इबरानी 12 - Korwa Bible

मुरुक बगरा हिदइतदारकूराः बिसवास

¹ भगवान एचेरेकू बिसवासतेरा हँकुःआ जमा होड़कू अबूराः चाइरो गतर, बदरी इया हिदइतदारकू इदानकुःआ। हनालगा मान अबू रोंकावबूता हनाकून अरू अबू दाःबूता हना कसूरकूनबू चलाः एंडाय। अरू भगवान अबू लगाय संजोड़केरा हनानाः बतकाः, सहाव घड़ीनबू बतकाव ञवन।

² अबूराः बिसवासे बुँहड़ीता अरूय उडु-बुडूगेता, हाँयग ईसू अगी सिरढीटबू ञेलगोड ञवन। हाँय कुरूसराः गुजुः बदीरे एचे बेग-हतान लगा मेरेय ओंगोल एरंगगान, मनदो हाँय दरवाःआ हना बहालराः कताकून लगा हना कटसियाय सहावतेरा। अरू हना तयोमते भगवानराः गदीराः खउना तिःई गतर हाँय दुड़ुःकिया।

³ कसूर होड़कू अते मुरुक कटसियाय सहावतेरा हाँयग ईसूपे ओंगोल, जेमहा अपे अदरुजीकियानखन अपेराः जीव अलो हदरावगुः।

⁴ कसूर अते जीताः लगा अपे अते तोनोंगीग नुँहू वरी बलंगी मेरपे तूगड।

⁵ अरू अपे लइंकू इयाकू चेडपेता हना सरवनपे लिड़िंग एंडागोतेडा जा, “ने बेटा, परबू आमे चेडतेरा हना नपायमे ओंगले, अरू हाँय आमे डंटाव दो अलोम अदरुजीन।

⁶ परबू दुलारगेयता हनाँये चेडता, अरू बेटायिंग माःआने कतावायता हाँये सुटियावगेयता।”

⁷ अपात मेरेय सुटियावगेयता हना इयायीग तोनोंगीग लँइग इदानिया जा? भगवान अपे, ईंगरिकुःआ लइंकू हवे, माःआने ओंगोलपेतना। हनालगा अपे जीवरे कटसिया होयाः दो, हना भगवान सुटियावलेतना माःआन ओंगोलकेडखनपे सहावया।

⁸ भगवान अपे मेरेय सुटियावपेतान दो अपे हाँयरिकुःआ निकता लइंकू ना लवे, मनदो अपे अतिंग जुमावतो लइंकू हवे।

⁹ अँननबूरिकुःआ अआपकू हों अबूकू सुटियावा अरू अबू हँकूबू मान मरजइतता। दो सेरमो देसरीग अबू अपाबूराः आड़रे दोहोकियानखन अबूके तुमिन बगरा जियाः लगा इदा।

¹⁰ अबूरिकुःआ अआपकू अँननकूराः ओंगोल इया गुनमिन बेला वरीकू सुटियावबुःआ। मनदो भगवान अबूराः नफा लगा अबूय सुटियावता, जेमहा अबू हों हनाँय इया सुदबू होया जुवाः।

¹¹ भगवान अबूय सुटियावता हान मेला अबूके नपाय मेर लगाःता। मनदो हना तयोमते सहाव सहावबू चेड जुवाःतान दो अबूराः जीव सलसत जुवाःता अरू बेगर गारबार होड़कूबू होया जुवाःता।

¹² हनालगा अपेराः लर-लूर तिःई अरू अबड़ टोबोः सोझावगेपे।

¹³ अरू अपे सोएग दूररेपे सलाः, जेमहा लंगड़ा इया इदानकुःआ हँकुःआ होड़कू अलोकू अइठाः, मनदो नाय नपायकू होया जुवाः।

भगवानराः मया अहापे आड-बेकारवा

¹⁴ जमा होड़कू सुदा हेल-मेलपे दोहोन लगा अरू सुद जीव जियाः लगा जमालेःआपे कुरनिसगोड ञवन। सुद जीव मेरकू जियाःता हँकुःआ होड़कू भगवान कहियो ओरोकू ञेल अवेतिरिया।

¹⁵ तोनोंगीग भगवानराः मयाय पवाः अते अनँयग तिःई कुदागे अते सवासितीपे दोहोन। अरू हटी जेर इया तोनोंगाः कताकून अपे तलारे अलो सेडे़याः लगा हों सवासितीपे दोहोन। नाःआ अते होड़कू हलकइन जुवाःता अरू मुरुक होड़कूराः जीव मइलाव जुवाःता।

¹⁶ अपे अते तोनोंगीग सनहा-सनही होड़कू सहे एसाव इया गारबार होड़कू अलोपे होयाः। दो मरंग बेटाकू पवाःता हना हातपात एसाव मी जुवारराः जोम जिनिस लगाय अकरिंग एंडागोतेड।

¹⁷ अपे सुसुदीता, तयोमते एसाव चहाःआ, अपांग भलावाडिंगखन ईंग जीव जहने नपायगोडता, माःआन। मनदो हना इया ओरो होया अवेकुःआ। हाँय इयाम घड़ीन अपात एचेरेय गोड़न-पइयना। हनारे हों हना हाँय मेरेय बदलाव अवेगाड।

¹⁸ होड़कूकू ञेल अवेता अरूकू टोँवाव अवेयता हना सीनाई पहाड़रे मेरपे सेनेगान। नंडा हितकाःतो सेंगेल सहे अंदरा सहे कड़िया बदरी सहे बंडोइर कोवानेःआ।

¹⁹ हँकू मरंग सोहनाई इया मुरुक मरंग अरोकू अयूमतेरा अरू हँकू भगवानराः अरो अयूमतेडखन मोसेस एचेरेकू असेया, भगवान अले सुदा अरू अलोय बुतुड़ु, माःआन।

²⁰ दो भगवान मड़ंगरेय हुकुमतेरा, “तोनोंगीग जानर हों पहाड़े टोँवाव दो दिरिते तेके ञेड एंडाय लगा इदा।” दो हना हुकुम हँकू मेरकू सहाव अवेगाड।

²¹ हँकू अयूमतेरा अरूकू ञेलतेरा हना अते हँकू मुरुककू बोरोयान अरू मोसेस होंय कतातेरा, “ईंग बोरते मुरुकिंग कलपाःआ।”

²² मनदो अपे नुँहू सीयोन पहाड़रे अरू जीयत भगवानराः सहर, सेरमो देसराः एरुसलेमरेपे सोदोरकिया।

²³ अरू हंडा अहाल-बहालते जुमावतो लाक लाक सेरमो देसरिकुःआ बराहीलकू इदानकुःआ। हंडा मरंग बेटाकूराः गउदा अरू कलसिया हों इदा अरू हँकुःआ होड़कूराः ञाव सेरमो देसरे ओजाःतो इदा। अरू अबू जमा होड़कूय फड़ियावता हाँयग भगवान हों हंडा इदानिया। उडु-बुडू बड़ाँवतो बेगर गारबार होड़कूराः हनसाकून

²⁴ अरू हाबीलराः बलंगी अते मसीराः मुरुक नाय नपाय इरचीत बलंगी हों हंडा इदा। अरू नँवा कता-जमकावतोरीग बिच-बिचवाई होड़ इदानिया हाँयग ईसू हों हंडा इदानिया।

²⁵ भगवान अपेय कता उदुःवाता हना कता नपायपे अयूम ठुड़ावगे। चउंदीसरे होड़कूय सेतावतेरा हाँयगराः कता मेरकू मनावगान, हँकुःआ होड़कू मेनेरकू बनसावगान। दो सेरमो देस अते अबूय सेतावतना हाँयराः कता मेरबू अयूम ठुड़ावगे दो, अबू बनसाव अवेनता जा?

²⁶ हनमेला भगवानराः अरो चउंदीस झिकोड़गोतेड। अरू हाँय जबानकेरा, अरू मी तुरहा चउंदीस एकला कोवान सेरमो देस होयिंग झिकोड़गेता।

²⁷ अरू मी तुरहा माःआने कताकेरा हना ननानाः उदुःता, झिकोड़ जुवाःता हना तुलात जिनिसकून टगाव एंडा जुवाःता, जेमहा मेर झिकोड़ अवेनता हना जिनिसकून दोनोहो जुवाः।

²⁸ मेर झिकोड़गुःता हना राइजबू पवावतना। हनालगा भगवानबू धनियाबाद अरू हाँयबू मान मरजइत अरू अकूस मनाः घड़ीन हाँय ननाँय जुवाः इयाबू जागगेय।

²⁹ अरू अबू अलोबू लिड़िंगगेय, अबूरीग भगवान लाय एंडायीग सेंगेल हवे।