इबरानी 8 - Korwa Bible

ईसू मरंग मूक पुजउरी हवे

¹ दो मनइद कता ननानाः हवे। अबू लगा सेरमो देसरे भगवानराः खउना तिःई गतररे दुड़ुःतो मरंग मूक पुजउरी ईसू हवे।

² अरू तोनोंगीग होड़ मेरकू तुलागरा, मनदो भनगवान तुलाकेरा हना सुद ततेर अरू सताय टपइर ओड़ाःरे हाँय सेसेवातना।

³ जमा मूक पुजउरीकू दान अरू बलिदान देग लगा सुनावतोकू दोहोनता। हनालगा नाँयग मूक पुजउरी ईसू एचेरे हों दान अरू बलिदान एएमे लगा तोनोंगाः होनोयाः इदा।

⁴ चउंदीसरे मोसेस एमेतेरा हना नियमकून इया दान एएमे लगा लेवी गोतोररिकुःआ मुरुक पुजउरीकू इदानकुःआ। हनालगा नाँय नाःआ चउंदीसरे दोहोकुः दो पुजउरी ओरोय बड़ाँवकुःआ।

⁵ चउंदीसरिकुःआ पुजउरीकू सेसेवातना हना टपइर ओड़ाः सेरमो देसराः सताय टपइर ओड़ाःराः उंबूल अरू अउल-तउल इया इदा। हनालगा मोसेस टपइर ओड़ाः भाये तुलागे मेला भगवान हाँये सेतावतेरा, “अयुमेमे! पहाड़रे नकलिंग उदुःवातेडमेःआ, हनन इया जमालेःआ तुतुला लगा इदा।”

⁶ ईसू नाय नपाय कता-जमकावतोरीग बिच-बिचवाई होड़ इदानिया, अरू हना कता-जमकावतो नाय नपाय जबानते सनालाःतना। हनालगा ईसू चउंदीसरिकुःआ पुजउरीकू अते नाय नपाय सेवाय पवावकिया।

⁷ मड़ंगाः कता-जमकावतो बेगर गारबारते दोहोकुः दो एटाःआ कता-जमकाव लगा भगवान ओरोय ओंगोलकेःआ।

⁸ मनदो भगवान हना कता-जमकावतोराः गारबार ञामकेडखने कतातेरा, “परबू कतायतना, अयुमेपे! मी दिन दरवाःआ, हना दिन ईंग इसराएल होड़कू अरू एहूदाकू सुदा नँवायिंग कता-जमकावता।

⁹ हँकूरिकुःआ खुटिपहार होड़कू मिसिरी देस अतेयिंग उडुंग अगूतेडकू मेला, हँकू ईंग कता-जमकावतेरा हनारे मेरकू सलावगान। हनालगा ईंग हँकू सुदा मेरिंग ननायगान। दो हँकू सुदायिंग कता-जमकावतेरा हना इया नाःआ नँवा कता-जमकाव ओरो होयानेना, माःआन भगवान कतायतना।

¹⁰ परबू कतायतना, हना दिनराः तयोमते इसराएलरिकुःआ होड़कू सुदा नाःआ इयायिंग कता-जमकावगेता। ईंग ईंगराः नियम हँकूराः जीवरेयिंग दोहोगोडता, अरू हँकू इंदरीरेयिंग ओजाःगोडता। ईंग हँकूरीग भगवानिंग दोहोनता अरू हँकू ईंगरिकुःआ होड़कूकू दोहोनता।

¹¹ हना वरीते हँकू अते हुडिंगीग सहे मरंगीग, हँकू जमाकू ईंगकू कबुलाःता। हनालगा परबूपे कबुलाः, माःआन तोनोंगीग अनँयगराः देसरिकुःआ होड़कू, अरू अनँयगरिकुःआ वपक-बोपोहकू ओरोय चेडतेडकुःआ।

¹² अरू ईंग हँकूराः गारबारिंग बराव एंडागोडता, अरू हँकूराः कसूर ईंग जीवरे कहियो ओरोयिंग ओंगोल कुदातेरा।”

¹³ नाःआ नँवा कता-जमकावतो अते मड़ंगाः कता-जमकावतो भगवान जुनाय बड़ाँवगोतेडा। अरू जुना अरू जिलियावतो इदा हना ओहेन टगाव एंडा जुवाःता।