एकूब 5 - Korwa Bible

गिरहत होड़कू लगा सेताव

¹ ने गिरहत होड़कू, अयुमेपे। दरवाःआ हना कटसिया बदीरे खिररी घड़ीनपे इयाम।

² अपेराः हुड़ुकून बोडयना अरू अपेराः सोनहेकून हों दियाँकू जोमगोतेडा।

³ अपेराः सोना अरू चाँदीकून हों किचियावयना। सेंगेलते मास लो ओब जुवाःता हनन इया अपेराः जीव लायगोडता अरू अपेराः सोना चाँदीकूनराः किचियावतो अपे बदीरे हिदइत इया दोहोनता। हनते हों अपे चउंदीसराः टुटीगगुः बेलारे आन-धानपे बटुड़ावकेरा।

⁴ अपेराः हुड़ुकू ईरतेरा हँकुःआ मंजुरियाकूराः बनी मेरपे एमेवागाडकू। अयुमेपे। हँकुःआ होड़कू अपे बदीरे खिररी घड़ीनकू लालिसगेतना अरू हँकूराः खिररी परबू भाबी भगवान अनायूमगोतेरा।

⁵ नाःआ चउंदीसरे दोहोन मेला अपे मुरुक जोम ञू घड़ीन बहालते अरू नपायतेपे दोहोना। जानरकू गेडकू लगा असूल हराकूता हनन इया अपे हों डंड पवाः लगा जोम मोटावकिया।

⁶ मेर बदलाकू कुदा अवेयता हँकुःआ बेगर गारबार होड़कू अपे कसूर होड़कू इया बदीतेडकूखनपे ञेड एंडातेडकुःआ।

कटसियारे सहाव घड़ीनपे दोहोन

⁷ हनालगा ने अजी बोपोहकूतिंग, परबू ईसू अरीन वेग वरी जमा बरानाः सहाव घड़ीनपे दोहोन। किसाड़कू ओतराः ननपाय जोःओ अदेरगे लगा असड़ दाः अरू सिसीर दाः लुजरुः वरी असरागोड ञवनताकू,

⁸ हनन इया अपे हों सहावगोड ञवनपे। परबू वेगराः बेला निचकाःतना। हनालगा अपे अँननपेराः जीवपे बड़ियाड़गे।

⁹ ने अजी बोपोहकूतिंग, अपे एटाः होड़कू बदीरे अँननपे अपे अहापे कुरबुराव होड़ेंग। हनन इयापे एचेय दो फड़ियावदार अपेराः कसूर बदीरे अपेय डंडियावता। अरू हनाँयग फड़ियावदारराः अरो पता निचकाःतना।

¹⁰ ने अजी बोपोहकूतिंग, परबूराः ञावतेकू कताया हँकुःआ भगवानराः बड़रा कता होड़कू कटसियाकू सहाव पारतेडखन अबू लगा चिनहा इया इदनकुःआ।

¹¹ सहाव घड़ीनकू दोहोनता हँकुःआ होड़कू सनातायरे ननपायबू कतावाकूता। अयूब करा इया कटसियाय सहावगेःआ अरू करा इया परबू हाँय लगा जमाकूने नपायगोतेड, हना कता अपे अनायूमकेरा। नाःआ अते अबू सुनुदीयतना, अबूरीग परबू अबूय सोगावाबूता अरूय मयावाबूता।

¹² ने अजी बोपोहकूतिंग, मइद कता ननानाः हवे। अपे किरिया कसट अहापे जोम, ना दो सेरमो देसराः, ना दो ओतराः, ना दो तोनोंगाः जिनिसकूनराः। मनदो अपेराः कहड़ी कता हा दो हा, बुरी दो बुरी। हनामिन अते अपे तोनोंगाः डंड ओरोपे पवावनेना।

¹³ अपे अते तोनोंगीग होड़ सिकिसतारे इदानीग दो, हाँय अरजीगेय। बहालरे इदानीग दो, हाँय भगवान जाग घड़ीने सेरेंग।

¹⁴ बेमरियारे इदानीग दो हाँय कलसियारिकुःआ अगुवा होड़कूय राः अरू हँकू परबूराः ञावते सुनुम तिलाःकिरिगखन, हाँय लगाकू अरजी।

¹⁵ अरू बिसवासराः अरजीते बेमरिया होड़ बनसाव जुवाःता अरू परबू हाँय नपाये दोहोयता। हाँय तोनोंगाःआय कसूरतेड दो, हना हों परबू बराव एंडागोडताय।

¹⁶ हनालगा अपे अँननपे अपेराः कसूरकूनपे कबुलाव होड़ेंग अरू अरजी होड़ेंगपे, जेमहा अपे नपाय जुवाः। बेगर गारबार होड़कूराः अरजी जंगरते दोहोनता अरू हानते नफा होनोया जुवाःता।

¹⁷ इलियाह हों अँननबू इया कटसिया सहावीग होड़े दोहोना। अरू हाँय बिसवास घड़ीन दाः अहा उयुः लगाय अरजीतेरा अरू पेय बरिस छो महिना वरी, हंडा दाः मेर उयुःगान।

¹⁸ हना तयोमरे हाँय अरूय अरजीतेरा, दो सेरमो अते दाः उयुःनेना अरू ओत मुरुक जोःओकूनते पेरेगयान।

¹⁹ ने अजी बोपोहकूतिंग, तोनोंगीग होड़ सताय दूर अतेय चलाः जुवाः अरू तोनोंगीग हाँये कुदा अगूय दो,

²⁰ हाँय सुदीगे लगा इदा, तोनोंगीग बहकावतो कसूर होड़े कुदा अगूयता हाँय, गुजुः अते मी होड़े बनसावगेयता अरू हाँयराः मुरुक कसूरकून भगवानतेय एचे बराव एंडागोडता।