कुलूसी 3 - Korwa Bible

मसी सुदा नँवा जीव

¹ भगवान अपे नँवा जीव लगा ईसू सुदाय जियाव रेमकेडपेःआ, दो नुँहू हाँय भगवानराः खउना गतररे राइजगे लगाय दुड़ुःकिया हना सेरमो देसराः कताकूनपे ओंगोलगोड ञवन।

² अपे चउंदीसराः ओंगोलरे अहापे दोहोन, मनदो अपे सेनेरमो देसराः ओंगोलरेपे दोहोन।

³ अपेराः जुना जीव टुटीगयना अरू अपेराः नँवा जीव मसी सुदा भगवान एचेरे जबीततो इदा।

⁴ ईसू मसी अबूराः जीव हवे, अरू हाँय अनँयग एचे ञिलुः मेला, अपे हों हाँय सुदापे ञिलुःता अरू हाँय सुदा मान मरजइतपे पवाःता।

⁵ चउंदीसराः बेनेलूराः नेवन इया अलोपे सलाः। बेलूर बुता, सनहा-सनही, अरू बेनेलूर ओंगोल, नाःआ जमाकून अपेराः जीव अते हिर-हिटीपे अनाड़ाः एंडागोड। लुभिया ओंगोल मुरती सेवा इया इदा। हनालगा अपे लुभिया होड़कू अहापे होयाः।

⁶ ननानाः अते हुकुम मेरकू मनाःता हँकुःआ होड़कू एचेरे, भगवानराः रीस रंजाव जुवाःता।

⁷ बिसवासगे अते मड़ंग, अपे हों बेलूर नेवनकुःआ होड़कू सुदा मेसाकियानखन, हनानाः दूररेपे सलाव ञवना।

⁸ मनदो नुँहू अपे रीस, कटराहा, टेनसाहा, ओपता बड़रा अरू तूड बड़रा, नाःआ जमाकून हिर-हिटी अड़ाः एंडागोडपे।

⁹ अपेराः बेनेलूर दोहोना हना जुना जीवपे चलाः एंडागोतेडा। हनालगा अँननपे अपे अहापे लबरा होड़ेंग।

¹⁰ अपेराः लूर-नेवन नँवायना। अरू अपेरीग तुलादार भगवान आँयगराः लूर इया अपेराः लूर-नेवने नँवागोड ञवनता, जेमहा अपे हाँय, अनउर नाय नपायतेपे सुदी अवेय।

¹¹ नाःआ नँवा जीवरे तोनोंग इयाःआ हिगार हटिंग कोवानेःआ। खतनाकू एचेयता हँकुःआ एहूदाकू, सहे मेरकू खतनानता हँकुःआ बेगर एहूदाकू सहे जोडेकू सहे अलीगवारकू, सेवकियाकू सहे मालिककू, अबू तोनोंगीग एटाः कोवाबुःआ। मनदो मसी एकला मनारंग इदानिया अरू हनाँय अबू जमाकूराः जीवरे इदानिया।

¹² अपे भगवानरिकुःआ सुद अरू सुनावतो निकता होड़कू इदानपेःआ। हनालगा सोगादारकू अरू देनहारकू अरू हुडिंग ओंगलुः होड़कू अरू सहाव अवेय होड़कू अरू सुधा होड़कू इया अपेराः लूर नेवन होयाः लगा इदा।

¹³ तोनोंगीग होड़ बदीगेय इयाःआ कता अपे एचेरे दोहोन दो अपे सहाव होड़ेंगगोड ञवन, अरू परबू अपेराः कसूरे बराव एंडाकेरा, हनन इया अपे हों कसूरपे बराव एंडा होड़ेंग।

¹⁴ नाःआ जमाकूनपे एचेगोड ञवन। मनदो नाःआ अते अरू बगरा अपे अलार-दुलार होड़ेंगपे। दो अपे हेनेल-मेलरेपे दोहो अवेनता।

¹⁵ हेल-मेलरे मिनी जुमूटकियानखन, मिनी देह इया दोहोन लगा, भगवान अपेय राःकेरा। दो मसी एमेकेरा हना सलसतते, अपेराः जीव सलसत जुवाः। अरू अपे भगवानपे धनियाबादगोड ञवन।

¹⁶ मसीराः सरवन अपेराः जीवरे नपायतेपे दोहोगे। अरू जमालेःआ कनहूनते अँननपे अपे सेताव होड़ेंग घड़ीनपे चेड होड़ेंग। अरू अँननपेराः इंदरीरे भगवान धनियाबाद घड़ीन जाग सेरेंगकून, लंबी लंबी मसी सेरेंगकून, अरू सुद बिरुवा अगुवाइवापेता हना सेरेंगकूनपे सेरेंगगोड ञवन।

¹⁷ अपे तोनोंगाः बुतापे बुता सहे तोनोंगाः कतापे बड़रा हना जमाकून ईसू मसी लगापे एचेय, अरू हाँयते अपांग भगवानपे जागगोड ञवन।

बिसवासी मइछुवाकू लगा नियमकून

¹⁸ ने एपेराकू, बिसवासी अइमीकू लगा नपाय दोहोनता हान इया अपे अँननपेरिकुःआ हेपेरेलकूतापेराः आड़रेपे दोहोन।

¹⁹ ने मरदकू, अपे अँननपेरिकुःआ एपेराकूतापेपे अलार-दुलार अरू अपे हँकू सुदा एरंगाहा अलोपे दोहोन।

²⁰ ने लइंकू, अपे अँननपेरिकुःआ एंगा-अपाराः जमा कताकूनपे मनाः दो, परबू अपे सुदाय ननाय जुवाःता।

²¹ ने अआपकू, अपेरिकुःआ लइंकू अहापे हलकइनकू, जेमहा हँकूराः जीव अहा उदबासगुः।

²² ने सेवकियाकू, अपेरिकुःआ मालिककू अपेकू ञेलता, हनमेला एकला अहापे बुता बोनाः। मनदो अपे मिनी जीवते परबूराः अकूस मनाः घड़ीन हँकूराः जमा कताकूनपे मनाः।

²³ तोनोंग बुताकूनपे बुता दो अपे, अले होड़कू लगाले बुतातना, माःआन अलोपे ओंगले। मनदो अले परबू लगाले बुतातना, माःआन ओंगोलकेडखन अनंगेर अंगेरतेपे बुता।

²⁴ दो अपे परबू ईसूपे सेवातना अरू हनाँय अपेराः सेवा बदलारे इमान इया इताडे एमेवापेता।

²⁵ बेलूरे एचेयता, हाँयग होड़राः जमा बेलूर बुता बदलारे भगवान बेगर पाचपटीतेय डनंडियावगेयता।