मूक चेलाकू 4 - Korwa Bible

पतरस अरू एहुना मरंग पंचाइतरेकू एचे चड़ाँतेडकिना

¹ ईसू मसीते होड़कू गोएग गुराः तयोमरेकू जियाव रिमुःता माःआन परसार घड़ीन पतरस अरू एहुना होड़कूकिन चेडा।

² हँकिन होड़कू एचेरे कनाता कताय मेला पुजउरीकू, भगवान ओड़ाःराः अगुरा होड़कूरीग हातपात होड़ अरू सदूकी होड़कू हँकिन एचेरे रीसनेनखनकू वेजेडा।

³ दो हनमेला सिंगाड़यान अरू हँकू पतरस अरू एहुनाकू साबतेडखन निंदावा वरी जेहेलरेकू सींगगोतेडकिन।

⁴ मनदो नपाय सरवनकू अयूमतेरा, हँकुःआ होड़कू अते मुरुक होड़कू बिसवासतेरा अरू हँकुःआ होड़कू अंदांज पाँच हजार होड़कू दोहोना।

⁵ एटाः दिन मरंग पुजउरीकू, मरंग पंचाइतरिकुःआ मूक होड़कू अरू नियम चेडदार होड़कू एरुसलेमरेकू जुमावनेना।

⁶ हंडा मूक पुजउरी, अनना होंय दोहोना अरू कइपा, एहुना, सिकंदर अरू मूक पुजउरीराः गोतोररिकुःआ एटाः होड़कू हों हंडाकू जुमावनेना।

⁷ हँकू पतरस अरू एहुना अँकू मड़ंगरेकू एचे चड़ाँतेडकिनखन हँकिन एचेरेकू होंबोरतेड, “अबा इयेराः ञावते अरू जंगरते नाःआ इयाबा एचेकेरा?”

⁸ हनते पतरस सुद बिरुवाते पेरेगनेनखन हँकू एचेरेय कतातेरा,

⁹ “ने इसराएल होड़कूरिकुःआ नेताकू अरू मूक होड़कू, मी होड़ ठुठा होड़लिंग मयावातेरा अरू हाँय करा उड़ी नपाययना हना बदीरेलेपे होंबरेतना।

¹⁰ दो अपे अरू जमा इसराएलरिकुःआ होड़कू नाःआ कतापे सुदीगे लगा इदा। अपे कुरूसरेपे ठोंकाव गोएगतिरिया अरू भगवान गोएगतो होड़कू अतेय जियाव रेमकिरिया हाँयग नसरतरीग ईसू मसीराः ञावते अपे मड़ंगरे चड़ाँत इदानिया नाँयग होड़ नपाययनाय।

¹¹ ओड़ाः तुला मिसतिरीकू तेके एंडातेरा हना दिरि जमा दिरिकून अते ननपाय दिरि होयानेना। अरू हनानाः दिरि ईसू हवे।

¹² नाःआ चउंदीसरे होड़कू सडाः लगा अरू एटाः ञाव कोनोवानेःआ अरू अबू सडाव अवे लगा हाँय अड़ाःकेडखन तोनोंगीग एटाः होड़ कोवाया।”

¹³ दो हँकुःआ होड़कू पतरस अरू एहुनाराः डीड़कू ञेलतेरा अरू मुरुककू बयावयान। हँकू सुदीबाःगोतेड, नँकिन नियम बदीरे अलीगवार इदानकिना अरू ईसू सुदाकिन दोहोना, माःआन।

¹⁴ मनदो नपायनेना हाँयग होड़, हँकिन सुदा चड़ाँतोकू ञेलतिरिया दो हँकू तोनोंग इया मेरकू कता अवेगाड।

¹⁵ हनते हँकू हँकिन हंडा अतेकू एचे उडुंगतेडकिनखनकू होंबोर होड़ेंगा,

¹⁶ “नँकिनाः होड़किन करा इयाबू करेगकिन? एरुसलेमरेकू दोहोनता हँकुःआ जमा होड़कू सुसुदीतना, नँकिन ञेनेल ञेलरे बयाव जुवाः इयाःआ बुताकिन एचेकेरा अरू हना अबू ओरोबू आड-बेकार अवेतेरा।

¹⁷ मनदो नाःआ चेड, अरू होड़कू एचेरे अहा सगराः लगा, नँकिन हुड़कावकेडखनबू कतायता, अबा नाःआ ञावते अरू तोनोंगीग एचेरे अलोबा कताय, माःआन।”

¹⁸ हना तयोमरे हना छिनारे हँकिनकू एचे राःतेडखन हँकिन एचेरेकू हुकुमतेरा, “अबा अलेबा अयूम। अबा होड़कू एचेरे ईसूराः ञावते अहाबा चेडकू सहे अहाबा परसारगे।”

¹⁹ मनदो पतरस अरू एहुना कता कुदातेरा, “अपे अँननपे अपे फड़ियावगे। भगवानराः कता अते अपेराः कता बगरालिंग मनाः दो हना भगवान मड़ंगरे नपाय इदा जा?

²⁰ अलिंग ञेलकेरा अरूलिंग अयूमकेरा हना कता बदीरे अलिंग कलेकाल ओरोलिंग दोहोनेना।”

²¹ भगवान हाँयग ठुठा होड़े नपायतेरा अरू हनाते जमा होड़कू भगवानकू जागगोड ञवना। हनालगा हँकुःआ मूक होड़कू हँकिन मेरकू डंडियाव अवेगाड। अरू हँकू हँकिन अरूकू हुड़कावतेडखनकू अड़ाःगोतेडकिन।

²² अरू होड़कू ञेनेल ञेलरेय नपायनेना, हाँयग होड़राः उमइर चालीस बरिस अते बनागरा दोहोना।

बिसवासी होड़कूराः अरजी

²³ मरंग पंचाइतरिकुःआ होड़कू पतरस अरू एहुनाकू अड़ाःगोतेड अरू हँकिन अँननकिनारिकुःआ होड़कू एचेरेकिन कुदा सेनेडा अरू हँकू एचेरे मूक पुजउरीकिन अरू एटाः मूक होड़कू कतातेरा हना जमाकिन कता उदुःवातेडकुःआ।

²⁴ नाःआ कता बिसवासी होड़कू अयूमतेरा दो, हँकू मिनीनेनखन हुमइसके भगवान एचेरेकू अरजीतेरा, “ने भाबी भगवान, आम सेरमो देस, ओत, समुंदर अरू जे हों सकालाः हनारे इदा हना जमाकूनमे तुलाकेरा।

²⁵ आम नाःआ कता सुद बिरुवाते अलेरीग खुटिपहार होड़ अरू आमरीग सेवादारे दोहोना, हाँयग दाऊद राजाम एचे उदुःतेरा, बेगर एहूदाकू चिला लगा रीसतेकू रंजावकिया, अरू होड़कू चिला लगा बेगर लूर बुइदकू तुलातना,

²⁶ चउंदीसरिकुःआ राजाकू अरू हातपात होड़कू, भगवान अरू आँयग मसी बदीरे कड़ीग लगाकू मिनी जुमूटयना।

²⁷ सनातायरे हरदोस राजा अरू एहूदिया छतररीग मरंग हातपात होड़ पुंतियूस पिलातूस, बेगर एहूदाकू अरू नाःआ सहर एरुसलेमरिकुःआ इसराएल होड़कू सुदा जुमावनेनखन आम सुनावतेरा आमरीग सुद सेवादार ईसू, एचे ञेड गोएगगेय लगाकू ओंगोलतेरा।

²⁸ आमराः जंगर अरू कनहून इया होनोयाः लगा मड़ंग अतेम ओंगोल दोहोतेरा हिनिनमिन हँकू एचे अवेतेरा।

²⁹ दो परबू, नुँहू हँकूराः हुड़कावमे अयूम अरू अले आमरिकुःआ सेवकिया होड़कू, मुरुक डीड़ते आमराः सरवन कता उदुः लगाम संघरावाले।

³⁰ आम अले जंगरमे ओवाले, जेमहा आमरीग सुद सेवादार ईसूराः ञावते होड़कूले नपाय अवे अरू ञेनेल ञेलरेकू नपाय जुवाःता हना बयाव जुवाःआ बुताकूनले एचे अवेय।”

³¹ हँकू अरजीतेड हना तयोमरे हँकुःआ होड़कू दोहोना हना ततेरराः ओत डोलावनेना। हनते हँकुःआ जमा होड़कूराः जीव भगवानराः सुद बिरुवाते पेरेगयान अरू भगवानराः सरवन होड़कू एचेरे डीड़तेकू कता उदुःतेरा।

बिसवासीकू जिनिसकूनकू हटिंग होड़ेंगा

³² जमा बिसवासी होड़कू मिनी जीव अरू ओंगोलतेकू दोहोना। तोनोंगीग मेरकू कतागाड, नाःआ जिनिसकून ईंगराः हवे, माःआन। मनदो हँकू एचेरे दोहोना हना जमा जिनिसकून बरोबइरकू हटिंग होड़ेंगा।

³³ हँकुःआ मूक चेलाकू परबू ईसू गोएगतो होड़कू अतेय जियाव रेमकिया हना कता बदीरे मुरुक जंगरते हिदइतकू उदुःगोड ञवना। दो भगवान हँकुःआ जमा बिसवासी होड़कू मुरुके मयावातेडकुःआ।

³⁴ हँकुःआ होड़कू अते तोनोंगीग एचेरे हुडिंग बगरा मेर दोहोगान। ओड़ाः दोहोड़कून दोहोना हँकुःआ होड़कू हना जमाकूनकू अकिरिंगतेरा

³⁵ अरू हना ढिबुवाकून अगूतेडखन मूक चेलाकू एचेरेकू जिमातेरा। होड़कूके एएमे लगा दोहोना हना इया हँकू जमाकूकू हटिंगनेना।

³⁶ दो उसूप ञावीग लेवी गोतोरीग मी होड़ होड़ दोहोना। हाँय सइपरास डुगुरीग होड़े दोहोना। हाँयराः एटाः ञाव दोहोना बरनाबास, अरू हना ञावते मूक चेलाकू हाँयकू रगेया। (नाःआ ञावराः मतलोब कता बहालगेयीग बेटात, माःआन हवे।)

³⁷ हाँय एचेरे मीटोंग कियारी दोहोना। हना अकिरिंगकेडखन हाँय हना ढिबुवा मूक चेलाकू एचेरेय जिमागोतेड।