कुलूसी 4 - Korwa Bible

¹ ने मालिककू, अपेरीग मालिक सेरमो देसरे इदानिया। हनालगा अपे अपेरिकुःआ सेवकियाकू सुदा अहापे एरंगाहान अरू नपाय लूर-नेवनतेपे लकूतवाकू।

² अपे अरजीगोड ञवनपे अरू भगवान धनियाबाद घड़ीन सवासितीपे दोहोन।

³ ईंग नपाय सरवन परसार बदीरे जेहेलरे इदानिंगा। हनालगा अले ईसू मसीराः ओकोत सरवन उदुःगे लगा भगवान अले बेलाय एमेवाले लगा,

⁴ अरू अले उउदुः लगा इदा, हनन इया थित-थितारले उदुः अवेय लगा होँपे अरजीगोड ञवन।

⁵ बेगर बिसवासी होड़कू सुदा नपाय ओंगोल बुझाः घड़ीन अपेराः लूर-नेवन होयाः लगा इदा। अरू जमा बेला हँकू लगा नपाय बुता एचेय लगा सपड़ावतोपे दोहोन।

⁶ अपेराः बुतुड़ु हेलेम-हेलेमते उंबार उडुंगगुःता इया होयाः, जेमहा अपे होड़कूराः जबापरे नपायते कता कुदा अवे लगापे सुदीय।

टुटीग सलाम

⁷ ने अजी बोपोहकूतिंग, अलेराः हाल चाले कता उदुःवापे लगा ईंगरीग दुलार सउंगता अरू सेवा देंगवा होड़ तुकिकूस अपे एचेरेयिंग वारेयतना। हाँय परबूराः सेवा लगा बिसवासगेयीग इदानिया।

⁸ हाँय अलेराः हाल चाले कता उदुःवापेता अरू अपेराः जीवे कता बहालगोडता। हनालगा ईंग हाँय अपे एचेरेयिंग वारेयतना।

⁹ ईंग उनेसिमूस हों हाँय सुदायिंग वारेयतना। हाँयग उनेसिमूस अपे अते मी होड़ इदानिया। हाँय ईंगरीग दुलार सउंगता अरू भगवान लगा बिसवासगेयीग इदानिया। हँकिन अले बदीरे जमालेःआकिन कता उदुःवापेता।

¹⁰ परसार बदीरे ईंग सुदा जेहेलरे इदानिया, हाँयग अरिसतरकूस अपेय सलामतना। अरू बरनाबासरीग नसी-नता बोहोत मरकूस अपेय सलामतना। अपे मनाड़ंगगिंग उदुःवाडपेःआ मरकूस लगा करा इया अपेके एएचे इदा। हाँय वेग दो अपे हाँय नपायतेपे नेत-नेवारगेय।

¹¹ एसतूस माःआनकू कतावायता, हाँयग एहोसू अपेय सलामतना। ईंगकू सेवा देंगवातेरा हँकुःआ एहूदाकू अते नननकुःआ पेनेय होड़ ईंगराः जीवकू हड़ियाड़केरा।

¹² इपापरास, अपे अते मी होड़ इदानिया अरू हाँय ईसू मसीरीग सेवकिया हवे। हाँय अपेय सलामतना। अरू हाँय, अपे भगवानराः ओंगोल इया, अपेराः बिसवास जमालेःआ बड़ियाड़ जुवाः लगा, मुरुक मिहनइततेय अरजीगोड ञवनतना।

¹³ ईंग निठासिंग सुसुदीतना, हाँय अपे लगा अरू लउदिकिया सहररिकुःआ अरू हिरापुलीस सहररिकुःआ होड़कू लगा मुरुके मिहनइतगोड ञवनतना।

¹⁴ अलेरीग दुलार जिड़ीदार लूका अरू देमास, हँकिन अपेकिन सलामतना।

¹⁵ लउदिकियारिकुःआ बिसवासी होड़कू अरू नुंपास बाईराः ओड़ाःरेकू दुड़ुःता हँकुःआ जमा बिसवासी होड़कू ईंग अगीतेपे सलामगोडकू।

¹⁶ ईंग अपे लगायिंग ओजाःकेरा नाःआ चिठी अपे बछावकियानखन लउदिकिया सहरराः कलसियारिकुःआ होड़कू बछाः लगापे एमेगोड। अरू लउदिकिया कलसियारिकुःआ होड़कू लगा ईंग ओजाःकेरा हना चिठी अपे होँपे बछाः।

¹⁷ अरू अरकिपूस एचेरेपे कताय, “परबू आमे जिमावारा, हना सेवा एचे पुरावगे लगाम ओंगोल दोहोबाःका।”

¹⁸ ईंग पउलूस, नाःआ सलाम इनिंग तिःईते अपे लगायिंग ओजाःगेतना। ईंग जेहेलरे इदानिंगा। हनालगा अपे अरजी मेला ईंग अलोपे लिड़िंगींग। भगवान अपेय मयावा।