इबरानी 2 - Korwa Bible

बहकावगुः अते सवासिती

¹ हनालगा अबू अयूमकेरा हना कताकून मुरुक तिंगीड घड़ीन अबूके मनाः लगा इदा, जेमहा अबू अलोबू बहकावगुः।

² सेरमो देसरिकुःआ बराहीलकूते भगवान कतातेरा हना सरवन तोल दोहोत दोहोना, अरू हना सरवनकू टड़ावतेरा हँकुःआ होड़कू, बेगर गारबारतेःआ फड़ियावराः डंडकू पनावावनेना।

³ भगवान अबूय सडावता हना मुनुरुक मरंग सरवनबू आड-बेकारवा दो, करा इयाबू बनसाव अवेनता? नाःआ सडावराः सरवन मड़ंगरे परबू ईसू कतातेरा, अरू हाँय अतेकू अयूमतेरा हँकुःआ होड़कू हना सरवन सताय हवे माःआनकू पनकियाबाःगोतेरा।

⁴ चिनहाकूनते अरू बयाव जुवाः इयाःआ बुताकूनते अरू एटाः एटाः इयाःआ ञेनेल ञेलरे नपाय जुवाःता हना बुताकूनते, अरू अनँयग हिछा इया होड़कूय हटिंगवातेरा हाँयग सुद बिरुवाराः दहिनकूनते भगवान, हाँयराः सरवन सताय हवे माःआन हिदइते उदुःबाःगोतेडा।

ईसू मनुवाकू बरोबइरे बड़ाँवनेना

⁵ दरवाःआ हना चउंदीस बदीरेबू कतायतना दो, हना तोनोंगीग सेरमो देसरिकुःआ बराहीलकूराः आड़रे भगवान मेरेय जिमागरा।

⁶ मनदो भगवानराः कागदरे तोनोंगीग नाःआ इयाय ओजाःकेरा; “आम मनुवाराः बदीरेम ओंगोलगे लगा हाँय इये हवे, अरू मनुवारीग बेटात चिला लगाम तिहा हड़ाःगेयता?

⁷ सेरमो देसरिकुःआ बराहीलकू अते गुनमिन हुडिंगमे बड़ाँवतिडिया अरू जमा बरानाः हाँयराः आड़रे जिमाकेडखन

⁸ मान मरजइत सुदा मरंगमे तुलाकिडिया।” जमा बरानाः मनुवाराः आड़रे भगवान जिमातेरा दो, तोनोंगाः हाँयराः आड़रे दोहोन अते मेरेय रोंकावगरा। मनदो नुँहू वरी जमालेःआ हाँयराः आड़रे इदा हना इया मेरबू ञेलता।

⁹ मनदो अबू ईसूबू ञेलता। दो गुनमिन बेला लगा हाँय सेरमो देसरिकुःआ बराहीलकू अते भगवान हुडिंगे बड़ाँवतिरिया, जेमहा हाँय भगवानराः मयाते जमाकू लगा गुजुःए अटकार अवे। अरू नुँहू हाँय गुजुः सहावतेडखन मान मरजइते पवावकिया अरू मरंगे बड़ाँवयना।

¹⁰ जनामा भगवानराः हवे अरू जनामा हनाँय हमा तुलाकेरा। दो सडावराः रेःएयीग इदानिया हाँयग ईसू, कटसिया सहाव पारकेडखन उडु-बुडूत बड़ाँवगे लगा भगवानके नपाय लगावनेना, जेमहा हाँय मुरुक होड़कूय एचे मान मरजइतकू।

¹¹ होड़कू सुदे बड़ाँवकूता हाँय, अरू सुदकू बड़ाँव जुवाःता हँकू मिनी मइछुवारिकुःआ होड़कू इदानकुःआ। हनालगा ईसू हँकुःआ होड़कू, ईंगरिकुःआ अजी बोपोहकूतिंग माःआन राःकू लगा मेरेय गियुःता।

¹² भगवानराः कागदरे हाँय कतायता, “ईंग आम बदीरे ईंगरिकुःआ बोपोहकूतिंग एचेरेयिंग कतायता; अरू जमा बिसवासी होड़कू तलारे आमराः ञाविंग जागता।”

¹³ अरूय कताया, “ईंग हाँय एचेरेयिंग भरसागेता।” अरूय कतायता, “भगवान ईंगे जिमावारा हँकुःआ लइंकू सुदा ईंग नंडा इदानिंगा।”

¹⁴ भगवानरिकुःआ लइंकू, मास अरू बलंगीते बड़ाँवतो मनुवाकू इदानकुःआ। दो ईसू हों मनुवाय बड़ाँवनेना। हाँय मनुवाकू इयाय गोएगनेना, जेमहा होड़कू गोएगकू लगा जंगर इदा हाँयग कलउए लाय एंडा अवे,

¹⁵ अरू जिलिंगी भइर गुजुःराः बोतोरते बेगारी होड़कू इयाकू दोहोना हँकुःआ होड़कूय अजइतकू।

¹⁶ हाँय सेरमोरिकुःआ बराहीलकू बदीरे मेनेरेय ओंगोल दोहोगेता, मनदो इबराहीमरिकुःआ नइड़-बाँस होड़कू लगाय ओंगोल दोहोगेता।

¹⁷ हनालगा हाँय जमालेःआते मनुवाकू इया बड़ाँः लगा दोहोना, जेमहा हाँय भगवानराः सेवारे मी होड़ सोगायीग अरू बिसवासगेयीग मूक पुजउरी इया जमा होड़कूराः कसूर लगा बलिदाने होया अवेन।

¹⁸ हाँय अंदजावरेय परावनेन मेला अनँयग आँयग कटसियाय सहावतेरा। हनालगा हाँय अंदजावरेकू पराःता हँकुःआ होड़कूय संघरा अवेवाकूता।