःआपे।

²⁹ नाःआ कताकून होया जुवाःतान मेला अपे बिसवासगे लगा हना कताकून होनोयाः अते मड़ंग अपे एचेरेयिंग कताकेरा।

³⁰ चउंदीसरीग राजा, कलउ वेगतना। हनालगा ईंग अपे एचेरे नाःआ इया मुरुक बेला वरी ओरोयिंग कतातेरा। हाँय ईंग एचेरे हातपातगे लगा ओरोय अवेतेरा।

³¹ मनदो अपांग ईंग एचेरेय हुकुमकेरा, हनानाः इयायिंग एचेयता। नाःआते चउंदीसरिकुःआ होड़कू सुदीगोडता, ईंग अपांगिंग अलार-दुलारता, माःआन। दोबू अबू रिमुः अरू नानतेबू सेन।”