एकूब 4 - Korwa Bible

भगवानराः आड़रेपे दोहोन

¹ चिला लगा अपे तलारे कड़ीग अरू बेलूर कता होड़ेंग होयाःता? अपेराः जीवरे इदा हना बेलूर बेलूर ओंगोलते अपे जमा इयाःआ कसूरपे एचेयता।

² तोनोंग तोनोंग जिनिसकून लगापे ललचाःतना अरू हना अपे मेरपे पवाःता दो, अपे एटाः होड़कूपे ञेड एंडागोडकूता। अपे होड़कूपे इरावाता। हनारे हों अपे चहाःता हना अपे मेरपे पवाःता। हनालगा अपे कड़ीगरे अरू बेलूर कता होड़ेंगरेपे मेसा जुवाःता। अपे चहाःतना हना जिनिसकून लगा अपे भगवान एचेरे मेरपे असेयतना। हनालगा अपे मेरपे पवाःता।

³ अरू अपे भगवान एचेरे असेय मेला बेलूर बेलूर ओंगोल दोहोकियानखनपे असेयता। अपे चहाःता हना अपे अँननपे अपेराः हिछा इया उपयोतगे लगापे ओंगलेतना। हनालगा अपे असेयता हना भगवान अपे लगा मेरेय एमेयता।

⁴ ने सनहा-सनहीत होड़कू, अपे मेरपे सुदीयता जा, अपे नाःआ चउंदीसराः जिनिसकूनपे मंजूरवाता दो, अपे भगवानपे हिनइस-बिनइसवाता। तोनोंगीग होड़ चउंदीसराः जिनिसकून मंजूरगे लगाय चहाःता दो, हाँयग होड़ भगवानरीग मुदइ होड़ इदानिया।

⁵ भगवानराः कागदरे ओजाःतो इदा हना कता सदाःआ इदा माःआनपे ओंगलेता जा, अबू जीवरे दोहोन लगाय एमेकेरा हाँयग सुद बिरुवा बदीरे भगवान मेरेय तरसाःता जा?

⁶ मनदो भगवान होड़कू अरूय मयावाकूता। हनालगा भगवानराः कागदरे नाःआ इया ओजाःतो इदा, “भगवान बड़वार होड़कूय हिनइस-बिनइसवाकूता, मनदो हुडिंगकू उंगलुःता हँकुःआ होड़कूय मयावाकूता।”

⁷ हनालगा अपे भगवानराः आड़रेपे दोहोन। कलउ अपे जीवरे हातपातगे लगा दोंग अहापे एमेवाय। दो हाँय अपे अतेय ञीर जुवाःता।

⁸ भनगवानराः लेसानरेपे दोहोन दो भगवान हों अँननपेराः लेसानरेय दोहोनता। ने कसूर होड़कू, अहापे कसूरगे। ने बार जीव ओंगोल होड़कू, अपेराः जीव सुदगेपे।

⁹ अपे अँननपे अपे हुडिंगगुःपे अरू अपेराः कसूर बदीरे फिकीर घड़ीनपे इयाम। अपे लंदा होड़ेंग बइगेपे अरू इयाम लगापे बुँहड़ीगे अरू अपेराः बहाल जीव उदबासतेपे बदलावगे।

¹⁰ परबू भगवान मड़ंगरे हुडिंगपे ओंगलुः दो, हाँय अपे मरंगे बड़ाँवपेता।

एटाः होड़कू बदीकू अते सेताव

¹¹ ने अजी बोपोहकूतिंग, अपे अँननपे अपे अहापे बदी होड़ेंग। अनँयग वपक बोपोहकूतेने बदीता सहेय जाःकूता हाँयग होड़ भगवानराः नियमे बदीता अरूय जाःगेता। नियमे जाःता हाँयग होड़ नियम इया मेरेय सलाःतना, मनदो हाँय हना नियमराः फड़ियावदारे होयाःता।

¹² सताय नियम एमेयीग अरू फड़ियावदार दो भनगवान हवे। हाँय एचेरे होड़कू बनसाव लगा अरू लायकू लगा हातपात इदा। मनदो एटाः होड़कू फड़ियावीग आम इये हवे?

गपाःआ दिन बदीरे बड़वार

¹³ ईंगपे अयूम, अपे अते तोनोंगीग कतायता, तिसिंग सहे गपा अले हनानाः सहररे सेनेकियानखन मी बरिस हंडाले दोहोनता अरू फेरवइत घड़ीन ढिबुवाले अदेरता, माःआन।

¹⁴ मनदो अपे मेरपे सुदीयतना गपाःआ दिनरे चिला होयाःता। अयूमवापे, अपेराः जीव बदीरेपे ओंगले। अपे गुनहोन बेला वरी दोहोनता अरू तयोमरे केड़े जुवाःता हना कुहास इया इदानपेःआ।

¹⁵ ननदो अपेके नाःआ इया ककाता लगा इदा, परबू चाहाःतान दो, अले जीयतले दोहोनता अरू नाःआ सहे हना बुता होंले बुताता, माःआन।

¹⁶ मनदो अपे अँननपे अपे मरंगपे ओंगलुःता अरूपे बड़वारता। हना इयाःआ बड़वार जमा दो बेनेलूर इदा।

¹⁷ तोनोंगीग होड़ नपाय नपाय एचेय लगाय सुदीयता, मनदो हना इया मेरेय एचेयता दो, हाँय कसूरगेतना।