मूक चेलाकू 22 - Korwa Bible

¹ “ईंग वपक बोपोहकूतिंग अरू ईंग अपांग इया इदानपेःआ होड़कू, अपे ईंग कतायता हना कतापे अयूम।”

² हाँय इबरानी भासीरे बड़रा लगाय बुँहड़ीतेरा दो जमा होड़कू जपनावयानकू।

³ हनते पउलूस कताया, “ईंग किलिकिया देसराः तरसूस सहररीग एहूदा होड़ हवे। मनदो ईंगराः पला दरी ननानाः सहररे होयानेना। अबू खुटिपरिया होड़कूराः नियम बदीरे ईंग गमालिएल एचेरेयिंग चिडुःआ। अपे भगवान जमालेःआ मान मरजइतगेय लगा सपड़ावतो इदानपेःआ, हना इया ईंग होयिंग दोहोना।

⁴ नाःआ दूररिकुःआ होड़कू, मरदकू अरू अइमीकू साबतेडखन जेहेलरेयिंग एचे सींगगोतेडकुःआ अरू हँकूयिंग ञेड गोएग एंडा वरी होयिंग संतावतेडकुःआ।

⁵ हनालगा नाःआ कता मूक पुजउरी अरू मरंग पंचाइतरिकुःआ होड़कू होंकू सुसुदीतना। ईंग हँकुःआ होड़कू अते दिमसकूसरिकुःआ एहूदाकू एचेरे चिठी गोःतेडखन हंडाकुःआ बिसवासी होड़कू एचे तोल अगूतेडकूखन एरुसलेमरे डंडियावकू लगायिंग सेनेडा।

⁶ तिकिन बेलारे दिमसकूस सहर गतररिंग सोदोरनेना, दो असाका सेरमो देस अते चइरो गतर मरसल विड़चेड़नेना।

⁷ ईंग ओतरेयिंग कसड़यान अरू मीटोंग बड़रायिंग अयूमतेरा, साहूल, साहूल, आम चिला लगा ईंगमे संतावगींगतना, माःआन।

⁸ दो ईंग होंबोरतिरिया, परबू आम इये हवे? हनते हाँय कता कुदातेरा, आम संतावगेयतना हाँयग नसरेतरीग ईसू इनिंग हवे, माःआन।

⁹ ईंगरिकुःआ सउंगताकू मरसलकू ञेलतेरा, मनदो ईंग अयूमतेरा हना बड़रा हँकू मेरकू बुझाव अवेगान।

¹⁰ दो ईंग होंबोरतेड, परबू ईंग चिला एचे लगा इदा? परबू कतातेड, आम रिमुःमे अरू दिमसकूस सहररेम सेन। हंडा आम एचे लगा इदा हना ईंग आम एचेरेयिंग एचे कता उदुःगेता, माःआन।

¹¹ हना मरसलते ईंग अंधायान। हनालगा ईंग सुदाकू दोहोना हँकुःआ होड़कू ईंगराः तिःईरे साबतिडिंगखन दिमसकूस सहररेकू गोःतिरिंगा।

¹² हनानियाह ञावीग मी होड़ हंडाय दोहोना। हाँय भगवानराः नियमकून नपायतेय मनाःआ अरू हना सहररिकुःआ जमा एहूदाकू हाँयकू मान मरजइतगेया।

¹³ हाँय ईंग सुदा जुमाः लगाय वेजेडा अरू ईंग एचेरे चड़ाँनेनखने कताया, बोहोयिंग साहूल, आम अरूम ञेल अवेय। अरू हननमेला ईंग नपायतेयिंग ञेल अवेया अरू हाँयिंग ञेल अवेतेरिया।

¹⁴ हनते हनानियाह ईंग एचेरे अरूय कतातेड, अबूरिकुःआ खुटिपरिया होड़कूरीग भगवान आँयगराः ओंगोलमे सुदी लगा अरू आँयगरीग सुद होड़मे ञेल लगा अरू हाँयराः आहते आँयगराः बड़राम अयूम लगा आमे सुनावकेडमेःआ।

¹⁵ आम अयूमकेरा अरूम ञेलकेरा हना कता बदीरे जमा होड़कू एचेरे हाँयरीग हिदइतदारमे दोहोनता।

¹⁶ अरू नुँहू आम चिलाम तंगीतना? रिमुःमे अरू बतिसमाम गोः अरू आमराः कसूर भगवान बराव एंडागे लगा ईसू एचेरेम बिसवासगे।

¹⁷ दो ईंग एरुसलेम सहररेयिंग कुदा वेजेडा अरू भगवानराः ओड़ाःरेयिंग अरजीतेरा। हनमेला ईंग मीटोंग दरसनिंग ञेलतेरा।

¹⁸ हना दरसनरे परबू ईसू ईंग एचेरेय कताया, ईंग बदीरे आमराः हिदइत नंडाकुःआ होड़कू मेरकू बकाःता। हनालगा आम ओहेन एरुसलेम अतेम सलाव जुवाः, माःआन।

¹⁹ मनदो ईंग कता कुदातेरा, परबू नँकुःआ होड़कू सुसुदीतना ईंग मीटोंग अरजी ओड़ाः अते एटाः अरजी ओड़ाःरे सेनेवाडखन आम एचेरेकू बिसवासतेरा हँकुःआ होड़कू ईंग ञेडतेडकूखन जेहेलरेयिंग एचे सींगतेडकुःआ।

²⁰ अरू आमरीग चेला इसतपनूसराः गुजुःरे होयिंग राययना अरू हाँयकू ञेड एंडातेरा हँकुःआ होड़कूराः सोनहेयिंग अगुरातेरा, माःआन।

²¹ मनदो परबू ईसू ईंग एचेरेय कताया, दूमे, ईंग आम बेगर एहूदाकू एचेरेयिंग वारमेतना, माःआन।”

पउलूस मरंग हातपात होड़ एचेरे

²² बेगर एहूदाकू बदीरे पउलूस कताया, हना वरीते होड़कू हाँयराः बड़राकू अयूमतेरा। हना तयोमरे हँकू खिररी घड़ीनकू कताया, “नाँयग होड़ ञेड एंडागेय लगा इदा। नाँय नाःआ चउंदीसरे दोहोन जुकूर कोवाया।”

²³ हँकू रीसते खिररी घड़ीन अँकूराः बहरी तुसिंगतो सोनहेकूनकू तेके एंडाःआ अरू हासकूनकू तेके कुहड़ावा मेला,

²⁴ हाँयग मरंग हातपात होड़ पउलूस गड़हीरे एचे अगूतिडिगखन सइनाकू एचेरेय कतातेड, “नाँय गुरुंदतेपे ञेंडेय अरूपे जासवाय, दो ईंग सुदीगोडता होड़कू नाँय बदीरे चिला लगाकू खिररीतना।”

²⁵ दो पउलूस ञेडगेय लगाकू एचे बंगातिडिगखनकू तोलतिडिया दो पउलूस मी सव सइनाकूरीग हातपात होड़ एचेरेय होंबोरतेरा, “मी होड़ रूमी देसरीग थनहिया होड़, बेगर फड़ियावते गुरुंदते ञेडेय दो हना, नियम इया हवे जा?”

²⁶ दो हाँयग मी सव सइनाकूरीग हातपात होड़ नाःआ कताय अयूमतेरा दो हाँय मरंग हातपात होड़ एचेरे सेनेडखने कताया, “आम चिलाम एचेयतना? नाँयग होड़ रूमी देसरीग थनहिया होड़ हवे।”

²⁷ दो हाँयग मरंग हातपात होड़ पउलूस एचेरे सेनेडखने होंबोरतिरिया, “सतायरे आम रूमी देसरीग थनहिया होड़ हवे जा?” दो हाँय कताया, “हाव, ईंग हवे।”

²⁸ हनते मरंग हातपात होड़ कताया, “ईंग रूमी देसरीग थनहिया होड़ बड़ाँः लगा मुरुक ढिबुवायिंग एमेतेरा।” पउलूस कता कुदातेरा, “मनदो ईंग जनमावकियान वरीते रूमी देसरीग थनहिया होड़ इदानिंगा।”

²⁹ हाँय एचेरे सवालकून होंबोर लगाकू वेजेडा हँकुःआ होड़कू हाँयकू अड़ाःगोतेडिगकू। मरंग हातपात होड़, रूमी देसरीग थनहिया होड़ दोहोना हाँयग पउलूसे एचे तोलतेरा, हनालगा हाँय बोरोयान।

एहूदा मूक होड़कू मड़ंगरे पउलूसराः परसार

³⁰ एहूदाकू पउलूस चिला लगाकू बदीतिरिया हना सुदीगे लगा हाँयग मरंग हातपात होड़ एटाः दिन पउलूसे अड़ाःगोतेड अरू एहूदाकूरिकुःआ मरंग पुजउरीकू अरू मूक होड़कूराः मरंग पंचाइतकू एचे जुमावकू लगाय हुकुमतेरा। हनते हाँय पउलूसे अगूतेडखन हँकू मड़ंगरेय एचे चड़ाँःतिरिया।