एकूब 2 - Korwa Bible

पाचपटी बदीरे सेताव

¹ ने अजी बोपोहकूतिंग, अबू मान मरजइत पवाःयीग परबू ईसू मसी एचेरे बिसवासगेतना दो, अबू करा उड़ी पाचपटी सुदाबू दोहो अवेन?

² अपे संगइती दुड़ुः मेला मी होड़ गिरहत होड़ मुरुक किमइतराः नपाय सोनहे अरू सोनाराः अंठी बेराकून तुसिंगकेडखने वेगता अरू एटाः गरीब होड़ मइलावतो सोनहे तुसिंगकेडखने वेगतान।

³ दो अपे हँकिनाः बना होड़ अते मुरुक किमइतराः नपाय सोनहे तुसिंगतो गिरहत होड़ एचेरेपे कतायता, आम मसिलारेम दुड़ुः, माःआन। मनदो गरीब होड़ एचेरेपे कतायता, आम मंडाम चड़ाँन सहे ओतरेम दुड़ुः, माःआन।

⁴ अपे तलारे नाःआ इया हिगार हटिंगकिन लगापे उदुःगेतान दो अपे बेलूर ओंगोलतेपे फड़ियावगेतना।

⁵ ईंग अजी बोपोहकूतिंग, अपे ईंगपे अयूम, नाःआ चउंदीसरिकुःआ गरीब होड़कू भगवान आयँगराः बिसवासरे गिरहत होड़कू बड़ाँः लगाय सुनावकेडकुःआ। अरू भगवानकू दुलारता हँकुःआ होड़कू लगा आँयग जबानकेरा हना इया सेरमो देसरिकुःआ इताडदारकू तुला लगा होंय सुनावकेडकुःआ।

⁶ अपे गरीब होड़कूराः जीवपे एचे बेग-हताकेरा। मनदो गिरहत होड़कू ना लवे जा अपेकू सिकिसतापेता अरू कोट कछेरीरेकू गोः इदीपेता?

⁷ अरू अपेय राःकेरा हनाँयग नाय नपाय परबू ओपताकिडिगखनकू कतायतना नँकुःआ होड़कू ना लवे जा?

⁸ जमा नियमकून अते मइद नियम नानाः हवे, अपे अँननपेरिकुःआ परुसीकू अँननपे इयापे अलार-दुलारकू। अपे नाःआ नियमपे मनाःतना दो नपायपे एचेतना।

⁹ मनदो अपे एटाःकू सुदापे पाचपटीता दो, अपे कसूरगेतना अरू अपे नियम टड़ाव होड़कूपे होयाःता।

¹⁰ अपे मिनीटोंग नियमपे टड़ावगोडता दो, जमा नियमकूने टड़ावकेरा हाँयग होड़ इया डंडपे पवाःता।

¹¹ अहापे सनहा-सनही, माःआने हुकुमकेरा हाँयग भगवान अबू एचेरे तोनोंगीग होड़ अहापे ञेड एंडाय माःआन होंय कताकेरा। हनालगा अपे मेरपे सनहा-सनही हों अपे एटाः होड़पे ञेड एंडागोडेयता दो अपे भगवानराः नियमपे टड़ावकेरा।

¹² भगवान होड़कूय अजइतगेता, हनानाः नियमते अपेराः बड़रा अरू बुता लगा भगवान अपेय फड़ियावपेता।

¹³ तोनोंगीग होड़ एटाः होड़कू मेरेय सोगावा दो, फड़ियावराः दिनरे भगवान हों हाँयग होड़ ओरोय सोगावातेरिया। मनदो एटाःकूय सोगावाता हाँयग होड़, भगवान फड़ियावराः दिनरे हाँये सोगावाता।

¹⁴ ईंगरिकुःआ अजी बोपोहकूतिंग, तोनोंगीग होड़ कतायतना, ईंग ईसू मसी एचेरेयिंग बिसवासगेतना। मनदो हाँय नपाय बुता मेरेय एचेयता दो हनारे चिला नफा इदा? नानाः इयाःआ बिसवासते हाँय सडाव जुवाःताय जा?

¹⁵ तोनोंगीग बिसवासी वपक बोपोहकू सहे मेमेसकू बेगर जोमते अरू तुसिंग लगा बेगर सोनहेतेकू दोहोन होले,

¹⁶ हँकू एचेरे अपे अते तोनोंगीग होड़ कतायता, नपायतेपे जोम ञूय अरू सोनहेकून तुसिंगकियानखन सलसतरेपे दोहोन, माःआन। मनदो हाँयराः जरूरी लगा मेरेय एमेयता दो हनारे चिला नपाय इदा?

¹⁷ हनन इया तोनोंगीग होड़ कतायता, ईंग बिसवासगेयतना। मनदो बिसवास इया नपाय बुता मेरेय बुतायता दो, हाँयराः बिसवास गोएगतो इया इदा।

¹⁸ तोनोंगीग होड़ ईंग एचेरेय कतायता, आम ईसू एचेरेम बिसवासगेता अरू ईंग नपाय नपाय बुतायिंग एचेता, माःआन। दो ईंग हाँय एचेरेयिंग कता कुदायतना, आमराः बिसवास आम बेगर नपाय बुतातेम उदुःगे अरू ईंग नपाय बुता सुदा ईंगराः बिसवास आमिंग उदुःवाता।

¹⁹ आम बिसवासगेतना जा भगवान मिनीटोंग इदानिया? नपाय। हना कता भूतकू हों बिसवासगेतना अरू एकलाः घड़ीनकू बोरता, माःआन।

²⁰ आम बोको होड़ इदानमेःआ। आम मेरेम सुदीयता जा, बेगर बुताते दोहोनता हना बिसवास बेगर लूर दोहोनता।

²¹ अबूरीग खुटिपरिया होड़ इबराहीम बदीरेम ओंगोलगे। हाँय बदीरे भगवान करा उड़ीय कतातेरा, हाँय बेगर गारबारीग होड़ हवे माःआन? हाँय बेदीरे भगवान लगा आँयग बेटात इसहाक बलिदान एमेगेय लगाय सपड़ावनेना। हनालगा भगवान हाँय बेगर गरबारीग होड़ हवे माःआने कतावातेरिया।

²² भगवान एचेरे इबराहीमके बिसवास दोहोना अरू हाँय नपाय बुता होंय एचेतेरा। इबराहीम आँयग बेटात भगवान लगा बलिदान एमेगेय लगाय सपड़ावनेना अरू हनाते हाँयराः बिसवास हों पुरावयान।

²³ भगवानराः कागदरे ओजाःतो इदा हनन इया होयानेना। इबराहीम भगवान एचेरेय बिसवासतेरा अरू भगवान हाँय बेगर गारबार होड़े ओंगोलबाःकातेरिया। अरू भगवान इबराहीम, ईंगरीग सउंगता माःआने कतावातेरिया।

²⁴ दो अपे सुसुदीता, तोनोंगीग होड़राः बिसवास एकलाते, भगवान हाँयग होड़ नपाय मेरेय ओंगलेयता, मनदो हाँयग होड़राः नपाय बुता बुताते हों भगवान हाँय नपाये ओंगलेयता।

²⁵ हनन इया मड़ंगरे सनहीय दोहोना हाँयग रहाब हों इसराएलरिकिनाः बराहीलकिने बनसाव लगा अनँयग ओड़ाःरेय नेत-नेवारतेडकिनखन एटाः दूरतेय वारगोतेडकिन। दो भगवान हाँयराः नपाय बुतातेय मंजूरवातिरिया।

²⁶ बेगर हनसाते देह गोएगतो दोहोनता अरू हनन इया बेगर नपाय बुताराः बिसवास सदाःआ दोहोनता।