मूक चेलाकू 25 - Korwa Bible

पिसतूस मड़ंगरे पउलूस

¹ कइसरियारे सोदोरनेनखन पेय दिन तयोमरे पिसतूस हंडा अते एरुसलेम अगी तोराय।

² हंडा मरंग पुजउरीकू अरू एहूदा मूक होड़कू हाँय एचेरे वेगकियानखन पउलूसकू बदीतेरा।

³ हँकुःआ होड़कू पउलूस दूनूररेकू एचे ञेडगेय लगाकू ओंगलेःआ। हनालगा हँकू पिसतूस एचेरेकू कताया, “अले मयावाडलेखन आम पउलूस एरुसलेम सहररे एचे अगूगेय।”

⁴ मनदो पिसतूस कतातेरा, “पउलूस कइसरिया सहररे तोलतो इदानिया अरू ईंग हों हंडा सेन लगा इदा।

⁵ अपेरिकुःआ अदोम मूक होड़कू ईंग सुदा सेन लगापे वारगोडकू अरू हाँयग होड़ तोनोंगाः गारबारे एचेकेड दो हंडा हाँय बदीकेडखनपे कता उदुःगेय।”

⁶ हँकू सुदा एरुसलेमरे आठ दस दिन दोहोनेनखन हाँय कइसरिया अगी तोराय। अरू हंडा सोदोरनेनखन एटाः दिन कोट कछेरी ओड़ाःरे दुड़ुःकियाखन पउलूस अगूय लगा अगुरा होड़कूय हुकुमवातेरा।

⁷ हँकू पउलूसकू अगूतेरा दो एरुसलेम अतेकू वेजेडा हँकुःआ एहूदा मूक होड़कू पउलूसराः चइरो गतर चड़ाँनेनखन मुरुक बगरा जाः बड़रा हाँय बदीरेकू कता उदुःतेरा। मनदो हँकू आभा मेरकू पुराव अवेगाड।

⁸ हनते पउलूस कता कुदातेरा, “ईंग एहूदाकूराः नियम बदीरे सहे भगवानराः ओड़ाः बदीरे सहे कइसर मरंग राजा बदीरे ईंग तोनोंगाः मेरिंग कसूरगरा।”

⁹ पिसतूस एहूदा मूक होड़कू एचे बहालकू लगा पउलूस एचेरेय कतातेरा, “आम बदीरे जाः बड़रा इदा हना ईंग फड़ियावगे लगा एरुसलेमरे सेन लगाम चहाःतना जा?”

¹⁰ दो पउलूस कतातेरा, “ईंग रूमी देसराः कोट कछेरीरे चड़ाँत इदानिंगा। अरू ईंगराः फड़ियाव ननंडा होयाः लगा इदा। अरू ईंग एहूदाकू बदीरे तोनोंगाः गारबार मेरिंग एचेगरा। हना नपायतेम सुदीयतना।

¹¹ गुजुः इयाःआ तोनोंगाः गारबारिंग एचेकेरा दो गुजुः अते बनसाः लगा मेरिंग चहाःतना। मनदो नँकू ईंगकू जाःतना हना कताकून अते तोनोंगाः कता सताय मेर दोहोना दो तोनोंगीग ईंग हँकू तिःईरे ओरोकू जिमा अवेतिरिंगा। दो नुँहू कनइसर मरंग राजा ईंग फड़ियावगींग लगायिंग असेयतना।”

¹² हनते पिसतूस आँयगरिकुःआ सलाहदार होड़कू सुदा सलाहनेनखन पउलूसे कतातेरा, “आम कइसर मरंग राजा एचेरे फड़ियावमे लगाम असेकेरा। हनालगा ईंग आम हाँय एचेरे रूमी सहरिंग वारमेता।”

पिसतूस एचेरे अगरिपा राजा

¹³ तोनोंग दिन तयोमरे अगरिपा राजा अरू आँयगरीग मेसेत बेरनिका पिसतूस सुदा जुमाः लगा कइसरियारेकिन वेजेडा।

¹⁴ हँकिन पिसतूस सुदा मुरुक दिन वरीकिन दोहोना। हनमेला पिसतूस पउलूस बदीरे राजाय कता उदुःवातेरा, “पेलिकस तोलतोय अटूडिया मी होड़ होड़ नंडा इदानिया।

¹⁵ ईंग एरुसलेमिंग सेनेडा, हनमेला मरंग पुजउरीकू अरू एहूदाकूरिकुःआ मूक होड़कू हाँय बदीरेकू लालिसतेरा अरू हँकू हाँय डंडियावगेय लगाकू चहाःआ।

¹⁶ मनदो ईंग हँकू एचेरेयिंग कतातेरा, बेगर फड़ियावते तोनोंगीग होड़ डंडियावगे दो रूमी देसराः रिती-बिधी इया कोवानेःआ। डंडियावगेय अते मड़ंग हाँयग होड़ कता कुदाय घड़ीन अनँयग बनसाः लगा दाव एमेवाय लगा इदा, माःआन।

¹⁷ हँकू ईंग सुदा नंडाकू वेजेडा दो हाँय फड़ियावगेय लगा मेरिंग कुबेरगाड। मनदो एटाः दिन फड़ियावगेय लगा गदीरेयिंग दुड़ुःनेना अरू हाँयग होड़ ईंग मड़ंगरे अगूगेय लगायिंग हुकुमतेरा।

¹⁸ हाँयकू जाःतेरा हँकुःआ होड़कू बड़रा लगाकू चड़ाँनेना दो ईंग ओंगलेःआ हना इयाःआ तोनोंगाः गारबार पउलूस बदीरे हँकू मेरकू कतागाड।

¹⁹ मनदो हँकू अँकूराः बिसवास बदीरे अरू, गोएगनेना अरू पउलूस हाँय जीयत इदानिया माःआन पनकियाय कतागेःआ ईसू ञावीग मी होड़ बदीरे हाँय सुदाकू अड़ा-चउकीःआ।

²⁰ दो नाःआ कता ईंग करा उड़ीयिंग फड़ियावगेता माःआन ओओंगोलरेयिंग दोहोना। हनालगा ईंग हाँय एचेरेयिंग होंबोरतेरा, नाःआ कता फड़ियाव होयाः लगा आम एरुसलेमरेम सेनता जा?

²¹ मनदो पउलूस कइसर मरंग राजा हाँय फड़ियावगे लगाय असेतेरा। दो हाँय कइसर मरंग राजा एचेरे रूमी सहर अगी, अरीनिंग वारगेय वरी तोलतोय दोहो ओवागेय लगायिंग हुकुमतेरा।”

²² हनते अगरिपा पिसतूसे कतावातेरा, “ईंग हों हाँय एचेरे अअयूम लगायिंग चहाःतना।” दो हाँय कतातेड, “आम गपाम अयूमगेता।”

अगरिपा राजा मड़ंगरे पउलूस

²³ एटाः दिन अगरिपा अरू बिरनिका फड़ियावगेःआकू हना ओड़ाःरेकिन सेनेडा दो होड़कू मुरुक रीझ-रंगतेकू पइड़घाव अगूतेडकिना। अरू हँकिन सुदा सइनाकूरिकुःआ मरंग हातपात होड़कू अरू हना सहररिकुःआ मरंग मरंग होड़कू होंकू दोहोना। हनते पिसतूस पउलूस अगूगे लगाय हुकुमतेरा।

²⁴ दो पिसतूस कतातेड, “ने अगरिपा राजा अरू नंडा ईंग सुदा इदानपेःआ अपे जमा होड़कू, नाँयग होड़पे ञेल। जमा एहूदाकू एरुसलेमरे अरू नंडा हों मुरुक सटीते नाँयग होड़ तोनोंग इया ञेड गोजेय लगाकू असेया।

²⁵ मनदो ईंग सुदीगोतेडा, नाँय हना इया तोनोंगाः गारबार मेरेय एचेगरा। अरू हाँय अनँयग आँयगते कइसर मरंग राजा एचेरे एचे फड़ियावगुः लगाय असेतेरा। दो हाँय मरंग राजा एचेरे वारगेय लगायिंग ओंगोलतेरा।

²⁶ मनदो नाँय बदीरे कइसर मरंग राजा एचेरे तोनोंग इयाःआ ओजाःगे लगा ईंग एचेरे कोवानेःआ। हनालगा अपे जमाकू मड़ंगरे बिसेक, ने अगरिपा राजा, अनम मड़ंगरे नाँय ईंग अगूकिरिया, जेमहा आम जासकिरिगखन नाँय बदीरे कहिसाः ईंग ओजाःगे लगायिंग पवाः।

²⁷ ईंग ओंगोलरे तोनोंगीग तोलतो होड़राः बदीरे तोनोंगाः जाः बड़रा इदान दो हना नपायते मेरिंग ओजाःगे वरी हाँयग होड़ कइसर मरंग राजा एचेरे वारगेय लगा कोवानेःआ।”