इबरानी 4 - Korwa Bible

भगवान जबानकेरा हना लोड़ोन

¹ हनालगा भगवान जबानकेरा हना लोड़ोन अबू अटकार अवेय लगा हन नुँहू वरी सलाव वेगतना। दो अबू अते तोनोंगीग होड़ हना लोड़ोन मेरेय अटकार अवेगे अते सवासिती दोहोन लगा इदा।

² हँकुःआ होड़कू अयूमतेरा हना नपाय सरवन अबू हों अयूमकेराबू। हँकुःआ होड़कू हना सरवन अयूमतेडखन बिसवास घड़ीन अँनकूराः जीवरे मेरकू दोहोगाड। हनालगा हँकू अयूमतेरा हना सरवनते हँकूके तोनोंगाः नफा मेर होयागान।

³ नुँहू अबू अतेकू बिसवासकेरा हँकुःआ होड़कू हना लोड़ोनकू अटकारगेता। दो नाःआ कता भगवान कतातेरा हनन इया इदा। हाँय कतातेरा, ईंग रीसते किरियायिंग जोमतेरा, लोड़ोन लगायिंग एमेवाकूता हंडा कहियो ओरोकू बोलो अवेनेना। भगवान चउंदीस तुलातेड वरी नाःआ लोड़ोन होड़कू अटकारगे लगाय संजोड़ दोहोतेरा। हनारे हों हाँय नाःआ इयाय कतातेरा।

⁴ सातवा दिन बदीरे तोनोंगरे नाःआ इया ओजाःतो इदा, “अरू सातवा दिनरे भगवान अनँयग बुता चबातेडखने लोड़ोनेना।”

⁵ अरू नंडा हाँय अरूय कतायता, “ईंग लोड़ोन लगायिंग एमेवाकूता हंडा कहियो ओरोकू बोलो अवेनेना।”

⁶ दो अदोम होड़कू नाःआ लोड़ोन अटकारगे लगा हन नुँहू वरी सनालाव वेगतना अरू मड़ंगरे नपाय सरवनकू अयूमतेरा हँकुःआ होड़कू हुकुम मेरकू मनावगान अते, हना लोड़ोन मेरकू अटकार अवेगाड।

⁷ हनालगा भगवान मी दिने तोल दोहोकेरा अरू हनानाः दिन बदीरे दाऊद राजाते तिसिंगाः दिन, माःआने कताकेरा। हंडा नाःआ इया ओजाःतो इदा, “तिसिंग अपे भगवानराः अरोपे अयूम दो, अपेराः जीव अलोपे कटकटगे।”

⁸ एहोसू हँकुःआ होड़कू हना लोड़ोने एचे अटकार अवेकेकुः दो भगवान एटाः दिन बदीरे ओरोय कताकेःआ।

⁹ हनन इया इदान दो भगवानरिकुःआ होड़कू लगा मीटोंग मनइद लोड़ोन बनसावतो इदा।

¹⁰ तोनोंगीग भगवानराः लोड़ोने अटकार, हाँय भगवान अनँयग बुता पुरावतेडखने लोड़ोनेना हनन इयाय लोड़ोनता।

¹¹ हनालगा अबू जमा इयाःआ मिहनइत घड़ीन हनानाः लोड़ोन अटकारगे लगाबू कुरनिसगोड ञवन, जेमहा तोनोंगीग हुकुम मेरकू मनावगान हँकुःआ होड़कू इया अलोबू बेगेनान।

¹² भगवानराः सरवन जीयत अरू कड़िगाड़ इदा। हना सरवन बनर परोम धार दोहोनता हना तलवइरते हों मुरुक लसेर इदा। हन हनसा अरू जीव अरू गेट-गेट अरू तुबूल एटाः एटाःकेडखन बेधा पारगोडता अरू जीवराः चहाः अरू ओंगोल हों जासगेता।

¹³ भगवान तुलाकेरा हना जमा सकालाः हाँय अते ओकोत कोवानेःआ। जमाकून हाँय मेडरे ञेल पुरुःता इया इदा, अरू हनाँय एचेरे अबूके आभा एएमे पराःता।

मरंगीग मूक पुजउरी ईसू

¹⁴ भगवानरीग बेटात ईसू सेरमो देसरे अबू लगा मरंगीग मूक पुजउरी इदानिया। हाँय अँननबू इया जमालेःआ अंदजावरेय परावनेना, मनदो तोनोंगाः मेरेय कसूरगाड।

¹⁵ दो हाँय अबूराः अबड़ाव जीव-जहन बदीरेय सोगा अवेवाबूता। हनालगा अबू कबुलाःता हना बिसवासरे बड़ियाड़बू दोहोन,

¹⁶ अरू डीड़ घड़ीन मयादार भगवानराः गदी अगीबू सेन, जेमहा हाँय अबू मयावा घड़ीन अबूराः जरूरइत मेलाय संघरावाबू।