गलातिया 4 - Korwa Bible

¹ अपातराः इताड दो लइंकू लगा इदा। मनदो हँकू बुता जोम जुकूर अरीनकू होयाः वरी, जमा आन-धान पवावतो होड़कू इदानकू हों, हँकू सेवकियाकू बरोबइरकू दोहोनता।

² अरू अपात तोल दोहोकेरा हना बेला वरी हँकुःआ लइंकू जिमेवारी होड़कू अरू बराहीलकूराः आड़रेकू दोहोनता।

³ हनन इया अबू हों हँकुःआ लइंकू इया नाःआ चउंदीसराः रिता-रिता चेडतो इयाबू सलाःआ।

⁴ मनदो भगवान तोल दोहोतेरा हना बेलारे हाँय अनँयग बेटात नाःआ चउंदीसरेय वारतिरिया अरू हाँय मी होड़ अइमी एचेरेय जनमावनेना अरू नियम मनाः घड़ीने दोहोना।

⁵ अरू हाँय नियमराः आड़रेकू दोहोना हँकुःआ होड़कू सडावकेडकूखन अनँयग लइंकू इयाय समुटावकेडकुःआ।

⁶ नुँहू अबू भगवानरिकुःआ लइंकूबू बड़ाँवयना अते, हाँय अनँयग बेटातराः बिरुवा अबू जीवरेय वारकेरा। हनाँय बिरुवाते अबू हाँय, ने अबबा, ने अपांग, माःआन चइड़ घड़ीनबू राः अवेयता।

⁷ हनालगा अपे नुँहू वरीते बेगारी होड़कू ना लवे, मनदो भगवानरिकुःआ लइंकू हवे अरू लइंकू हवे दो इताडदारकू होँपे बड़ाँवयना।

बिसवासी होड़कू बदीरे पउलूसराः कुहकाः

⁸ अपे मड़ंगरे भगवान मेरपे सुदीया अरू सतायरे भगवान ना लवे हँकुःआ देवता-धरमीकूराः आड़ दाबरेपे दोहोना।

⁹ मनदो नुँहू अपे भगवानपे सुदीकेरा, बलकि भगवान अपेय सुदीकेडपेःआ। दो अपे हनानाः बेगर लूर अरू सदाःआ नियमकून, मनाः लगा चिला लगापे बहुराःतना? दो हना नियमकूनपे मनाः अते अपे हना नियमकूनराः आड़रे अरूपे दोहो जुवाःता।

¹⁰ चिला लगा अपे भगवानपे एचे ननाय लगा तोनोंग तोनोंग दिनकून, महिनाकून, तोल दोहोत बेलाकून अरू बरीसकूनपे मनाःता?

¹¹ दो अपे लगा ईंग सेसा-दुराकिया, हना सदाःआ होया जुवाःता माःआन ओंगोल खोबराः घड़ीन, अपे बदीरे ईंग जीव कुहकाःतना।

¹² ने अजी बोपोहकूतिंग, अपे एचेरेयिंग गोड़न-पइयनतना। अपे मड़ंगरे नियमकून मेरपे मनावगाड, हनन इया ईंग होयिंग होयाकिया। दो नुँहू अपे ईंग इया नाःआ नियमकून मनाः लगापे अड़ाः एंडागोड। ईंग अपे एचेरे मड़ंग मी तुरहा परसारगे लगायिंग सेनेडा दो,

¹³ अपे बेग-हतावाडिंगा जा? अरू अपे ईंग बदीरे अलपाहानाय, माःआनपे सुदीया। हनते हों अपे ईंग नपायतेपे संघरावातिरिंगा।

¹⁴ ईंग अलपाहानेन मेला अपे लगा बोझा इयायिंग दोहोना। हनते हों अपे ईंग हुडिंग मेरपे ओंगोलवागडिंग अरू मेरपे एरंगवागडिंगा। मनदो अपे ईंग भगवानरीग बराहील सहे इनीसू मसी इया ईंगपे नेत-नेवारतिरिंगा।

¹⁵ ईंग सुदीयतना, होनोयाःकून करे अपे अँननपेराः मेड हों गुड़तीग उडुंगकेडखन ईंग लगापे एमेगोडकेःआ। हनमेला अपे ईंग बदीरे मुरुक बहालतेपे दोहोना। दो नुँहू नाःआ इया करा उड़ीपे बदलावयना?

¹⁶ ईंग अपे एचेरे सतायिंग कता उदुःगोड ञवना, दो ईंग अपेरीग मुदइ होड़िंग बड़ाँवयना जा?

¹⁷ हँकुःआ लबरा चेडदार होड़कू अपे लहराव फुसलावकेडखन सउंगताकूपे बड़ाँः लगाकू चहाःतना। मनदो हँकूराः ओंगोल नपाय कोवानेःआ अरू अपे ईंगराः चेड अते हिगार गोःपे लगाकू चहाःतना, जेमहा अपे हँननकूराः चेडतो बहालतेपे मनाव ञवन।

¹⁸ अपे नपाय ओंगोलते ओसताजपे दोहोन दो मुरुक नपाय इदा, मनदो ईंग अपे सुदायिंग दोहोनता हना बेला एकला ओसताज अहापे दोहोन।

¹⁹ ने ईंगरिकुःआ लइंकू, ईसू मसीराः लूर-नेवन इया अपेराः लूर-नेवन अरीन होयाः वरी, ईंग अपे लगा लरकुरहिया अइमी इया कटसियायिंग सहावगोड ञवनता।

²⁰ ईंग अपे बदीरे ओंगोल खोबराः घड़ीनिंग कुहकाःतना। हनालगा ईंग अपे एचेरे ओहेन सेन लगा अरू मुहा-मुही बुतुड़ु लगायिंग चहाःतना।

साराह अरू हजीराराः अउल-तउल कहड़ी

²¹ अपे मोसेसराः नियमकून मनाः घड़ीन दोहोन लगापे चहाःतना दो, अपे ईंगपे उदुःवा। अपेराः नियमकून चेले माःआन कतायता, हना अपे मेरपे सुदीयतना जा?

²² भगवानराः कागदरे ओजाःतो इदा; इबराहीमरिकिनाः बार होड़ लइंकिन दोहोना। मी होड़रीग एंगात बेगारी होड़, हजीरा दोहोना। अरू मी होड़रीग एंगात इबराहीमरीग अइमी, साराह दोहोना अरू हाँय बेगारी होड़ कहियो मेरेय दोहोगान।

²³ बेगारी होड़तेय जनमावनेना, हाँय मी होड़ होड़राः ओंगोलतेय जनमावनेना। मनदो अजइत अइमीतेय जनमावनेना हाँयग लँइग भगवानराः जबान इयाय जनमावनेना।

²⁴ नाःआ कहड़ीरे मीटोंग अउल-तउल कता इदा। नँकिनाः बनर अइमीकिन भगवान होड़कू सुदाय एचेयकेरा हना बनर कता-जमकावतो इया इदनकिना। मीटोंग सीनाई पहाड़रे मोसेसते एहूदाकू सुदा भगवान एचेतेरा हना कता-जमकावतो हवे। अरू हान हजीरा हवे अरू हाँयरिकुःआ लइंकू जमाकू बेगारी होड़कू हवे।

²⁵ हजीरा अरब देसराः सीनाई पहाड़ इया इदानिया अरू हना पहाड़ चउंदीसराः एरुसलेम सहरते अउल-तउलतो इदा। अरू हँकुःआ एहूदाकू हों नियमकूनकू मनाः घड़ीन बेगारी होड़कू इया इदानकुःआ।

²⁶ मनदो सेरमो देसराः एरुसलेमते अउल-तउलतो इदानिया हाँयग साराह अजइत इदानिया अरू हाँय अबूरीग एंगाबू हवे।

²⁷ भगवानराः कागदरे नाःआ इया ओजाःतो इदा; “ने लइंकू मेरेय ऊम अमिंगगना हाँयग बहिली अइमी, आम अहाल-बहाल जुवाःमे। अड़ाः एंडात इदानिया हाँयग अइमी एचेरे, हेरेलतो सुदा इदानिया हाँयग अइमी अते, मुरुक बगरा लइंकू आम एचेरे इदानकुःआ। हनालगा मेरेम लरकुरहियागान हाँयग अइमी आम लंदा कुचा जुवाःमे।”

²⁸ दो ईंगरिकुःआ अजी बोपोहकूतिंग, अबू इबराहीमरीग बेटात इसहाक इया भगवानराः जबान इयाःआ लइंकू इदानबुःआ।

²⁹ होड़राः ओंगोलतेय जनमावनेना हाँयग लँइग भगवानराः बिरुवातेय जनमावनेना हाँयग लँइगे संतावतेरा। ननन इया नुँहू हों होयाःतना।

³⁰ मनदो नियमकून कागदरे चेले माःआन ओजाःतो इदा? अजइततो अइमीरीग बेटात सुदा बेगारी अइमीरीग बेटात इताडदार ओरोय बड़ाँवनेना। हनालगा बेगारी होड़ अरू आँयगरीग बेटात उडुंगगोडकिनपे।

³¹ दो ईंगरिकुःआ अजी बोपोहकूतिंग, अबू बेगारी अइमीरिकुःआ लइंकू ना लवे, मनदो अबू अजइत अइमीरिकुःआ लइंकू हवे।