इबरानी 6 - Korwa Bible

¹ हनालगा अबू मसीराः बदीरे रिता-रिता चेडतो अते अनउरबू बुधियाड़ इदीन। अबू गोएगतो इया बेलूर बुताकून अते जीव कुदा बदीरे अरू भगवान एचेरे बिसवासगे बदीरे,

² अरू बतिसमा बदीरे अरू तिःई खेपा बदीरे अरू गोएगतो अते जियाव रिमुः बदीरे अरू ओरो टुटीगनेना हना डंड बदीरे चेडतो इया नेव अनउर अहाबू गडाय।

³ दो भगवानराः ओंगोल इदान दो नाःआ अनउरबू चेडुःता।

⁴ मी तुरहा भगवानराः मरसल अरू दहिनकू पवावनेना, अरू एटाःकू सुदा सुद बिरुवातेकू मिनीनेनखन तयोमतेकू कुदा जुवाःता हँकुःआ होड़कू बदीरे चेले माःआनबू कताय?

⁵ भगवानराः नपाय सरवन अरू दरवाःआ हना जूगराः जंगर सुदीकेडखन तयोमतेकू कुदा जुवाःता हँकुःआ होड़कू बदीरे चेले माःआनबू कताय?

⁶ हँकू भगवानरीग बेटात, अरू कुरूसरे ठोंकावकिडिगखन जमाकू मड़ंगरेकू एचे बेग-हतावायता। हनालगा हँकू बिसवास अतेकू एटाः जुवाः दो, बिसवासरे अरू कहियो ओरोबू कुदा अवेतेडकुःआ।

⁷ घड़ी घड़ी उयुःता हना दाः ओत ओरता अरू किसाड़कू हना ओत अते जोःओकूनकू अदेरता। दो हना ओत भगवान अगीते नपाय दोहोनता।

⁸ मनदो ओत, जनुम अरू रटंग-पटंग ओमोनगेता दो, हना ओत बेलूर अरू एचे सती-सरापगुः लगा इदा। अरू हना जमाकून एचे बाल लो एंडान लगा इदा।

⁹ ने सउंगताकू, अले नाःआ इयाले कतायतान हों, अपे बदीरे नाय नपाय अरू सडावगे इयाःआ कताकूनले भरसाता।

¹⁰ भगवान जमालेःआ नपाये एचेयता। हनालगा अपेराः बुता अरू भगवानरिकुःआ सुद होड़कू सेवा घड़ीन हाँयपे दुलारकेरा हना, हाँय ओरोय लिड़िंगतेरा। अपे नुँहू हों हँकूपे सेवागोड ञवनतना।

¹¹ अपे जमाकू एचेय लगा ननन इया टुटीग बेला वरी ओसताजपे दोहोन लगाले चहाःतना, जेमहा अपे असराकेरा हना जमा दहिनकूनपे पवाव जुवाः।

¹² अरू सुखवार अलोपे होयाः, मनदो बिसवास अरू सहाव घड़ीन भगवानराः जबानरे इताडदारकू इदानकुःआ हँकुःआ होड़कू इया अपे होँपे एचेय।

भगवानराः जबान ओरो टगावनेना

¹³ भगवान इबराहीम एचेरेय जबानगेःआ हनमेला किरियाय जोमतेरा। मनदो हाँय किरियाय जोम मेला, आँयग अते मरंग तोनोंगीग मेरकू दोहोगान। हनालगा हाँय अनँयग आँयग अते किरिया जोमकेडखने कतातेरा,

¹⁴ “ईंग आमराः जीव-जहनिंग भल-भलायबाःगोडता, अरू आमरिकुःआ नइड़-बाँस होड़कू मुरुकिंग बगरागोडकूता।”

¹⁵ दो इबराहीम सहाव घड़ीने दोहोना अरू भगवान जबानतेरा हनाय पवावनेना।

¹⁶ होड़कू अँननकू अते तोनोंगीग मरंगीगराः किरियाकू जोमता अरू हँकूराः तोनोंगाः अड़ा-चउकी किरिया जोमकेडखनकू फड़ियावगेता।

¹⁷ ननन इया भगवान आँयगराः जबानराः इताडदारकू एचेरे, अनँयगराः ओरो टगावनेना हना बुइद उदुःबाः लगा मीटोंग किरियाय जोमकेरा।

¹⁸ दो भगवान अबू सुदाय जबानकेरा, अरू मीटोंग किरिया होंय जोमकेरा। भगवान कहियो ओरोय लबरा अवेनेना। हनालगा नाःआ बनर कहियो ओरो टगावनेना। अरू अबू हाँय एचेरे दांगगुः लगाबू बतकावकिया दो, मुरुक डीड़कियानखन अबू मड़ंगरे इदा हना असराबू पवाव अवेन।

¹⁹ भगवान एचेरे इदा अबूराः हना असरा अबू जीव लगा मीटोंग पहटाराः खुंटा इया जबड़ अरू बड़ियाड़ इदा। दो नाःआ असराते मरंग परदाराः मार परोम मुरुक सुद ततेररे भगवानराः मड़ंगरे बोलोत इया इदानबुःआ।

²⁰ हंडा ईसू अबू अते मड़ंग अबू लगाय बोलोयना। हाँय मलिकिसिदिक इया सगर सइट लगा मरंगीग मूक पुजउरीय बड़ाँवयना।