मूक चेलाकू 23 - Korwa Bible

¹ एहूदाकूराः मरंग पंचाइतरिकुःआ होड़कू एचेरे पउलूस तिंगीड घड़ीन ञेलतेडखने कताया, “ईंगरिकुःआ वपक बोपोहकूतिंग, नुँहू वरी ईंग भगवानराः मड़ंगरे नपाय इंदरीते हाँयराः सेवायिंग सेवाकेरा।”

² नाःआ अयूमकेडखन मूक पुजउरी हनानियाह पउलूस एचेरे चड़ाँकुःआकू हँकुःआ होड़कू एचेरेय हुकुमतेरा, “नाँयराः आहरेपे ञेडेय।”

³ दो पउलूस हाँय एचेरेय कताया, “ने बेलूर पचघुचिया होड़, भगवान आमे ञेडता। आम नियम इया ईंग बदीरे फड़ियावगे लगाम दुड़ुःकिया अरू आम अनम नियम टड़ाव एंडाकेडखन ईंग ञेड लगाम कतावाकूतना जा?”

⁴ पउलूस एचेरे चड़ाँकुःआ हँकुःआ होड़कू कताया, “भगवानरीग मूक पुजउरी बेग-हतागेय लगा आम करा उड़ीम डीड़यना?”

⁵ पउलूस कता कुदातेरा, “वपक बोपोहकूतिंग, ईंग मेरिंग सुदीःआ नाँय भगवानरीग मूक पुजउरी हवे माःआन। भगवानराः कागदरे नाःआ इया ओजाःतो इदा, अपेरीग अगुवा होड़ बदीरे तोनोंगाः बेलूर बड़रा अहापे कताय।”

⁶ दो पउलूस सुदीगोतेड हँकुःआ होड़कू अते अदोम होड़कू सदूकी होड़कू अरू अदोम होड़कू फरीसी होड़कू हवे माःआन अरू हाँय हुमइसके कताया, “ईंग वपक बोपोहकूतिंग, ईंग इनिंग फरीसी होड़ इदानिंगा, अरू मी होड़ फरीसी होड़रीग बेटात हवे। ईंग असरागेतना गोएग गुराः तयोमरे होड़कू जियाव रिमुःता अरू हना असरा बदीरे फड़ियाव लगा नंडा ईंगकू एचे चड़ाँतिरिंगा।”

⁷ पउलूस नाःआ इयाय कताया हना तयोमरे फरीसी होड़कू अरू सदूकी होड़कू तलारे कड़ीग रेमयान अरू हना पंचाइत हिगार हटिंगयान।

⁸ (सदूकी होड़कू कतायता, गोएग गुराः तयोमरे होड़कू मेरकू जियाव रिमुःता अरू सेरमो देसरिकुःआ बराहीलकू सहे भूतकू कोवाकुःआ, मनदो फरीसी होड़कू नाःआ जमा कताकूनकू बिसवासगेयतना।)

⁹ हंडा हँकुःआ होड़कू मुरुक खिररी घड़ीनकू कता होड़ेंगा अरू फरीसी होड़कू दोहोना, हँकुःआ चेडदार होड़कू चड़ाँनेनखन पउलूस बदीरे हुमइसकेकू कताया, “अले नाँयग होड़ एचेरे तोनोंग गारबार मेरले ञामतना। होनायाःकून करे तोनोंगीग सेरमो देसरीग बराहील सहे भूत हाँय एचेरे तोनोंगाःय कतातेरा।”

¹⁰ हँकुःआ होड़कू तलारे मुरुक कड़ीग होयानेन अरू हाँयग मरंग हातपात होड़ बोराः, नँकुःआ होड़कू पउलूसकू सरी-मतरी एंडागोडेयता, माःआन। हनालगा सइना होड़कू लतार अगी सेनेवाडखन पउलूस हँकुःआ होड़कू अते सइनाकूराः गड़हीरे तोतकाव अगूकू लगाय हुकुमतेरा।

¹¹ एटाः रइत परबू ईसू पउलूस एचेरे चड़ाँनेनखने कताया, “ने पउलूस, ड़ीड़तेम दोहोन! आम एरुसलेमरे ईंगरीग हिदइतदारमे बड़ाँवनेना हनन इया आम रूमी सहररे हों ईंगरीग हिदइतदारमे दोहोनता।”

पउलूस ञेड गोएग लगा बुइद

¹² एटाः दिन एहूदाकू बुइदकू तुलातेरा अरू किरिया कसटकू जोमा, पउलूस अरीनबू ञेड एंडागेय वरी तोनोंगाः अलोबू जोम अरूबू ञूय, माःआन।

¹³ नाःआ किरिया कसटकू जोमतेरा हँकुःआ होड़कू चालीसगोटोंग मरदकू अते बगराकू दोहोना।

¹⁴ हँकू मरंग पुजउरीकू अरू एहूदाकूरिकुःआ मूक होड़कू एचेरे सेनेडखनकू कताया, “पउलूस अरीनले ञेड एंडागेय वरी तोनोंगाः ओरोले जोम ञूतेरा, माःआन मीटोंग किरिया कसटले जोमकेरा।

¹⁵ हाँयग पउलूस बदीरे नपायते अता पतागे लगा अपे मड़ंगरे अगूगेय लगा मरंग हातपात होड़ एचेरे आम अरू मरंग पंचाइतरिकुःआ होड़कू मीटोंग बुइद तुलाकेडखनपे कताय। पउलूस नंडाय सुदरुः अते मड़ंग हाँय ञेड एंडागेय लगा सपड़ावतो इदानलेःआ।”

¹⁶ मनदो पउलूसरीग भगीनात नाःआ बुइद बदीरेय अयूमतेरा अरू सइना होड़कूराः गड़हीरे सेनेडखन पउलूस एचेरेय कता उदुःतेरा।

¹⁷ हनते पउलूस मी सव सइनाकूरीग हातपात होड़ राःकेडखन हाँय एचेरेय कताया, “नाँयग डिंघा होड़ मरंग हातपात होड़ एचेरेम गोःयाडीग। नाँयके हाँय एचेरे तोनोंगाः ककता लगा इदा।”

¹⁸ दो हाँय हाँयग डिंघा मरंग हातपात होड़ एचेरेय गोःयाय। अरू हाँय कताया, “नाँयग डिंघा होड़ आम एचेरे तोनोंगाः ककता लगा इदा। हनालगा सींगतो इदानिया हाँयग पउलूस, आम एचेरे नाँयग होड़ ईंग अअगू लगाय कताया।”

¹⁹ दो हाँयग मरंग हातपात होड़ हाँयग डिंघा होड़ एटाः अगी गोःकिडिगखन हाँय एचेरेय होंबरेःआ, “आम ईंग एचेरे चिला कता लगा इदा?”

²⁰ दो हाँयग डिंघा कताया, “ने साहेब, अदोम एहूदाकू गपा पउलूस बदीरे अरू जास पता होयाः लगा बुइद तुलाकेडखन मरंग पंचाइतरे हाँय अगूगेय लगा आम एचेरे असे लगाकू राययना।

²¹ मनदो चालीसगोटोंग अते बगरा होड़कू ओकोकियानखन हाँय ञेड एंडाय लगाकू ततंगीतना। हनालगा आम हँकूराः कता इया अहम एचेय। हँकू किरिया कसट जोमकेडखनकू कताकेरा, हाँय अरीनबू ञेड एंडाय वरी तोनोंगाः ओरोबू जोम ञूतेरा, माःआन। अरू हँकू असरातना, हाँय अबूराः ओंगोल इयाय एचेयता, माःआन।”

²² दो हाँयग मरंग हातपात होड़ हाँयग डिंघा सेतावतिडिगखने कतावाया, “आम तोनोंगीग एचेरे अलोम कताय, ईंग मरंग हातपात होड़ एचेरे हँकूराः बुइद बदीरेयिंग कताकेरा, माःआन।”

पेलिकस एचेरे पउलूसे वारतेरा

²³ हनते हाँयग मरंग हातपात होड़ आँयगरिकुःआ मी सव सइनाकूरिकिनाः बारगोटोंग हातपात होड़किन राःतेडखने हुकुमवातेडकिन, “बार सव सइना होड़कू, सतरगोटोंग घोड़ा सलाव होड़कू अरू बरछा साबतो बार सव होड़कू कइसरिया सहररे तिनिसिंग खर-बियाड़ी रइत सेन लगापे सपड़ाव दोहोका।

²⁴ एहूदिया राइजरीग मरंग हातपात होड़ पेलिकस एचेरे पउलूस नपायतेय सेने सुदुरुः लगा घोड़ापे सपड़ावका।”

²⁵ अरू हाँय नाःआ इया मीटोंग चिठीय ओजाःतेरा,

²⁶ अगम मान मरजइतगेयीग मरंग हातपात होड़ पेलिकस लगा कलाउदियूस लुसियास अगीते सलाम,

²⁷ एहूदाकू नाँयग होड़ साबतिडिगखन ञेड गोजेय लगाकू ओंगलेःआ, मनदो हाँय रूमी देसरीग थनहिया होड़ हवे माःआनिंग सुदीकेरा अरू हनालगा ईंगरिकुःआ सइनाकू सुदा सेनेकियानखन हाँयिंग सडावतेरा।

²⁸ हाँय चिला लगाकू बदीगेया हना सुदीगे लगा ईंग हँकूराः मरंग पंचाइतरे हाँयिंग गोः इदीतिरिया।

²⁹ हनाते ईंग सुदीगोतेडिंग हँकू अँकूराः नियम बदीरेकू अड़ा-चउकीःआ अरू हाँय ञेड एंडाय लगा अरू जेहेलरे एचे सींगगेय इयाःआ तोनोंगाः गारबार मेरेय एचेगाड।

³⁰ ईंगे उदुःवातेरा, नाँयग होड़ ञेड गोएगगे लगाकू सपड़ावकिया दो ओहेन ईंग आम एचेरेयिंग वारगोतेडीग अरू हाँयकू बदीःआ, हँकुःआ होड़कू हों अँकूराः लालिस आम मड़ंगरेकू उदुःगे लगायिंग हुकुमतेरा।

³¹ हाँय हुकुमवातेडकुःआ, हनन इया सइना होड़कू पउलूस रनातो रइतरे हँकू सुदाकू गोःयाय अरू अंतिपतिरिस सहररेकू गोः सोदोरतिरिया।

³² एटाः दिन घोड़ा सलाव होड़कू पउलूस सुदा मड़ंगकू सेना अरू एटाः सइना होड़कू अँकूराः गड़हीरेकू कुदायान।

³³ घोड़ा सलाव होड़कू कइसरिया सहररेकू सोदोरनेन दो हँकू मरंग हातपात होड़ पेलिकस एचेरे चिठीकू एमेतेरा अरू पउलूस हों हाँय एचेरेकू जिमागोतेडीग।

³⁴ दो हाँयग हातपात होड़ चिठी बछावनेनखने होंबोरतेडकुःआ, “नाँय करा राइजरीग होड़ हवे?” दो हँकू कतातेड, “नाँय किलिकिया राइजरीग हवे।”

³⁵ दो हाँय पउलूस एचेरेय कतातेड, “आमकू बदीकेरा हँकुःआ होड़कू वेगता हनमेला आमिंग फड़ियावता।” हनते हाँय हरदोसराः गड़हीरे पउलूस एचे इदीकिडिगखन अगुरा होड़कू हाँय नपायते अगुरागे लगाय हुकुमवातेडकुःआ।