मूक चेलाकू 26 - Korwa Bible

¹ हनते अगरिपा राजा पउलूस एचेरेय कतातेरा, “आम अनम बदीरेम कता अवेयता।” दो पउलूस आँयगराः तिःई पेरेतेडखने कताया,

² “ने अगरिपा राजा, एहूदाकू ईंग बदीरे जेमिन जाः बड़राकू कतायतना, हना तिसिंग आम मड़ंगरे हँकू कतावा लगा ईंग जीवरे नपाय माःआनिंग ओंगलुःतना,

³ अरू आम एहूदाकूराः रिती-बिधीकून अरू हँकूराः अड़ा-चउकीकून नपायतेम सुदीयतना। हनालगा ईंग असेगेता, ईंगराः कता तिंगीड घड़ीनमे अयूमवा।

⁴ ईंगराः लूर-नेवन ईंगराः देसरे अरू एरुसलेम सहररे लनँइग वरीते करा इयायिंग दोहोना हना जमा एहूदाकू सुसुदीतना।

⁵ हँकू ईंग मुरुक बरिसतेकू सुदीगींगतना अरू हँकू ओंगोलकेःआ दो ईंग बदीरे कता उदुः अवेकेःआकू, अलेराः नियम इया जिनियाः लगाकू कुरनिसगेतना हँकुःआ कटकट फरीसी होड़कू अते मी होड़ ईंग दोहोना।

⁶ अरू भगवान अलेरिकुःआ खुटिपरिया होड़कू एचेरेय जबानतेरा हना असराराः बदीरे नुँहू ईंगकू फड़ियाव लगा नंडायिंग चड़ाँकिया।

⁷ अलेराः बारहगोटोंग गोतोरिकुःआ होड़कू नाःआ जबान होनोयाः लगा जमा इंदरीते दिन रइत भगवान सेवा घड़ीनकू असरागोड ञवनतना। ने राजा, ननानाः असरा बदीरे एहूदा मूक होड़कू ईंगकू जाःता।

⁸ भगवान गोएगतो होड़कूय जियाव रेमता हना कता बिसवासगे अते चिला रोंकावकेडपेःआ?

⁹ नसरतरीग ईसूराः ञावकू गोःता हँकुःआ होड़कू बदीतेडखन जेमिनिंग एचे अवेयता हनामिन एचेय लगायिंग ओंगोल दोहोबाःकातेरिंगा।

¹⁰ अरू एरुसलेमरे हनानाःयिंग एचेतेरा। मरंग पुजउरी होड़कू अते हातपात पवावनेनखन मुरुक बगरा बिसवासी होड़कू जेहेलरेयिंग एचे सींगतेडकुःआ। अरू हँकुःआ होड़कूकू ञेड एंडाःआ बेला ईंग हों नाःआ कतारे हँकू बदीरेयिंग रायनेना।

¹¹ अरू ईंग मीटोंग अरजी ओड़ाः अते एटाः अरजी ओड़ाः सेनेडखन हँकूयिंग संतावा अरू ईसूराः बदीरेयिंग एचे ओपताकुःआ। हँकू बदीरे ईंगराः रीस मुरुक दोहोना अरू हँकू संतावकू लगा एटाः एटाः राइजराः सहरकूनरे होयिंग सेनेडा।”

पउलूसराः जीव बदलाव बदीरे

¹² “हनन इया मरंग पुजउरीकूराः हुकुम चिठी अरू हातपातते ईंग दिमसकूस सहर अगीयिंग सेना।

¹³ दो ने राजा, तिकिन बेला सेनेन सेन मेला सेरमो अते बेरराः सितोंग अते मुरुक विड़चेड़तो मरसल ईंग अरू ईंगरिकुःआ सउंगताकूराः चइरो गतरिंग ञेलतेरा।

¹⁴ दो अले जमा होड़कू ओतरेले कसड़यान अरू इबरानी भासीरे ईंग मीटोंग बड़रायिंग अयूमतेरा, साहूल, साहूल, आम चिला लगा ईंगमे संतावगींगतना? पयनारेम तकिनगे दो आम लगा मुरुक कटसिया होयाःता, माःआन।

¹⁵ हनते ईंग होंबोरतेड, ने परबू, आम इये हवे? दो परबू कतातेड, आम संतावगेयतना हाँयग ईसू इनिंग हवे।

¹⁶ नुँहू आम रेम चड़ाँनमे। आम ईंग अगीतेम ञेलतेरा अरू आमिंग उदुःवामता, हना जमाकूनराः हिदइतदार अरू ईंगरीग सेवादार बड़ाँः लगा आमिंग सुनावकेरा। हनालगा ईंग आम एचेरेयिंग एचे ञेलयना।

¹⁷ अनमरिकुःआ एहूदाकू अते अरू बेगर एहूदाकू अते आमिंग बनसावगोड ञवनता अरू ईंग बेगर एहूदाकू एचेरेयिंग वारमेतना,

¹⁸ जेमहा हँकू ईंग बदीरेकू सुदी अवेय अरू अँनकूराः कसूर अड़ाःकेडखन अंदरा दूर अते मरसल अगीकू वेग अरू कलउराः आड़ अते भगवान अगी जीवकू कुदा अवेय। नाःआते भगवान हँकूराः कसूरे बराव एंडाता अरू ईंग एचेरे बिसवासकेडखन एचे सुदकेडकुःआ हँकुःआ होड़कू सुदा इताडदारकू होयाःता।

¹⁹ दो अगरिपा राजा, सेरमो देस अतेयिंग पवावनेना हना दरसन ईंग कहियो मेरिंग टड़ावगाड।

²⁰ मड़ंगरे दिमसकूस सहररिकुःआ होड़कू, अरू हनते एरुसलेमरिकुःआ होड़कू, अरू जमा एहूदिया राइजरिकुःआ होड़कू, अरू बेगर एहूदाकू जमाकू अँकूराः जीव कसूर अते भगवान अगी कुदाकेडखन, भगवानराः ओंगोल इयाःआ बुताकूनकू एचेय लगा ईंग परसारगोड ञवना।

²¹ हनालगा एहूदाकू भगवानराः ओड़ाःरे ईंग साबकेडखन, ञेड गोएग एंडायिंग लगाकू कुरनिसतेरा।

²² मनदो भगवान नुँहू वरी ईंगे बनसावकिडिंगा, अरू मरंग मरंग होड़कू अरू लचार होड़कू एचेरे हों हिदइतिंग उदुःगेतना। भगवानराः बड़रा कता होड़कू अरू मोसेस होंकू कता उदुःतेरा हना अड़ाःकेडखन कहिसाः मेरिंग कतायतना।

²³ हँकू कतातेड, मसी कटसिया सहावकेडखन जमा गोएगतो होड़कू अते मड़ंगे जियाव रिमुःता अरू ननन इया हाँय अनँयगरिकुःआ होड़कू अरू बेगर एहूदाकू एचेरे मरसल इया भगवानराः सरवने परसार उदुःता।”

²⁴ हनमेला पिसतूस पउलूसराः बड़रा सेरमो अलंगतेय तेलातेडखन मुरुक सटीतेय कतावाया, “ने पउलूस, आम बउड़ाहा इदानमेःआ। आम मुरुकमे चेडकियानते बउड़ाहायनाम।”

²⁵ मनदो पउलूस कतातेरा, “अगम मरंगीग पिसतूस, ईंग मेरिंग बउड़ावगना। ईंग कतायतना हना कता सताय अरू कनहूनाः बड़रा हवे।

²⁶ ईंग राजा मड़ंगरे बेगर बोरतिंग कतायता, हना कता हाँय होंय सुदीयता। अरू नाःआ कताकून जमाकू मड़ंगरे होयानेना अरू ईंग बिसवासगेतना हना तोनोंगाः कता हाँय अते ओकोत कोवानेःआ।

²⁷ ने अगरिपा राजा, आम भगवानराः बड़रा कता होड़कू एचेरेम बिसवासगेतना जा? हाव! ईंग सुनुदीयतना आम बिसवासगेता।”

²⁸ हनते अगरिपा राजा पउलूस एचेरेय कतातेरा, “गुन लकन बेलाते ईंग मसी होड़ बड़ाँवगींग लगाम ओंगलेतना जा?”

²⁹ दो पउलूस कतातेरा, “हुडिंग सहे बगरा बेलाते आम एकला कोवान, मनदो ईंगराः बड़राकू अयूमता, हँकुःआ जमा होड़कू नाःआ सिकिड़ीकून अड़ाःकेडखन ईंग इयाकू होया जुवाः लगा ईंग भगवान एचेरेयिंग अरजीतना।”

³⁰ दो राजा अरू मरंग हातपात होड़ अरू बिरनिके अरू हँकू सुदाकू दुड़ुःकुःआ हँकुःआ होड़कू जमाकू रेम चड़ाँयान।

³¹ हनते हँकू एटाः अगी उडुंगनेनखनकू कता होड़ेंगा, “नाँयग होड़ गुजुः इया सहे जेहेलरे सींगगेय इया मेरेय जनाःतना।”

³² दो अगरिपा पिसतूस एचेरेय कतातेरा, “नाँयग होड़, कइसर मरंग राजा ईंगे फड़ियावगे लगायिंग असेयतना, माःआन अहाय कताकेः दो नुँहू नाँय अड़ाःगोडकेयाबू।”