इपीसी 2 - Korwa Bible

गुजुः अते जीव अगी

¹ अपे गारबार अरू कसूरते गोएगतोपे दोहोन मेला भगवान जियावतेडपेःआ।

² हनमेला अपे हों चउंदीसरिकुःआ होड़कूराः लूर-नेवन इयापे जियाःआ अरू सेरमोरेकू दँड़ाता हँकुःआ भूतकूरीग राजा कलउराः कतापे मनेवाःआ। अरू कलउ, भगवानराः कता मेरकू मनाःता हँकुःआ होड़कूराः इंदरीरेय बुतातना।

³ मड़ंगरे नाःआ इयाःआ बेलूर ओंगोलरे अबूराः लूर-नेवन हों दोहोना। अबूराः ओंगोल अरू देहराः हिछा इयाबू एचेगोड ञवना, अरू अबू हों हँकुःआ होड़कू इया भगवानराः डंड पवाः जुकूरबू दोहोना।

⁴ मनदो भगवान अगम मयादार इदानिया अरू अबू कसूरते गोएगतोबू दोहोना।

⁵ हनते हों हाँय अबू मुरुके दुलारकेडबुःआ अरू ईसू मसी सुदा नँवा जीव एमेकेडखने जियावकेडबुःआ, अरू आँयगराः मनायाते अपेय सडावकेरा।

⁶ अबू ईसू मसी सुदाय जियाव रेमकेडबुःआ अरू सेरमो देसरे हाँय सुदाय एचे दुड़ुःकेडबुःआ,

⁷ जेमहा दरवाःआ हना जूगरिकुःआ होड़कू एचेरे, ईसू मसीते अबू लगा इदा अरू ओरोबू अउल-तउल अवेतेरा भगवानराः हना अलबइद मया बदीरेय एचे उदुःवाकू।

⁸ अपे ईसू मसी एचेरेपे बिसवासकेड मेला भगवान आँयगराः मयाते अपेय सडावकेडपेःआ। अरू अपे अँननपे कुरनिसगे अते मेरपे सडावगना, मनदो भगवानराः दहिन हवे।

⁹ अबू अते तोनोंगीग अनबूराः बुताते मेरबू सडावगना, जेमहा तोनोंगीग अलोबू बड़वार अवेन।

¹⁰ अबू भगवानरिकुःआ तुलात होड़कू हवे अरू मनाड़ंगते अबू लगाय सपड़ाव दोहोकेरा हनानाः नपाय बुताकून ईसू मसीते एचेय लगाय तुलाकेडबुःआ।

मसीरे अबू मिनीयना

¹¹ अपेराः जनम एहूदा जइतरे मेर होयागान अते, अपे बेगर एहूदाकू हवे। नाःआ कता अपे अहापे लिड़िंगे। होड़कूराः तिःईते खतनात होड़कू, अपे बेगर खतनात होड़कू हवे, माःआनकू कतावातेडपेःआ।

¹² अपे मसी अते हिगारतोपे दोहोना अरू इसराएल होड़कू सुदा अपेराः तोनोंगाः इताड मेर दोहोगान। भगवानराः जबानरे तोनोंगाः बंटा अपे लगा मेर दोहोगान अरू अपे भगवान मेनेरपे सुदीया अते, बेगर असराते नाःआ चउंदीसरेपे दोहोना।

¹³ मड़ंगरे अपे भगवान अते तोनोरेपे दोहोना। मनदो ईसू मसी अबू लगा अनँयग बलंगी तूकेडखने गोएगनेन अते अपे नुँहू भगवान अगीपे लेसानयना।

¹⁴ एहूदाकू अरू बेगर एहूदाकू तलारे भीट इया दोहोना हना हिगार हटिंगतो, भगवान रूब एंडागोतेडा अरू बनर गउदारिकुःआ होड़कूय एचे सलसतगोतेडकुःआ।

¹⁵ ईसू अनँयग गुजुःते एहूदाकूराः नियमकून, रिती-बिधी अरू हुकुमकून सुदाय चलाः एंडागोतेडा, जेमहा हाँय बनर गतररिकुःआ होड़कूय एचे राजू नमागोडकू अरू मिनी देह इया सलसतरेय एचे जुमावगोडकू।

¹⁶ कुरूसरे हाँय गोएगनेनखन एहूदाकू अरू बेगर एहूदाकूराः हिनइस-बिनइसे चलाः एंडाकेरा, अरू मिनी देह इया भगवान सुदाय एचे हेल-मेलगोतेडबुःआ।

¹⁷ हाँय वेगनेनखन भगवान अते तोरेकू दोहोना अरू भगवानराः लेसानरेकू दोहोना, हँकुःआ जमा होड़कू एचेरे सलसतराः सरवने कता उदुःतेरा।

¹⁸ दो नुँहू अबू जमाकू मिनीटोंग सुद बिरुवाते अपांग भगवान एचेरेबू सोदोर अवेनता।

¹⁹ ननानाः अते नुँहू अपे दुरीन देसरिकुःआ होड़कू इया कोवापेःआ। मनदो अपे भगवानरिकुःआ सुद होड़कू सुदा मिनी देसरिकुःआ होड़कू हवे अरू अपे भगवानराः ओड़ाःरिकुःआ होड़कूपे बड़ाँवयना।

²⁰ अरू अबू हना ओड़ाःराः फड़ा इयाबू बड़ाँवयना। इनीसू मसी हना ओड़ाः तलाराः बड़ियाड़ खुंटा इया इदानिया अरू मूक चेलाकू अरू भगवानराः बड़रा कता होड़कू, ओड़ाःराः धरी खुंटाकून इया इदानकुःआ।

²¹ जमाकू ईसू सुदा जोड़ावकियानखन भगवान लगा मीटोंग सुद ओड़ाःकू बड़ाँःतना।

²² ईसू मसीरे सुद बिरुवाते अपे बेगर एहूदाकू हों, भगवान दोहोन लगा ओड़ाःपे बड़ाँःतना।