इबरानी 10 - Korwa Bible

मसीराः नाय नपाय बलिदान

¹ दरवाःआ हना सताय नपाय कताकूनराः उंबूल इया मोसेसराः नियमकून इदा। हनालगा सगर बरिस मिनी बरानाः बलिदान घड़ी घड़ी एमेय लगा भगवान एचेरेकू वेगता, हँकुःआ होड़कू हना बलिदानते कहियो ओरोकू उडु-बुडूनेना।

² नाःआ बलिदानते होड़कू उडु-बुडू जुवाःकुः दो, घड़ी घड़ी चिला लगा बलिदानकू एमेकेःआ? भगवान जाग लगाकू वेगता हँकुःआ होड़कू मिनी तुरहारे नाय नपायतेकू सुद जुवाःकुः दो हँकू, अबू कसूर होड़कू हवे, माःआन ओनोरोकू ओंगोलकुःआ।

³ मनदो हना बलिदानते सगर बरिस होड़कू अँननकूराः कसूरकूनकू उहियारगोड ञवना,

⁴ अरू बएल अरू मेरोमकूराः बलंगीते होड़कूराः कसूर कहियो ओरो बराव एंडानेना।

⁵ हनालगा मसी चउंदीसरेय वेगनेन मेला भगवान एचेरे नाःआ इयाय कतातेरा, “आम बलिदान अरू दान मेरेम चाहावगान, मनदो आम ईंग मीटोंग देहमे ओवातिरिंगा,

⁶ बाल लो बलिदान अरू कसूरराः बलिदानते आम मेरेम ननायगुःता,

⁷ हनते ईंग कतातेरा, ने भगवान, आमराः कागदरे ओजाःतो इदा हनन इया, ईंग आमराः हिछा पुरावगे लगायिंग वेगकिया।”

⁸ मड़ंगरे हाँय कतातेरा, “आम दान अरू बलिदानकून, बाल लो बलिदान अरू कसूरराः बलिदान, नाःआ जमाकून आम मेरेम चाहावगान अरू हना अते मेरेम ननायगान।” नाःआ बलिदानकून दो मोसेसराः नियम इयाकू एमेयता।

⁹ अरू नाःआ इया होंय कताया, ञेलिंगमे, आमराः हिछा पुरावगे लगायिंग वेगकिया, माःआन। हाँय मड़ंगाः बलिदानकून चलाःकेडखन अनँयग आँयग हना बदलारेय बलिदाननेना।

¹⁰ भगवानराः हिछा इया ईसू मसीराः देह सगर सइट लगा मिनी तुरहाय बलिदानयान। हनाते अबू सुदे बड़ाँवकेडबुःआ।

¹¹ दो पुजउरीकू सगर दिन टपइर ओड़ाः पेंदारे चड़ाँकियानखनकू सेवागोड ञवनता अरू हनानाः बलिदानकून घड़ी घड़ीकू देगगोड ञवनता। मनदो हना बलिदानकूनते होड़कूराः कसूरकून कहियो मेर बराव एंडा अवेयता।

¹² मनदो मसी मिनी तुरहा सगर सइट लगा होड़कूराः कसूरकून बराव एंडा लगाय बलिदाननेना। अरू हना तयोमरे भगवानराः खउना तिःई गतररेय दुड़ुःयना।

¹³ अरू अनँयगरिकुःआ मुदइ होड़कू हरुवावकेडकूखन अनँयगराः काट हँकू चोटरे चोड रोपाः लगा भगवान अरीने तुलाकू वरी हाँय ततंगीतना।

¹⁴ मसीराः मिनी तुरहाःआ बलिदानते, सुदकू होया जुवाःता हँकुःआ होड़कू, सगर सइट लगाय उडु-बुडूगोतेडकुःआ।

¹⁵ सुद बिरुवा हों नाःआ कताकून भगवानराः कागदरे इसराएल होड़कू बदीरे हिदइत एमेतेरा,

¹⁶ “परबू कतायता, ईंग तयोमरे होड़कू सुदा ननानाः कता-जमकावतोयिंग जमकावता, ईंग इनिंगराः नियमकून हँकूराः इंदरीरेयिंग ओजाःगेता अरू हँकूराः जीवरेयिंग दोहोगेता।”

¹⁷ हनते अरू नाःआ इयाय कतायता, ईंग हँकूराः कसूर अरू गारबार कहियो ओरोयिंग उहियारतेरा।

¹⁸ होड़कूराः जमा कसूरकून बराव एंडायान दो, कसूर लगा तोनोंगाः बलिदान मेनेर बनसावगना।

डीड़ते भगवान अगीबू सेन

¹⁹ हनालगा, ने अजी बोपोहकूतिंग, ईसू मसीराः बलंगीते अबू हना सुद ततेररे डीड़केडखनबू बोलो अवेनता।

²⁰ मसीराः देह, टपइर ओड़ाःराः परदा इया दोहोना। अरू हाँय गुजुः लगाय जिमागोतेड अरू नाःआ परदा चलाः एंडाकेडखन हाँय अबू लगा मीटोंग नँवा अरू जीयत दूरे बड़ाँवगोतेरा।

²¹ अबू लगा मी होड़ मरंग मूक पुजउरी इदानिया, अरू हाँय एचेरे भगवानराः ओड़ाःराः हातपात इदा।

²² दो हनालगा अबू नपाय ओंगोलते अरू मिनी जीवते बिसवासकेडखन भगवान एचेरेबू सेन। अबूराः इंदरी बेलूर ओंगोलते इरची सुदकेडखन अरू अबूराः देह सुद दाःते एचे बुहालकियानखन हाँय एचेरेबू सेन।

²³ अबूय जबानवारा हाँयग भगवान बिसवासगेयीग इदानिया। हनालगा अबू कबुलावकिया हना असरा, बेगर हिटोः डोबोःते नपायतेबू संभाड़ ञवन।

²⁴ अबू एटाः होड़कू अलार-दुलार होड़ेंग लगा अरू नपाय बुताकूनकू एचेय लगा करा इयाबू संघरा अवेवाकूता, हना बदीरेबू ओंगोलगोड ञवन।

²⁵ तोनोंग तोनोंग होड़कू संगइती अड़ाःगे लगाकू हेवाकिया। हना इया अबू एटाः होड़कू सुदा संगइतीरे जुमाः लगा अलोबू अड़ाःगे। मनदो मसी कुदा वेगराः बेला निचकाःतना, हनालगा अँननबू अबू अनउरबू कता बहाल होड़ेंग ञवन।

²⁶ अबू भगवानराः सताय कता सुदीकेडखन हना तयोमरे ञेनेल मेडबू कसूरगोड ञवन दो अबूराः कसूर सुदगे लगा अरू तोनोंगाः बलिदान बनसावतो कोनोवानेःआ।

²⁷ मनदो नाःआ इयाकू एचेयता हँकुःआ होड़कू भगवान फनड़ियावकूताय अरू आँयगरिकुःआ मुदइ होड़कूय डंडियावता हना हितकाःतो सेंगेलरे हँकू होंय डनंडियावकूता।

²⁸ तोनोंगीग मोसेसराः नियमकूने टड़ाव एंडाःआ हाँयग होड़ बदीरे बार होड़ सहे पेय होड़, नाँय कसूरकेराय, माःआन हिदइतकू कताया दो, हाँयग होड़ बेगर मयातेकू ञेड एंडाबाःगोडेया।

²⁹ दो अँननपे ओंगले, भगवानरीग बेटाय आड-बेकारवाता अरू मयावाबूता हाँयग सुद बिरुवाय बेग-हतावाता अरू होड़कू सुदगेता हना कता-जमकावतोराः बलंगी सदाःआ इदा माःआने ओंगलेता, हाँयग होड़ भगवान तुमिन बगराय डंडियावगेयता।

³⁰ अबू सुसुदीतना, भगवान कताकेरा, “बदला कुदाय लगा ईंग इदानिंगा अरू इनिंग बदलायिंग कुदायता।” अरू नाःआ हों सुसुदीतनाबू, “भगवान अनँयगरिकुःआ होड़कूय फड़ियावता।”

³¹ जीयत भगवानराः तिःईरे पराः मुरुक जबूरन कता इदा।

³² अपे मड़ंगाः कताकूनपे उहियार अगू। भगवानराः सताय सरवनराः मरसल अपे पवावनेना हना तयोमरे मुरुक कटसियापे सहाव पारतेरा अरू अपे बिसवासरे बड़ियाड़पे दोहोना।

³³ तोनोंग तोनोंग मेला, अपे एटाः होड़कू मड़ंगरेकू बदीतेडपेःआ अरू अपेकू संतावतेरा। अरू तोनोंग मेला, एटाः होड़कूकू संतावा, हनमेला हों अपे संतावतो होड़कू सुदापे मेसानेना।

³⁴ जेहेलरेकू दोहोना, हँकुःआ बिसवासी होड़कूराः कटसियारे अपे होँपे कटसियानेना। अपे सुसुदीःआ अबू लगा मुरुक नाय नपाय अरू सगर सइट दोहोनता हना आन-धान सेरमो देसरे इदा, माःआन। हनालगा होड़कू अपेराः आन-धानकू अडिग गोःआ, हनमेला अपे बहालतेपे लुड़ी गोः ओवातेडकुःआ।

³⁵ हनालगा अपे डीड़कियानखन भगवान एचेरेपे असरागोड ञवन। दो भगवान अपे मरंग इमाने एमेवापेता।

³⁶ अपे सहावगोड ञवन लगा इदा, जेमहा भगवानराः हिछा पुरावकेडखन हाँय जबानकेरा हनापे पवाव जुवाः।

³⁷ भगवानराः कागदरे ओजाःतो इदा, “गुनहोन तयोमरे वेग लगा इदानिया हाँय वेगता, अरू हाँय ओरोय कुबेरतेरा।

³⁸ मनदो ईंगरिकुःआ बेगर गारबार होड़कू, बिसवासतेकू जिनियावगोड ञवनता, अरू हँकू कुदा तयोम जुवाः दो, ईंग हँकू सुदा ओरोयिंग ननायनेना।”

³⁹ दो अबू कुदाकियानखन लाय एंडन होड़कू कोवाबुःआ, मनदो अबू दो बिसवासकेडखनकू बनसाव जुवाःता हँकुःआ होड़कू हवे।