मूक चेलाकू 1 - Korwa Bible

सुद बिरुवाराः बदीरे जबान

¹ ने तियूपिलूस, आम लगा मड़ंगरेयिंग ओजाःतेरा हना कागदरे, ईसू एचे लगा अरूय चेडकू लगाय बुँहड़ीकेरा,

² अरू सेरमो देस अगी भगवान रेम गोःगे अते मड़ंग हाँय आँयगरिकुःआ सुनावतो मूक चेलाकू एचेरे भगवानराः सुद बिरुवाते हुकुमकूने एमेवातेडकुःआ हनायिंग ओजाःकेरा।

³ ईसू कटसिया सहावतेडखन कुरूसरेय गोएगनेन तयोमरे हाँय जीयत इदानिया, माःआन मुरुक सताय चिनहाकून हँकुःआ होड़कू एचेरे चालीस दिन वरीय एचे उदुःतेरा अरू भगवानराः राइज बदीरेय कता उदुःतेरा।

⁴ मी दिन ईसू आँयग चेलाकू सुदा जोजोम मेला हँकू एचेरे नाःआ हुकुमे एमेतेरा, “एरुसलेम सहर अते अपे अहापे सेन। मनदो भगवान जबानकेरा हना पवाः लगा ननंडापे तंगीगोड ञवन। अरू नाःआ कता बदीरे ईंग अपे एचेरे मड़ंगरेयिंग कतातेरा।

⁵ एहुना अपे दाःते बतिसमाय एमेवातेडपेःआ, मनदो तोनोंग दिन तयोमरे भगवान अपे सुद बिरुवाते बतिसमाय एमेवापेता।”

ईसू सेरमो देस अगी तोराय

⁶ तयोमरे ईसू सुदा आँयग चेलाकू जुमावनेन दो हँकू हाँय एचेरेकू होंबोरतेड, “ने परबू, मड़ंगरे इसराएल होड़कू अँननकूरीग राजा दोहोना हना इया नुँहूम एचेयता जा?”

⁷ दो ईसू हँकू एचेरेय कतातेरा, “अपांग भगवान अनँयगराः हातपात इयाय तोल दोहोकेरा हना बेला बदीरे अपे सुदीगे लगा कोवानेःआ।

⁸ मनदो सुद बिरुवा अपे एचेरेय वेगता अरू जंगरपे पवाःता। हनते अपे एरुसलेम सहररे, एहूदिया छतररे, समरिया राइजरे अरू चउंदीसराः जमा देसरे ईंगरिकुःआ हिदइतदारकूपे बड़ाँःता।”

⁹ हाँय नाःआ बड़रा कनाता कताय तयोमरे, हँकुःआ होड़कू मड़ंग अते सेरमो अगी भगवान हाँये रेम गोःतेरा अरू हँकू हाँय ञेनेल ञेलरे बदरीरेकू ञेल केड़ेगोतेडिग।

¹⁰ ईसू सेरमो देस अगीय सेनेन मेला मूक चेलाकू तिंगीड घड़ीनकू संगीलेःआ दो असाका उजड़ सोनहे तुसिंगतो बार होड़ होड़किन हँकू एचेरेकिन चड़ाँयान।

¹¹ अरू हँकिन कतातेड, “ने गलीलरिकुःआ होड़कू, अपे नंडा चड़ाँकियानखन चिला लगापे संगीलगेतना? अपे अते सेरमो देस अगी भगवान गोःयडिया हनाँयग ईसू करा इया तोराया हनन इयाय कुदा वेगता।”

जूदाराः बदलारे मतियाह

¹² हनते हँकुःआ चेलाकूतेन जइतून पहाड़ अते एरुसलेम सहर अगीकू कुदा वेगयान। नाःआ जइतून पहाड़ एरुसलेम अते आधा कोस तोरेरे दोहोना।

¹³ हँकू हंडाकू सोदोरनेन दो हँकू डेरानेना हना ओड़ाःराः सेरमो छिनारेकू सेनेडा। हंडा ईसूरिकुःआ मूक चेलाकू सिमोन पतरस, एहुना, एकूब, अंदरियास, पिलिपूस अरू तोमा, बरतुलमाय अरू मती, हलपाइरीग बेटात एकूब अरू जेलोतेस माःआनकू राःगेया हाँयग सिमोन अरू एकूबरीग बेटात जूदा, हों दोहोना।

¹⁴ हँकुःआ होड़कू ईसूरीग एंगात मरियम अरू आँयग बोपोहकू अरू एटाः बिसवासी अइमीकू सुदा घड़ी घड़ी मिनी जीवकियानखन अरजीगोड ञवना।

¹⁵ दो मी दिनरे अंदांज मी सव बीस बिसवासी होड़कू मिनीरेकू जुमावनेना। अरू हँकू तलारे पतरस चड़ाँनेन

¹⁶ अरूय कतातेड, “ईंग अजी बोपोहकूतिंग, मड़ंगरे भगवानराः सुद बिरुवाते दाऊद राजा जूदा बदीरेय कतातेरा हना कता पुराः दोहोना। हाँयग जूदा, ईसू साब लगाकू वेजेडा हँकुःआ होड़कूय अगुवाइतेडकुःआ।

¹⁷ हाँय अले मूक चेलाकू अते मी होड़े दोहोना अरू अलेरीग सेवा देंगवा होड़े दोहोना।”

¹⁸ (हाँयराः बेलूर बुताराः बनीते हाँय मीटोंग दोहोड़े किजातेरा। हाँय सुदूब दूरे लोजोरनेना अरू हाँयराः धारतो सिरावयान अरू लवीगतो उडुंगयान।

¹⁹ एरुसलेमरिकुःआ जमा होड़कू नाःआ कताकू अयूमतेरा। हनालगा हँकू अँकू भासीरे हना दोहोड़ अकलदामा माःआनकू कतावातेरा। हना लबदराः मतलोब बलंगीराः दोहोड़ माःआन हवे।)

²⁰ दो पतरस अरूय कतातेड, “सेरेंगकून कागदरे नाःआ इया ओजाःतो इदा, हाँयरिकुःआ जमाकू नरी नठी एंडा जुवाःकू, अरू हँकू तोनोंगीग हना ओड़ाःरे अहाकू दोहोन। अरू तोनोंगीग हाँय बदला हाँयराः मूक बुताय गोःगे

²¹ हनालगा अबू तोनोंगीग होड़ जूदाराः बदला सुनावगेय लगा इदा। हाँयग होड़ अले ईसू सुदाले दोहोना हना जमा बेला,

²² एहुना ईसू बतिसमाय एमेवातिरिया हना बेला वरीते ईसू अबू अते सेरमो देस अगी भगवान रेम गोःयाया हना वरी अले सुदाय दोनोहोना। हाँय एटाःकू एचेरे ईसू गोएगनेन तयोमरे जियाव रेमकिया, हना कता अले सुदा हिदइत उदुःगे लगा इदा।”

²³ दो जमा बिसवासी होड़कू बार होड़ बदीरेकू सलाहनेना। हँकिन अते मी होड़ बरसाबास माःआनकू कतावायता हाँयग उसूप दोहोना। (हाँयराः एटाः ञाव दोहोना जसतूस) अरू एटाः होड़राः ञाव दोहोना मतियाह।

²⁴ हनते हँकू अरजीतेड, “परबू, आम जमा होड़कूराः इंदीरीम सुदीतना। जूदा गोएगनेनखन डंडियावराः ततेर हाँय लगा भगवान दोहोवातेरा हना ततेर अगी हाँयराः बिरुवा तोराःआ।

²⁵ दो नँकिन बना होड़ अते ईसूरीग मूक चेलाराः सेवा बुता लगा, इयेम सुनावकेरा, हना अले उदुःवालेमे।”

²⁶ हनते हँकू लुंबाड़ लगा चीट-पोटतेडकू अरू हनाते मतियाहकू लुंबाड़तेरा। अरू हाँय गारहगोटोंग मूक चेलाकू सुदाय मेसायान।