एहुना 10 - Korwa Bible

सरवाहा अरू आँयगरिकुःआ भेड़ाकू

¹ दो ईसू कतातेरा, “अपे ईंगपे अयूम! भेड़ाकूराः गुदड़ीराः दुवारते मेरेय बोलता, मनदो एटाः अगीतेय देग बोलता हाँयग होड़, इनिग होड़ अरू लुड़ी होड़ इदानिया।

² मनदो दुवारतेय बोलता हाँयग होड़, अनँयग भेड़ाकूरीग सरवाहा हवे।

³ हाँय बोल लगा हना गुदड़ीरीग अगुरादार दुवारे गीगगोडता। हाँय आँयगरिकुःआ भेड़ाकू मेमेडटोंगराः ञाव गोः घड़ीने राःकूता। हँकुःआ भेड़ाकू हाँयराः अरोकू अयूमता अरू हाँय हँकू ससराव लगा बहरीय गोःयाकूता।

⁴ हाँय हँकू बहरी उडुंगकेडकूखन हँकू मड़ंग मड़ंगे सेनता। अरू भेड़ाकू हाँयराः अरोकू सुदीयता, हनालगा हँकू हाँय देह दूरकू सेनता।

⁵ मनदो हँकू अनसिनहार होड़राः देह दूर मेरकू सेनता। हँकू हाँयराः अरो मेरकू अरखाःता। हनालगा हँकू हाँय अतेकू ञीर जुवाःता।”

⁶ ईसू हंडाकू दोहोना हँकुःआ होड़कू एचेरे नाःआ अउल-तउल कहड़ीय कतातेरा। मनदो हँकू हाँयराः कताकूनराः मतलोब मेरकू बुझाव अवेगान।

⁷ हनालगा ईसू हँकू एचेरे अरूय कताया, “अपे ईंगपे अयूम! भेड़ाकू बोल लगा दुवार ईंग हवे।

⁸ ईंग अते मड़ंगकू वेजेडा, हँकुःआ होड़कू इनिग होड़कू अरू लुलुड़ी होड़कू दोहोना। हनालगा ईंगरिकुःआ भेड़ाकू हँकूराः अरो मेरकू अयूमगाड।

⁹ भेड़ाकूराः गुदड़ीराः दुवार इनिंग हवे अरू तोनोंगीग ईंगते हंडाय बोलता, हाँय बनसाव जुवाःताय। हाँय बेगर बोरते बोल उडुंगगुः घड़ीने सराःता।

¹⁰ इनिग होड़ इनिगगे लगा, अरू ञेड एएंडा लगा अरू लाय एएंडा लगाय वेगता। मनदो हँकू जीव पवाः लगायिंग वेगकिया अरू मुरुक बडे बगराकू पवाः।

¹¹ नपाय सरवाहा ईंग हवे। नपाय सरवाहा आँयगरिकुःआ भेड़ाकू लगा गुजुः लगा हों सपड़ावतो दोहोनता।

¹² मंजूरीया होड़ सरवाहा मेरेय दोहोनता सहे भेड़ाकूरीग मालिक हों मेरेय दोहोनता। हनालगा रमू बुःआ वेगतोय ञेलेयतान दो, हाँय भेड़ाकूय ञीर एंडा अटूकूता। हनमेला रमू बुःआ भेड़ाकू साबकेडखने रिती-छितीगोडकूता।

¹³ हाँय मंजूरी होड़े दोहोनता, हनालगा हाँय ञीर एंडा अटूकूता अरू भेड़ाकू मेरेय ओंगोलकूता।

¹⁴ नपाय सरवाहा ईंग हवे। ईंग ईंगरिकुःआ भेड़ाकूयिंग सुदीता अरू ईंगरिकुःआ भेड़ाकू ईंगकू सुदीता।

¹⁵ अरू ईंग ईंगरिकुःआ भेड़ाकू लगा ईंगराः जीविंग एमेगोडता। ईंगरीग अपांग ईंगे सुदीता, हनन इया ईंग हों ईंगरीग अपांगिंग सुदीता।

¹⁶ नाःआ गुदड़ीरे कोवाकुःआ ईंगरिकुःआ एटाः एटाः भेड़ाकू हों इदानकुःआ। हँकू हों ईंगराः गुदड़ीरे अअगू इदा अरू हँकू हों ईंगराः अरोकू अयूमता। हनते जमाकू मिनीटोंग खुड़हारेकू दोहोनता अरू हँकूरीग मिनीटोंग सरवाहाय दोहोनता।

¹⁷ ईंग गुजुः लगा ईंगराः जीविंग एमेगोडता अरू हनते अरूयिंग जियाव रिमुःता। हनालगा ईंग अपांग ईंगे दुलारता।

¹⁸ तोनोंगीग ईंगराः जीव ईंग अते ओरोय गोः अवेतेरा, मनदो ईंग इनिंग ओंगोलतेयिंग एमेगोडता। ईंगराः जीव एएमे लगा अरू अरूयिंग गोः कुदाय लगा हों हातपात इदा। नाःआ हुकुम ईंग अपांग भगवान अगीतेयिंग पवावकिया।”

¹⁹ नाःआ कता अयूमतेडखन एहूदाकू अरूकू हिगार हटिंगयान।

²⁰ हँकू अते मुरुक बगरा होड़कू कताया, “नाँय एचेरे भूत इदा अरू नाँय बउड़ाहा इदानिया। नाँयराः कता चिला लगाबू अयुमे?”

²¹ मनदो एटाः होड़कू कताया, “भूत इदा हना इया नाँयग होड़राः बड़रा कोवानेःआ। तोनोंयग भूत अंधा होड़े एचे ञेल अवेयता जा?”

एहूदाकू मेरकू बिसवासगाड

²² तोनोंग दिन तयोमरे ररंगराः बेलारे एरुसलेमरे हनूका परोब दोहोना।

²³ दो ईसू भगवानराः ओड़ाःराः राचरे सुलइमान ञावराः परछी पेंदारेय दँड़ाःआ।

²⁴ हनमेला एहूदाकू हाँय चँड़ा रेडतिडिगखनकू होंबरेया, “अलेराः जीव तुमिनमे बार बंटागेता? आम मसी हवे दो अले एचेरेम कता उदुःबाःगोड।”

²⁵ दो ईसू कतातेड, “ईंग अपे एचेरेयिंग कनाता उदुःगोतेडा। मनदो अपे मेरपे बिसवासगेतना। ईंग अपांगराः ञावतेयिंग एचेयता, हनानाः बुता ईंगराः हिदइत हवे।

²⁶ मनदो अपे ईंगरिकुःआ भेड़ाकू ना लवे। हनालगा अपे ईंगराः कता मेरपे बिसवासगेता।

²⁷ ईंगरिकुःआ भेड़ाकू ईंगराः अरोकू अयूमता। ईंग हँकूयिंग सुदीता अरू हँकू इनिंग देह दूरकू वेगता।

²⁸ ईंग हँकू लगा ओरो टुटीगनेना हना जीविंग एमेवाकूता। हँकू कहियो ओरोकू लायनेना अरू तोनोंगीग हँकू ईंग तिःई अते ओरोकू गोः अवेतेडकुःआ।

²⁹ ईंगरीग अपांग भगवान, हँकुःआ होड़कू ईंग तिःईरेय जिमाकेडकुःआ अरू हाँय जमाकू अते मरंग इदानिया। अरू तोनोंगीग हँकू ईंग अपांगराः तिःई अते ओरोकू गोः अवेतेडकुःआ।

³⁰ ईंगरीग अपांग अरू ईंग मिनी हवे।”

³¹ नाःआ अयूमतेडखन एहूदाकू ईसू तेके गोएगगेय लगा दिरिकू रेमतेरा।

³² मनदो ईसू हँकू एचेरेय कताया, “ईंग अपांग अगीते मुरुक बयाव जुवाः इयाःआ बुताकूनिंग एचे उदुःवाडपेःआ। हना अते करा बुता लगा, दिरिते ईंग ञेड एंडा लगापे ओंगलेतना?”

³³ एहूदाकू कतातेरा, “नपाय बुताम एचेतेरा हना अते अले आम दिरिते ञेड एंडामे लगा मेरले ओंगलेतना। आम मी होड़ होनोड़ एकला हवे अरू ईंग भगवान हवे, माःआनमे कताकेडखन भगवान बदीरे ओपता बड़राम कतायतना। हनालगा अले आम दिरितेले तेके गोएग एंडामेता।”

³⁴ दो ईसू हँकू एचेरेय कताया, “भगवानराः कागदरे भगवान नाःआ इयाय कतातेरा, ईंग कतातेरा, अपे भगवानकू हवे।

³⁵ अरू भगवानराः कागदराः कता, लबरा ओरो होयानेना। भगवानराः सरवनकू मनेवातेरा हँकुःआ होड़कू भगवानकू माःआने कतावातेडकुःआ,

³⁶ अरू अपांग भगवान आँयगराः बुता बुता लगा ईंगे सुनावकिडिंगखन नाःआ चउंदीसरेय वारकिरिंगा। दो ईंग बदीरे अपे चेले माःआनपे कतायता? ईंग भगवानरीग बेटा हवे, माःआनिंग कतायतान दो अपे चिला लगापे कतायता, आम भगवानमे ओपताता, माःआन?

³⁷ ईंग भगवानराः बुता मेरिंग एचेयतना दो ईंग एचेरे अलोपे बिसवासगे।

³⁸ दो ईंग इनिंग अपांगराः बुतायिंग एचेता अरू अपे ईंग एचेरे मेरपे बिसवासगेता होले, ईंगराः बयाव जुवाः इयाःआ बुतारेपे बिसवासगे। हनाते अपे सुदीगोडता अपांग सुदायिंग मिनीयना अरू अपांग ईंग सुदा होंय मिनीयना।”

³⁹ हनते हाँय अरू सबेय लगाकू कुरनिसतेरा। मनदो हाँय हँकूराः तिःई अतेय बोड़ेड उडुंगयान।

⁴⁰ हना तयोमरे ईसू एरदन नई मार परोम तोराय। हना ततेररे एहुना मड़ंग दिनरे होड़कू बतिसमाय एमेवाकुःआ। अरू ईसू हंडा सेनेडखने दोहोना।

⁴¹ मुरुक होड़कू हाँय एचेरेकू सेनेडा अरू हँकू कताया, “एहुना तोनोंगाः बयाव जुवाः इयाःआ बुता मेरेय उदुःगाड। मनदो एहुना नाँयग होड़ बदीरेय कतातेरा, हना जमा कताकून सनाताय दोहोना।”

⁴² अरू हंडा मुरुक होड़कू ईसू एचेरेकू बिसवासतेरा।