गलातिया 6 - Korwa Bible

अँननपे संघरा होड़ेंगगोड ञवन

¹ ईंगरिकुःआ अजी बोपोहकूतिंग, सुद बिरुवा अपे अगुवाइवापेतना। हनालगा अपे अते तोनोंगीग होड़ कसूरगोड दो, अपे सुधा होड़कू इया सताय दूर अगीपे कुदा अगूय। मनदो अपे कसूररे अलोपे बझाः लगा सवासितीपे दोहोन।

² अपे कटसिया मेला जमा इयातेपे संघरा होड़ेंगगोड ञवन अरू नाःआ इया अपे जमालेःआते मसीराः हुकुमपे मनाःता।

³ मनदो अपे अते तोनोंगीग होड़ हुडिंग इदानीग हों, हाँय अनँयग आँयगते मरंगे उंगलुःता दो हाँय अनँयग अडिग जोमता।

⁴ अपे जमाकू अँननपेराः बुता नपायतेपे जासवा, जेमहा अपे एटाः होड़कू बदीरे कोवान, मनदो अपे अँननपे अपे सयाँड़ अवेन।

⁵ अपेराः जीवराः जिमेवारी अँननपे एचेरे इदा। हनालगा अँननपेराः लूर-नेवन एटाः होड़कूराः लूर-नेवन सुदा अहापे तउलावगे।

⁶ सरवने चिडुःता हाँयग होड़ अनँयगराः आन-धान आँयगरीग चेडदार होड़े हटिंगवा।

⁷ तोनोंगीग होड़ ओंगलेता, ईंग भगवानिंग अडिग अवेयता दो हाँय अनँयग आँयगे अडिग जोमता। होड़कू वेरता हनानाः जिनिसकू ईरता।

⁸ दो तोनोंगीग अनँयग जीवरे अनँयगराः बेलूर ओंगोल इयाय एचेयता, हाँय गुजुःए पवाःता। मनदो सुद बिरुवाराः ओंगोल इयाय एचेयता, हाँयग होड़ ओरो टुटीगनेना हना जीवे पवाःता।

⁹ अबू नपाय बुताबू बुतागोड ञवन लगा अबूराः जीव अहाबू हदराव ओवागे। दो भगवान तोल दोहोकेरा हना बेलारे हाँय अबू लगा इमाने एमेवाबूता।

¹⁰ हनालगा अबू जमाकू सुदा होया अवेन हनामिन, बिसेक बिसवासी होड़कू संघरागोड ञवन लगा इदा।

टुटीग चेडतो

¹¹ ईंगरिकुःआ अजी बोपोहकूतिंग, नाःआ टुटीग कता ईंग इनिंग तिःईते अपे लगा मरंग मरंग अकछरतेयिंग ओजाःगेतना।

¹² अपे खतनापे लगाकू रेनहापेता, हँकुःआ होड़कू एटाः होड़कू एचेरे अँननकू अँकू बदीरे ईंग मरंग इदानिंगा, माःआन उदुःगुः लगाकू चहाःतना। ईसू मसीराः कुरूसराः गुजुः एकलाते होड़कू सडाव जुवाःता, माःआन परसारगे अते एहूदाकू हँकूकू संतावकूता। हनालगा हँकू अपे खतनापे लगाकू रेनहापेता।

¹³ खतनाकिया हँकुःआ होड़कू, अँननकू मोसेसराः जमा नियमकून मेरकू मनाःता। मनदो हँकू अपे एचे खतनाकेडपेखन अँननकू बड़वार लगाकू रेनहापेता।

¹⁴ मनदो ईंग तोनोंग इयायिंग भल-भलायगुः दो, ईसू मसीराः कुनुरूस बदीरे एकलायिंग भल-भलायगुःता। ईसू मसी कुरूसरेय गोएगनेना, हनालगा ईंग चउंदीसराः ओंगोलकून लगा गोएगतो इदानिंगा अरू चउंदीसराः ओंगोलकून ईंग जीवरे गोएगतो इदा।

¹⁵ अपे खतनात होड़कू सहे बेगर खतनात होड़कू इदानपे हों अपे बदीरे भगवान एचेरे एटाः इयाःआ ओंगोल कोवानेःआ। मनदो मइद कता ननानाः हवे; ईसू मसीते भगवान अपेराः जीवे नँवागोतेडा।

¹⁶ नाःआ इयाकू सलावगोड ञवनतना हँकुःआ होड़कू, सतायरे भगवानरिकुःआ इसराएल होड़कूकू बड़ाँःता। अरू भगवान हँकुःआ होड़कूय सोगावा अरू सलसतरेकू दोहो ओवा।

¹⁷ ईंग ईसूरीग मूक चेला हवे अरू हनाराः चिनहा इया ईंग इनिंग देहरे कटसियाराः जोरोडिंग गोः चुवेरगेता। हनालगा अपे तोनोंगीग नुँहू वरीते ईंग अहापे हलकइनगींग।

¹⁸ ईंगरिकुःआ अजी बोपोहकूतिंग, परबू ईसू मसी अपेराः जीवे मयावा। आमीन!