इबरानी 3 - Korwa Bible

ईसू मोसेस अते मरंग इदानिया

¹ ने सुद अजी बोपोहकूतिंग, भगवान ईंगे राःकेरा हनन इया अपे होंय राःकेरा। हनालगा भगवानरीग बराहील अरू मूक पुजउरी हवे माःआनबू कबुलाःता हाँयग ईसू एचेरे अपेराः ओंगोलपे टक-टकगोड।

² मोसेस भगवानराः ओड़ाःरिकुःआ होड़कू लगा बिसवासगेयीगे दोहोना। हनन इया ईसू हों अनँयगे सुनावकेरा हाँयग भगवान एचेरे बिसवासगेयीगे दोहोना।

³ ओड़ाः तुला मिसतिरी ओड़ाः अते मुरुक मान मरजइते पवाःता, हनन इया ईसू हों मोसेस अते मुरुक बगरा मान मरजइते पवावनेना।

⁴ जनामा ओड़ाः तुला लगा तोनोगीग दोनोहोनता, मनदो जमाकूनरीग तुलादार भगवान हवे।

⁵ मोसेस भगवानराः ओड़ाःरिकुःआ होड़कू एचेरे मी होड़ सेवकिया होड़ इया बिसवासगेयीगे दोहोना। अरू तयोमरे भगवान उदुःगेता हना सताय कता बदीरे मोसेस हिदइते कता उदुःतेरा।

⁶ मनदो बेटात इया भगवानराः जमा ओड़ाःरे ईसू मसी बिसवासगेयीगे दोहोना। अरू अबू डीड़ घड़ीन टुटीग वरीबू असरागोड ञवन दो अबू हाँयराः ओड़ाःरिकुःआबू बड़ाँःता।

बेगर बिसवास बदीरे सेताव

⁷ हनालगा सुद बिरुवा कतायता हनन इया, तिसिंग अपे भगवानराः अरोपे अयूम दो,

⁸ अगड़-बगड़ अरू अंदजावराः दिनरे टयंगाब ततेररेकू एचेतेरा, हनन इया अपेराः जीव अलोपे कटकटगे।

⁹ हंडा अपेरिकुःआ खुटिपहार होड़कू ईंगकू अंदजावतिडिंगा अरू चालीस बरिस वरी ईंगराः बुताकूनकू ञेलतेरा।

¹⁰ हनालगा ईंग हना जूगरिकुःआ होड़कू सुदा रीस रंजावतोयिंग दोहोना, अरू ईंग कतातेरा, नँकूराः जीव सगर दिन बहकावगोड ञवनतना, अरू ईंगराः दूर नँकू मेरकू सुदी अवेगाड।

¹¹ दो ईंग रीसते किरियायिंग जोमतेरा, ईंग लोड़ोन लगायिंग एमेवाकूता हंडा कहियो ओरोकू बोलो अवेनेना।

¹² दो ईंगरिकुःआ अजी बोपोहकूतिंग, जीयत भगवानराः दूर अते बहकावपेता हना बेनेलूर अरू बेगर बिसवासराः जीव अपे अते तोनोंगीग एचेरे अहा होयाः लगा सवासितीपे दोहोन।

¹³ अपे सगर दिन कता बहाल होड़ेंगगोड ञवन, जेमहा तोनोंगीग कसूररे अलोय बझाः अरू जीव अलो कटकटगुः।

¹⁴ अबू बिसवासकेरा हना बेलाःआ भरसा, टुटीग वरीबू बड़ियाड़ इदीन दो, अबू मसीरिकुःआ बुता देंगवा होड़कूबू बड़ाँव जुवाःता।

¹⁵ कतत इया, “तिसिंग अपे भगवानराः अरोपे अयूम दो, अगड़-बगड़राः दिनरेकू एचेतेरा हनन इया, अपेराः जीव अलोपे कटकटगे।”

¹⁶ दो इये इयेकू अयूमतेड होंकू अगड़-बगड़तेरा? मोसेस मिसिरी देस अतेय उडुंगतेडकुःआ हँननकुःआ होड़कू अगड़-बगड़तेरा।

¹⁷ अरू भगवान चालीस बरिस वरी इये सुदाय रीस रंजावनेना? कसूरतेडखन टयंगाब ततेररेकू गोएगनेना हँननकुःआ होड़कू सुदाय रीस रंजावनेना।

¹⁸ अरू भगवान आँयगराः हुकुम मेरकू मनावगान हँकुःआ होड़कू सुदा किरियाय जोमतेरा, ईंग लोड़ोन लगायिंग एमेवाकूता हंडा कहियो ओरोपे बोलो अवेनेना, माःआन।

¹⁹ दो अबू ञेलता हँकू हाँय एचेरे मेरकू बिसवासगाड अते हंडा मेनेरकू बोलो अवेगान।