इपीसी 5 - Korwa Bible

¹ अपे भगवानरिकुःआ दुलार लइंकू हवे। हनालगा हाँयरिकुःआ ञेल सिखात होड़कूपे बड़ाँः।

² ईसू मसी अबू दुलारकेडखन अनँयग जीव अबू लगा भगवान मड़ंगरे मुरुक नपाय महकराः बलिदान इयाय जिमातेरा। हननलगा अपे अँननपे दुलार होड़ेंगगोड ञवन।

³ अपे भगवानरिकुःआ सुद होड़कू हवे। हनालगा अपे तलारे तोनोंग इयाःआ सनहा-सनही, बेलूर बुता सहे ललचीराः गुनमिनाः ओंगोल हों अहापे दोहो ओवागे।

⁴ अपे लगा नपाय कोनोवानेःआ हना बेगर गियुःतेःआ बड़रा, सदाःआ बड़रा सहे केसेड़ा बड़रा, अपे अहापे बुतुड़ु। मनदो भगवान अपे लगाय एचेकेरा हना जमाकून लगा हाँयपे धनियाबादगे।

⁵ सनहा-सनही, बेलूर बुता सहे ललची ओंगोल, मुरती सेवा हवे। अरू नाःआ इयाकू एचेयता, हँकुःआ होड़कू लगा ईसू मसी अरू भगवानराः राइजरे तोनोंगाः इताड कोवानेःआ।

⁶ तोनोंगीग होड़ अँकूराः लबरा चेडतोते अलोकू अडिग अवेपे। बेलूर बुता एचेकेडखन भगवानराः कता मेरकू मनाःता हँकुःआ होड़कू एचेरे भगवान रीस रंजाव जुवाःताय।

⁷ ननानाः लगा अपे हँकू सुदा अलोपे मेसान।

⁸ मड़ंगरे अपेराः जीव अंदरारे दोहोना, मनदो नुँहू परबू अपेराः जीवे मरसलगोतेडा। हनालगा अपे भगवानराः मरसल पवावतो होड़कू इयापे जियाः।

⁹ दो मरसल पवावतो होड़कूराः जीवरे जमालेःआते नपाय अरू सताय जोःओकून जोःता।

¹⁰ अरू भगवान ननायगुःता हना कता अपे चिडुः लगापे कुरनिसगे।

¹¹ होड़कू रइतरेकू एचेयता हना अंदराराः बुतारे अहापे मेसान, मनदो हँकूराः बुता तुमिन बेलूर अरू सदाःआ इदा, हना अपे हँननकूपे एचे उदुःवाकू।

¹² नँकुःआ होड़कू ओनोक दनंगरेकू एचेयता हना कता बदीरे कताय लगा हों होड़कू गियुः जुवाःता।

¹³ मनदो तोनोंग जिनिसरे मरसल विड़चेड़ता दो, अंदरा चलाः जुवाःता अरू हना जिनिस ञिलुःता।

¹⁴ अरू मरसलरे जमा जिनिसकून नपायतेबू ञेलता। हनालागा नाःआ इयाबू कतायता, “ने अपीगतो होड़कू, बेरेडपे! अरू गोएगतो अतेपे जियाव रिमुः, दो मसी अपेराः जीवरे मरसले एमेवापेता।”

¹⁵ अपे बोको होड़कू इया अहापे होयाः। मनदो कनहूनदारकू इया, जमा कताकून अउल-तउलकेडखनपे जियाः।

¹⁶ नाःआ जूगरे मुरुक बेलूर कताकून होयाःता। हनालगा अपे सगर बेलापे उपियोतगे।

¹⁷ अरू ननानाः लगा अपे बोको होड़कू इया अहापे दोहोन, मनदो भगवानराः हिछा चेले माःआन इदा, हना नपायतेपे बुझाः।

¹⁸ कोसोड़ा-दारूरे अहापे झड़ीगे। नाःआते हउड़ी होड़कूपे बड़ाँव जुवाःता। मनदो भगवानराः सुद बिरुवाते पेनेरेगगोड ञवनपे।

¹⁹ अँननपे अपे जाग सेरेंगकून, लंबी मसी सेरेंगकून अरू सुद बिरुवाते सगरावतो सेरेंगकूनपे सेरेंग उदुः होड़ेंग। अरू अँननपे अपेराः इंदरीते भगवान लगा सेरेंगकेडखन हाँयपे जागगोड ञवन।

²⁰ अरू परबू ईसू मसी अबू लगाय एचेकेरा हना जनामालेःआ लगा अपांग भगवान जमा बेलापे धनियाबादगोड ञवन।

एपेराकू अरू हेपेरेलकू बदीरे चेड

²¹ अपे ईसू मसीराः अकूस मनाः घड़ीन, अपे जमाकू अँननपे सेवा होड़ेंग ञवन।

²² ने अइमीकू, अपे परबू ईसू मसीराः आड़रेपे दोहोनता हनन इया, अपे अँननपेरिकुःआ हेपेरेलकूराः आड़रेपे दोहोन।

²³ मसी कलसियाराः बोः हवे, हनन इया मरद अइमीराः बोः हवे। कलसिया मसीराः देह हवे अरू हनाँय कलसियारीग सडावदार हवे।

²⁴ कलसिया मसीराः आड़रे दोहोनता, हनन इया अइमीकू हों जमा कताकूनरे, अँननकू अँकूरिकुःआ हेपेरेलकूराः आड़रे दोहोन लगा इदा।

²⁵ ने हेपेरेलकू, मसी अनँयग आँयगते गुजुः लगा जिमानेनखन कलसियाय अलार-दुलारकेरा, हनन इया अपे अँननपेरिकुःआ एपेराकूपे अलार-दुलार।

²⁶ भगवानराः सरवनते कलसिया, दाःतेकू बुहाल अमिंगगुःता हनन इया सुदगे लगा मसी अनँयग आँयग जिमानेना,

²⁷ जेमहा कलसिया बेगर जोरोडते अरू बेगर कोकोड़ावते, सुघर बड़ाँवकेडखन सुद अरू बेगर गारबारते अनँयग लगाय सपड़ाव अवेय।

²⁸ ननन इया मरदकू हों अँननकूरिकुःआ एपेराकू, अँननकूराः देह इयाकू दुलारकू। अनँयग एराते दुलारता, हाँयग होड़ अनँयग आँयग दुलारगुःता।

²⁹ तोनोंगीग होड़ अनँयग देह मेरेय हिनइस-बिनइसवाता, मनदो अनँयग आँयगतेय असूलगुःता।

³⁰ अबू कलसियारिकुःआ होड़कू मसीराः देहराः दगलीकून हवे। हनालगा हाँय अबूय दुलारता अरूय असूलबूता।

³¹ भगवानराः कागदरे नाःआ इया ओजाःतो इदा, “नानलगा मरद आँयग एंगात अपात अते एटाःकियानखन आँयग अइमी सुदाय दोहोनता। अरू हँकिन बना होड़ मिनी देहकिन होया जुवाःता।”

³² नाःआ कता बुझाः लगा रिता कोवानेःआ। मनदो ईंग नाःआरे मसी अरू कलसियाराः बदीरेयिंग अउल-तउलगेतना।

³³ ईंग अरूयिंग कतायतना, अपे जनामा मरदकू अँननपेरिकुःआ एपेराकू अँननपे इयापे अलार-दुलारकू अरू जनामा अइमीकू अँननपेरिकुःआ हेपेरेलकूपे मान मरजइत।