इबरानी 9 - Korwa Bible

दान अरू बलिदानते होड़कू सुद ओरोकू बड़ाँव अवेनेना

¹ दो मड़ंगाः कता-जमकावतोरे होड़कू भगवानकू जाग लगा चउंदीसरे मीटोंग सुद ततेर अरू नियमकून हों दोहोना।

² दो मीटोंग टपइर ओड़ाः दोहोना। हना ओड़ाःराः मड़ंग छिना सुद ततेर दोहोना। अरू हंडा मीटोंग ढिबरी अरू मीटोंग टिबूल अरू सुदतो रुटी दोहोना।

³ अरू बार नमारराः परदा मार परोम मुनुरुक सुद ततेर माःआनकू कतावाता।

⁴ हंडा सकला बाल लगा मीटोंग सोनाराः धाम दोहोना अरू सोनाते दाबतो, कता-जमकावतोराः मीटोंग बकसा दोहोना। हना बकसा पेंदा, सोनाराः डुबहारे मनाह अरू बहानेना हारूनराः हना हाप अरू कता-जमकावतोराः दिरिराः पटरा दोहोना।

⁵ हना बकसा सेरमो बारटोंग मरसलतो पंकीत बराहीलकिनराः मुरइत दोहोना अरू कसूर बराव एंडा ततेरराः सेरमो अँकिनराः डेनातेकिन डबावकातेरा। नाःआ जमा कताकूनराः बदीरे नुँहू ओरोले कता उदुः अवेतेरा।

⁶ टपइर ओड़ाःराः जमा जिनिसकून नाःआ इया संजोड़तो दोहोनता। दो हना मड़ंग छिनारे पुजउरीकू सगर दिन अँकूराः सेवा बुता लगाकू बोलता।

⁷ मरंग पुजउरी एकला मी बरिसरे मिनी तुरहा जानरकूराः बलंगी गोःकेडखन भितरी छिनारेय बोलता। हना बलंगी अनँयग अरू एटाः होड़कू बेगर सुदीतेकू कसूरगोडा हना कसूरकून भगवान बराव एंडा लगा बलिदाने एमेगेता।

⁸ नाःआते सुद बिरुवा उदुःवाबूता, मड़ंगाः टपइर ओड़ाः दोहोना हना वरी तोनोंगीग हना मुनुरुक सुद ततेररे ओरोय बोलो अवेनेना।

⁹ नाःआ जमा कताकून नाःआ जूगरिकुःआ होड़कू लगा मीटोंग अउल-तउल कता इया इदा। ननानाः अते अबू सुदी अवेयता, भगवानकू जागता हँकुःआ होड़कूराः ओंगोल, दान अरू बलिदान देग अते मेर सुदगुःता।

¹⁰ नाःआ जमा नियमकून जोम ञूय अरू एटाः एटाः रिती-बिधी इयाःआ बुहालगुःराः बदीरे एकला दोहोना। अरू नाःआ नियमकून, नाःआ अते तोनोंगाः नपाय इलम अरीन होयाः वरी लगा एकला दोहोना।

मसीराः बलंगीराः जंगर

¹¹ दो नुँहू मसी, नाय नपाय कता-जमकावतोरीग मरंग मूक पुजउरी बड़ाँवकियानखने वेगकिया। हाँय मड़ंगाः टपइर ओड़ाः अते मरंग अरू बेगर गारबारराः टपइर ओड़ाःरेय बोलो पारयना। हना टपइर ओड़ाः तोनोंगीग होड़ मेरेय तुलागतेरा अरू हान नाःआ चउंदीसरे कोवानेःआ।

¹² मसी मुनुरुक सुद ततेररे मेरोम अरू बसरूराः बलंगी गोःकेडखन मेरेय बोलोगना। मनदो अनँयग बलंगीते हना मुनुरुक सुद ततेररे मिनी तुरहा सगर सइट लगाय बोलोकिया। नाःआते हाँय सगर सइट लगा अबू कसूर अते सडावकेडबूखने अजइतगोतेडबुःआ।

¹³ मेरोम अरू बएलराः बलंगी अरू बसरू ओब कसूर होड़कू सेरमोरेकू इरचीगे अते हँकूराः बाहरी देह दगलीकूनकू सुदगेःआ।

¹⁴ मसी, सगर सइट जीयत दोहोनता हाँयग सुद बिरुवाते, भगवान मड़ंगरे बेगर गारबारते बलिदानगुः लगा अनँयग आँयगे जिमायान। दो अबूराः ओंगोल गोएगतो इयाःआ बुताकून अते अबू जीयत भगवानबू सेवा अवे लगा हाँयराः बलंगी चिला लगा अरू मेर सुदकेःबुःआ?

¹⁵ कसूरतेराकू अरू मड़ंगाः कता-जमकावतोकू टड़ावतेरा हँकुःआ होड़कू सडाव लगा मसी गोएगनेना। नुँहू हाँय नँवा कता-जमकावतोरीग बिच-बिचवाई होड़े बड़ाँवकिया, जेमहा भगवान सुनावकेडकुःआ हँकुःआ होड़कू आँयगराः जबान इया ओरो टुटीगनेना हना इताडकू पवाः।

¹⁶ तोनोंगीग अनँयगराः आन-धान एटाः होड़ एमेवा लगा जबान चिठीय तुला दो, जबानगेताय हाँयग होड़ अरीने गुजुः वरी एटाः होड़ हना इताड मेरेय गोः अवेयता।

¹⁷ तोनोंगाः जबान चिठी पका-निका होयाः लगा इदान दो, मी होड़ गुनुजुः पराःता। हनालगा जबान चिठीय तुलाकेरा हाँयग होड़ गोएग जुवाःताय हना तयोमते हाँयराः जबान पका-निका जुवाःता।

¹⁸ नननलगा मड़ंगाः कता-जमकावतो हों बलंगीते पका-निका होयानेना।

¹⁹ मोसेस जमा होड़कू एचेरे नियमकूनराः जमा हुकुमे कता उदुःवातेडकुःआ। हना तयोमरे हाँय बसरूकूराः अरू मेरोमकूराः बलंगी गोःकेडखन दाः अरू लाल रंगाः मोट सितोम सुदा जूफा ञावराः टटकाःते नियमकूनराः कागदरे अरू होड़कू सेरमोरेय इरचीतेरा

²⁰ अरूय कतातेरा, “अपे मनाः लगा भगवान हुकुमवातेडपेःआ, हना कता-जमकावतोराः बलंगी ननानाः हवे।”

²¹ अरू ननन इया मोसेस टपइर ओड़ाःरे अरू जाग लगाकू उपयोतगेता हना जमा जिनिसकूनरे हों हना बलंगीय इरचीतेरा।

²² सताय दो ननानाः हवे, नियम इया जमा जिनिसकून बलंगीते सुद होया जुवाःता अरू बलंगी अरीन तूः वरी कसूरकून मेर बराव एंडनता।

²³ चउंदीसरे होड़कू भगवान जाग लगाकू उपयोतगेता हना जिनिसकून सेरमो देसराः सताय जिनिसकूनराः उंबूल इया इदा। हनालगा चउंदीसराः जिनिसकून नाःआ इयाःआ बलिदानकूनते सुनुदगे लगा इदा। मनदो सेरमो देसराः जिनिसकून नाःआ अते मुरुक नाय नपाय बलिदानते सुद जुवाःता।

²⁴ मसी, होड़कू तुलातेरा हना सुद टपइर ओड़ाःरे मेरेय बोलोगान। नाःआ सुद टपइर ओड़ाः दो सेरमो देसराः सताय सुद टपइर ओड़ाःराः उंबूल हवे। मनदो मसी सेनेरमो राइजरेय बोलोकिया, जेमहा नुँहू हाँय अबू लगा भगवान मड़ंगरे बिच-बिचवाईए बड़ाँव जुवाः।

²⁵ मरंग पुजउरीकू सगर बरिस जानरकूराः बलंगी गोःकेडखन सुद ततेररेकू देगगेःआ। मनदो मसी नाःआ इया अनँयग आँयग घड़ी घड़ी बलिदानगुः लगा कोवानेःआ।

²⁶ ननन इया हाँय घड़ी घड़ी बलिदानगुः लगा दोहोकुः दो चउंदीस रेःएन वरीते घड़ी घड़ी कटसिया हों हाँयके ससहाव परावकुःआ। मनदो मसी, नाःआ टुटीग बेलारे अनँयग बलिदाननेनखन होड़कूराः कसूर बराव एंडागे लगा मिनी तुरहा चउंदीसरेय वेगनेना।

²⁷ होड़कू मिनी तुरहाकू गुनुजुःता अरू हना तयोमरे भगवान हँकूय फनड़ियावकूता,

²⁸ हनन इया मसी हों मुरुक बगरा होड़कूराः कसूर बराव एंडागे लगा मिनी तुरहाय बलिदाननेना। दो मसी अरू मी तुरहाय वेगता। हाँय होड़कूराः कसूर, अरू चलाः एएंडा लगा ओरोय वेजेडा। मनदो हाँयकू टका ञवनता हँकुःआ होड़कू सडावकू लगाय वेगता।