इबरानी 5 - Korwa Bible

¹ होड़कू अते सुनावतो मी होड़ होड़ हवे मूक पुजउरी। हाँय भगवानराः कताकून बदीरे होड़कू अगीते बिच-बिचवाई होड़े दोहोनता। हाँय हँकू लगा दान अरू कसूरराः बदलारे बलिदान भगवाने एमेवाता।

² हाँय अनँयग अबड़ाव जीव-जहने दोहोनता। हनालगा बेगर कनहूनदारकू अरू बहकावतो होड़कू सुदा हाँयराः लूर नेवन सुधिया दोहोनता।

³ हनालगा हाँय अनँयगराः कसूर लगा अरू एटाः होड़कूराः कसूर लगा हों बलिदान एएमे पराःता।

⁴ नाःआ इया मान मरजइत पवाः लगा तोनोंगीग अनँयग आँयगते मेरेय सुनावगेता। मनदो भगवान हारूने सुनावतेरा हनन इया भगवान हाँये सुनावगेय लगा इदा।

⁵ हनन इया मसी हों मूक पुजउरी बड़ाँवकियानखन अनँयग आँयगते मेरेय मान मरजइतगान। मनदो भगवान हाँय एचेरेय कतातेरा, “आम ईंगरीग बेटा हवे, ईंग तिसिंग आमरीग अपांगिंग बड़ाँवकिया।”

⁶ ननन इया एटाःरे होंय कतायता, “आम मलिकिसिदिक इया, सगर सइट लगा पुजउरी इदानमेःआ।”

⁷ ईसू चउंदीसरेय दोनोहोन मेला हाँय मुरुक सटी खिररी घड़ीन अरू मेड दाः जोरो जोरो हाँय गुजुः अते बनसाव अवेयता, हाँयग भगवान एचेरे असे घड़ीने अरजीःआ। अरू हाँय अकूस मनाः घड़ीने अरजीःआ अते भगवान अनायूमबाःकातेरा।

⁸ हाँय बेनेटात दोहोना। हनारे हों कटसिया सनाहाव घड़ीन अपात भगवानराः हुकुम मनाः लगाय चेडनेना।

⁹ अरू हाँय उडु-बुडूत होड़ बड़ाँवकियानखन हुकुमकू मनाःता हँकुःआ होड़कू सगर सइट लगाय सडाव अवेकूता,

¹⁰ अरू मलिकिसिदिक इया मूक पुजउरी बड़ाँः लगा भगवान हातपाते ओवाडिया।

बिसवास अते अहाबू कुदान लगा सेताव

¹¹ नाःआ कता बदीरे ककाता लगा मुरुक बड़राकून इदा। मनदो अपे ओहेन ओरोपे अयूम ठुड़ाव अवेतेरा। हनालगा अपे कता बुझावपे लगा मसकिल इदा।

¹² नाःआमिन दिन वरीते अपे चेडदारकूपे बड़ाँव जुवाःकुःआ, मनदो भगवानराः सरवनराः रिता-रिता कताकून हों तोनोंगीग नुँहू वरी अपेके अरू चेचेड पराःतना। अपे केटेग जिनिस जोम जुकूरपे होया जुवाःकुःआ, मनदो नुँहू वरी दुनूदपे ञूगोड ञवनतना।

¹³ दूदकू ञूयता हँकुःआ लइंकू बतीकू दोहोनता अरू हँकू उडु-बुडू मेरकू सुदी अवेयता।

¹⁴ मनदो बुधियाड़ इदानकुःआ हँकुःआ होड़कू कइन तुरहा उपयोतगेतान अते करा नपाय अरू करा बेलूर इदा हना जासगे लगाकू चेडकिया।