गलातिया 2 - Korwa Bible

पउलूस अरू एटाः मूक चेलाकू

¹ चउदाह बरिस तयोमरे ईंग बरनाबास सुदा एरुसलेमिंग सेनेडा अरू तितूस हों ईंग सुदायिंग गोःतिरिया।

² भगवान ईंगे कतावातेरा, आम एरुसलेममे सलाव जुवाः, माःआन। हनालगा ईंग हंडा तोरायिंग। हंडाले सोदोरनेनखन, बिसवासी होड़कूरिकुःआ मरंग मरंग मूक होड़कू सुदा, एटाःरेले जुमावनेना। बेगर एहूदाकू एचेरे नपाय सरवन कता उदुःगे लगा ईंगराः मड़ंगःआ अरू नुँहुःआ सेसा-दुरात, सदाःआ अहा होयाः लगा, हना सरवन बदीरे हँकुःआ मूक होड़कू एचेरे एकलायिंग कतातेरा।

³ तितूस बेगर एहूदा होड़े दोहोना। हनते हों एरुसलेमरे ईंग सुदाय दोहोन मेला, हाँय खतनागेय लगा मेरकू रेनहागडीग।

⁴ अदोम होड़कू सनातायते बिसवासी होड़कू मेरकू दोहोगान अरू लबरा बराहीलकू इयाकू दोहोना। ईसू मसी अबूय अजइतगोतेडबुःआ, मनदो हना अजइत अते एहूदाकूराः खतनात नियमकून एचे मनावकेडबूखन बेगारी होड़कू बड़ाँवबू लगाकू चहाःआ।

⁵ अपे सनातायते नपाय सरवनपे सुदीगे लगाले चहाःतना। हनालगा अले हँकुःआ बराहीलकूराः कता गुनमिन बेला वरी हों मेरले मनावगान।

⁶ होड़कू अदोम मूक होड़कू बदीरे मरंग होड़कू माःआनकू ओंगोलकूता। मनदो भगवान तोनोंगीग मेरेय पाचपटीगेयता। हनालगा नाःआ अते ईंगके कही आँच ओरो लगावनेना, अरू ईंग परसारतेरा हना सरवनरे तोनोंग इया मेरकू बदलाव अवेगाड।

⁷ मनदो हँकुःआ होड़कू सुदीगोतेड, नपाय सरवन एहूदाकू एचेरे परसार उदुःगे लगा भगवान पतरसे वारकिरिया। हनन इया बेगर एहूदाकू एचेरे भगवान पउलूसे वारकिरिया, माःआन।

⁸ एहूदाकू एचेरे मूक चेलाराः सेवागे लगा भगवान पतरसे वारकेरा। अरू हनाँयग भगवान बेगर एहूदाकू एचेरे मूक चेलाराः सेवागे लगा ईंग होंय वारकेरा।

⁹ कलसियारिकुःआ अगुवा मूक होड़कू हवे माःआनकू कतावाकुःआ, हँकुःआ एकूब, पतरस अरू एहुना, भगवान ईंग लगाय एमेवाडिंगा हना जिमेवारीकू सुदीगोतेड। दो हँकू ईंग अरू बरनाबास, अबूरिकिनाः सेवा देंगवा होड़किन हवे, माःआनकू मनेवातेडलिंगा। नाःआते अलिंग बेगर एहूदाकू एचेरे अरू हँकू एहूदाकू एचेरे सेवाकू लगा मिनी राययानकू।

¹⁰ हँकू अले एचेरे मिनीटोंग कताकू कतातेरा, अपे गरीब होड़कूपे संघरावाकू लगापे उहियारगोड ञवन। अरू नाःआ बुता जमा बेला एचेय लगा ईंग इनिंग सपड़ावतोयिंग दोहोना।

पउलूस अंतकियारे पतरसे मंदरावतिरिया

¹¹ पतरस अंतकिया सहररेय वेजेडा दो ईंग घंटावतिडिगखन हाँय एचेरेयिंग कतातेड, आम गारबारकेरा, माःआन।

¹² हाँयराः गारबार नाःआ दोहोना; एकूबरिकुःआ होड़कू हंडा अरीनकू वेग वरी बेगर एहूदा बिसवासी होड़कू सुदाय जोम-ञूया। मनदो हँकू वेजेड दो हाँय हँकू बोतोरते बेगर एहूदाकू सुदा जोम-ञूय लगाय अड़ाःगोतेड।

¹³ एटाः एहूदाकू हों हाँय इयाकू पचघुचियाःआ, अरू हनन इया बरनाबास होंय पचघुचियाःआ।

¹⁴ मनदो हँकूराः लूर-नेवन सताय नपाय सरवन इया मेरिंग ञेलगाड। दो ईंग जमाकू मड़ंगरे पतरस मंदराव घड़ीनिंग कतावातेरिया, “ने पतरस, आम एहूदा होड़ हवे, मनदो आम बेगर एहूदा होड़ इयाम जियाःतना। दो चिला लगा आम बेगर एहूदाकू, एहूदाकू इया जियाः लगाम रेनहाकूता?”

¹⁵ अलेरिकुःआ एंगा-अपाकू सताय एहूदाकू दोहोना अरू अले बेगर एहूदाकू इया कसूर होड़कू कोवालेःआ।

¹⁶ तोनोंगीग होड़ एहूदाकूराः नियमकून मनाः अते भगवान हाँय कसूर अते फड़ियावतो होड़ मेरेय बड़ाँवगेयता। मनदो हाँय ईसू मसी एचेरेय बिसवासगेता दो, हनानाः अते भगवान हाँय कसूरते फड़ियावतो होड़े बड़ाँवगेयता, माःआनले सुनुदीयतना। हनालगा अले एहूदाकू हों नियमकूनले मनाःता हना अते कोवान, मनदो ईसू मसी एचेरेले बिसवासगेता हना अते भगवान अले कसूर फड़ियावतो होड़कूय बड़ाँवकेडलेःआ।

¹⁷ अले एहूदाकू ईसू मसीते कसूर अते फड़ियावतो होड़कू बड़ाँवले लगाले ञामगेता। मनदो अले हों बेगर एहूदाकू इया कसूर होड़कू इदानलेःआ। दो ईसू मसी अलेय एचे कसूरलेता, जा? नाःआ इया कहियो ओरो होयानेना।

¹⁸ ईंग बिसवासते कसूर अते फड़ियावतो होड़िंग बड़ाँवनेना। अरू हना ईंग अड़ाःकेडखन अरू एहूदाकूराः नियम मनाः लगायिंग सेन दो उलात जोम होड़ इयायिंग बड़ाँःता अरू ईंग इनिंग कसूर होड़ इदानिंगा माःआनिंग उदुःबाःगुःतना।

¹⁹ ईंग मेरिंग मनाव अवेगान हनानाः नियमते ईंग कसूर बदीयना। दो ईंग हना नियम मनाव पुरावगे लगायिंग अड़ाःगोतेडा, जेमहा ईंग भगवान लगायिंग जियाव अवेन। ईंग मसी सुदा कुरूसरे गोएगतो इदानिंगा,

²⁰ अरू नुँहू ईंग मेरिंग जियाःतना, मनदो ईसू मसी ईंग इंदरीरेय जियाःतना। ईंग दुलारकेडखन अनँयग जीव ईंग लगाय एमेकेरा हनाँयग भगवानरीग बेटात ईसू मसी एचेरे बिसवासकेडखन नुँहूयिंग जियाःतना।

²¹ नियम मनावकेडखन कसूर अते फड़ियावतो होड़कूबू बनाड़ाँव अवेकुः दो, ईसू मसी अबू लगा गुनुजुः बेगर मतलोब होयाकुःआ। हनालगा भगवानराः मया सदाःआ हवे माःआन, मेरिंग ओंगलेतना।