इबरानी 7 - Korwa Bible

मलकिसिदिक इया मरंगीग मूक पुजउरी

¹ नाँयग मलकिसिदिक सालेम सहररीग राजा अरू भाबी भगवानरीग पुजउरीय दोहोना। इबराहीम, राजाकू हरुवावतेडखने कुदान मेला मलकिसिदिक सुदाय जुमावनेना। अरू हनमेला मलकिसिदिक इबराहीमे भलावातेडखने कताया, आमराः जीव-जहन नपाय जुवाः, माःआन।

² हनते इबराहीम हनाँय एचेरे लड़ाइते जितावनेनखन लुड़ी अगूत आन-धान अते दस बंटारे मी बंटाय ओवातिडिया। हाँयग मलकिसिदिकराः ञावराः अरत सतायराः राजा हवे। मनदो सालेमराः अरत सलसत हवे। हनालगा हाँय सलसतराः राजा हों इदानिया।

³ हाँयरिकिनाः एंगा अपा कोवाकिना अरू हाँयरिकुःआ खुटिपहार होड़कू कोवाकुःआ। हाँयराः जीवराः बुँहड़ी सहे टुटीग कोवानेःआ, अरू हाँय भगवानरीग बेनेटात इया सगर सइट लगा पुजउरी बड़ाँवतोय दोहोनता।

⁴ अबूरीग खुटिपरिया होड़ इबराहीम हों लड़ाइते जितावनेनखन लुड़ी अगूत आन-धान अते दस बंटा अते मी बंटा मलकिसिदिके एमेवातेरा। दो हाँयग मलकिसिदिक तुमिन मरंगे दोहोना हना अपे ओंगोलगेपे।

⁵ मोसेसराः नियम इया लेवीरिकुःआ नइड़-बाँस होड़कू पुजउरीकू बड़ाँःता। नँकुःआ लेवी गोतोररिकुःआ होड़कू हों इबराहीमरिकुःआ नइड़-बाँसकू दोहोना हों हँकुःआ पुजउरीकू अँनकूरिकुःआ इसराएल वपक-बोपोहकूतुकू अते आन-धानराः दस बंटारे मी बंटाकू गोःतेरा।

⁶ मलकिसिदिक लेवी गोतोररीग होड़ मेरेय दोहोगान। हनारे हों हाँय इबराहीमराः आन-धान अते दस बंटारे मी बंटाय गोःतेरा। अरू हाँय जबान पवावतो इबराहीम भलावातेडखने कताया, आमराः जीव-जहनकून नपाय जुवाः, माःआन।

⁷ मरंगीग होड़ हुडिंगीग होड़ भलावातेडखने कतायता, आमराः जीव-जहनकून नपाय जुवाः, माःआन। नाःआ कता बदीरे अबूके तोनोंगाः जाः कोवानेःआ।

⁸ होड़कूराः आन-धानराः दस बंटा अते मी बंटाकू गोःता हँकुःआ पुजउरीकू जमाकू मीनामी दिनकू गोएग जुवाःता। मनदो मलकिसिदिक जिनियते दोहोनता माःआन भगवानराः कागद उदुःगेता।

⁹ इबराहीम मलकिसिदिक सुदाय जुमावनेना हनमेला लेवी मेरेय जनमावगान अरू हाँय अनँयगरीग खुटिपहार होड़ पेंदा जांगरेय दोहोना।

¹⁰ दो अबू नाःआ हों कता अवेयताबू, होड़कू अते दस बंटा अते मी बंटाय गोःता हाँयग लेवी हों इबराहीमते मलकिसिदिक एचेरे दस बंटा अते मी बंटाय एमेगोतेडा।

ईसू मलकिसिदिक इया सगर सइट लगा पुजउरी

¹¹ भगवान अनँयगरिकुःआ एहूदाकू नियमकूने एमेवातेरा हनमेला लेवीरिकुःआ नइड़-बाँस होड़कू पुजउरी बुता लगाय हेलावतेडकुःआ। मनदो हँकुःआ पुजउरीकू भगवान मड़ंगरे होड़कू उडु-बुडू मेरकू बड़ाँव अवेगान। हनालगा हनानाः पुजउरी बुता लगा भगवान एटाः मी होड़े वारतिरिया। हाँयराः पुजउरी बुता मलिकिसिदिकराः इया दोहोना अरू लेवी गोतोररीग हारूनराः खुटिपहार वरीते सलाव वेगतना हना पुजउरी बुता इया कोवानेःआ।

¹² पुजउरी बुतारे बदलाव होयाःतान दो, नियम हों बबदला पनाराःता।

¹³ अबू पुजउरी बुता बदीरेबू कतायतना हाँयग पुजउरी ईसू, एटाः गोतोररीग हवे। मनदो हना गोतोररिकुःआ तोनोंगीग बेदीरे पुजउरी बुता मेरकू एचेगरा।

¹⁴ अबू सुसुदीतना अबूरीग परबू एहूदा गोतोररेय जनमावनेना। अरू हना गोतोररिकुःआ होड़कू एचेरे पुजउरी बुता बदीरे मोसेस तोनोंगाः मेरेय कतागरा।

¹⁵ दो मलकिसिदिक इया हाँय पुजउरीय बड़ाँव जुवाःतान दो अबू कताकेरा हना कता अरू फड़ी-फड़ीबू सुदीगोडता।

¹⁶ दो ईसू, लेवी गोतोररीग हारूनराः खुटिपहार वरीते सलाव वेगतना हना इया पुजउरी मेरेय बड़ाँवगना, मनदो ओरो टुटीगनेना हना जीवराः जंगरते पुजउरीय बड़ाँवकिया।

¹⁷ अरू हाँय बदीरे नाःआ इया हिदइत एमेत इदा, “आम मलिकिसिदिक इया, सगर सइट लगा पुजउरी इदानमेःआ।”

¹⁸ मड़ंगाः नियम अबड़ अरू सदाःआ दोहोना अरू हना नियम तोनोंगाः उडु-बुडू मेर बड़ाँव अवेगाड।

¹⁹ हना अते, हना नियमकू चलाः एंडागोतेड। मनदो नुँहू हना नियम बदलारे मीटोंग अरू नाय नपाय असरा रेःएयना, जेमहा अबू भगवान एचेरेबू सेने अवेन।

²⁰ एटाः पुजउरीकू बेगर किरिया कसट जोमते पुजउरी बुता लगाकू बड़ाँवनेना। मनदो भनगवान हमा किरिया कसट जोमकेडखन मसी पुजउरीय बड़ाँवतिरिया,

²¹ अरू हाँय एचेरेय कतातेरा, “परबू किरियाय जोमतेरा, आम सगर सइट लगा पुजउरी इदानमेःआ अरू हाँय हना किरिया अते ओरोय कुदानेना।”

²² नाःआ किरिया भगवान जोमतेरा अते ईसू नाय नपाय कता-जमकावतोरीग आभा पुरावदारे बड़ाँवनेना।

²³ मड़ंग मुरुक होड़कू पुजउरीकू बड़ाँव वेगनेना। अरू हँकू गोएग जुवाःआकू अते, सगर सइट पुजउरी बुतारे मेरकू दोहो अवेना।

²⁴ मनदो ईसू सगर सइट वरी जिनियते दोहोनता। दो हाँयराः पुजउरी बुता कहियो ओरो चबानेना।

²⁵ हाँयते भगवान एचेरेकू सेनता हँकुःआ होड़कू लगा अरजी घड़ीन सगर बेला जीयते दोनोहोनता। हनालगा हाँय हँकुःआ होड़कू जमालेःआतेय सडाव अवेकूता।

²⁶ इनीसू हमा अबू जुकूर मरंग मूक पुजउरी। हाँय सुद अरू बेगर गारबार अरू बेगर कसूरीग इदानिया। नुँहू हाँय सेरमो देसरे मुरुक मान मरजइत सुदा इदानिया।

²⁷ एटाः पुजउरीकू इया हाँय सगर दिन मड़ंग अनँयगराः कसूर लगा अरू हना तयोमते होड़कूराः कसूर लगा बलिदान एएमे लगा कोवानेःआ। हाँय मिनी तुरहा होड़कूराः कसूर लगा अनँयग बलिदानकियानखने पुरावगोतेडा।

²⁸ मोसेसराः नियमते अबड़ होड़कू पुजउरीकू बड़ाँवकूता। मनदो किरिया जोमतो जबान, नियम अते तयोमते बड़ाँवनेना। मनदो हनानाः किरियाते भगवान अनँयग बेटात ईसू सगर सइट लगा उडु-बुडूत पुजउरी बड़ाँवगे लगाय सुनावकिरिया।