मूक चेलाकू 27 - Korwa Bible

पउलूस रूमी सहरकू वारगोतेडीग

¹ अले जहाजते इटली देस सेन लगा पिसतूस ओंगोल दोहोतेरा, दो पउलूस अरू एटाः तोलतो होड़कू अगुसतूस ञावराः सइना होड़कूराः गउदारीग हातपात होड़ उलियूस एचेरेकू जिमागोतेडकू।

² दो अले अदरमितियूम सहर अते वेजेडा मीटोंग जहाजरे देगनेनखन आसिया राइजराः सियाँ सरहद होरते समुंदररे सेन लगाले बुँहड़ीतेरा। अरू अले सुदा अरिसतरकूस होंय दोहोना। हाँय मकिदुनिया राइजराः तिसलूनिका सहररीग होड़े दोहोना।

³ एटाः दिन सइदा सहररेले उतरावनेना अरू उलियूस, पउलूस एचेरे मयावातेडखन पउलूसरिकुःआ सउंगताकू हाँयकू संघरावा लगा हँकू एचेरेय सेने ओवातिरिया।

⁴ हंडा अते अले अरू समुंदररेले सेना। होय अले अगी मुरुक सलाःआ हना अते अले सइपरास डुगुराः ओधा ओधारेले सेना।

⁵ दो अले किलिकिया अरू पंपुलियाते लेनेसानराः समुंदर पारनेनखन लुकिया छतरराः मुरा सहररेले उतरावनेना।

⁶ दो हंडा सिकंदिरिया सहरराः मीटोंग जहाज इटली देस अगी सेना हना जहाजरे, हाँयग सइनाकूरीग हातपात होड़ अलेय एचे देगतेरा।

⁷ अले मुरुक दिन गते-गात सिकिसताते सलाव घड़ीन कनिदूस सहररेले सोदोरनेना। होयते अले मड़ंग अगी मेरले सेने अवेना। हनालगा अले सलमोन सहरराः लेनेसानते करेत डुगुराः ओधारेले सेना।

⁸ अरू अले मुरुक सिकिसताते लसेया सहरराः लेसानाः सुबलंगबारी ञावराः ततेररेले सोदोरनेना।

⁹ उपासराः दिन चबानेना अरू समुंदरते सेन लगा गराह कटसिया होयाःआ अरू मुरुक दिन होयानेना, दो पउलूस नाःआ इया कताकेडखन जहाज सलावदारकूय कता बुझावतेडकुःआ,

¹⁰ “ने साहेबकू, ईंग सुदीयतना नाःआ सेन दूररे मुरुक कटसिया होयाःता। नाःआ जहाजराः जिनिसकून लगा अरू अबू जीव लगा हों हनी होनोया जुवाःता।”

¹¹ मनदो सइनाकूरीग हातपात होड़ पउलूसराः कता अयुमे अते हना जहाजरीग मालिक अरू सलावदार, हँकिन बना होड़राः कताय मनेवातेरा।

¹² जहाजकूनकू रोंकावता हना ततेर ररंगराः बेला गुदराव लगा नपाय मेर दोहोगान, हनालगा जहाजरे दोहोना हँकुःआ होड़कू अते मुरुक होड़कू कताया, “अबू नाःआ ततेर अते सेन लगा इदा। दो अबू पिनीस सहरराः जहाजकूनकू रोंकावता हना ततेररे ररंग बेला अते मड़ंगरेबू सोदोर जुवाःता।” हना सहर करेत डुगुराः दखिन-पछिम अरू उतर-पछिम अगी दोहोना।

समुंदररे गड़रा घटा

¹³ दखिन अगीते होय गुन लकन सलाःआ, दो हँकुःआ जहाज सलावदारकू ओंगोलतेड, अबूराः ओंगोल इया होयाःतना, माःआन। हनते हँकू हना लंगर जहाजरेकू रेमगोतेड अरू करेत डुगुराः धरी धरीकू सेना।

¹⁴ मनदो गुनहोन तयोमते करेत डुगु अगी उतर-पछिम होरते गड़रा घटा सलावनेना।

¹⁵ हना गड़रा घटा जहाजरे तुकड़ावनेन दो जहाज हना अते मेर पार अवेगान अरू जहाज हनानाः गड़रा घटा अगीकू सेने ओवाड।

¹⁶ हनते कउदा ञावराः मीटोंग हुडिंग डुगुराः ओधारे सलाःआ अरू मुरुक मिहिनइततेडखन जहाजराः हुडिंग डोंगा टोटाःगुः अतेकू बनसावतेरा।

¹⁷ दो हना जहाज सलावदार होड़कू डोंगा जहाजरेकू रेम बोलोतेरा अरू जहाज टोटाःगुः अते बनसावगे लगा डोरातेकू तोल रहावतेरा। समुंदररे जुमावतो सुरतीस ञावराः बितीलरे जहाज गडावगुः अते बनसावगे लगा अरू जहाज गते-गात सलाः लगा जहाजराः लंगर दाःरेकू सोलोंगगोतेड अरू हँकू जहाज अँननतेकू सेने ओवातेरा।

¹⁸ एटाः दिन गड़रा घटाते जहाज झिकोड़तेरा दो अले जहाज अते मुरुक जिनिसकूनले तेके उडुंगगेःआ।

¹⁹ अरू पेय दिनरे जहाजराः अदोम लदावतो जिनिसकून हँकू अँननकू तिःईतेकू तेके उडुंगगोतेड।

²⁰ हनते मुरुक दिन वरी बेर अरू इपीलकू मेरले ञेलगाडकू अरू मुरुक गड़रा घटा सलाव ञवना। दो तयोमरे बनसावगुः लगा अलेराः असरा टुटीगगुःआ।

²¹ मुरुक दिन वरी तोनोंगीग तोनोंगाः मेरकू जोमगाड दो पउलूस हँकू तलारे चड़ाँनेनखने कताया, “ने वपक बोपोहकूतिंग, अपे मड़ंगरे ईंगराः कतापे मनावकुः अरू करेत अते जहाज मेरबू सलावकेःआ दो नाःआ कटसिया अरू टपसियारे ओरोबू परावकुःआ।

²² मनदो नुँहू ईंग अपे एचेरेयिंग कतायतना, अपे अते तोनोंगीग होड़राः जीव ओरो कहीनेना, मनदो जहाज एकला अडुःता। हनालगा अपे डीड़तेपे दोहोन।

²³ ईंग सेवागेयतना ईंगरीग मालिक भगवान हाँयरीग बराहील तिसिंग रइत ईंग एचेरे वेगनेनखने कताकेरा,

²⁴ ने पउलूस, अहम बोर। आम कइसर मरंग राजाराः मड़ंगरे फड़ियाव लगा चनाँड़न इदा। आम सुदाकू सलाःतना, हँकुःआ जमा होड़कू भगवान आमे जिमावारा, माःआन।

²⁵ दो ईंग वपक बोपोहकूतिंग, ईंग भगवान एचेरेयिंग बिसवासगेतना, ईंग एचेरे सेरमो देसरीग बराहील कतातेरा हनन इया होयाःता। हनालगा अपे डीड़तेपे दोहोन।

²⁶ मनदो अबूराः जहाज तोनोंगाः डुगूरे तुकड़ाव जुवाःता।”

²⁷ चउदाह रइतले गुदरावतेड अरू अले अदिरिया समुंदररे हलकोयग चुवेरगुःआ दो जहाज सलावदारकू हटिंग बरा रइतरेकू सुदीगोतेड, अले समुंदर धरीले सुदरुःतना, माःआन।

²⁸ दो हँकू समुंदरराः गहीरकू नपाःआ दो बीस पुरसाकू नपातेरा। हनते हँकू गुनहोन अरू तोरे सेनेवाडखनकू नपातेड, दो पंदरह पुरसाकू नपातेरा।

²⁹ दो हँकू जहाज चटइनरे तुकड़ाःराः बोतोरते हँकुःआ होड़कू जहाजराः तयोम गतर चइरगोटोंग लंगरकून समुंदररेकू जुवांग लोजोरगोतेड। हनते हँकू अंगुः लगाकू अरजीगोड ञवना।

³⁰ अरू जहाज सलावदारकू जहाज अते ञीर लगाकू ओंगलेःआ। हनालगा हँकू जहाजराः मड़ंग अगीते लंगरकू जुवांग लोजोरगे लगा बुइद तुलातेडखन हुडिंग डोंगा समुंदररेकू उतरावगोतेड।

³¹ दो पउलूस, सइना होड़कूरीग हातपात होड़ अरू सइना होड़कू एचेरेय कतातेड, “नँकुःआ होड़कू जहाजरे मेरकू दोहोन दो अपे ओरोपे बनसाव अवेनेन।”

³² हनते सइना होड़कू हुडिंग डोंगाराः डोराकून गेड एंडातेडखन हना डोंगा अनतेकू सेने ओवाड।

³³ अंगू फइड़साःआ मेला पउलूस जमाकू तोनोंगाः जोम लगा लहरावतेडकूखने कताया, “तिसिंग चउदाह दिन होयायना। अरू अपे सगर दिन ओंगोल घड़ीन अपे तोनोंगाः मेरपे जोमगाड।

³⁴ नननलगा अपे तोनोंगाः जोम लगायिंग फुसलावपेतना। अपे तोनोंगाःपे जोम होले जंगरपे पवाःता। अपे अते तोनोंगीगराः मीटोंगाः ऊब हों ओरो रवीगनेना।”

³⁵ हाँय नाःआ इया कतातेडखन रुटीय गोःतेरा अरू भगवान जागतेडखन जमाकू मड़ंगरे रुटी डुंडीग घड़ीने जोमा।

³⁶ दो हँकुःआ जमा होड़कू डीड़नेनखनकू जोजोमा।

³⁷ (जहाजरे अले जमाकू बार सव सतरगोटोंग होड़कूले दोहोना।)

³⁸ दो जमा होड़कू जोम बीनेनखन जहाज हलुकागुः लगा बनसावतो गोहोम समुंदररेकू तेके एंडागोतेड।

³⁹ आंगयान अरू तोनोंगीग हना ततेर मेरकू सिनहा अवेगेःआ। मनदो हँकुःआ जहाज सलावदारकू मीटोंग बितील ओधाकू ञेलतेरा अरूकू ओंगोलतेरा, होनोयाःकून करे हना ततेररे जहाजबू रोंकाव अवेयता, माःआन।

⁴⁰ हनालगा हँकू जहाजराः लंगरकूनकू बोंगोरतेडखन समुंदररेकू अड़ाः एंडागोतेड। अरू हनन मेला पतवारकून दाःरे अरूकू सोलोंगगोतेड। हनते जहाजरे तोलतो दोहोनता हना मरंग सोनहे जहाजराः मड़ंग होरकू कलथावगोतेड अरू ओत अगी जहाजकू सलावतेरा।

⁴¹ मनदो जहाज समुंदर दाः पेंदाराः टुकूरे हटकावयान अरू जहाजराः मड़ंग गतर सकसावयान। अरू मुरुक सटी हलकोयगगुःआ हना अते जहाजराः तयोम होर टोटाःयान।

⁴² दो सइना होड़कू तोलतोकू दोहोना हँकुःआ होड़कू अते तोनोंगीग अहा पउराव उडुंगकेडखन ञीरगुः अते हँकू ञेड एंडाकू लगा बुइदकू तुलातेरा।

⁴³ मनदो सइना होड़कूरीग हातपात होड़ पउलूस बनसावगे लगाय चहाःआ। हनालगा हाँय हँकूय रोंकावगोतेड अरू नाःआ इयाय कतातेरा, “पउराव अवेनतकू, हँकुःआ होड़कू मड़ंग दाःरे डेगा लोजोरकियानखन धरीरेपे पार जुवाः।

⁴⁴ अरू एटाः होड़कू पटरारे अरू जहाजराः टोटाःतो जिनिसकूनराः भरसातेपे उडुंग जुवाः।” नाःआ इया अले जमाकू ओतरेले बनसाव उडुंगनेना।