गलातिया 1 - Korwa Bible

पउलूस अगीते मसी सलाम

¹ ने अजी बोपोहकूतिंग, होड़कू अगीते सहे मनुवाकूराः ओंगोलते कोवान, मनदो ईसू मसीते अरू गोएगतो अते ईसूय जियाव रेमकिरिया हाँयग अपांग भगवान, हँकिनराः हिछाते मूक चेला बड़ाँवतो ईंग पउलूस,

² ईंग सुदा इदानकुःआ, हँकुःआ जमा बिसवासी होड़कू सुदा, गलातिया राइजराः कलसियारिकुःआ बिसवासी होड़कू, अपे लगा, नाःआ चिठीयिंग ओजाःगेतना।

³ अबूरीग अपांग भगवान अरू परबू ईसू मसी, अपेकिन मयावा, अरू सलसतरेकिन दोहो ओवापे।

⁴ नाःआ बेलूर चउंदीसराः जंगरते अबू सडावबू लगा, ईसू मसी अबूरीग अपांग भगवानराः ओंगोल इया, अबूराः कसूर लगा अनँयग आँयग गुजुः लगाय जिमायान।

⁵ होड़कू भगवान सगर सइट जूग वरी मान मरजइत घड़ीनकू जाग ञवन। आमीन!

मिनीटोंग सताय नपाय सरवन

⁶ अपे ईसू मसीराः मयाते नपाय सरवनपे बिसवासगे लगा भगवान अपेय राःकेरा, अरू हना बिसवास अते अपे हनाली कुदाकियानखन एनेटाः एटाः दूरपे साबकेरा। हनालगा अपे बदीरे, ईंग मुरुकिंग बयावयना।

⁷ सनातायरे, अरू एनेटाः दूर कोनोवानेःआ। मनदो तोनोंग तोनोंग होड़कू अपेराः ओंगोल बार जीव होयाः लगा अरू ईसू मसीराः नपाय सरवन अते अपे एटाः दूर अगी गोःपे लगाकू चहाःतना।

⁸ मनदो अपे ईंगपे अयूम! अले अपे एचेरे मड़ंगरेले कता उदुःतेरा, हना नपाय सरवन अते एटाः दूर अले सहे सेरमो देसरिकुःआ बराहीलकू अते तोनोंगीग वेगवाडखने चेडपे दो, भगवान हाँये सती-सरापगोडता।

⁹ नाःआ कता मड़ंगरे होयिंग कता उदुःतेरा, अरू हनन इया नुँहू अरूयिंग कतायतना, अपे बिसवासकेरा हना नपाय सरवन अड़ाःकेडखन एटाः सरवन तोनोंगीग परसारगे दो, भगवान हाँये सनाती सरापगेयता।

¹⁰ दो ईंग, होड़कू कता ननाय लगा जा भगवान बुता ननायगे लगायिंग चहाःतना? अपे चेले माःआनपे ओंगोलगींगतना, नाँय होड़कू जहंडाव होड़ हवे? ईंग नुँहू वरी होड़कू कता ननाय होड़िंग दोहोकुः दो ईंग मसीरीग सेवकिया होड़ ओरोयिंग दोहोकुःआ।

पउलूस ईसूरीग मूक चेलाय बड़ाँवनेना

¹¹ ईंग अजी बोपोहकूतिंग, अपेयिंग कता उदुःवाडपेःआ, हना नपाय सरवन होड़कूराः तुलात सरवन ना लवे।

¹² ईंग जूग पुटूसरीग ततयिंग अते, सहे तोनोंगीग एटाः होड़ अते, नाःआ सरवन मेरिंग चेडगना। मनदो इनीसू मसी हमा, नाःआ नपाय सरवन ईंगे एचे उदुःवारा।

¹³ ईंग अजी बोपोहकूतिंग, अपे नपायतेपे सुसुदीतना, मड़ंग ईंग एहूदा धरम इयायिंग सलाःआ। हनमेला ईंग भगवानराः कलसियारिकुःआ होड़कूयिंग संतावा, अरू लाय एंडाकू लगा मुरुकिंग कुरनिसगेःआ।

¹⁴ अले एहूदाकूराः रिती-बिधी इया नियम मनाः लगा, ईंग इनिंग घुरी-परी होड़कू अते ओसताजिंग दोहोना।

¹⁵ मनदो ईंग जनमावगुः अते मनाड़ंग भगवान अनँयग मयाते ईंग एटाःगिंग लगाय ओंगोल दोहोतेरा।

¹⁶ हनते हाँय अनँयग बेटात ईंगे उदुःवारिंगा, जेमहा ईंग बेगर एहूदाकू एचेरे नपाय सरवनिंग कता उदुःवाकू। ईंग तोनोंगीग होड़ सुदा मेरिंग कता होड़ेंगगना,

¹⁷ अरू ईंग अते मड़ंग ईसूरिकुःआ मूक चेलाकू बड़ाँवनेना, हँकुःआ होड़कू एचेरे एरुसलेम सहर अगी मेरिंग सेनेगान, मनदो अरब देसिंग सेनेडा अरू हंडा अते दिमसकूस सहरिंग कुदा वेजेडा।

¹⁸ पेय बरिस तयोमरे ईंग पतरस सुदा जुमाः लगा एरुसलेम सहरिंग सेनेडा अरू हाँय सुदा हंडा पंदरह दिनिंग दोहोना।

¹⁹ हंडा ईंग परबू ईसूरीग बोहोत एकूब अड़ाःवाडखन अरू एटाः तोनोंगीग मूक चेलाकू सुदा मेरिंग जुमावगान।

²⁰ ईंगराः कता सनाताय हवे अरू भगवान सुनुदीयतना, नाँय मेरेय लबरातना, माःआन।

²¹ हना तयोमते ईंग सिरिया देस अरू किलिकिया देसिंग सेनेडा।

²² हनामिन दिन वरी एहूदिया छतरराः कलसियारिकुःआ बिसवासी होड़कू अते तोनोंगीग ईंग मेरकू सुदीगडिंगा।

²³ मनदो हँकुःआ होड़कू ईंग बदीरे नाःआ इयाकू अयूमकेरा, मड़ंगरे अबूय संतावतेरा अरू नाःआ दूररिकुःआ होड़कूय लाय एंडातेरा हनाँयग होड़ नुँहू हनानाः नपाय सरवने परसारगेतना।

²⁴ अरू ईंग बदीरे हँकू भगवानकू जागा।