इबरानी 1 - Korwa Bible

भगवानराः सरवन ईसूतेबू पवावकिया

¹ ने अजी बोपोहकूतिंग, भगवान मड़ंग जूगरे अबूरिकुःआ खुटिपरिया होड़कू एचेरे आँयग बड़रा कता होड़कूते एटाः एटाः बेलारे एटाः एटाः इयाय बड़रा ञवना,

² मनदो नाःआ टुटीगगुः अते मड़ंगाः दिनरे भगवान अनँयगरीग बेटातते अबू सुदाय बड़राकिया। आँयगरीग बेटात जमा जिया-जइतकूनरीग इताडदार हवे अरू हाँय अते जमा राइजबड़ी भगवान तुलाकेरा।

³ भगवान तुमिन मरंग इदानिया हना हाँयग बेटात उदुःगेता अरू हाँय सिरामइत भगवान बरोबइर इदानिया। हाँय जमा जिया-जइतकून अनँयगराः अगम जंगर सरवनतेय संभाड़गोड ञवनता। हाँय होड़कूराः कसूर बराव एंडाकेडखन सेरमो देसरे इदानिया हाँयग मरंग भगवानराः खउना गतररे हातपात सुदाय दुड़ुःयना।

ईसू सेरमो देसरिकुःआ बराहीलकू अते अगम मरंग

⁴ ईसू सेरमो देसरिकुःआ जमा बराहीलकू अते मरंग ञावे पवावकियानते, हाँय हँकू अते अगम मरंगे बड़ाँवकिया।

⁵ दो सेरमोरिकुःआ बराहीलकू अते इये एचेरे भगवान कतातेरा, “आम ईंगरीग बेटा हवे, तिसिंग ईंग आमरीग अपांगिंग बड़ाँवकिया, माःआन?” अरू एटाः कागदरे हाँय कतायता, “ईंग हाँयरीग अपांगिंग बड़ाँःता अरू हाँय ईंगरीग बेटाय बड़ाँःता।”

⁶ अरू भगवान अनँयग मरंगीग बेटात चउंदीसरेय वारेय मेलाय कतायता, “ईंगरिकुःआ जमा सेरमो देसरिकुःआ बराहीलकू हाँयपे जाग।”

⁷ भगवान अनँयगरिकुःआ बराहीलकू बदीरेय कतायतना, “हाँय अनँयगरिकुःआ बराहीलकू होय इया, अरू सेवकियाकूतेन सेंगेल धइद इयाय तुलाकूता।”

⁸ मनदो अनँयग बेटात बदीरे नाःआ इयाय कतायता, “ने भगवान, आमराः राइज सगर सइट वरी दोहोनता, अरू आम राइजगेराः बोंग साबकेडखन सतायतेम फड़ियावगेता।

⁹ आम सताय कताम मंजूरवाता अरू बेलूर कताम हिनइस-बिनइसवाता। हनालगा भगवान, अनमरीग भगवान, बनाहालते सुनावकेडमेखन आमरिकुःआ सउंगताकूताम अते राजाय बड़ाँवकेडमेःआ।”

¹⁰ अरू, “ने परबू, जमाकून होयाः अते मड़ंग आम चउंदीसमे तुलाकेरा, अरू सेरमो आमराः कड़िगाड़तेम तुलाकेरा।

¹¹ हना जमाकून टगाव जुवाःता, अरू सोनहे इया जुना जुवाःता, मनदो आम सगर बेलाम दोनोहोनता।

¹² आम तोलोंगतो सोनहे इया हनाम कोंडोड़गोडता, अरू सोनहे इयाम बदलावगोडता। मनदो आम तोनोंग इया ओरोम बदलावनेना अरू आमराः बरिस कहियो ओरो टुटीगनेना।”

¹³ सेरमो देसरिकुःआ बराहीलकू अते तोनोंगीग एचेरे भगवान नाःआ इयाय कतातेरा जा, ईंग आमरिकुःआ मुदइ होड़कू हरुवावकेडकूखन आमराः काट चोडुः लगा अरीनिंग तुलाकू वरी ईंगराः खउना गतर दुडुःकियानखन आम ईंग सुदाम राइजकू?

¹⁴ जमा सेरमो देसरिकुःआ बराहीलकू भगवान सडावकूता हँकुःआ होड़कू सेवाकू लगाय वारतेडकुःआकू ना लवे जा?