इपीसी 6 - Korwa Bible

एंगा अपा अरू लइंकू

¹ ने लइंकू, अपे परबूरिकुःआ हवे। हनालगा अपेरिकुःआ एंगा-अपाकूराः कताकूनपे मनाःतान अते ननपायपे एचेयतना।

² भगवान जबानकेडखने हुकुमकेरा हना हुकुम अते मड़ंगाः हुकुम ननानाः हवे, “अपेरिकुःआ एंगा अपाकू मान मरजइतकूपे,

³ जेमहा अपेराः जीव नपाय दोहोन अरू मुरुक बरिस वरीतेपे जियाव जोम।”

⁴ ने अआपकू, अपेरिकुःआ लइंकू अहापे बिरझावकू, मनदो परबूराः ओंगोल इयाकू जियाः लगा सेताव घड़ीनपे चेड हराकू।

सेवकियाकू अरू मालिककू

⁵ ने सेवकियाकू, अपे ईसू मसीराः कतापे मनाःता हनन इया, अपेरिकुःआ मालिककूराः अकूस मनाः घड़ीन हँकूराः कता मिनी जीवतेपे मनाः।

⁶ अपे बुता लगा अहापे जहंडाव अडिगकू। मनदो मसीरिकुःआ सेवकिया होड़कू इया भगवानराः हिछा मिनी जीवकियानखनपे एचेय।

⁷ अपे होड़कू ननायकू लगा अहापे बुता, मनदो भगवान ननायगुः लगा मिनी जीवतेपे सेवागेय।

⁸ अपे नाःआ कता उहियारबाःकापे, सेवकियाकू सहे मालिककू दोहोन, नपाय बुताकू बुताता हँकुःआ जमा होड़कू लगा अँनकूराः बुता इया, परबू इमाने एमेवाकूता।

⁹ ने मालिककू, अपे हों सेवकियाकू सुदा हनन इया नपायतेपे एचे हड़ाःगे। अपे सुदीयतना, हँकू लगा अरू अपे लगा सेरमो देसरे मिनीटोंग मालिक इदानिया अरू हाँय एचेरे तोनोंग इयाःआ पाचपटी कोवानेःआ। हनालगा ने मालिककू, अपे अपेरिकुःआ सेवकियाकू अहापे हुटाःकू।

भगवान एमेकेरा हना अवजारकून

¹⁰ दो ईंगरिकुःआ अजी बोपोहकूतिंग, टुटीगरे अपे एचेरेयिंग कतायतना, अपे परबूरे हाँयराः अगामाः जंगरते अपेराः जीव बड़ियाड़ इदीन।

¹¹ लड़ाइ लगा भगवान एमेकेरा हना जमा अवजारकूनपे तुसिंग। दो कलउ अडिगपे अते अँननपे अपे बनसाव अवेनता।

¹² अबूराः लड़ाइ होड़कू सुदा कोवानेःआ। मनदो सेरमोरेकू दोहोनता हँकुःआ भूतकूरिकुःआ परधानकू अरू हातपातदारकू सुदा अरू अंदरारेकू दोहोनता हँकुःआ जंगरदार भूतकू सुदा अरू बेलूरकू एचे बुताकूता हना सेरमोरिकुःआ सइनाकू सुदा अबूराः लड़ाइ इदा।

¹³ हनालगा लड़ाइ लगा भगवान एमेकेरा हना जमा अवजारकूनपे तुसिंग। दो अपे बेलूर दिनरे कलउपे घंटाव अवेता अरू जमाकून एचेकेडखन, अपे चड़ाँतपे दोहो अवेनता।

¹⁴ दो अपे सवासितीपे दोहोन। भगवानराः सताय कताकून पेटार इया मयांगरेपे तोलगे अरू कुड़ोम बनसावगे लगा झिलमकू तुसिंगगेता हनन इया, बेगर गारबार जीवराः झिलमपे तुसिंगगे।

¹⁵ अरू पनही तुसिंगकेडखन सपड़ावतोपे दोहोनता हनन इया सलसत एमेयता हना नपाय सरवन परसारगे लगा सपड़ावतोपे दोहोन।

¹⁶ नाःआ जमाकून तुसिंगकेडखन परबू एचेरे अपेराः बिसवास ढाल इयापे सनाबका, जेमहा अपे कलउराः जनामा सलगाःतो सड़ाकूनपे इड़ीग अवे।

¹⁷ भगवान अबूय सडावकेरा, हनानाः कता लोहाराः टुपी इया बोःरेपे हनारूबका अरू, सुद बिरुवा एमेयता हना भगवानराः सरवन तलवइर इयापे सनाबका अरू

¹⁸ सुद बिरुवाते जमा बेलारे जमालेःआ लगा अरजी हड़ाःगोड ञवनपे। ननन इया सवासितीपे दोहोन घड़ीन भगवानरिकुःआ जमा सुद होड़कू लगा अरजीगोड ञवनपे।

¹⁹ ईंग भगवानराः नपाय सरवन कताय मेला, डीड़ते हना सरवनराः ओकोत कताकूनिंग कता अवे लगा, ईंग लगा होँपे अरजी।

²⁰ ईसू मसीराः सेवा लगाय वारकिरिंगा अरू ननानाः बदीरे ईंग तोलतो इदानिंगा। हनालगा करा इया बेगर बोरते नपाय सरवन ईंग कताय लगा इदा, हनन इया कता अवेय लगा होँपे अरजीगोड ञवन।

टुटीग सलाम

²¹ ईंगरीग दुलार सउंगता तुकिकूस, परबूराः सेवारे बिसवासगेयीग इदानिया। ईंग करा इया इदानिंगा अरू ईंग चिलायिंग करेगतना हना हाँय अपेय उदुःवापेता।

²² हाँय अलेराः हाल-चाले कता उदुःवापेता अरू अपेराः जीवे कता बहालगेता। हनालगा ईंग हाँय अपे एचेरेयिंग वारेयतना।

²³ अबूरीग अपांग भगवान अरू परबू ईसू मसी अपेराः जीवे सलसतगे अरू अँननपे अपे अलार-दुलार होड़ेंग घड़ीन, ईसू मसी एचेरेपे बिसवासगोड ञवन लगायिंग अरजीतना।

²⁴ सतायरे अबूरीग परबू ईसू मसीकू दुलारगोड ञवनतना हँकुःआ होड़कूराः जीव सगर सइट भगवान मयावागोड ञवन।