एकूब 1 - Korwa Bible

मसी सलाम

¹ ईंग एकूब, भगवानरीग अरू परबू ईसू मसीरीग सेवकिया होड़, नाःआ चिठीयिंग ओजाःगेतना। जमा चउंदीसरे सितिर-बितिरयनाकू हँकुःआ बारहगोटोंग गोतोररिकुःआ होड़कू लगा ईंग अगीते मसी सलाम।

बिसवास अरू कनहून बदीरे चेड

² ईंगरिकुःआ अजी बोपोहकूतिंग, अपेराः बिसवास बदीरे एटाः एटाः इयाःआ अंदजाव होयाःतान मेला अपे बनाहाल माःआनपे ओंगोले।

³ अपे सुदीयतना, हनाते अपे सहाव घड़ीन बिसवासरे बड़ियाड़गुः लगापे चिडुःता।

⁴ अपे जमालेःआपे सहाव अवे लगा चिडुः इदा। अरू हनाते अपे जमा बेला ओंगोल घड़ीन जमाकून कनहूनतेपे एचे अवेयता अरू अपेराः जीव नाय नपायकियानखन उडु-बुडू जुवाःता।

⁵ मनदो अपे अते तोनोंगीग ओंगलेतना, ईंग एचेरे गुनमिन कनहून इदा, माःआन दो हाँयके भगवान एचेरे अअसे लगा इदा अरू भगवान हाँयग होड़ लगा कनहूने एमेयता। अरू भगवान अनँयग एचेरेकू असेयता हँकुःआ होड़कू लगा मिनी जीवकियानखन बेगर कदरावतेय एनेमेवायता।

⁶ तोनोंगीग भगवान एचेरे कनहूने असेय दो हाँय बिसवासते अअसे इदा अरू बार जीवकियानखन अलोय असेय। बार जीवकियानखने असेयता हाँयग होड़ होयते सलाःता अरू तुकड़ाःता हना समुंदरराः लहरा इया इदानिया।

⁷ अरू हाँय अहाय ओंगले, ईंग परबू भगवान अगीते तोनोंगाःयिंग पवाःता, माःआन।

⁸ नाःआ इयायीग होड़ बार जीव ओंगोल होड़ हवे अरू अनँयग जीव मीटोंग कतारे हों मेरेय दोहो अवेयता।

⁹ एटाः होड़कू अते हुडिंग इदानकुःआ हँकुःआ बिसवासी होड़कू भगवान अनँयग ओंगोलरे मरंगे ओंगोलकूतना। हनालगा हँकू बहालते दोहोन लगा इदा।

¹⁰ गिरहत होड़कू पहाड़राः बहाकून इयाकू टगाव जुवाःता। हनालगा भगवान हँकुःआ होड़कू हुडिंगकूताय हननमेला हँकू बहालरे दोहोन लगा इदा।

¹¹ सिनितोंग सितोंगरे बहाकून गोसोकियानखन कसड़ जुवाःता। हनते बहाकून सुघर मेर ञिलुःता। हनन इया गिरहत होड़कू अँकू बुताकता हननमेला ञेनेल ञेलरेकू लाय जुवाःता।

अंदजाव अरू लहराव

¹² अपेराः बिसवास बदीरे अंदजाव होयाः मेला, सहाव घड़ीन बिसवासरे बड़ियाड़े दोहोनता हाँयग होड़राः जीव, भगवान ननपायगेता। तयोमरे हाँय लगा ओरो टुटीगनेना हना जीवराः इमान भगवान एमेयता। भगवानकू दुलारता हँकुःआ होड़कू हना इमान एमे लगाय जबानकेरा।

¹³ तोनोंगाः गारबार एचे लगा तोनोंगीग होड़ भगवान ओरोय अंदजाव अवेतिरिया। अरू भगवान तोनोंगीग होड़ तोनोंगाः गारबार एचे लगा ओरोय अंदजावतिरिया। हनालगा तोनोंगीग होड़ तोनोंगाः गारबार एचे लगा अंदजावरेय पराःतान दो हाँय अलोय ओंगले, भगवान ईंगे अंदजावगींगतना, माःआन।

¹⁴ मनदो जमा होड़कू अँननकूराः बेलूर ओंगोल अते अंदजावरेकू पराःता। हनानाः ओंगोल हँकू लहरावकेडकूखन कसूररे एचे दाःकूता।

¹⁵ नाःआ इयाःआ ओंगोलरेकू सेनतान दो हँकू कसूरगेता। अरू हना कसूर बगरा जुवाःतान दो हँकुःआ होड़कू गोएग जुवाःता।

¹⁶ ईंगरिकुःआ अजी बोपोहकूतिंग, अपे तोनोंगीग होड़ अडिगपे लगा अलोपे ओवाय।

¹⁷ जमा इयाःआ नपाय अरू उडु-बुडूत दहिनकून भगवान अगीतेबू पवाःता। जमा इयाःआ मरसले तुलाकेरा हाँयग भगवान अबू लगा नाःआ दहिनकूने एमेयता। भगवान सगर सइट मिनी इयाय दोहोनता अरू उंबूल लंबी पुडनता हनन इया हाँय एचेरे तोनोंगाः बदला कोवानेःआ।

¹⁸ हाँय तुलाकेरा हना जमाकून अते अबू बिसवासी होड़कू हाँय एचेरे बुताराः मड़ंग बंटा इया होयाः लगा भगवान चहाःतना। हनालगा हाँय अनँयगराः सताय सरवनते अबू नँवाय तुलाकेडबुःआ।

सरवन मनावकियानखनबू सलाः लगा इदा

¹⁹ ईंग अजी बोपोहकूतिंग, अपे नाःआ कतापे सुदीगोड। अपे अअयूम लगा ओसताजपे दोहोन अरू टेड़ा-चुवा अलोपे बड़रा सहे अपेराः रीस ओहेन अलोपे देग ओवा।

²⁰ तोनोंगीग होड़ रीस जुवाःता दो, हाँय भगवानराः ओंगोल इयाःआ कता ओरोय एचे अवेतेरा।

²¹ हनालगा अपेराः जमालेःआ लेटाव-पेटाव अरू बेलूर नेवन अपे जीव अतेपे चलाः एंडागोड अरू अँननपे अपे हुडिंग ओंगोलकियानखन भगवान अपे बनसाव लगा अपे जीवरे हुड़ू इयाय रोपाकेरा हना सरवनपे मनाः।

²² भगवानराः सरवन अअयूम एकलाते अँननपे अपे अडिग जोम होड़कू अलोपे बड़ाँः। मनदो हना सरवन इयाकू सलाःता हँकुःआ होड़कूपे बड़ाँः।

²³ भगवानराः सरवन अयुमेता मनदो मेरेय मनाःता हाँयग होड़, अनँयगराः सुरइत अइनारेय ञेलता हनाँयग होड़ इया इदानिया।

²⁴ मनदो हना अइना अगीतेय सेनतान दो हाँय अनँयगराः सुरइत करा इया दोहोना हना ओहेने लिड़िंगोडता।

²⁵ मनदो अजइतबूता हना उडु-बुडूत नियम ओंगोल बुझावगोड ञवनता, अरू अयूमकेडखन मेरकू लिड़िंगेता, अरू हनन इयाःकू सलाःता, हँकुःआ होड़कू भगवान भलायवाकूता।

²⁶ तोनोंगीग होड़ ओंगलेतना, ईंग भगवानराः ओंगोल इयायीग होड़ हवे, मनदो हाँय सोझायीरे बड़राता दो हाँय अनँयग आँयग अडिगगुःतना अरू हाँयराः लूर-नेवन भगवान जुकूर कोवानेःआ।

²⁷ टुरा होड़कू अरू रंडियाहीनकू अँनकूराः सिकिसता मेलारेय संघरावाकूता अरू अनँयग जीव चउंदीसराः कसूर अतेय बनसावता हाँयग होड़राः लूर-नेवन अबूरीग अपांग भगवान मड़ंगरे, सुद अरू बेगर गारबारतेःआ लूर-नेवन हवे अरू हनानाः भगवान जुकूर इदा।