गलातिया 3 - Korwa Bible

नियम मनाः अते जा बिनिसवासते?

¹ ने गलातियारिकुःआ होड़कू, अपे करा उड़ी नाःआ इयापे बोकोयना? ईसू मसी कुरूसरेय गोएगनेना माःआन अपे सनाताय सतायिंग उदुःवातेडपेःआ। दो अपे करा इया पती ञेडतो इयापे होयायना?

² मीटोंग कता ईंगपे उदुःवा। अपे भगवानराः सुद बिरुवा करा इयापे पवावकिया, नियम मनावकेडखन जा, नपाय सरवन बिसवासकेडखन?

³ अपे नाःआ इया करा इयापे बोको-डोंडोयना? सुद बिरुवा अपे जीवरेय बुँहड़ीकेरा, हना बुता अपे अँननपेराः ओंगोलते पुरावगे लगापे कुरनिसगेतना जा?

⁴ नाःआमिन अपे सेसा-दुराकिया, हना दो सदाःआयना जा? मेनेर होयागना।

⁵ ईंग अपे एचेरे अरूयिंग होंबरेतना। भगवान अपे सुद बिरुवाय ओवाडपेःआ अरू अपे तलारे बयाव जुवाः इयाःआ बुताकूने एचेकेरा। अपे नियमपे मनाः अते भगवान नाःआ जमाकूने एचेकेरा जा? कोनोवान। अपे ईसू मसीराः नपाय-सरवनपे बिसवासकेड अते भगवान नाःआ जमाकूने एचेकेरा।

⁶ ननन इया, “इबराहीम भगवान एचेरेय बिसवासतेरा, अरू भगवान हाँय बेगर गारबार होड़े ओंगोलबाःकातेरिया।”

⁷ नाःआ कता अपे सुदीगे लगा इदा। भगवान एचेरेकू बिसवासगेता, हँकुःआ होड़कू इबराहीमरिकुःआ लइंकू हवे।

⁸ मड़ंग जूग वरीते भगवानराः कागदरे नाःआ इया ओजाःतो इदा, बेगर एहूदाकू भगवान एचेरेकू बिसवासगे अते, कसूर अते फड़ियावतो होड़कूय बड़ाँवकूता। अरू भगवान नाःआ सरवन इबराहीम एचेरेय कतातेरा, “आम अते चउंदीसरिकुःआ जमा जइत होड़कू नपाय जीव-जहनतेकू दोहोनता।”

⁹ दो इबराहीम इया भगवान एचेरेकू बिसवासगेतना, हँकुःआ होड़कूराः जीव-जहन हों भगवान ननपायगेता।

¹⁰ भगवानराः कागदरे नाःआ इया ओजाःतो इदा; “जनामा नियमकून मेरकू मनाःता, हँकुःआ होड़कूराः जीव सती-सरापतो इदा।” हनालगा तोनोंगीग होड़ ओंगलेता, ईंग नियमिंग मनाः दो भगवान ईंग लगाय ननाय जुवाःता। हनते हों हाँय सती-सरापतो इदानिया।

¹¹ भगवानराः कागदरे नाःआ इया हों ओजाःतो इदा, “भगवान बेगर गारबारीग होड़े बड़ाँवकिरिया हाँयग होड़, बिनिसवासतेय जियावगोड ञवनता।” हनालगा तोनोंगीग होड़ जमा नियमकून मनावकियानखन भगवान ओरोय ननाय अवेतिरिया।

¹² भगवानराः कागदरे नाःआ इया ओजाःतो इदा; “मी होड़ नियमकून जमालेःआय मनाःतान दो, हननते हनाँयग होड़ जीयते दोहोनता।” हनालगा नियमकून मनाः इदान दो बिनिसवासगे लगा कोवानेःआ।

¹³ भगवानराः कागदरे ओजाःतो इदा, तोनोंगीग कठवारेकू ठोंकावगेयतान दो, हाँयग होड़ सती-सरापतोय दोहोनता। दो ईसू कुरूसरेकू ठोंकावतिरिग मेला, हाँय अबूराः कसूर बदलारे सती-सरापनेनखन नियमराः सती-सरापतेय सडावकेडबुःआ।

¹⁴ ईसू मसी अबूय सडावकेड अते, भगवान इबराहीमराः जीव-जहने नपायतेरा। हनन इया हाँय बेगर एहूदाकूराः जीव-जहन होंय नपायकेरा, जेमहा भगवान जबानतेरा हाँयग सुद बिरुवा अबू बिसवासकेड अतेबू पवाः।

भगवानराः जबान इया इताडबू पवावकिया

¹⁵ ने अजी बोपोहकूतिंग, सगर दिनाः कताकून अते मीटोंग कतायिंग कतायता। होड़कूराः कता-जमकावतो तोनोंगीग मेरकू टड़ावगेता अरू मेरकू बदलायता।

¹⁶ अपे ईंगपे अयूम, इबराहीम एचेरे अरू हाँयरिकुःआ नइड़-बाँस होड़कू अते मी होड़ एचेरे भगवान जबानतेरा। दो भगवानराः कागदरे हना जबान इबराहीमरिकुःआ मुरुक नइड़-बाँस होड़कू एचेरे मेरेय जबानगाड, मनदो मिनी होड़ एचेरेय जबानतेरा, अरू हनाँय हवे सडावदार मसी।

¹⁷ भगवान इबराहीम एचेरेय कता-जमकावतेरा, हना जबान चइर सव तीस बरिस तयोमराः तुलात नियमकूनते मेर टगावगुःता सहे मेर बदलाव अवेयता।

¹⁸ भगवान अगीते अबू इताडबू पवाः लगा नियमकून अबू मनाः परावकुः दो भगवानराः जबानते अबू इताड ओरोबू पवावकुःआ। मनदो भगवान इबराहीम एचेरे जबानतेडखने इताडकेडबुःआ।

¹⁹ दो नाःआ नियमकून चिला लगा भगवान अबूय एमेवातेरा? अबू कसूर होड़कू हवे माःआन उदुःगे लगाय एमेतेरा। मड़ंगरे भगवान जबानतेरा हाँयग नइड़-बाँस होड़ अरीने वेग वरी नाःआ नियमकून सलावनेना। अरू नाःआ नियमकून सेरमोरिकुःआ बराहीलकूते मोसेस बिच-बिचवाई होड़ साबतेडखन होड़कू एचेरे भगवान कता उदुःतेरा।

²⁰ भगवान इबराहीम एचेरेय कता-जमकावतेरा हना जबान तोनोंगीग बिच-बिचवाई होड़ साबतेडखन मेरेय जबानगाड, मनदो हाँय अनँयग आँयगतेय जबानतेरा।

²¹ अपे नाःआ इयापे ओंगलेतना जा, भगवानराः जबान अरू मोसेसराः नियमकून मेर जुमाःतना, माःआन? बुरी, नाःआ इया कोवान! अबू तोनोंगाः नियमकूनबू मनाः अते नपाय जीवबू जियाव अवेकुः दो हनानाः नियमकूनते, अबू भगवानराः ओंगोल इया बेगर गारबार होड़कूबू बड़ाँवकुःआ।

²² मनदो भगवानराः सरवन नाःआ इया कतायता, जमा होड़कू कसूरगोड ञवनताकू, अरू ईसू मसी एचेरेकू बिसवासगेता, हँकुःआ होड़कूराः जीव-जहन भगवान आँयगराः जबान इयाय नपायगेता।

²³ मनदो भगवान अबू बिसवासराः दूर अरीने उदुःवाबू वरी अबू एहूदाकूराः नियमकून मनाः घड़ीन हनानाः नियमकूनराः आड़रे सींगतो होड़कू इयाबू दोहोना।

²⁴ ईसू मसी एचेरे बिसवासकेडखन भगवानराः ओंगोलरे बेगर गारबार होड़कू अरीनबू बड़ाँः वरी अगुवाइवाबू लगा अरू संघरावाबू लगा नाःआ नियमकून भगवान एमेतेरा।

²⁵ नुँहू ईसू मसी वेगकिया अरू अबू हाँय एचेरेबू बिसवास अवेयता। हनालगा अबू नुँहू नियमकूनराः आड़रे कोवाबुःआ।

²⁶ ईसू मसी एचेरे बिसवासकेडखन अपे जमाकू भगवानरिकुःआ लइंकूपे बड़ाँवयना।

²⁷ अरू अपे बतिसमाते ईसू मसी सुदापे मिनीयना अरू नँवा सोनहेपे तुसिंगतान इया अपेराः लूर-नेवन ईसू मसीराः इया होयायना।

²⁸ अपे एहूदा होड़ सहे बेगर एहूदा होड़पे दोहोन, बेगारी होड़ सहे मालिकपे दोहोन, मरद सहे अइमीपे दोहोन, अपे ईसू मसी एचेरेपे बिसवासकेरा अते अपे जमाकू बरोबइर इदानपेःआ।

²⁹ अरू अपे ईसू मसीरिकुःआ होड़कू इदानपेःआ दो इबराहीमरिकुःआ नइड़-बाँस होड़कूपे बड़ाँवकिया अरू जबान इया इताडदारकूपे बड़ाँवकिया।